الساعة ١ صباحا كريم فتح باب البيت و هو سايق امو ، و وراهم المنذر ، قعدها في السرير في الحوش ومشى جاب ليها موية.... و قعد جنبها و قال :
- أنا قدرت أطلعكم بواسطة معارفي ، بس ده ما معناهو إن الحكاية انتهت على كده
المنذر قال :
- يعني قصدك شنو
- يعني القضية حتكون مستمرة لمن نشوف حيحكموا بشنو ، و ده حيعتمد على تقرير الطبيب الشرعي الحيكشف على هويدة و يحدد مستوى الضرر.....
شادية قالت :
- انت ما شرطي ، ما تتصرف
- يمة ده قانون ، و القانون بمشي على الكل ، و أنا القدرت عليهو عملتو و طلعتكم البيت.....
شادية أشرت للمنذر وقالت :
- كدي قوم شوف الشقية دي مرقت كيفن..
كريم سبق المنذر على الغرفة و اتفاجأ إنها مقفولة بالمفتاح ، والمنذر جاب المفتاح و حصلو و فتح الباب... و كريم مباشرة عينو وقعت على الشباك ، شغل كشاف الموبايل و بقى يعاين في الشباك ، المنذر مد يدو بس كريم مسكو و قال :
- لا ما تلمس شي
- ليه؟؟
- ماعارف بس في شي غريب هنا... خلي للصباح.....
..
........
- معقولة يا عمري! أنا أنساك برضو يانهى ؟ أنا بس كلمتها أول لأن الوقت حيتأخر ، أما إنتي زولتي عادي أتصل ليك في أي وقت
- طارق ما تستهبل أنا حافظاك كويس وفاهماك ، ولو طلعت بتلعب علي وقسما أعمل فيك شي عمرك ماشفتو
- نهى حبيبتي ليه بس الأسلوب ده ، أنا معتبرك زي نفسي و بثق فيك و كلمتك نحن دايرين نصل لشنو مع البت منار دي...
غيرت أسلوبها و قالت بدلع :
- بس أنا بغير عليك
-معقووووول القمر يغير من النجوم ؟ لا ياخ نجوم شنو... القمر حيغير من حصحاص الأرض ؟؟؟؟ هي منار دي تسوى شنو قصادك يا نور عيوني
- جد يا طارق ولا.....
-جد الجد كمان ، سيبك منها حتخرب ليلتنا البت دي ، و أنا مشتاق ليك..... كدي وريني لابسة شنو
- حأكون لابسة شنو يعني ؟ و بعدين لزومو شنو السؤال البايخ ده ؟
- يا نهويتي أنا بس داير أتخيل نفسي و أنا بتكلم معاك إنك جنبي حقيقة... لابسة شنو يا حبي ؟؟
- أمممم لابسة اسكيرت جنز اسود و قميص أبيض بأكمام طويلة و طرحة حمرا
- ده شنو ؟ لابسة ديل حسي بالليل ده ؟؟
- أيوة ، عادي....
- طيب طيب... يلا يا بيبي أنا نعست و بكرة وراي مشاوير كتيرة عشان عرس أختي و كده... سلاااام
