مع أذان الفجر بدت الحركة تدب في الداخلية ، و مريم قامت نورت نور الغرفة ، و شهقت :
- فاطني ، ديني... مالكن مكنكشات في بعضكن كدي؟؟
فاطمة اتلفتت بخوف و قالت :
- لو سمحتي يا مريم انتي ونهى ، بلاش هزار بايخ...
مريم مشت فتحت شنطتها و قالت وهي بتجهز في هدومها :
- اجي يخواني ، هظار شنو عاد بالصباح ده....
دينا رفعت راسها و قالت :
- ده ما هظار ، الداخلية دي مسكونة ، انا كل يوم بسمع حركة بالليل جنب الشباك ده ، بس امس كان اوضح....
مريم و فاطمة عاينو للشباك الكان عبارة عن شرايح خشبية مرصوصة بالعرض ، و في بعض الشرايح واقعة.....
قامت مريم مشت بي ثقة و عاينت عبر الفتحة ، وقالت :
- بري مافي اي شيطان بي هني
و ضحكت ضحكة عالية خلت نهى تصحى وتقول بضجر :
- مالكم ياخ ، اسكتو خلوني انوووم....
.....
منار كانت ماسكة المرايا و بتعمل مكياج خفيف بعد ما لبست ، و وفاء واقفة تعاين ليها ، منار انتبهت و قالت وهي بتمرر قلم الكحل على عينها :
- مالك واقفة بتعايني لي كده ؟
منتظراك عشان عاوزة مرايتك دي ، حقتي اتكسرت....
و فجأة ضيقت عيونها و قالت وهي بتدقق في وش منار :
- مالا عيونك دي ، كنتي بتبكي ولاشنو ؟
منار قالت باستنكار :
- أبكي ؟؟؟؟ أبدا بس طول الليل ما جاني نوم
و ختت المرايا و قالت :
- خايفة تقولي علي مجنونة لو كلمتك
وفاء طوالي شالت المرايا و قالت بدون اهتمام :
- لا مابقول مجنونة ، في شنو ؟
منار قالت بهمس :
- امس بالليل... كنت حاسة بحاجة ما طبيعية
- حاجة ؟؟؟ حاجة زي شنو ؟
- مابعرف ياوفاء بس حسيت انو في شي بتحرك في الغرفة دي
- بسم الله ده كلام شنو بس ، إنتي أعقل من كده!!
منار قربت من وفاء و قالت :
- أنا حبوبتي الله يرحمها كانت بتحس بالمكان الفيهو جن ، وبتعرف طوالي ، و كانت بتقول إني حأورث منها الحكاية دي بس كل الناس كانو بقولو عليها بتخرف ساي ، بس بصراحة.......
وفاء قاطعتها وقالت بلهجة حادة :
- منااار!!!! أرجوك ماتصدميني فيك ، إنتي صحبتي القدوة العاقلة ما حتصدقي تخاريف زي دي..... ارح ارح خلينا نطلع المحاضرة حتفوتنا
