_ أنتَ أتجننت في مُخك يا فريد!!
ـ من هنا ورايح تقولي يا بابا؛ ده أنا في مقام جوز أمك يا كيمو!
_ تاني هيقول جوز أمي، قسمًا بربي لو ما مشيت من البيت ده يا فريد لأكون مطربق عضمك في بعضه وأخليك غير قادر علىٰ الإستخدام الآدمي حتىٰ يا ابن سيد جَد الله!
ـ شوفتي ابنك بيكلمني إزاي يا فراولتي؟!
ـ جرا ايه يا كريم في ايه؟! الراجل داخل البيت من بابه وفي مثابة ضيف عندنا، أنا ربيتك علىٰ إنك تقفل الباب في وش الضيوف؟!
_ بقولك ايه يا فراولته أسكتي دلوقتي عشان منساش إنك أمي في لحظة تهور وأطخكم عيارين إنتوا الاتنين
ـ سو لوكال! أنتِ كنتِ فين والواد ده بيتربىٰ يا فراولتي!
ـ والله ما أنا السبب يا فوفي أنا ربيته كويس!
_ اه صدقها يا فوفها هي ربتني فعلًا وما ترونه الآن إلا إجتهاد شخصي.. ومش مني لا، ده منكم؛ خرجتوني عن شعوري يا... ولا بلاش عشان دي أمي وأنت كُنت عمي في يوم من الأيام بردو
ـ إهدىٰ بس يا كيمو يا حبيبي أعصابك هتتعب
_ بقولك ايه يا فريد أنا مش طايقك وماسك نفسي بالعافية عنك أنت وفراولتك إللي قلبتلي سعاد حسني دي
ـ صحيح يا فوفي، شكلي زي سُعاد حسني؟!
ـ سُعاد حسني مين بس يا عيوني؟! ده أنتِ أحلىٰ منها بمراحل يا قلب فوفتك من جوا
_ لا لا مسمحلكش يا فوفتها، هتكسف فراولتك قُدامي!
ـ لا ميصحش بردو ياض يا كيوم معاك حق، إحنا نخلي كتب الكتاب والفرح بعد يومين ونطردلك من هنا عشان أخد الهاني مون بتاعي وأعكسها براحتي
_ الهاني ايه يا روح ستي!
ـ كريم! ألفاظك!! أنا سكتالك بقالي كتير، إحنا قولنا بس نعرفك بما إنك ابني وكدا لكن تغلط في فوفي هتزعل أوي مني!
_ وأنتِ كنتِ ناوية تخبي عليا أصلًا يا ست ماما!! ست ماما ايه بقىٰ... كنتِ ناوية تخبي عليا يا فراولته!
ـ والله يا كيمو يا حبيبي مش موضوع نخبي عليك ولا حاجة، أصل أنت عارف المواضيع دي أهم حاجة في الإشهار! وبعدين مش هقولهالك تاني أهدىٰ وقول هديت عشان ده مش أسلوب مُتحضر نتكلم مع بعض بيه!
_ أديني أتزفت هديت!
ـ احم، بص يا كيمو أنا هقولهالك لتاني مرة وبفكرك إنك ترد بهدوء وتحضر... أنا طالب إيد أمك
ـ جرا ايه يا فريد ايه أمك دي؟! بتحسسني إني كبيرة
_ لا كبيرة إزاي يا حببتي؟! ده أنتِ يا دوبك ابنك ماشي في الـ30 وأنتِ 70 سنة وماشية في الـ 25
ـ بس يلا ملكش دعوة بيها، حقك عليا يا فراولة فريد بس هو للأسف ابنك وده واقع ومش هنهرب منه، بس بيني وبينك أنتِ شكلك أصغر وأحلىٰ منه بكتير، معرفش جبتيه إزاي بالشكل ده!!
_ ذنوب! ذنوب وبتتاخد يا أخ فوفي
ـ والله ما أعرف يا فوفي ده حتى أخوك الله يرحمه كان في شبه منك
_ اه ما هو ده السبب، الشبه إللي بينه وبين أبويا جه فيا أنا
ـ تقصد ايه؟!
_ بقولك ايه عمي أنت جاي عشان طالب إيد أمي، مش كدا؟!
- كدا يا قلب عمك من جوا، وقبل ما ترد أفتكر إني صاحبك ورفيقك في الحياة دي
_ والله لو فكرت فيك إنك فضائي مش مقتنع بردو، لكن أنا موافق... بس بشرط!
- وايه شرطك؟!
_ أفهم إشمعنا أمي إللي هي مرات أخوك سابقًا!
- ربنا يرحمه، أخويا ميت من عشر سنين يا كريم وأنا وأمك...
_ لم نفسك
- آسف، أنا ووالدتك كنا جنب بعض وبنقوي بعض علىٰ المحنة دي، ولقينا إننا أتشدينا لبعض من غير ما ناخد بالنا، بس فجيت هنا عشان أطلبها، فهمت؟!
_ فهمت
- حلو، الفرح إمتىٰ بقىٰ؟!
_ لا يا كبير أنا مخلصتش
- لاحظ إنك بدأت تكون إستغلالي!
_ والله لو مش عاجبك بلاها
- كمل يا كريم، كمل
_تجوزني مريم
- مريم بنتي؟!
_ أومال مريم بنتي؟!!
- وأنت تعرف بنتي منين ولا شوفتها فين؟؟؟؟!
_ جرا ايه يا فريد هو أنت عجزت وبدأت أعراض الزهايمر تظهر ولا ايه؟! ما هي بنت عمي!! أكيد أعرفها!!
- احم اه صح، تمام أنا موافق!
_ وفرحنا معاكم
- لا أنا بنتي متتجوزش بالسرعة دي!
_ ولا أنا أمي تتجوز بالسرعة دي!
- طب أخطبها الأول عشان تشوفوا هترتاحوا مع بعض ولا لا!
_ وهو كذلك، خطوبتي مع خطوبتكم وفرحي مع فرحكم
- ايه الواد الغلث ده؟!
_ بتقول حاجة يا فوفي؟؟!
- بقول إني أنا وأمـ.. ووالدتك كُبار في السن ومنضمنش هنعيش للفرح ولا لا
_ وأنا قولت إللي عندي فرحي مع فرحكم، شوف بقى هتقدر تقنع بنتك في قد ايه، ولما تقرر أنت وهي فرحي إمتىٰ، هنزل في نفس اليوم أجيب فُستانها وفُستان أمي
- الواد ده أنتِ كنتِ بترضعيه غلاثة وهو صغير؟!
- معلش أستحمله يا فوفي
- أمري لله، موافق يا كيمو
_ حلو، زغرطي يا أما، ولا أقولك قومي هاتي الشربات علىٰ طول يا عروسة...
♡_________♡________ ♡
لو عجبك الإسكريبت متنساش تحط لايك وتسيبلي أثر لَطيف _مِثلك_ قبل ما تمشي 🍒♥♥
#إسكريبت_عشوائي "جوازة أمي"
#االحـــــــــلقة_الأُولـــــــــــــىٰ
#رَوَانْ_سَالِمْ "حَلوىٰ فِبراير"
أنت تقرأ
توم وجيري |مجموعة إسكريبتات|
Short Storyهُنا وطن صغير مليء بالمشاعر المُختلفة اللطيفة والمُشاكِسة "الحب والغيرة والضحك والمُزاح والرومانسية وغيرها الكثير" وطن لا يسكنه سوا إثنين فقط هُنا حكايات الأخوين التؤام التي لا تنتهي ولا تنتهي معها إبتسامتك اللطيفة تِلك هُنا مَسكن "آسر وآسية" • هذه...
