توم وجيري |مجموعة إسكريبتات|

القصة الخامسة|بنضف التلاجة!|

ـ أنتِ بتعملي ايه؟
بصتله ببسمة كبير وهي بتقول:
ـ بنضف التلاجة
بص على الأرض إللي مليانة أكل وقال
ـ هي التلاجة كان فيها أكل سخن؟!
ـ لا ما أنا سخنته!
ـ هو مش المفروض إنك بطلعي الأكل برا تغسلي التلاجة وبعدين ترجعيهم تاني؟ أنتِ بقا سخنتيهم ليه؟
ـ مين قال إني هغسل التلاجة؟ أنا بقول هنضفها
ـ هي مش هنضفها يعني اغسلها ولا غيروها؟!
ـ تؤ غيروها
ـ طب وأنتِ بتنضفيها من ايه يا ترى؟!
قالت ببسمة كبيرة:
ـ من الأكل 
ـ إحنا مش لسا واكلين يا بت أنتِ دلوقتي؟!
رفعت كف ايديها في وشه وهي بتقول:
ـ الله أكبر! ايه باصصلي في الأكلة إللي باكلها؟
ـ أكلة! ده كُــــــــــــــــــله وأكلة؟؟؟!
بصت في الطبق إللي كان في ايديها وهي بتكمل أكل بعدم إهتمام
ـ اه أكلة

ـ آسية حببتي، أنتِ عندك امتحان بكرا، صح؟
رفعت عينيها وهي لسا مميلة رقبتها في الطبق وابتسمت بسمة واسعة وهي بتهز راسها بأيوا
خلع الجزمة إللي كان لابسها وهو بيرفعها في الهوا بتهديد
ـ وبتاكلي؟ وبتاكلي يا بــــــــــاردة؟؟؟! ده أنا لما بيبقا عليا امتحان نفسيتي بتتقفل لغايت ما النتيجة ما تظهر!!
قالت وهي واقفة ورا الكنبة بعد ما جريت وراها لما شافته رفع الجزمة في الهوا
ـ أيوا يعني أموت من الجوع؟! عشان شوية ورق بجنيه ونص؟!
رمى الجزمة عليها وهو بيقول بجنون
ـ جنيه ونص ايه يا بنت عبد الرحمن؟! ده أنا دافع مصاريف قد كدا في أم الكلية دي! وفي الآخر عايزة تعيدي سنة؟!
اتفادت الجزمة في آخر ثانية وقالت بمضض:
ـ والله أنا مقولتلكش تدخلني كلية أصلًا
ـ وصية الحج! كان متخيل إن أنتِ عايزة تتعلمي ميعرفش إنك فاشلة
قالت بتكملة برجاء وجدية:
ـ وعايزة أتجوز
خلع الجزمة التانية ورماها عليها
ـ لا وأنتِ الصادقة ده أنتِ عايزة تتربي
قالت بوجع وهي ماسكة راسها بسبب الجزمة إللي خبطت فيها:
ـ أنت عايز تستقوى عليا إكمني يعني مليش حد يقف ورايا، ما أهو لو بابا كان عايش كان زمانك دلوقتي محترمني
ـ أبوكِ لو كان عايش كان زمانه مات من الشلل
بصتله بغيظ وبعدها بصت بعيد
قعد على الكنبة بتعب، نطت هي من وراه الكنبة وقعدت جنبه، حط إيده على كتفها وهو بيقول ببسمة:
ـ آسية حببتي أنا عايز أشوفك حاجة حلوة
ـ بذمتك في أحلى من كدا؟
بصلها بدون ملامح وزق وشها بعيد وهو بيقول بمضض:
ـ تصدقي أنا غلطان! أسقطي وبعدها هدبس فيكِ أول حد يتقدملك، وعشان الضمان؛ هقوله البضاعة المُباعة لا تُرد ولا تُستبدل
بصتله ببسمة وهي بتقول:
ـ بما إنك فتحت الموضوع، هو جمال صاحبك عامل ايه؟
بصلها بصدمة شوية فقالت بتراجع وبسمة متوترة:
ـ كويس؟ طب الحمدلله يلا بقا عن إذنك عشان عندي امتحان بكرا وأنت بتلكعني أهو
قالتها وجريت على الأوضة بتاعتها

رفع آسر ايده للسما وهو بيقول:
ـ يا رب، أعني على تلك المصيبة
_ _ _ _ _ _ _ _ _ _ _ _
#توم_وجيري "5"
#روان_سالم "حلوة فبراير"
ريأكت وكومنت برأيك عزيزي القارئ اللطيف 📌♥