توم وجيري |مجموعة إسكريبتات|

القصة الثامنة

#توم_وجيري |الحلقة الثامنة|
#روان_سالم
_ _ _ _ _ _ _ _ _ _ _ _
متنساش الڤوت ورأيك 👀♥♥
_ _ _ _ _ _ _ _ _ _ _ _

- كدا فاضل 15 يوم محتاجة ألم فيهم سبع محاضرات من مواد مختلفة واذاكر الباقي.... يبقا كدا هنام خمس ساعات!
- حلو! في اليوم!؟
بصتله بدموع وقالت بحسرة
- لا في الـ 15 يوم
بصلها بضحك وقال بشماتة
- جميل نامي عشرين دقيقة في اليوم
- أنت حسبتها إزاي؟!
- لما تكبري هقولك
- ياما في ناس بشهادات كبيرة ومبتفهمش، فأنت حاول تفهمني عشان لو ملحقتش الشهادة ألحق الفهمان
بصلها بشك وهو بيقول بهدوء
- بتحاولي تهربي من المسؤولية ومن ضميرك ومتذاكريش، صح؟!
أبتسمت إبتسامة كبيرة وهي بتقول
- الله ينور عليك، عرفت ازاي؟!
- طب والـ مش عارف كام محاضرة!
- لا مش مهم بقا!
- وتسقطي في الإمتحان وأنا ادفع مصاريف تاني صح؟!!
قالت بغرور مصطنع
- لا ما ساعتها جوزي هو إللي هيدفع مش أنت
بصلها بسخرية وهو بيضحك ضحكة طويلة
- جـ.. ايه يا عنيا؟! بالله عليكِ أتوكسي على جنب عشان أنا ساكت بالعافية
- بذمتك يا شيخ، في وَكسة أكتر من إللي أنا فيها!
- هو الصراحة لا
قربت منه وحضنت دراعه وهي بتقول بعياط وصياح
- هسقط يا آسر
حاول يبعد دراعه وهو بيقول بقرف
- طب ما تذاكري!
مسكت فيه أكتر وهي بتدفن راسها في دراعه
- لا لا أنا حاسة إني هسقط! مفيش فايدة من المذاكرة أصلًا
- لا متخافيش هم مش حِمل أنهم يستحملوكِ سنة كمان
رفعت عيونها ليه وهي بتقول
- قصدك إني لا أُطاق؟!
- والله يا حببتي أنا أخوكِ ومش طايق اشوف وشك، ما بالك بحالتهم؟!
دفنت راسها في دراعه تاني وهي بتقول بصوت عالي وعياط
- أنا عايزة ماما!
- يا قلب أمك!
بعدت عنه وهي بترفع راسها للسقف وبتقول بدراما
- ليه مروحتش معاهم! وفضلت مع البني آدم ده!
قال وهو بيبصلها بحزن وحسرة
- يا عيني يا ضنايا
بصتله وهي بتكمل
- ليه ربنا بلاني بأخ زيك؟!
- معلش؛ أصلي بحـ'ـرقك بالسجاير في إيدك
كملت هي ولا كأنه قال حاجة:
- من بين كُل الناس دي! أنت تبقا أخويا؟! طب ليه!
قال بسخرية لنفسه
- أنا بدأت أشك إني بمشي على أربع رجلين!

قام وهو بيقول ببرود وسخرية
- ضيعتي الوقت خلاص يا آسي، وقت نومك يا حببتي
بصلها وكمل كلام
- لو سقطي السنة دي أنا ولا أعرفك ولا تعرفيني، ومفيش مصاريف هدفعها تاني!
مسحت دموعها ولا كأن في حاجة حصلت  وقالت ببسمة وغرور قبل ما تدخل أوضتها
- متخافش؛ أبو نواف هيدفع ومش هتحوج لحد زيك
_ _ _ _ _ _ _ _ _ _ _ _
#توم_وجيري (8)
#روان_سالم "حلوة فبراير"
اسفة لو اتأخرت حبة حبتين تلاتة، والصراحة يعني مفيش سبب مقنع للتأخير... يا أما بكسل يا أما بنام يا اما بنسى 🙂
ريأكت وكومنت برأيك عزيزي القارئ اللطيف 📌♥