رواية #فرحة_هشة

الجزء الخامس عشر

الحلقة #15 من رواية #فرحة_هشة
الأكثر وجعًا، ليس ما لم يكن يومًا لنا، بل ما امتلكناه برهة من الزمن، وسيظلّ ينقصنا إلى الأبد.
•
•
شافت صورة مروة وسراج وهما عرسان !!!!
قعدت تتأمل في الصورة ومش مصدقة ان هدا سراج وهادي مروة ؟
من وين بتتقبلها خيانة صاحبتها او خذلان الشخص اللي حباته ؟
تهز في راسها بلا وتقول > مستحيل مستحييل !!!
ياربي خليني نقول ان نحلم او نتخايل بس مش مروة وسراج !!!؟
بعدين تذكرت ان مقايلينها اسمها مروة !!
في خاطرها ودموع ينزلوا على خدودها > مروة هي ام ميمي ؟
مروة هي اللي تزوجت سراج !!؟
مروة هي خانت خوي وخانتني حتى اني !!
لاااااااااااااش ياربي اني يصيرلي هكي ..
؟معاش تحملت سكرت الدار بالمفتاح وقعمزت عالسرير تبكي , حب حياتها وصاحبتها الخاينة !!!
قبل ماتخونها هي خانت محمد ..
قعدت تبكي وتشهق بالعبرة , ليش هدا كله يصير فيها !!!
لاش مافيش حد صارحها وقاللها ؟
به لاش الكل استغفلها وماحكالهاش ؟
حست بغباوتها كيف كانت لما تسأل فيهم او تفتح في سيرة مروة الكل يغير في الموضوع ومايعطيهاش اجابة على اي سؤال تطرحة بخصوصها ..
قعدت تعاتب في نفسها > لاش اني كنت مغفلة مفروض فهمت بروحي , او واجهت الكل وقلتلهم فهموني احكولي ..
بس فاااااااااات الآوان …
حست بدوخه وماعاش تندري على شيء ..
*
*
الكل نزل ويوتوا في الفطور اللا منار !!!
جميلة > وين مرت خوكم يابنات ؟
سندس > شكلها قاعدة راقدة ..
جميلة > برو نوضوها خلوها تفطر ..
سبأ > تو نركب انوضها اني ..
طلعت مشت ركبت , لقت الباب مسكر بالمفتاح !!
سبأ وهي تطقطق > منار منار ..
بس للأسف منار كانت صايخة وماتندري على شيء ..
سبأ وهي وراء الباب > منار افتحي أني سبأ ..
بعد عدت محاولات لسبأ وهي تكلم فيها وماتردش , نزلت سبأ ..
سهى > ها وينها بنفطروا ..
سبأ > الدار مسكرة ومابتش تفتح ..
اهني نهى وجهها تغير الوان واعتقدت ان بعد مامنار عرفت يمكن انتحرت او دارت حاجة في روحها :[
جميلة > كيف مابتش تفتح ؟
سبأ > خبطت وتكلمت ماكانش في رد ..
سندس ناضت > متأكدة ؟
أروى > مرات تكون في الحمام *حشاكم* ..
سبأ > مافيش صوت امية وقعدت خمسة دقايق قدام الباب ..
جميلة > مرات صارتلها حاجة البنت نادوا واحد من الرجالة قولوله يفقع الباب ..
سندس > اهو منير اهني تو نقوله ..
وفعلاً ركب منير وكسر الباب ونزل ..
خشت سندس تجري لقتها متلوحة عالسرير ودموعها على خدها , خشوا وراها سبأ وسهى  ..
سبأ > سندس كلمي منير مايمشيش خلي نرفعوها للمستشفى ..
سندس مشت تجري وكلمت منير والحوش قعد في ربكة !!
سهى وسبأ لبسوا منار حاجة على راسها ونزلوها ..
سبأ > اني بنمشي معاها ..
سندس > واني جاية معاكم ..
سهى > به طمنونا ..
ميمي شبحت منار جت تجري > حيرها ماما منار ؟ [خيرها ماما منار ؟]
سهى شدتها > مريضة شوية ..
ميمي > هي حليني زي ماما ؟ [هي بتخليني زي ماما ؟]
سهى خشت هي وياها > لالا شوية وتنوض هي ..
*
*
خشت سهى للحوش وركبت لدار سراج لقت صورة طايحة عالارض قامتها لقت صورة مروة وسراج !!!
نزلت لوطة وخشت عليهم ..
سهى > منار عرفت ان سراج كان متزوج مروة صاحبتها ..
جميلة نصدمت > كيف ؟
سهى مدت الصورة > هادي لقيتها طايحة في الدار والاغلب انها شافتها ..
جميلة > بس كيف خوك مش مخلي صورة ليها في الحوش
سهى شبحت لنهى > ايه بس اكيد حد حطهالها ..
نهى > من يكون يعني ؟
سهى > مافيش حد غريب اللي حطهالها يتكلم ؟
نزيها مرت عمهم > استهدوا بلله من بيكون يا سهى ؟
سهى بحقد > اكيد وحدة من بناتك ..
أروى > الزمي حدودك ..
سهى > كلنا نعرفوا انك انتي يا اروى صاحبتك مروة وانتي يا نهى تكرهي منار ..
جميلة > تو مش وقتها هادي الدوة اتصلي بسبأ ولا سندس وشوفي حالها …
سهى > كل شيء يبان مع الوقت بس اقسم بلله لو حد منكم انتم الاتنين دارها والله لما نقاطعكم لا بنات عمي ولا نعرفكم لان تعرفوا كم الموضوع هدا حساس انتم خربتوا حوش عيلة ..
اتصلت بسبأ > قوليلي شن صار ؟
سبأ > قاعد الدكتور ماطلعش قوليلي شن صار عندكم ؟
سهى > بعد ما طلعتوا ركبت لدار سراج ولقيت صورته هو ومروة في العرس ..
سبأ بصدمة > كيف ؟
سهى > هدا اللي صار ..
سبأ > هادي نهى ..
سهى > حتى اني شاكة في وحدة منهم نبي الدليل ..
سبأ > مش امس قالت نبي نخش الحمام *حشاكم* بعد مافتحنا الموضوع امتع مروة لما قالت منار خاطري نشوفها , بعدين ركبت لقيتها كيف طالعة من دار سراج ولما سألتها قتلي نسحابها دارك نبي اسيتون ..
سهى > به باي تو طمنيني اول مايقولولكم حاجة …
سبأ > ان شاء الله سلام
سكرت وجت جبدت نهى من شعرها ..
نهى > ااااااااي شعري ..
سهى > والله والله اللي حتذوقيه مني مش حيكون شوية ..
وجبدتها ليها > كيف انتي اديري هكي كيييييييف ؟
نزيها مرت عمها ناضت وقربت منهم > سهى سلم بنيتي استهدي بلله صلي عالنبي ..
سهى > اللهم صلي وسلم على سيدنا محمد , مرت عمي من يوم ورايح لا انتي مرت عمي ولا بناتك بنات عمي ,عندي خو واحد وخربتوله حوشه هي بنتك حتطلها الصورة اهيا الحقيرة التافها ,ماعرفتوش تربوها ..
جميلة > سهى خلاص اطلقيها كل شيء تو نحلوه بالهداوة اهدي .
على خشت سعيد بو سراج > سهى خيرك شن اديري في البنت ؟
نهى وهي تبكي > عمي كلمهاااااااا شعرريي راااااااسسي ..
سهى وزادت ريشتلها شعرها > مزاال فيك لسان وتتكلمي وتقولي حتى عمي ,سبأ شداتك وشفااتك امس كيف طالعة من دار سراج ..
سعيد صيح > سههههههىىىى اطلقيهاااا وفهمينييييي شن صاااير ..؟
سهى سيبتها ,ونهى قعدت تبكي ..
سعيد > تو فهموني شن صاير ؟
سهى > منار لقيناها صايخة لين ركب منير وهد باب الدار عليها ..
وبعد مارفعوها للمستشفى خشيت للدار ولقيت هادي الصورة ~ومدتهاله~ ملوحة عالارض ..
وامس سبأ شبحت نهى وهي طالعة من دار سراج ..
اصلاً سراج مش مخلي صورة ولا حاجة لمروة في حوشنا ..
سعيد قرب من نهى وضربها كف بقوة > تعرفي انتي شن درتي ؟
عندي ولد واحد بعد مافرح خربتيلة سعادته ,حتى حوشه هدمتيه , حبه نهيتيه بسهولة ..
انتي لا بنت خوي ولا نعرفك وكملوا مناسبتكم هادي وجهكم ماعاش نبي نشوفه …
تعرفي انتي شن درتي ؟
هدمتي حوش ولدي وخليتيني نقاطع خوي لانه ماعرفش يربيك ..
نهى قعدت تحسس في وجهها وتبكي ..
*
*
في المستشفى ..
بعد  ساعتين ..
جاهم الدكتور مبتسم ..
سندس بسرعة > طمنا يا دكتور ؟
الدكتور > ناضت وزي ماقلتلكم لازم انديروا تحاليل ونعرفوا ,في البداية كان معاها نهيار عصبي ,بس معاها حاجة تانية الف مبروك هي حامل ..
سندس وسبأ شافوا لبعض بفرح وحزن في نفس الوقت !!
سبأ > الله يبارك فيك دكتور مشكور ,نقدروا نخشولها ؟
الدكتور > ايه تفضلوا ..
خشولها مابتش تشبحلهم او تقيم وجهها فيهم ..
منار بصوت مهدود وضعيف > اطلعوا برة ..
سبأ > بس ان..
منار بصياح > سبأ انتي اكثر وحدة ماتوقعتكش تجرحيني تاني بعد جرحي الاول انتم لتاني مرة جرحتوني انتم استغفلتوني ~وبدت تبكي~ بسببكم عندي روح في بطني حتعيش بدون اب حتعتبرة ميت ..
ماكلفتوش نفسكم وقلتولي ~وضحكة هزوة~ همكم كان ان خوكم يعيش سعيد بس , اني عذاب ثلاثة سنين بعد عن سراج كان علية اهون من هادي اللحظة لما عرفته بالصدفة انه كان متزوج مروة ..
مش منكم مفروض من اول ماعرفت ان اسمها مروة قلت انها صاحبتي , بس هي ماتت خلاص , جيتو شنو بدلتوني بيها …
هانت عليكم العشرة هانوا عليكم ضحكنا مع بعض ومواقفنا , باش ادسوا علية هدا الشيء مافكرتوش ان حيجي يوم بنعرف تو او بعدين ؟
مافكرتوش في هذا اليوم ؟
طول عمري من لما عرفتكم اعتبرتكم خواتي , بس انتم طول هالفترة تطعنوا فيا ومتفقين علية ..
حطت يديها على وجهها وتلفتت كملت > ياريت تطلعوا خلاص , لاهني وتم كل شيء ..
سندس > بس يا منار اسمعينا ..
منار ومن بين شهقاتها > شن بنسمع ياسندس قوليلي شن بنسمع كل الكلام اللي بتقوليه توا مفروض قولتيه من زمان من زمااااااااااااااان ..
تو فات الاوان ,مش كل الكلام يجي في وقته ,مرات يجي بعد ماينتهي كل شيء ومايكونش للكلام داعي ..
*
*
في الحوش .
بدوا المعازيم يخشوا ..
كان الكل مش لاهي والجو متكهرب بيناتهم ..
سهى وسندس هما وصغارهم قعدوا فوق ومابوش ينزلوا يحضروا السبوع ..
وسبأ قعدت في المستشفى ..
*
*
في مكان تاني من العالم وبالتحديد في الايمارات
كان سراج متكي على السرير ويحاول يتصل بيها في البداية كان ينادي بعدين تحول لمقفل اتصل بابرار بيسألها قتله في السبوع ,اتصل بامه بخواته مافيش حد بيه يرد عليه ..
او بالاحرى مش عارفين شن بيقولوله !!!
*
*
في المستشفى فتحت عيونها وهي تحس بتعب الدنيا عليها قعدت تمس في بطنها ومش مصدقه ان في روح في داخلها ومن الانسان اللي كانت تحبه ..
مش مصدقه اللي صارلها , تعبت من الدنيا تفرحها شوية وتبكيها هلبة !!!
كل ماتوقف على رجليها تواجهها الدنيا وتضربها تاني واطيحها كل صدمة اكبر من التانية , تذكرت الحادث اللي داراته هي وريان , وتذكرت كيف قعدت في المستشفى , وتذكرت موت ريان , تذكرت صدمتها بمرضها , تذكرت رفضها لسراج بس لانها تحبه , تذكرت يوم زواج سراج وكيف كانت تفكر في كل لحظة انه مع مراء غيرها , تذكرت الثلاث سنين اللي عاشتهم بعيد عن اهلها وصحابها وبرة وطنها بس على خاطر حبها , وتو جتها الصدمة ان صاحبت الابتدائي صاحبت عشرة عشرة سنوات تزوجت الانسان اللي تحبه ..
تنهدت وقالت > الله يسامحك يا مروة , مش حنقول الله يرحمك من اليوم حنقول الله يسامحك , عن نفسي جرحي قاعد جديد مش حنسامحك , بس في الاخير هو ربي اللي يسامح ..
كانت بحداها ابرار تشوفلها وساكتة منصدمة زيها !!!
أبرار > منار خلاص ريحي نفسك ياسري شوفي لصحتك ..
منار وهي تبكي > يا أبرار فيا نار مافيش حد حاس بيها , اني شن امدايرة باش نتعذب هكي ؟
أبرار > هدا مش عذاب هدا ابتلاء من ربي لازم ترضي باللي كتبهولك ربي يبيك تصبري على ما ابتلاك ..
منار > تعبت , اني مقهوورة يا أبرار ..
شرين موبايل ابرار قامت الموبايل وشافت عالشاشة رقم سراج !!
أبرار > يتصل ..
منار > ماترديش ..
أبرار > لاش اديري هكي ..؟
الباب طققطق ..
خشت سبأ > ممكن نخش ؟
منار > سبأ خلاص اطلعي روحي مانبيكش تخشي , مش مسامحة اي حد فيكم , المرة الاولى كلامكم وجرحكم ليا كنت متحملاته بس لأن كان من حقكم لاني رفضت سراج وياما سمعتوني كلام ورضيت , بس انتم تو ماعندكمش مبرر ..
ماخليتوش عندي حتى حرية الاختيار وقلتولي الحقيقة ..
هكي غميتوني وزوجتوني في تلاتة شهور باش مانعرفش بالموضوع مش لان سراج يبي , مش مسامحة اي حد فيكم ..
جي بو سراج وخش عليهم جايب عصير وشكلاطة حطهم فوق الطاولة وتكلم وهو منزل راسه > الحمد لله على السلامة , الف مبروك ~بغصة~ يتربة في عزك , ربي يهدي الوضع ويفرج عليك , سامحينا يابنتي حقك علينا وكل الكلام اللي بتقوليه صح ومعاك فيه الحق ..
طلع وخلاهم لحقاته سبأ وسكرت الباب ..
منار > شن قلتي لماما ؟
أبرار > ماتندريش جابني محمد عالاساس للسبوع لما قالولي انك في المستشفى قلتلهم ارفعوني جابني بو سراج ..
منار مسحت دموعها > كلميهم ..
أبرار > شن بنقوللهم ؟
منار > قوليلهم انك بايتة ..
واقعدي معاي في المستشفى ..
أبرار > ماعنديش حوايج ..
منار > هما جابولي حوايجي خودي حاجة منهم عادية ..
أبرار > به ..
*
*
في الحوش ..
روحوا كلهم والتمت عيلة سراج ..
سعيد > اي حاجة باديرها البنت معاها فيها الحق ..
جميلة > كيف ؟
سعيد > كل واحد يحط مكانة في مكانها , سراج هو اللي غالط , من حقها حتى تحرمه من اللي في بطنها , لان هي ديما تفكر فيه وتفكر في مصلحته حباته , بس ولدك خذلها سراج كسرها جرحها لما دس عليها ..
اني تو بنكلمه لان من بكري يتصل وبنقوله الحقيقة , وحيرجع يلومك انتي لان انتي اللي زوجتيهاله بعد ماعارضناك كلنا , وانتي حتسكتي وحتتحملي لان غلطك هدا ..
اتصل بسراج وحكاله كل شيء بدون مقدمات من غير مايتوقع اي شيء يصير لولده ..
*
*
نصدم لما اتصل بيه بوه وقاله , عرف ان يمكن حب حياته تدمر وانتهيه , مش يمكن يتصلح , الغلطة غلطت عمر كامل , كانت فرحته بيها منسياته انه داس عليها حاجة كبيرة ..
مادار شيء غير انه قام سماعت التلفون واتصل بشركة الطياران وحجز على اول طيارة ..
فكر كويس , رتب كلامة , توقع كل التوقعات في اللي جاي !!
*
*
جي يوم جديد وخشت الشمس على دارها في المستشفى , يوم داس هلبة حجات ..
فتحت عيونها لما حست الشمس خشت تتاوبت وتكلمت بشوية > ابرار ..
أبرار ناضت > امم نعم ؟
منار > نبي الحمام *حشاكم* ماعنديش جهد انوض ..
أبرار ناضت وشدتها وقعدت تسعد فيها لين وصلت ..
طلعت من الحمام صلت وهي مقعمزة , فكرت كيف تحكي لعيلتها ؟ , فكرت كيف حتبدأ تعيش حياتها ؟ , فكرت كيف حتواجه سراج , وشبحت للخاتم اللي في صبعها وتكلمت بصوت مخنوق > ياريت القصة كلها في مجرد خاتم ننحيه ونحذف كل شيء وراي ..
أبرار > شن مفكرة ؟
منار > ياريتني اني في مكان مروة اني تحت التراب وهي تعيش معاه ..
أبرار > استعوذي من الشيطان ..
منار > اني مش عارفة من وين بنبدأ كيف بنحكي لماما ~وتنهدت~ وكيف نتصرف عموماً ..
أبرار > فكري كويس وفكري في اللي في بطنك وحاولي ماتكونيش انانية ..
منار > ربي يرزقني الالهام والخيرة فيما اختاره الله ..
قعدوا هكي لين جت العشية وباب الدار انفتح ..
•
•
إنه الحنين لما تركناه خلفنا ولن نعود إليه. أماكن جميلة تتمنّى لو أنك لم ترها حتى لا تحزن. لحظات باهرة , تندم أنك عشتها كي لا تتذكّر. رجال مدهشون تودّ لو أنك لم تلتقِهم, كي لا تبكيهم ما بقي من عمر, كما لو أنهم رحلوا.
•
•
يتبع ~~
#Orjwan ~_~