أنا فيك ضعت وهذا أجمل ضياع

𝘗𝘢𝘳𝘵2

المكان: المانيا
الوقت: 6:00 الصبح

ف مكان مظلم وبعيد .. ف مكان ما يصدر منه الا صوت صريخ وضرب .. كان قاعد على الكرسي ويدوخ زقارته ويطالع الي ينضرب ببرود وتمتع في نفس الوقت .. بعد ما خلص زقارته عقها على الارض وداسها وتقدم صوب الشخص الي يضربونه واشر لحرسه يوقفون .. قعد على ريله ورسم على ويهه ابتسامه سخريه وانتصار
كايد: تبا شيء قبل لا نرسل جثتك لاهلك
الريال بألم: ب ت ن د م
ابتسم ومد ايده لواحد من الحراس وخذ المسدس و طلق عليه وبعدها قام وعقم ايده ولف على حراسه
كايد: تأكدوا انه مات .. واذا ما مات ما يحتاج اقولكم شو تسوون
طلع من عندهم وركب السياره الي توجهت للقصر الكبير الي اتزينه الورود والزراعه والسياير الفخمة .. والحرس ف كل مكان واصوات العصافير ماليه الحديقه .. نزل من السيارة بعد ما فتحوا له الباب ودخل القصر لقى الخدم واقفين يستقبلونه
الخدم : اهلاً بك يا سيد كايد << يتكلمون الماني بس انا بكتبه بالفصحى
كايد: اين رودينا ؟!
رودينا وهي طالعه من المطبخ: اهلاً فيك سيد كايد
كايد: وينها تولين؟!
رودينا: بأوضتها يا سيد
كايد: نايمه؟!
رودينا: ايي
هز راسه وصعد فوق .. فتح الباب ولقاها غارقه ف نومها تقرب منها وباسها على خدها ودخل غرفة الملابس بدل ملابسه وانسدح عندها ونام
~~~~~~~~~~~~~~~~~~~~~~
المكان: الامارات .. بيت خالد
الوقت:8:00

قامت الصبح شافت ابوها راقد عندها ابتسمت وباسته على خده وقامت دخلت المطبخ سوت له الشاي وبعدها راحت فرشت اسنانها وتسبحت وتلبست وبعدها قومت ابوها وطلعت الصاله وهي تمشط شعرها .. رتبت شنطتها على حسب الجدول المحطوط على اليدار الصاله وقعدت تتريا ابوها يطلع .. شوي طلع ابوها وابتسمت يوم شافته
حور: صباح الخير
خالد : صباح النور
حور تمت اتطالعه وتبتسم
خالد بنص عين: شعندج اتطالعيني جذي
حور: بقولك شيء
خالد تنهد: شعندج قولي
حور: امممم اليوم شيء رحلة .. بيودونا الحديقه وابا اروح
خالد: سيري يبي البوك عشان اعطيج الفلوس
قامت حور بفرحة ويابت البوك وعطته اياه اما هو طلع 50 درهم وعطاها : يكفيج ؟
حور وهي تاخذهم بفرحة: هيه .. اممم في شيء ثاني بعد
خالد: شو ؟!
حور: اممم في ورقة لازم توقع انك موافق على الرحلة .. ولازم تحط رقم تلفونك
خالد مد ايده: عطيني اشوف
ركضت ويابت له الورقه وعطته وتمت واقفه بحماس اتطالعه يوقع ويكتب رقم تلفونه .. ومن مد لها الورقه باسته على خده
حور: شكراً
خالد: يلا اتجهزي عشان اوصلج المدرسة وبعدين بروح الدوام
حور: خلاص انا جاهزه .. بس امممم
خالد طالعها بملل: شو بعد
حور: ابا اسوي تسريحة حق شعري
خالد: انزين سوي
حور: ما اعرف .. اممم براويك فيديو وانت شوفه وسولي مثله
خالد: اشوف
قامت حور ويابت تلفون خالد وطلعت الفيديو له وراوته .. تم خالد يشوف الفيديو ويتعبث ف شعرها لين كشكشه لها وبعدين قام بملل
خالد: افففف قومي قومي ما اعرف التسريحة هذي صعبة
حور: شوف شو سويت ف شعري
خالد: يلا يلا رتبي شعرج وخلينا نطلع بتأخر على دوامي انا
حور: خلود .ت..
قاطعها: اصغر عيالج انا تقولين لي خلود .. الناس يقولون ابوي او بابا وانتي خلود
حور: هههههههه .. انزين ما اعرف اسوي شعري
خالد: خلاص خذي اغراضج وتعالي السياره
حور: يعني اروح المدرسه بكشتي
خالد وهو طالع : تعاااالييي
خذت شنطتها وطلعت وركبت معاه .. دقايق وقفوا قدام قصر كبير .. القصر مشابه لقصر كايد بس اكبر .. الحرس محاوطين البيت و عامل يسقي الزرع والخدم رايحين ورادين ف القصر
حور: ليش يبتني هني
خالد وهو ينزل: خلي الخدامه اتسوي لج شعرج
حور نزلت ومسكت ايده: انت تعرف هذيك الحرمة شو بتقول؟
خالد: تبين تعدلين شعرج خلي الخدامه اتسويه ما تبين ركبي السياره وانتظري
حور: اففففف .. وينها هذي بعد
خالد: لحقيني
~~~~~~~~~~~~~~~~~~~~~~~
داخل القصر .. بعد ما حطوا الخدم الريوق قعدت تتريق .. شوي ونزل ولدها سالم
سالم: صباح الخير امايه
ام كايد: صباح النور .. وين كنت امس ؟؟
سالم: كنت سهران مع ربعي
ام كايد: وما وراك دوام ؟؟
سالم: اليوم الخميس
ام كايد: اعرف اليوم الخميس .. وفهاليوم الناس يداومون
سالم: افففف امايه بس خلاص محاضره من الصبح
ام كايد: ما عليه يا سلوم علومك كلها بوصلها عند اخوك
لولوة: صباح الخير
سالم: زين يتي .. يلا امايه الحين جابلي بنتج النفسيه وكلميها وسبيها وسوي الي تبينه ما بتتكلم تراها بتسكت وبتسمعج .. انا طالع
ام كايد: تعال وين رايح .. استغفر الله من هالولد
مروان وهو ينزل: صباحووو
ام كايد: صباح النور .. هلا بشمعة البيت .. حياك تعال تريق
مروان وهو يبوس راسها: شحالج ام مروان
ام كايد: الحمدلله بخير .. شحالك انت
مروان: الحمدلله بخير
ام كايد: ها اشوفك اليوم متحمس .. شو عندك
مروان ابتسم: ما شيء والله .. بس تدرين اليوم الخميس وبنطلع بسرعه واكيد انه ما شيء دراسه
لولوة: امايه طرشي اليوم حد يطلعني من المدرسه
ام كايد: لا ما شيء .. ما تطلعين من المدرسة الا اذا ما عندج دراسه والاخصائية اتصلت وقالت لي هالكلام ولا اذا عندج موعد
لولوة نزلت راسها وما تكلمت .. اما مروان ف سوا له سندويشتين و وقف
مروان: يلا انا بروح .. يلا لولو عشان ما نتأخر
ام كايد: بعده الوقت انزين .. خلص اكلك بعدين روح
مروان: لا امايه اليوم عندي امتحان وفي كم سؤال مب فاهمنهم ف ابا الحق عشان اسأل الاستاذ
ام كايد: زين .. ربي يحفظكم
طلعوا مروان و لولوة و خالد بطل لهم الباب وركبوا
حور عقدت حوايبها: وانا وين اركب
خالد: ركبي قدام
حور كتفت ايدها: افتح لي الباب مثلهم
خالد تنهد وفتح لها الباب وركبت وبعدها ركب وحرك السياره
مروان وهو يمد لها السندويشة
مروان: كلي
لولوة وهي اتطالع برا: ما ابا
مروان: لولو خذي ترا اكلي ما يتفوت .. كلي تراج مب ماكله شيء من امس
لولوة: مروان ما ابا اكل
مروان: تسوين رجيم ؟!
لولوة: ..
حور بفضول : خلود شو يعني رجيم؟!
خالد: اشش اسكتي
مروان ابتسم: هذي بنتك حور؟!
خالد: هيه نعم طال عمرك .. هذي بنتي حور
مروان: ما شاء الله .. اول مره اشوفها
حور: انا دايماً عندكم ف البيت .. بس اليوم تأخرت
مروان: وكم عمرج يالحلوه ؟!
حور ابتسمت: سبعه
مروان وهو يمد لها السندويشه: خذي كلي هذا .. ترا انا سويته
حور خذت السندويشه ولفتها بكلينكس وتمت ماسكتنه
مروان: ليش ما كليتيه
حور: بعدين باكله ف الرحلة
مروان ابتسم لها ولف على اخته : بتاخذين السندويشه ولا اتصل ف كايد
لولوة لفت عليه وخذت السندويشة من ايده
مروان: اول ما اطلع اليوم بمر اخذج
لولوة بضيق: كيف بتاخذني وانت ما يبت الهويه
مروان ابتسم وطلع هويتها وهوية امها
لولوة بطلت عينها: متى خذيتهم
مروان غمز لها: افا عليج مروان انا مب اي حد
لولوة ابتسمت له وحضنته: مشكور مروان
مروان: سمعي بعد ما اطلعج بنطلع نحوط شوي وبنرد البيت
لولوة هزت راسها بالموافقه
~~~~~~~~~~~~~~~~~~~~~~
ف بيت ام كايد.. بعد ما طلعوا مروان ولولوة .. نادت ام كايد وحده من الخدم
ام كايد: اين عهود لما لم تنزل الى الان ؟ < تكلمها انجليزي
ايميلي: نائمة في غرفتها
ام كايد: هل قمتم بايقاظها ؟
ايميلي: نعم سيدتي ولكنها رفضت ذلك
ام كايد: حسناً .. يمكنك الذهاب الان
راحت الخادمة تكمل شغلها اما ام كايد فراحت فوق عند بنتها .. دقت عليها الباب وما سمعت رد .. بطلت الباب وهب عليها هوا بااارد .. عقدت حوايبه وبطلت كل الليتات وسكرت المكيف وتقدمت صوب بنتها وسحبت عنها اللحاف
ام كايد: عهودوه قومي اشوف .. قوومي
عهود بنعاس: اففف امايه شو تبين فيني خليني انااااام
ام كايد: قومي بعد شوي حرمة عمج بتزورنا .. قومي قعدي معاي
عهود بعين وحده: انزين انزين بقوم
ام كايد: انتظرج تحت لا تتأخرين
عهود: انزييين
~~~~~~~~~~~~~~~~~~~
عند خالد بعد ما نزل لولوة ومروان .. مدت له بنته السندويشة الي عطاها مروان
حور: خذ
خالد: شو ها
حور: ادري انك ما كليت شيء الصبح .. خذ كل هذا
خالد: خليه عندج حق الرحله
حور: عندي فلوس
خالد تنهد وخذ منها السندويشه وتم ياكل
حور: خلود
خالد لف عليها: شو تبين
حور: انا حلوه ؟
خالد ابتسم: لا
حور: قول الصدق .. ترا الي يكذب يدخل النار
خالد: وانا قاعد اقول الصدق
حور: شو يعني انا بعد حلوه
خالد: لا منو قال انج حلوه
حور بزعل: عشان جذي تقول حق مروان طال عمرك وحق لولوه الشيخة .. يعني انت تقولهم جذي لانهم حلوين وانا لا
خالد تنهد: هيه
حور نزلت راسها وغطت ويهها بايدها
دقايق و وقف قدام مدرستها
خالد: يلا انزلي وصلت المدرسه
حور خذت شنطتها ويت تبا تنزل بس مسك ايدها
خالد: اصبري شوي
نزل من السياره وبطل لها الباب : تفضلي يا اميرتي
حور عقدت حوايبها وطالعته
خالد نزل ومسك ايدها: انتي اجمل بنت ف العالم هذا كله .. اذا انا اقول للولوة الشيخة ومروان طال عمرك هذي مجرد مجامله لاني اشتغل عندهم ولازم اقول جذي .. بس انتي قطعه من قلبي واميرتي بعد
حور ابتسمت وحضنت ابوها وبعدها ابتعدت عنه
خالد: يلا الحين دخلي لانج تأخرتي صدق
يت تبا تمشي بس اتذكرت شيء ورجعت
خالد ابتسم ونزل لها .. تقدمت صوبه وباست على خده من الجهتين و ركضت داخل وهي تودعه
خالد: ربي يحفظج من كل شر
|
|
|
|
|
|
|
|
|