ـ شغال ايه بقا يا تعيس الحظ؟!
ـ أفندم؟!
ـ مش أنت متقدم لآسي؟ تبقا تعيس الحظ! عارف ليلة القدر؟
قال وهو مش فاهم حاجة
ـ أكيد
ـ أكيد الست الوالدة دعت عليك فيها!
أدخلت آسية بصدمة وغيظ
ـ جرا ايه يا أبيه؟ ما تطرده أحسن؟!
ـ الله نكذب على الراجل؟! والله يا أبني أنت شكلك نضيف وابن ناس ومش هتعمر مع البت دي صدقني
كمل آسر "أخو آسية" كلامه
ـ لو عايز تتجوز عشان لما تصحى الصبح للشغل تلاقي فطارك جاهز؛ فبنتنا مبتعرفش تطبخ ولا بتصحى بدري ولا بتصحى أساسًا
ولو عايز تتجوز عشان عيال وكدا، بنتنا لو جابت عيل هتلعب بيه مش هتلعب معاه وهتتخانق معاك عشان جبتله حاجة حلوة وهي لا وأشك أنها هتعرف تربي نملة أصلًا و....
قاطعه وهو بيقول بسرعة
ـ مش بشتغل، أنا لسا طالب مش بشتغل فأكيد مش عايز كل ده!
ـ يعني متجوز عشان أنا إللي أصرف عليكوا؟!
قالت آسية بإستغراب
ـ أنت!؟ هي مش كانت أنت متجوزها عشان هي تصرف عليك؟
ـ ده على أساس إنك بتشتغلي؟ ما أنتِ مخلصة فلوسي أنا! وكله على حاجات تافهة، وشيكولاتات وشيبسيهات وحاجات بدون لازمة، مش عارف هتعرفي تفتحي بيت ازاي أسـ...
قاطعته آسية بسخرية
ـ خلاص يا يويو طفشته، خلاص يا حبيبي
بص آسر على مكان العريس الفاضي وقال باستغراب
ـ يا ترى مشي ليه ده؟!
بصتله آسية بسخرية
ـ ملوش حق الصراحة
حط إيده على كتفاها وكمل ببسمة واسعة وجدية
ـ صح، ملوش حق... أنتِ إللي ياخدك يا آسي لازم ياخدك كلك على بعضك بعيوبك ومميزاتك وبهبلك وعبطك وجنانك وتخلفك، باكدچ واحدة
ـ مش عارفة ده شكر ولا شتيمة والله، بس المهم يعني تاكل بطاطس؟
ـ اه يا ريت، قومي احرقيلنا إتنين على السريع
قامت من جنبه بإبتسامة
ـ عيوني
_ _ _ _ _ _ _ _ _ _ _ _
#توم_وجيري "2"
#روان_سالم "حلوة فبراير"
ريأكت وكومنت برأيك عزيزي القارئ اللطيف 📌♥
أنت تقرأ
توم وجيري |مجموعة إسكريبتات|
Short Storyهُنا وطن صغير مليء بالمشاعر المُختلفة اللطيفة والمُشاكِسة "الحب والغيرة والضحك والمُزاح والرومانسية وغيرها الكثير" وطن لا يسكنه سوا إثنين فقط هُنا حكايات الأخوين التؤام التي لا تنتهي ولا تنتهي معها إبتسامتك اللطيفة تِلك هُنا مَسكن "آسر وآسية" • هذه...
