في بيت شادية....
كريم وقف وهو بعاين للاتنين البتبادلو نظرات الاستنكار... منار الكانت مستنكرة انو يجيبها هنا بدون ما يكلمها الا في الطريق ، و شادية الكانت مستنكرة إنو يجيب ليها بت غريبة و يقول ليها تخليها تعيش معاها ، أما فهو فابتدا يستوعب المجازفة الكبيرة القام بيها ، إذا كانت هويدة زوجة المنذر ماقدرت تتحمل نسيبتها و لا تقعد في بيتها فكيف منار حتتحملها...
قال بابتسامة مزيفة :
- يمة نحن جايين من سخانة شديدة ، اعملي لينا كبايتين عصير بارداااات
شادية عاينت ليهو بطرف عينها و قالت :
- فوت قدامي كسر لي التلج ماعندي ليهو قدرة...
منار فهمت الحاصل ، و بعد شافتهم مشو اتنفست بعمق وقالت بصوت مسموع :
- ياربي الأيام داسة لي شنو....
..
جوة المطبخ :
- يمة براحة كده حتسمعك
- هووي يا عبدالكريم أنا الحاجات دي مابتنفع معاي ، و ناس الحلة يقولو شنو.. جبت لي بت من الشارع قعدتها معاي؟
- الله يهديك يمة البت مامن الشارع و أنا دايرها على سنة الله و رسوله ، بس أرتب أوضاعي و......
قالت بانفعال :
- كمااان... داير تعرس دي؟؟؟ البت الماعندها والي دي ؟؟؟؟
- يا سلاااام خلااااص خلييييتها ما داير اعرس زاتو......
- يا ولد اسمع كلامي وشوف ليك بت من توبك و اهلها معروفين...
- طيب طيب... كدي انتي حسي امشي اقعدي معاها شوية و حاولي اتونسي معاها ، صدقيني حتدخل قلبك.....
.....
طلعت شادية و جا وراها كريم شايل العصير ختاهو و قعد ، و التلاتة بقو متوترين....
بس فجأة دخل زول ، هايج.... و قال :
- وينو العامل فيها راجل ده..... فلاحتو يضرب في النسوان
كريم وقف و قال :
- يا حاج براحة....
- ما براحة ، انا ركبت اول طيارة و جيت عشان اوريهو كيف تاني يمد يدو على بتي... زح كده يا كريم انا كلامي ما معاك
- سمي بالله ياحاج.. حتتحلا ان شاءالله
ضرب الأرض بالعصاية الكان شايلها وقال:
- هو كان راجل صحي يجي يقيف قدامي هنا ده
- انا حأجيبو ليك لغاية عندك بس انت اهدا وبنتفاهم
الحاج لزاهو و قال :
- مافي اي تفاهم ، تضربو البت و تكسروها و تجو تقولو نتفاهم ؟؟؟
