ပြီးပြည့်စုံခြင်း [COMPLETED]

[ 32 ]

Unicode

အပိုင်း - ၃၂

ဝမ်ကျားနင်အဖို့ တီဗီဇာတ်လမ်းတွဲ မရိုက်ကူးဖြစ်သည်မှာ နှစ်အတော်ကြာခဲ့ပြီ။ သူ အရင်ဘဝက စစချင်း debut လုပ်ခဲ့ချိန်မှာ ဇာတ်လမ်းတွဲများစွာကို ရိုက်ကူးခဲ့သော်လည်း နာမည်ကြီးပြီးနောက်ပိုင်း ထိုစီးရီးများကို တစ်ခါမှ ထပ်မရိုက်တော့။

တီဗီဇာတ်လမ်းတွဲများ၏ ရိုက်ကူးနှုန်းမှာ အလွန်မြန်သည့်အပြင် အသေးစိတ်မကျရုံသာမက အခုခေတ် ပြည်တွင်းဈေးကွက်လိုအပ်ချက်အရ အများစုကို အလျင်စလိုရိုက်လေ့ရှိပြီး အရည်အသွေးသိပ်မကောင်းတတ်ပေ။

ထိုအထဲမှာမှ 'ဇာမဏီနွှယ်သောဒဏ္ဍာရီ'ရုပ်ရှင်ဇာတ်ကားကိုတော့ ရင်းနှီးမြှုပ်နှံမှုကောင်းကောင်းလုပ်ပြီး အကုန်အကျခံ ရိုက်ကူးမည်ဟု ပြောလို့ရသည်။ ပရိုဂျူဆာဖြစ်သည့် လိန်ရှင်းအနေနှင့် ထိုဇာတ်ကားကို အရင်းခံကာ ခေါ့ရှင်ဟန်နှင့်ဝမ်းလင်အား ပွဲထုတ်ဖို့ရည်ရွယ်ထားသည်မို့ ငွေကုန်ကြေးကျအများကြီးခံပြီး quality ရော၊ ရိုက်ကူးနှုန်းပါ ညီမျှအောင် အားထုတ်ထားခြင်းပင်။

ဝမ်ကျားနင်နှင့်ကျန်လူများ ရိုက်ကူးရေးနေရာသို့ရောက်ရှိပြီး နောက်တစ်နေ့မှာ ရိုးရိုးရှင်းရှင်းအဖွင့်ကြိုဆိုပွဲကို တက်ရောက်ရကာ တရားဝင်ရိုက်ကူးရေးစပြီ ဖြစ်သည်။

ဇာတ်လိုက်မင်းသမီး လင်ကျန့်အာအဖြစ် ယွမ်ချန်း၊ ဧကရာဇ်ရှောင်ကျုံးယီအဖြစ် ဝမ်းလင်နှင့်အတူ ဝမ်ကျားနင်က စိတ်ခံစားချက်အပြည့်ပါသော ပထမဆုံးဇာတ်ဝင်ခန်းကို ရိုက်ကူးရမည်။

ယွမ်ချန်းက ရှေးခတ်နန်းတွင်းရုပ်ရှင်များဖြင့် လူသိများလာတာ မကြာသေးသော မင်းသမီးတစ်ဦး။ သူမ၏သရုပ်ဆောင်စွမ်းရည်က သာမန်မျှသာဖြစ်သော်လည်း ချောမောလွန်းသောရုပ်ရည်ကြောင့် လူကြိုက်များလာကာ အင်တာနက်ပေါ်မှာ နာမည်ကြီးလာခြင်းဖြစ်သည်။

သူတို့ရိုက်ရမည့် scene က သည်လို....

ရှောင်ကျုံးယန်တစ်ယောက် ပုရစ်တစ်ကောင်ဖမ်းမိ၍ ရှောင်ကျုံးယီကိုပြဖို့ နန်းတော်သို့လာချိန်မှာ မိန်းမစိုးနှင့်အပျိုတော်တို့ပြောနေသော စကားကို အမှတ်မထင်ကြားလိုက်ရသည်။ မနေ့ညက လင်ကျန့်အာ၏အဆောင်ထဲမှာ ရှောင်ကျုံးယီ တစ်ညတာကုန်ဆုံးခဲ့ကြောင်း...။ ရှောင်ကျုံးယန် ရင်ထဲမှဝေဒနာကို လျစ်လျူရှုကာ တော်ဝင်စာကြည့်တိုက်ဆီသို့ သွားပြီး ရှောင်ကျုံးယီကို ရှာခဲ့သည်။ သူ အပြုံးမပျက်ဘဲ အစ်ကိုတော်အား ပုရစ်အကြောင်း ပြောပြမည်ပြုချိန် တိုက်တိုက်ဆိုင်ဆိုင် ထိုနေရာမှာ လင်ကျန့်အာလည်းရှိနေ၏။