الاقربون

الجُزء الحادي عشر

الما يحب ينطيك وجهة
آنطي گفاك لا تكَل للمــــاشـي عنك تاني
لا تطـــخ الراس وتـنـزّل غـلاك
شنهي چا بالدنيا مـامش ثاني

~~~~~~~~~~~~~~~~~~~~~

ليلاف:-

حطيت ايدي على العملية دتوجعني حتى ما اگدر اغفى، باوعت للغرفة واضح بناتية بيها سريرين بألوان فاتحة، جريت الحجاب خنگني مددت صافنة بدون هدف، شنو معنى حياتي وشنو المغزى من عيشتي؟ الك حُكم بيها يا رب

ما احب الف شعري احس راسي يصير يوجعني فتحتة وتنفست مبتسمة براحة، غمضت عيوني احاول انام اندگت الباب

" تفضل

دخلت بنية مبتسمة

" واضح عليج التعب حبيبتي اهلاً وسهلاً بيج

ابتسمت اجاملها

" وبيج اكثر تسلمين

حطت عصير وماعون كيك ابتسمت الي منحرجة لان اباوعلها، تركتني وطلعت، باوعت للكيك اني جوعانة هذا الضابط ما تذكر احنة بدون عشاء؟، اكلت كيكة وشربت من العصير عطشانة حييل 

رجعت ممددة اتلمس جرحي ما احب العجز الي اني بي، متعودة اتحرك اركض وما انام هواي، ركزت اتمعن بتصاميم السقف واضح البيت قديم بس مسوين ترميم داخلي شكلة صاير مرتب، التفتت على الباب لمن انفتحت بسرعة، دخل ولد يحجي مستعجل

" تالة، تُيام يريد چاي گومي سويلة حبابة هاي مسار ام راس المربع ما امن اخليها تسوي شي

لمن انتبه الي وگف مصدوم، ضحكت لا ارداياً على شكلة باوعلي وحجة ببلاهة

" سوكة العبيطة شجابها ببيتنا؟

تفاجأت صافنة علي شيقصد هذا عليمن ديحجي، التفتت اريد اشوف تليفزيون حتى ابرر كلامة، ماكو شي، اشرت على نفسي اخزرة

" هاي علية؟

حك حاجبة يضحك بأستفزاز

" شنو هذا شعرج داينيني منة اخلي مسار تغسل بي مواعين

فتحت حلگي بتعجُب شنو هالانسان

" احترم نفسك اغاتي، لا تخليني اشوفك وجه ما يعجبك، اطلع برى

شديت على كلامي بالنهاية، باوعلي كاتم ضحكتة ويفر ايدة يم راسة عود مخبلة، طلع واني مصدومة غريب شنو هالصلافة المو طبيعية، مددت دمي محروگ اريد شخص اشبعة كتل واطلع قهري بي

~~~~~~~~~~~~~~~~~~~~

شيرمين:-

مليت من الگعدة وي البنات ونسيت احنة ما متعشين اجة لؤي يضحك

" هذا الزاجل المكعكل المن؟

عقدت حاجبي مستغربة

" شنو؟