ပြီးပြည့်စုံခြင်း [COMPLETED]

[ 52 ]

Unicode

အပိုင်း - ၅၂

ဝမ်းလင်နှင့် ရိနန် နှစ်ယောက်လုံး မူးနေပြီ ဖြစ်ပြီး ဝမ်ကျားနင်က သူတို့အားလုံးကို တစ်အိမ်စီ လိုက်ပို့ပေးဖို့ မဖြစ်နိုင်သဖြင့် ဧည့်သည်တည်းခန်းထဲမှာပဲ သိပ်လိုက်ရသည်။ ယခုအချိန်မှာ ဤအိမ်ကြီးကို ကြောက်စရာကောင်းသည်ဟု ဘယ်သူမှ မတွေးနိုင်‌တော့။ သူတို့ကိုယ်သူတို့ ဘယ်ကို ရောက်လို့ ရောက်မှန်း မသိအောင် မူးနေကြသောကြောင့်ပင်။

အခန်းထဲသို့ သုံးယောက်လုံးကို ပို့ပေးပြီးနောက် ဝမ်ကျားနင်က ဒုတိယထပ်၊ လေသာဆောင်မှ စားကြွင်းသောက်ကြွင်းများကို ရှင်းလင်းရသည်။ တစ်ဝက်မျှ ပြီးသောအခါ သူ မောလာသလို ခံစားရ၍ လေသာဆောင်မှာပဲ ပစ်လှဲလိုက်ကာ တသုန်သုန် တိုက်ခတ်နေသော လေအေးကို ခံစားမိပြီ။

တခြားသူများနှင့် ရယ်မော စကားပြောနေတုန်းကတော့ သူ ဘာကိုမှ သိပ်မတွေးမိခဲ့ပေ။ သို့ရာတွင် တစ်ယောက်တည်း ရှိနေချိန်တွင်မူ အတွေးများစွာက သူ့ခေါင်းထဲ အလိုလို ပေါ်လာသည်။ ရှုပ်ထွေးနေသော စိတ်ခံစားချက်များက ထိန်းချုပ်နိုင်သည့် အတိုင်းအတာကို ကျော်လွန်နေသည်မို့ ဘဝကို တဖန် ရှင်သန်လာသည့် အသက် ၃၀ ကျော် အရွယ် ဝမ်ကျားနင်သည်ပင် ထို ခံစားချက်များကို ရှင်းလင်းအောင် မလုပ်နိုင်ခဲ့ပါ။

သို့ပေမယ့် ရင်းနှီးကျွမ်းဝင်သော အိမ်နှင့် ပတ်ဝန်းကျင်ကို ရောက်နေသည့်အတွက် ဝမ်ကျားနင် စိတ်သက်သာရာရသည် ဆိုရမည်။

အနည်းဆုံးတော့ ဒီအချိန်ထိ အရာအားလုံး အဆင်ပြေပြေ ချောမွေ့နေသေးတာပဲ။

ကုမ္ပဏီမှ စီစဉ်ပေးမည့် အလုပ်ကို ဝမ်ကျားနင် စောင့်ဆိုင်းနေဆဲ အချိန်တွင် ဖန်ဝေ့၏ 'October Fireworks' ဇာတ်ကားက နိုင်ငံခြား ရုပ်ရှင်ဆုပေးပွဲအခမ်းအနား တစ်ခုတွင် ဆန်ခါတင် စာရင်းဝင်ကြောင်း အင်တာနက်ပေါ်မှာ သတင်းတက်လာသည်။

'October Fireworks' ဇာတ်ကားကို တရုတ်ပြည်တွင် တရားဝင် မထုတ်လွှင့်ရသေးသော်လည်း နိုင်ငံခြားမှ ရုပ်ရှင်ပွဲတော်များ၌ စာရင်းသွင်းထားပြီးဖြစ်ကာ ဆုရနိုင်ခြေ စာရင်းထဲကိုလည်း အောင်အောင်မြင်မြင် ပါသွား၏။