أول مرة يحس نفسو عاجز ، محتار قدام لغز مهما يفك طلاسمو بلقاهو لسه غامض ... بس كل العملو حاليا إنو قدر يطلع منار من صالة العرس ، و يبعدها من الظنون و الشكوك...
منار فاقت ولقت نفسها في العربية... اتلفتت لقتو جنبها سايق ، ووراهم وفاء الكانت بتبكي و ترجف من الخوف ، و زادت رجفتها لمن منار اتلفتت عاينت ليها ، و سألت باستغراب :
- في شنو ؟
كريم قال :
- بعدين بفهمك...
رفعت كفها عاينت ليدينها الكانو وسخانين بالفحم ، قالت :
- ده شنو ؟
كريم ما رد ، و هي بدت تتحسس وشها و قالت :
- ده منو العمل فيني كده... ردو علي
هنا وفاء بقت تبكي اكتر ، و منار اتلفتت عليها وقالت :
- وفاء ، فهميني ماتبكي....
...
كريم وقف بيهم على جانب الطريق ، و اتلفت بكل جسمو على منار وقال بجدية :
- أنا ما عارف أشرح ليكم كيف و يمكن تستغربو خاصة إني شرطي و زول منطق و عقل ، بس البحصل ده لازم تفهموهو كويس عشان نعرف حنعمل شنو..
منار قالت :
- كريم قول مباشرة بدون مقدمات..
- سولا.. عبارة عن.. امممم ماعارف بالضبط شنو ، بس تقريبا جن أو روح خبيثة ، دايرة تنتقم مني في الناس القريبين مني بس لسه ماعرفت السبب شنو ، و هي حاليا ساكنة جسمك يا منار ، هي الحاولت تقتلك و هي البتخليك تتصرفي تصرفات غريبة..
منار قالت :
- كريم إنت جنيت رسمي
- طيب تقدري تفسري لي الحصل قبل شوية ده ؟؟؟
و لا اقول ليك خليك انتي...
اتلفت على وفاء وقال :
- وفاء قولي ليها الحصل شنو
وفاء قالت بانفعال :
- فجأة الباب اتقفل ، و منار بقت تصدر أصوات غريبة ، و بتجري بسرعة حولين المكان الضيق ، ما كنت شايفاها بسبب الضلام بس حاسة بحركتها السريعة.. و تقريبا هي الشخبطت في المرايا و خربشت وشها...
منار اندهشت و قالت :
- روح خبيثة؟؟؟ جواي أنا ؟؟؟؟؟
كريم قال :
- للأسف مافي أي تفسير تاني
دموعها جرت ، فتحت شنطتها عشان تطلع منديل.. لقت موبايل وفاء و مدتو ليها ببساطة بدون ما تفكر الجابو هنا شنو ، بس وفاء ما سكتت :
- ده الجابو في شنطتك شنو ؟ كل شي بيأكد إنو كلام كريم صح....
كريم قال :
