- أنت عندك سكرتيرة مش كدا؟!
- يا ساتر! في حد يدخل علىٰ حد المكتب كدا يا نيرة؟!
- متغيرش الموضوع، أنت عندك سكرتيرة في الشركة صح؟!
- شركة إصدار وتصدير كبيرة زي دي يا نيرة طبيعي يبقىٰ فيها سكرتارية!!!
- أيوا وتاجي بالچيبة القصيرة المفتوحة وتحط نص طن بوهيا -مكياچ- علىٰ خلقتها عشان توقع صاحب الشركة اللُقطة المُز إللي ميتسابش
- أنا مُز!
- لتاني مرة أقولك متغيرش الموضوع، ورد عليا
- أستغفرك ربي وأتوب إليك، ما تلبس إللي هي عيزاه يا نيرة أنا مالي بيها؟!
- مالك ونص وتلات تربع كمان! مش أنت صاحب الشركة؟! يعني ممكن تحط uniform -زي موحد- ومتخليهاش تلبس المسخرة دي، ولا أنت بتلكك؟!
- أصبتِ! أنا فعلًا بتلكك
- اه أنا قولت من الأول إنك نسوانجي وبتاع ستات وعينك زايغة ومش هتراعي ربنا فيا ولا هتعمل حساب إني مراتك وهتخوني
- أنتِ قولتي كل ده إمتىٰ؟!
- ما أنا مكانش ينفع أرفض الدكتور إللي كان متقدملي بردو
- أنتِ عبيطة يا نيرة ما أنا خريج طب!
- احم اه صح! طب لما أجي أعلي عليك أقولك ايه؟!!
قام وحضن كتفها وهو ماشي معاها لبرا المكتب
- قولي كان متقدملك طيار يا عيوني
- بس أنا متقدمليش طيارين!
- يعني هو كان متقدملك دكتور قبلي؟! ما إحنا دافنينه سوا وأنا أول عريس كان متقدملك أصلًا
- أيوا صح!
-....
- طب والسكرتيرة؟!
- أنا عندي سكرتير مش سكرتيرة أساسًا، وأنتِ شوفتيه لما جتيلي الشركة قبل كدا يا نيرة!
- أيوا محمود عرفاه
-...
- طب هو دلوقتي مينفعش أزعل منك وأقولك طلقني؟!!
- أطلقك؟!! أنا بدأت أفكر جديًا إني أسحب التيلفون منك وأمنع عنك روايات بير السِلم إللي بتقرأيها دي، واحدة زيك حامل المفروض تقرأ كتب عن العناية بالطفل مش لفهد الفهود!
- لا المرة دي كان أسد الأسود، أستنىٰ هحط الغدا وأجي أحكيلك عمل ايه في البطلة
- مستنيكِ يا روحي
♡_________♡________ ♡
متنساش الـ "Vote/النجمة" بجانب كومنت برأيك |سواء إيجابي أو سلبي| عزيزي القارئ اللطيف ♡
_ دُمتم سالمين
#إسكريبت_عشوائي "سكرتارية"
#رَوَانْ_سَالِمْ "حَلوىٰ فِبراير"
أنت تقرأ
توم وجيري |مجموعة إسكريبتات|
Short Storyهُنا وطن صغير مليء بالمشاعر المُختلفة اللطيفة والمُشاكِسة "الحب والغيرة والضحك والمُزاح والرومانسية وغيرها الكثير" وطن لا يسكنه سوا إثنين فقط هُنا حكايات الأخوين التؤام التي لا تنتهي ولا تنتهي معها إبتسامتك اللطيفة تِلك هُنا مَسكن "آسر وآسية" • هذه...
