ပြီးပြည့်စုံခြင်း [COMPLETED]

[ 44 ]

Unicode

အပိုင်း - ၄၄

'Springtime Dream'ရိုက်ကူးနေရင်း သုံးရက်မြောက်နေ့တွင် ဇာတ်ဆောင်မင်းသားအဖြစ်သရုပ်ဆောင်မည့် ဖန်မင်သုံ့ကို ဝမ်ကျားနင် တွေ့ဆုံခဲ့သည်။ တကယ်တမ်း ဖန်မင်သုံ့က ဝမ်ကျားနင်အတွက် အသိမိတ်ဆွေဟောင်းသာဖြစ်ပြီး သူတို့အတူတူ ရုပ်ရှင်ရိုက်ဖူးခဲ့၏။ ထိုအချိန်တုန်းကတော့ ဖန်မင်သုံ့က ဇာတ်ပို့နေရာပင်။ အတိတ်က သူတို့ ခင်ခင်မင်မင်နေခဲ့ကာ သွားသွားလာလာ၊ စားစားသောက်သောက်ရှိခဲ့သည်။

ဖန်မင်သုံ့က အစွန်းရောက်သောစရိုက်ရှိသည်မို့ သူ သဘောမကျသောအရာမှာ များပြားလှ၏။ အသည်းအသန်အပြစ်တင်တာမျိုးမလုပ်သော်လည်း သူ သဘောကျလား၊ မကျဘူးလားဆိုတာ သူ့မျက်နှာကိုကြည့်ရုံနှင့် ရှင်းရှင်းလင်းလင်းသိနိုင်သည်အထိ။

အတိတ်မှထိုသူဟာ ဝမ်ကျားနင်နှင့်အဆင်ပြေခဲ့သော်လည်း လက်ရှိဝမ်ကျားနင်ကိုမူ သိပ်ပြီး သဘောကျပုံမရ။ ဝမ်ကျားနင် သူ့ကို နှုတ်ဆက်လိုက်ပေမယ့် ဖန်မင်သုံ့က ခေါင်းညိတ်ရုံ တုံ့ပြန်ကာ တခြားလုပ်စရာတွေအကြောင်းပြပြီး ဝမ်ကျားနင်နှင့် ကြာကြာ စကားမပြောချင်ဟန် လှည့်ထွက်သွားလေသည်။

ကြည့်ရတာ လုကျင်းလန်က ပရိုဂျူဆာအား အကူအညီတောင်းပြီး ဝမ်ကျားနင်အတွက် နေရာပေးလိုက်ခြင်းကို ဖန်‌မင်သုံ့ သိသွားပုံရ၏။ သို့ဖြင့် ဖန်မင်သုံ့က သူ့အား အစကတည်းက မကြည်ပေ။

ယနေ့ရိုက်ရမည့် scene က ကော်ဖီဆိုင်ထဲမှာ။ ဖန်မင်သုံ့သရုပ်ဆောင်ရမည်က သူ အမျိုးသမီး‌အမှုသည်တစ်ဦးနှင့်တွေ့ဆုံနေသည်ကို ဇာတ်လိုက်မင်းသမီးနှင့်သူငယ်ချင်းများက blind date လုပ်နေသည်ဟု အထင်လွဲသွားသည့်အခန်း။ ဇာတ်လိုက်မင်းသမီးက စိုးထိတ်ကာ တားဖို့မရဲသော်လည်း ရွှယ့်ယုံတစ်ဖြစ်လဲ ဝမ်ကျားနင်က အနားကိုရောက်သွားပြီး ဇာတ်လိုက်မင်းသား၏မျက်နှာအား ရေခွက်ဖြင့် ပက်၍ သူ့ကို ထားခဲ့ပြီလားဟု  ဟန်ဆောင်ငိုယိုပြောလိုက်သည်မို့ အမျိုးသမီးအမှုသည်,လည်း ကြံရာမရဖြစ်ရင်း ထိတ်လန့်သွားခဲ့လေသည်။

ရိုက်ကူးရေးမစမီ ဝမ်ကျားနင်က ဖန်မင်သုံ့နှင့်အတူ ရီဟာဇယ်လုပ်နေ၏။ ခွက်ထဲမှာ ဘာရေမှမရှိသော်ငြား ဖန်မင်သုံ့ဆီ ရေပက်လိုက်ဟန် လေ့ကျင့်နေမိသည်။