انتي نبضي💘(باللهجة الجزائرية) 🇲🇦🇹🇳🇩🇿

الحلقة 3

الحلقة 3
.
.
.
♡♡♡♡♡♡♡♡♡♡♡♡♡♡♡♡♡♡♡

قتلكم جاو ذوك الخطابة و قبل ما ندخل قاتلي مليكة كنة عمتي لبسي هذ السباط قتلها اودي عالي منعرفش نمشي بيه قاتلي البسيه واش دخلك ...جاو الكناين لوخرين قلولي لالا متلبسبهش يطيحك ..ومن بعد شفت مليكة تشوف فيا شوفة تاع لبسيه بسيف باسكو كانت كاينة حاجة في راسها ..المهم قتلهم نلبسو نلبسو ....لبستو و ديت ذيك القهوة و رحت نمشي و نتمايل باين بلي منعرفش نمشي بيه ..دخلت عليهم مشافوش قاع فالسباط نخلعو فيا ..بقاو غير يشوفو فيا متوقعونيش نكون هاكك دايرين في حسابهم وحدة عروبية من دوار باين بلي ماشي شابة ..المهم حطيت ذاك سني تاع القهوة و ذاك الصباط فيه ميترا...فرغتلهم و مديتلهم ..قاع فنجان فنجان ...بصح من شربة لولة مكاش لي زاد شرب بقاو يشوفو في بعضاهم و يكمشو في فامهم تقول شربو الليم ...عرفت بلي مليكة كاش ما دارت فيها باسكو هي طيبتها ...وزدت تاكدت كي عمتي مشربتش من القهوة لانو طبيب منعها عليها على ذيك مليكة استغلت الفرصة ..المهم حطو ذوك الفناجين و بقاو يسقسو فيا ..وانا بطبيعة الحل نلبز فالهدرة بلعاني ..وعمتي من موريا تصلح ...المهم قعدنا وحد شوية و من بعد غمزتني عمتي (تاع صيبو خرجي ) ...كي جيت خارجة مشيت زوج خطوات و نطيح و حدة الطيحة الله لا يشوفكم ما عرفت لا نضحك و لا نبكي ...ناضت ختو تضحك ثاني رفدتني وبدات تقولي نورمال نورمال ..وعمتي ماتت بالحشمة .. المهم خرجت و قلولي ضروك هو يجي يشوفك ....دخلوني في شومبرة و حدوخرة و من بعد دخل ..منكذبش عليكم بقا غايس فيا و في وجهي الهدرة و مهدرش ما عرفت لا عجبتو ولا معجبتوش ..المهم راحو ..قلولنا من بعد نردولكم الخبر ....المهم كي جاو خارجين خرجت معاهم عمتي و كناينها كامل يوصلو فيهم فالباب ..وشفت مليكة راحت تجري لصالو جابت ذيك القهوة و فرغتها قاستها و بدلت السكرية تاع السكر. ......رحت ليها قاتلها واش درتي فيها ..قاتلي سكتي سكتي من بعد من بعد ....(بصح قاع ذاك الشي وومكاش لي فاق للقهوة لانو هوما حشمو باه يقولو القهوة فيها حاجة و عمتي متشربهاش وزيد مليكة مخلتلهمش الفرصة باه يذوقوها ) ...معليناش كي راحو ذوك الخطابة جات عمتي بهدلتني انا و مليكة على ذاك السباط و قاتلي نخبر عليك بويك ...معليانش بقينا نستناو فالخبر واش يقولو مع الاذان تاع المغرب ديراكت جا بابات العريس لراجل عمتي باه يردلو الخبر قعدو ثم برا وحد شوية و من بعد دخل راجل عمتي لقاتلو عمتي تجري و احنا عند الباب نتصنتو ..قاتلو واش قالو ...قلها اسمعي .....
__________________