رواية #فرحة_هشة

الجزء الثاني والعشرين

الحلقة #22 من رواية #فرحة_هشة
و مازلنا ننتظر لنرى ماذا سيفعل بنا القدر , و ماذا سيخبئ لنا !!
•
•
مر وقت وهي راقدة بعد ما طلعت من العملية , او بالاحرى نايضة وادير في نفسها راقدة !!!
كان مسيطر الهدوء عالغرفة , حاسة بوجع , الوجع ما كانش ألم من العملية , الوجع من إنها خسرت أن تكون أم , حباته من قبل مايجي , لو جي كانت حتكون ليه أجمل أم في العالم وهو حيكون أجمل ابن او ابنة رسمت معاه كل شيء في مستقبلها القريب , بس ربي مش رايد ..
نزلت دمعة سخونة على خدها , دمعة حرقة , دمعة فقد , دمعة خسارة !!!
فتحت عينها ومسحت دمعتها , تفحصت المكان , لقت أمها تصلي وسراج راقد من التعب عالكرسي !!!
تكلمت بصعوبة > سراج ..
لما ماردش عاودت > سراج ..
كان مش مرتاح في نومة , راقد بين يقظى وحلم فتح عيونه لما سمعها > الحمد لله على السلامة ..
الله يسلمك , نبي امية ..
ناض صبلها المية في طاصة , وقعد يستنى فيها , كملت خدي منها الطاصة وقال > صحة ..
- سلمك , امتى مروحة ؟
- شوية تانية , الدكتور كان يستنى فيك تفيقي ..
- اها ..
طلقت امها السلام , ناضت وجتها > الحمد لله على السلامة ..
- الله يسلمك ..
- كيف حالك تو ؟
- الحمد لله ..
- تبي تاكلي حاجة ؟
- ماعنديش نية ..
- براحتك ..
*
*
طلعت أمها من الدار , قعدت هي وسراج ..
هو يشوفلها وهي تشوفله ومافيش حد تكلم !!!
•
•إذا جرحت شخص وطال صمته فتأكد بأنه يعاقبك بعقاب أقسى من الكلام..
الصمت أحياناً
رماد الكلمات التي إحترقت عبثاً !!
•
•
قرب منها ووقف جنب راسها , حط عيونه في عيونها > منار ..
ردت ببرود غير معتاد > نعم ؟
شدها من يدها > نبي نحكي ..
ردت بلا مبالاء > مش مهم ..
•
•
تعبت قلوبنا من الاعتذار دوما
و تعبت كل الأحاسيس في داخلنا
•
•
تنهد وقعمز > اني تزوجتها حتى اسمها مانعرفاش , ايه ما نعرفاش , الفترة اللي امي خطبتهالي فيها ماكنتش نقعد في الحوش , كنت متشتت بين رفضك انتي ليا وبين امي اللي اجبرتني , وكنت مستغرب كيف هي وافقت علية اصلاً من غير ماتشوفني !!!
بس مع الايام عرفت ان هي شايفتني في صور مورينهالها , وزي ماتعرفي انتي الفترة اللي كانت فيها الخطبة قصيرة هلبة !!! تزوجنا وكان زواج محترم مبني على الثقة والاحترام , ماكنتش حاب نظلمها معاي مادامها خشت في حرمتي , وبعد ماجابت ميمي بستة شهور , وصلوني صور ليها كانت هي مع شخص , ما كانتش تخون فيا لان الصور كانو باينين قدم , ومن خلال هادي الصور عرفت ان اللي بعتتهملي عهد مرت خوك محمد وكتبتلي انها كانت صاحبتك ومع أني سائلها عليك لما عرفتها انها قارية صيدلة , بس قتلي نعرفها من بعيد لبعيد , وقتلي عهد انها كانت صاحبت محمد خوك وعلى خاطر هادوا الصور سيبها , لما سألت عهد من وين عرفت مروة صاحبتك نفسها هي مرتي , قتلي شفتها في عرس سهى !!!
كانت بالنسبة ليا صدمة زي ما انتي نصدمتي , مرتي وام بنتي كان ليها ماضي مش كويس !!!
تهورت ولُمت امي على الشيء هدا , مع إنها  ماليهاش ذنب وليت عليها لأن هي اللي اجبرتني , ووريتها اللي ريته , ورفعت مروة لحوش بوها , ووريتهم الصور , بوها جاته جلطة في دماغة من الصدمة وتوفة , وبعدها بشهر خديت ميمي منها اجباري وهددتها لو طالبت ببنتها او الطلاق بالصور اللي عندي , كنت ناوي نطلقها بس بعد ماتوفة بوها كنت نبي نبهدلها ونخليها تتربة ~تنهد~ , بعدها بشهرين ماتت منتحرة بالحبوب بعد ماولت متهظة من كل عيلتها وخوتها الولاد اللي مارحموهاش …
*
*
جتها غصة في قلبها وألم في معدتها , ما كانتش تتوقع ان حتكون النهاية هكي !! عهد مرت خوها هي السبب !!!
حست بغدر تاني وخذلان تاني من عهد , اللي كانت تعرف ان منار وسراج منفصلين بسبب مروة , ماحاولتش تدافع على سراج او تقوللها الحقيقة !!!
بس انتقمت من مروة لنفسها , ومافكرتش في الباقي !!!
تكلمت بصوت مشوش وهي تحاول تتأكد > انتحرت ؟
طلق زفير > انتحرت واخدة اكثر من شريط حبوب , ماتت ..
نزلوا دموعها وقاعدة في صدمة > عمو عبد البارئ توفة بجلطة ؟
وبسببها ؟
تكلم بأسى > الله يرحمه ما كانش يستاهل لمت نفسي هلبة , بس حتى اني ماكنتش متحمل ..
جرحي كبير قعدت عشرة ايام شايل هالحمل بروحي ونحاول نعاملها ببرود وقعدت نفكر شن باندير , في الاخير قلت لازم اهلها يعرفوا لاني مقرر نطلب الطلاق واكيد لما بنطلب الطلاق يبو يعرفوا السبب !! سهلت على نفسي ووريت الصور ..
سكتت وهي مصدومة , مصدومة من الدنيا , من قال مروة تكون نهايتها انتحار !!!؟ ,  الدنيا وغدرها يوصلك لاكبر قدر من الدناءة تخلي الشخص اللي عاقل ينتحر !!! متفكي من الدنيا ومش مفكر في عقاب الاخرة الاكبر ..
خش الدكتور وقطع صدمتهم > السلام عليكم ..
شاف لمنار بابتسامة مرسومة على وجهه كالعادة > الحمد لله على
السلامة
ابتسمت اجباري وردت بصوت مخنوق > الله يسلمك ..
- حاسة بوجع ؟
- نفسي بس يا دكتور ..
- سلامتك , خلي ايمانك بالله قوي, ومزال العمر قدامكم ..
سراج بتساؤل > دكتور امتى نروحوا بيها ؟
- تقدر حتى تو ..
- خلاص دكتور ديرلنا ورقة خروج , ومشكور على مجهوداتك ..
- العفو ولو , ان شاء الله نشوفوكم قريباً تاني عندي وجايكم احلى بيبي , ربي يفرحكم ..
- شكرا دكتور ..
طلع الدكتور , قربت منها أمها > هي نوضي غيري مابين كلمت محمد يجي ..
تكلمت بصوت عالي شوية > لا مانبيشي يجي ..
انصدمت امها بردت فعلها > خيرك اماله من بيروح بينا ؟
سكتت شوية وعرفت انها صيحت على امها > اسفة ماما , بس اهو سراج تو يروح بينا مافيش داعي يجينا محمد ..
شافتلها امها باستغراب وعيون تطلب التفسير , لما عرفت امها مستغربة من اللي قالاته قالت > تصالحنا وحنروح لحوشي ..
ابتسم هو واستأذن > نطلع نمشي ندفع للمستشفى مابين وتيتو روحكم ..
امها > اذنك معاك ربي يعاونك ..
طلع سراج , وتلفتت لبنتها > واخيراً رضيتي عليه الراجل ..
منار وهي بتنزل من السرير > هو اجبرني ان نسمعله , مع أني ماكنتش نبي نسمعله , ولكن هو ابدي في الكلام وماقدرتش نمنعه ..
- ربي يهنيكم , ومرة تانية اسمعي منه , وخلي كل شيء يصير مابيناتكم ويتم مابيناتكم ..
- ان شاء الله ماما ..
- به شن حكالك ؟
- مش مهم , عرفت إني فاهمة غلط ومتسرعة , زي ماقالت امه ماكانش يعرف ..
*
*
طلعوا من المستشفى وركبوا للسيارة ..
قعد هدوء ساد في السيارة , حبت تقطع الصمت وتتكلم > ماما شن رايك تروحي عندي ؟
- لالا شن مزال باديري بوجهي ..
ضحك سراج ضحكة بسيطة > اليوم عازمينك عندنا وماترفضيش , أبرار وزوجتيها , ورواد مسافر شن باديري بتقعدي بروحك ؟
- يا ولدي الناس لما تكبر ماتحبش تبات برة حوشها , ولا تتقلقل من حوش لحوش ..
- خيرك يا خالتي تكبري في روحك قاعدة في عز شبابك مشاء الله ..
- ايه والله , زوجت اربعة وهنيت عليهم ومزال تقول شباب , انتم اللي في شبابكم مشاء الله ..
- ماما هيا اليوم روحي معانا اني مزال تعبانة شوية ..
- حاضر زي ماتبو ..
*
*
حطهم في الحوش وخلاهم ..
كان محوس ومقلوب :[
خشوا لدار النوم :O سروال اهني وتيشرت غادي والسرير مش مفرش , نصدموا الاتنين :[
تكلمت امها وهي تأشر عالكرسي > قعمزي شوية مابين فرشتلك السرير ..
مشت قعمزت بتعب > سامحيني ماما , ريتيه قالب الحوش :[
- هكي لما تخلي راجلك بروحة ماعاش يحب يطلع من حوشة ..
- تقول عليه حوش عزابة ..
وهي تفتح في الروشن تهوي في الدار > امالة شني , تو نضم غير استريحي انتي ..
- صحيتي ..
- اني امك , ماعاش تقولي صحيتي ..
ضمت دار النوم وخلت منار تتكة , ظلمت الدار وطلعت اضم في باقي الحوش >_ ..يتبع ~~
#Orjwan ~_~