توم وجيري |مجموعة إسكريبتات|

القصة الثالثة |مُقابلة عَمل|

ـ آنسة آسية، شايفة نفسك فين كمان خمس سنين؟؟
ـ والله ما أعرف!
ـ أفندم؟
ـ ده علم غيب أنت عايزني أطلع على علم الغيب يا ابني؟! لا إله إلا الله! زمن عجيب

قال بحمحمة وهو بيقول
ـ طب بلاش ده، في غيرك كتير أوي برا ومحتاجين نفس الشيء إللي أنتِ جاية عشانه، ايه إللي يخلينا ناخدك أنتِ يالذات

ـ هبلة وعلى نياتي
ـ نعم؟؟!
ـ اه والله آسر طول عمره يقولي كدا!

ـ آسر مين؟؟!
ـ آسر تؤامي! بس هو جه الأول بخمس دقايق، ومن ساعة ما ماما وبابا ماتوا وهو عاملي فيها الكبير بقا والكـ...
قال وهو بيقاطعها بصوت عالي
ـ بــــــــــــــــــــــس! أنا مالي؟!

قالت بنفس درجة صوته
ـ بتزعق ليــــه، ده عبد الرحمن معملهاش!
ـ عبد الرحمن ميـــــــــن؟؟!
ـ أبويا! ده كان أطيب أب ممكن تشوفه في حياتك بقا يا أستاذ والله، كان أب ولا كل البيبان

قال بصدمة وشلل
ـ بيبان؟؟؟؟؟!
هزت راسها وهي بتكمل كلامها
ـ كان بيدلعني ويخرجني.. كُـــل يوم لازم خروجة، وكان بيجبلي شيكولاتة، شيكولاتات كتيـــر بقا

بعد شوية...
كان حاطط ايده على دقنه وبيبصلها بتركيز
ـ لا والله؟ طب وبعدين؟
قالت وهي قاعدة ومربعة رجليها على الكرسي
ـ ولا قبلين يا سيدي! الولية الحيزبونة إللي إسمها سُعاد دي كانت كل شوية تنطلي، كل شوية!
ـ شوف الولية!
ـ ما أنا بقولك حيزبونة يا عمرو

ـ إنتوا بتعملوا ايـــــــــــه؟؟؟!
قام عمرو بسرعة وهو بيقول بحرج
ـ آسف يا فندم، أصلي كنت.... كنت

ـ لا كنت ولا مكنتش! أنت سايب الناس برا ومعطلهم وقاعد مع السنيورة؟!

قالت آسية ببسمة وهي بتلف حوالين نفسها
ـ بجد سنيورة؟!
بصلها بعدم فهم وبعدها بص على عمرو تاني وهو بيقول
ـ يعني موقف كل إللي برا عشان واحدة هبلة؟!
~ ~ ~ ~ ~ ~ ~ ~ ~ ~ ~ ~
دخلت من باب البيت وهي حيزنة، ثواني وسمعت صوت ضحكات عالية بتبص على الكنبة لقت آسر بيبص على ملامحها بضحك
ـ طردوكِ يا لوزة؟

قالها بضحك وبعدها فتح دراعه ليها فجريت عليه واترمت في حضنه
ـ مش مقدرين النعمة إللي في إيديهم يا آسر
طبطب على ضهرها وهو بيحاول يمنع ضحكاته
ـ ولا يهمك يا قلب آسر! أنا وفلوسي تحت أمرك يا حببتي ولا الحوجة لناس زي دول!
_ _ _ _ _ _ _ _ _ _ _ _
#توم_وجيري "3"
#روان_سالم "حلوة فبراير" 
ريأكت وكومنت برأيك عزيزي القارئ اللطيف 📌♥