أنا فيك ضعت وهذا أجمل ضياع

𝘗𝘢𝘳𝘵40

قبل لا نبدا خلونا ندعي للشيخ خليفه بن زايد الله يرحمه:

(اللَّهُمَّ، اغْفِرْ له وَارْحَمْهُ، وَاعْفُ عنْه وَعَافِهِ، وَأَكْرِمْ نُزُلَهُ، وَوَسِّعْ مُدْخَلَهُ، وَاغْسِلْهُ بمَاءٍ وَثَلْجٍ وَبَرَدٍ، وَنَقِّهِ مِنَ الخَطَايَا كما يُنَقَّى الثَّوْبُ الأبْيَضُ مِنَ الدَّنَسِ)
اللهم امين
—————————————————

ف شقة سالم .. دخل الشقه وهو يسمع صياح ولده محمد عقد حوايبه و دخل الغرفه لقاه على الشبريه ميت من الصياح و منال يالسه تتمكيج
سالم وهو يتقدم صوب ولده: ما تسمعين الولد يصيح يعني !!
منال لفت عليه ببرود: زين وصلت .. امسكه لين ارد
سالم: على وين ان شاء الله ؟!!
منال: بيت امي مسويه عزيمه
سالم: قعدي مكانج ما في طلعه
منال: بس انا تعدلت وخلصت .. بطلع ما يالسه اشاورك
سالم: منال قعدي ف البيت ما في طلعه !!
منال: اذا ما تبا تمسك محمد عادي بعطيه اي خدامه هناك ف بيت امي تمسكه طول العزيمه
سالم بدهشه: انتي صاحيه .. شو الي داخل راسج بالضبط .. قلبج من شوووو ... وتقولينها ببرود بعطيه اي حد ولا كأنه ولدج!!!
منال: اوووه يعني شو تباني اسوي مثلاً خلاص مليت منه ماباه
سالم عقد حوايبه: شو لعبه هو عشان تقولين مليت منه
منال: اسمع عاد انا ما عندي وقت بتمسك الولد ولا اشله واعطيه اي خدامه هناك
سالم: قلت لج ما شيء طلعه .. قعدي مكانج و ربي ولدج
منال رشت عطر و طلعت من الغرفه .. يت بتطلع من الشقه بس وقفها سالم
سالم: اذا عتبت ريولج برا الشقه ما بتردين لها مره ثانيه
منال لفت عليه بحايب مرفوع: شقصدك!!
سالم: اذا طلعتي انتي طالق
منال ابتسمت: ع بالك بي وبطيح عند ريولك بترجاك .. لا حبيبي اباها من الله .. و الولد ربه انت انا مب فاضيه
بطلت الباب وطلعت
~~~~~~~~~~~~~~~~~~~~~~~~~~~~~
ف لندن ..
كانت يالسه تسوي العشا و حور يالسه تساعدها .. طلع خالد من الغرفه يدورها وحصلها ف المطبخ
خالد: وانا يالس ادورج ف الغرفه اخر شيء هني ف المطبخ مع حور
لولوه: اشتهيت باستا و قلت بسوي .. عاد حور من سمعت باستا قالت بساعدج
حور: بنسوي باستا مع الدياي و الماشروم
خالد وهو يبوسها على راسها: فديت هالمنطوق .. اذا طلع حلو دوم بتطبخون لي عيل
لولوه: انت امر بس .. اصلاً طباخي انا وحور ما يتفوت
خالد: متأكده؟!
لولوه: اسأل الشيف حور
حور: صح حلو وايد .. بعدين بتقول كل يوم ابا نفس هذا
خالد: انزين يلا متى بيخلص
لولوه: الحين بخلص .. بس زهب الصحون انت
خالد وهو يطلع الصحون: يلا ترتيب الطاوله عليّ
رتب الطاوله وهم جهزوا الاكل و قعدوا
خالد: حور ازقري امج
حور راحت وخالد لف على لولوه: ناوي اخذ لها شقه عندنا احسن لها و لنا
لولوه ابتسمت: هيه احسن
خالد: تبين الفكه اشوفج
لولوه: وجودها يضايقني .. وبعدين مب مطمنه احسها بتاخذك مني اي وقت
خالد: ليش عاد !!
لولوه: لانها احلى عني
خالد ابتسم ومسك ايدها وسحبها عنده وخلاها تقعد على ريوله وحاوط خصرها
خالد: ف نظري ما في احلى عنج و قلبي ما يملكه غيرج .. لا تقارنين نفسج بحد ماله اهميه ف حياتي كلها
لولوه ابتسمت له وباسته على خده .. لحظتها طلعت جميله مع حور وشافوهم .. استحت لولوه ويت تبا تقوم بس خالد منعها
خالد بهمس: خلج
ضربته على ايده وقامت قعدت مكانها
جميلة: خالد نبا نطلع .. اختنقت من الشقه
خالد: حور عندها موعد بعد ما نرد بنروح
جميله: متى موعدها؟!
خالد: تاريخ 10
جميله: وييي اليوم تاريخ 7
لولوه لفت عليها بدهشه: اليوم تاريخ سبعه!!!
جميله: هيه
قامت من مكانها و خذت فونها بتتصل بس اتذكرت ان فونها ما فيه شحن طلعت عند خالد ومدت ايدها
لولوه: خالد ابا فونك
خالد: ليش شفيج؟!
لولوه: عطني بسرعه
عطاها خالد وهي خذت الفون ودقت على الارقام الي حافظتنهم و اتريت يرد .. رن و رن و رن وبعدها ما سمعت رد
خالد: لولو
لولوه ابتسمت: برد اتصل مره ثانيه
اتصلت واتريت الرد ولكن ما شيء فايده .. ابتسمت بألم وحطت الفون على الطاوله وقعدت .. مسك خالد ايدها
لولوه: اليوم عيد ميلاد مروان كنت بكلمه بهنيه .. بس شكلهم بعدهم زعلانين عليّ
جميله: اكيد حبيبتي بيزعلون عيل خليتي اهلج الي من اصلج و فصلج وما حبيتي ولا لفيتي الا على طليقي !!
خالد: جميله !!!
تمت لولوه تاكل والباقي قعدوا ياكلون .. من خلصوا راحت غرفتها و لحقها خالد لقاها قاعده على السرير .. تقدم صوبها ومسك ايدها
خالد: لا تشلين ف خاطرج .. مردهم بيتصلون فيج و بيسامحونج
لولوه وعيونها ادمع: اشتقت لهم .. فاقدتنهم فاقده حسهم وهم ولا افتكروا فيني
خالد وهو يحضنها: تلقينهم مشغولين ف شيء لا تحاتين شيء بيردون يتصلون فيج و يسألون عنج
لولوه ابتعدت عنه وهي تمسح دموعها: خالد خلنا نرد الامارات
خالد: لولو ا...
قاطعته: ما بيصير شيء بس بروح اطمن عليهم اذا ردوني وعد مني لك ما اتكلم عنهم مره ثانيه .. دخيلك خالد هذيل اهلي مالي غيرهم
خالد: لولو اذا ردينا البلاد وين تبينا. نسكن ما عندي بيت انا بيتي شلوه
لولوه: عندنا فلوس ف البنك وتكفي الحمدلله خلنا نحفظهم لين نرد و نأجر فيهم شقه .. شرايك؟!
خالد بابتسامه سخريه: وعادي عندج تسكنين معاي ف شقه مب من مستوى الرفيع
لولوه عقدت حوايبها: انت تعرف اني ولا مره اهتميت للأشياء هذي .. ليش دايماً تبين لي انك اقل مني واني مب مرتاحه بس لاني ف مكان ثاني غير القصر
خالد: لاني مب مصدق انج مرتاحه طول حياتج عايشه ف قصر الحين صار عادي عندج تسكنين ف شقه عاديه
لولوه وقفت: خالد انا من زمان جذي .. ما اهتم للماركات والقصور وغيرها مب بايدي اذا كبرت وتربيت ف قصر هذا نصيبيي
يت تبا تطلع من الغرفه بس تقدم وحضنها من ورا: خلاص اهدي انا اسف .. و بيصير مثل ما تبين حور موعدها قريب بنحضره و اليوم الثاني بنرد الامارات ان شاء الله.. وبناخذ لنا شقه و انتي بتروحين تشوفين اهلج مثل ما تبين
لولوه: وعد؟!
خالد ابتسم وباسها على خدها: وعد
~~~~~~~~~~~~~~~~~~~~~~~~~~~~~~
ف المانيا .. بيت كايد
كان ف الحديقه يالس يلعب رياضه .. فجأة سمع صريخ وثواني طلعت صوفيا تركض صوب السياره
مروان: بسم الله شفيكم
دخل داخل وسمع صريخ تولين ركض صوب غرفتها وشافها تصيح وتصارخ وهي ماسكه بطنها
مروان: لولي شفيج؟؟
تولين وهي تصيح: بططنييي بطنييي بموووتتت .. يااااا رببببيييي ارررحممنننيييييي
مروان لف على رودينا: شو فيها شو عطيتوها انتو!! 
رودينا: لازم نسعفها للست تولين هلأ .. والا بيصير شي للبيبي
مروان خاف من سمع كلام رودينا .. وساعد تولين انها تمشي لين السياره الي كانت ف كل خطوه تصارخ من الالم وتصيح .. دقايق و وصلوا المستشفى و على طول دخلوها على غرفة العمليات
مروان: يارب سترك يا رب سترك .. رودينا شو الي صار بالضبط خبريني
رودينا: كنا عم نحكي انا وياها وفجأة حست بألم خفيف و بعدين زاد الالم وظلت تصرخ
مروان: لا حول ولا قوة الا بالله
بعد عدة ساعات وطول انتظار طلعت الدكتوره اطمنهم على البيبي وتولين وبشرتهم ان تولين يابت ولد
مروان: اللهم لك الحمد .. اللهم لك الحمد
صوفيا: سأذهب لشراء هدية للسيدة تولين
مروان ابتسم: حسناً
قعد يتريا لين يطلعون تولين وبعد دقايق طويله طلعوها وحطوها ف غرفة خاصه وطبعاً قعد يترياها لين تقوم .. بعد ساعتين قامت و لقت مروان قاعد ويلعب بفونه
تولين بتعب: مروان
انتبه لها وابتسم: مبروك يا ام مروان
تولين: وين كايد؟!
اختفت ابتسامته: ما يدري ما بلغت حد
تولين: خبره اتصل فيه الحين
مروان: ما تبين تطمنين على ولدج ؟!
تولين هزت راسها بلا: اول شيء كايد بعدين الولد
تنهد مروان و اتصل على كايد مرتين وما رد .. رفع عينه على تولين: ها اتصل بعد ولا خلاص
تولين: اتصل لين يرد عليك .. اكيد هو بعيد عن الفون
اتصل مروان وعلى اخر شيء رد عليه
كايد: الو
مروان: كايد شحالك؟!
كايد: الحمدلله بخير شحالك انت ؟!
مروان: انا الحمدلله بخير .. متصل ابشرك
كايد: تبشرني بشو؟!
مروان: تولين ربت .. صار عندك ولي عهد
كايد: اها زين
اختفت ابتسامته: شو اها زين .. اقولك حرمتك ربت كانت حالتها صعبه شوي بس الحمدلله الحين بخير والولد بخير
كايد: بحول لك فلوس تساعدكم ف العيشه
تولين سحبت الفون من ايده وبندته: نساني
مروان: تعوذي من الشيطان
تولين: قلت لك نساني نسى تولين نسى انه متزوج نسى انه عنده ولد نساني خلاص .. ما عدت شيء ف قلبه
مروان نزل راسه
تولين تمت تصيح على حالها و حظها
~~~~~~~~~~~~~~~~~~~~~~~~~~~~~~
عند كايد .. بند من عندهم ولف على اخوه وهو مبتسم
سالم: شفيك جذي شاق الحلج؟؟
كايد: صرت ابو صار عندي ولد ههههههه
سالم: مبروك ياخوي يتربى بعزك
كايد: الحمدلله يارب الحمدلله .. سبحان الله التذكره يت ف وقتها
سالم: احجز لي معاك .. خل محمد يشوف ولد عمه الالماني ههههههه
ضحك كايد وقعد يشكر ربه .. دقايق واتصل مروان .. رد عليه كايد
كايد: الو
مروان: انت شفيك اقولك حرمتك ربت واخر شيء ترد هالرد البارد .. نسيتها يا كيود
كايد رفع حاجبه: كيود يدك تكلم عدل
مروان: شو يالس تسوي كايد شو هذا كله ماتباها طلقها و انا باخذها
كايد: انت اييييهههههه بصفعك صدقني شو ها المذهب الي فيك
مروان كتم ضحكته
كايد: وينك انت؟! .. تولين معاك؟!
مروان: لا طلعت من الغرفه
كايد: بيكم باجر ان شاء الله.. اهتم فيها لين اوصل
مروان: لا تحاتي ف عيوني
كايد: كيف صحتها وايد تعبانه؟؟
مروان: هيه كانت صعبه ولادتها وايد .. بس الولد بخير
كايد: شفته؟!
مروان: لا .. تولين رفضت تشوفه
كايد استغرب: ليش فيه شيء؟؟
مروان: ومستغرب بعد توك ما همك شيء وبحول لكم فلوس .. قعدت تقول ما ابا الياهل اذا ابوه ما يباني وناسني
كايد: وينه ولدي الحين؟!
مروان: راحت رودينا تحرسه لاصقه ف حضانة اليهال
كايد: دير بالك عليهم واهتم فيهم لين اوصل باجر
مروان: تباني ابلغ تولين انك بتي؟!
كايد: لا .. ما اباها تعرف
مروان: سبرايز وحركات يعني
كايد: هيه
مروان: انزين يلا بخليك الحين
كايد: ليش شعندك؟!
مروان: شو شعندك .. بند بعد شو تبا؟!
كايد: لا لا خلك ع الخط
مروان وهو يشوفها تتقدم صوبه ابتسم: يلا كيود بند فكني
وقبل لا يتكلم بند فويهه
مروان: تو ما نور المكان
: شحالها .. وين البيبي شفتوه؟!
مروان: تعبانه شوي و البيبي ما شفته لين الحين .. تبين تشوفينه
: هيه
مشى معاها للحضانه و شافوا البيبي
: حياااتتييي كيووت .. وااااييي اعششقق اليهااالل
مروان ابتسم: عقبالنا
استحت: اقول عاد جب
مروان: شو ما تبين ؟!
رفعة حاجبها: والله تدل باب بيتنا مب هني
مروان: ان شاء الله قريب
بوزت: بتردون الامارات صح؟!
مروان: ما ادري
رودينا: سيد مروان النيرس بدها تاخذ البيبي مشان الفحوصات
مروان: زين خذيه .. من يخلصون حرصي عليهم ايبونه الغرفه عندها
رودينا: حاضر
مشى مروان ومشت معاه: دايماً ينادونك سيد؟!
مروان: هيه .. مب لايق عليّ؟!
: ودايماً تاخذ وتعطي معاهم
مروان: اذا كنت ابا شيء اكلمهم
صوفيا: سيد مروان اين انت ؟!
مروان: جئت لارى الطفل .. هل حصل شيء؟!
صوفيا: السيده تولين وقعت على خروجها من المستشفى
مروان عقد حوايبه: ماذا .. كيف!!!
ما ترياها ترد وراح صوب تولين دخل الغرفه
مروان: تولين صح الي سمعته؟!
تولين: شو سمعت؟!
مروان: موقعه انج تبين تطلعين من المستشفى وعلى مسؤوليتج
تولين: هيه
مروان: تولين ولادتج كانت صعبه وتعب عليج ارتاحي ليش تبين تطلعين الحين ع الاقل تريي يومين
تولين: مروان خلاص انا وقعت وما ابا نقاش زايد
مروان: و الولد .. انتي حتى ما سميتيه!!
تولين: ماباه خلهم ياخذونه
مروان: لا انتي مب صاحيه .. شيء طايح على راسج اكيد
تولين بعصبيه: خلاص مروان انا قلت بطلع والولد برايه عندهم ما اباه
زفر بعصبيه وطلع وهو يرقع الباب .. شافها واقفه قدام الباب تترياه
: شفيكم؟!
مروان: تخيلي تبا تطلع باجر وبدون ولدها
شهقت: صدق تتكلم!!
مروان: عيل اجذب عليج .. تخبلت هذي وبتخبلني معاها
ابتعدت عنه وقعدت ع الكرسي .. تنهد وتقدم صوبها
مروان: اسف مب قصدي اكلمج بهالاسلوب
: عادي ما صار شيء
مروان: ردي البيت الحين وانا بكلمج بعدين .. مزاجي تعكر وما اقدر اكلمج وانا هذي حالتي
وقفت: خلص امورك معاها و بعدين بنتفاهم .. لا تقول لها اني مريت المستشفى
مروان: تعرف تراها
عقدت حواجبها باستغراب: كيف تعرف انا ما دخلت عندها!!
مروان ابتسم بسخريه: رودينا و صوفيا شافوج .. الخبر وصلها من اول ثانيه مرت
: ما عليه عادي .. بروح انا الحين تأخرت
مروان: يارا
لفت عليه
مروان ابتسم: انتبهي للدرب
ابتسمت له و راحت ~~~~~~~~~~~~~~~~~~~~~~~~~~~~

يتبع
|
|
|
|
|
|