الاقربون

الجُزء الثامن والاربعون

ماندري المشاهد صعبة تنشاف
ام وتشوف ابنها بـ علم ملفوف
الوجع من الكسر مايقبل يهيد
مثل ليل الشتة للتوة معيوف

_____________________

مسار:-

سديت التليفون من يوسف مبتسمة، گال رايح للبصرة يجيب اهلة الكربلاء علمود تجهيزات العرس، اهلي شايليني على كفوف الراحة بحيث حتى امي ما تصيح علية وين ما يشوفوني يحظنون بية واني اضحك

ما متعودة على هيج دلال منهم جنت شابعة رزايل، امي كُل يوم تطلع تجهز الي اني ما احب هالسوالف وتاركة كُل شي عليها لان ذوقها حلو، هي وعمة ام سَنمار مستلمات مهري ويتسوگن

تالة وشيرمين ما يمر يوم اذا ما يخابرني ونظل ساعات نسولف حسيت نفسي صرت عزيزة، هيج شعور الفقدان يخلي الناس يهتمون بيك! باركت الشيرمين على حملها اصنف عليهن لان اني ويوسف متفقين ما نجيب اطفال الا نخلص الكلية وهن ثنينهن حوامل

صار الليل ويوسف ما متصل هو گال بس اوصل اخابرج، اتصلت على تليفونة اكثر من مرة ما يرد، گلت اكيد گاعد وي اهلة وملتهي ما يدري بتليفونة، گعدت اسوي خلطات البشرتي اول تالي اني اهتم جنت دومني مهملة بس من اريد اطلع ارتب

دزيت رسالة اليوسف قبل ما انام

( تصبح على خير)

حجيتها بزعل لان ما رد علية، سديت التليفون ونمت صايرة اهتم بنومتي حتى تروح الهالات قبل العرس، غير صرت باندا بسبب السهر والدراسة، ومرات اذا ماكو دراسة اخابر يوسف و نسهر نسولف

~~~~~~~~~~~~~~~~~~~

ليلاف:-

غافية واسمع صوت موبايل يرن يم راسي، اني بالگوة لگيت وضعية نوم ارتاح بيها بالليل انوب من الصبح هذا يصحيني، رفعت راسي صافنة ع الساعة بالـ6 حتى لؤي بعدة نايم، جريت التليفون صافنة عليه مكتوب اسم (علي)

افتريت على لؤي دغيت كتفة

ليلاف:- لؤي گوم رد ترى انسطرت

فتح عينة بصعوبة مسح على عيونة واستقام يسحبة من ايدي، خلاه على اذنة يگول الو وهو ما فاتح الخط اصلاً، جريتة منة فتحت الخط والمايك وياه لان هو فدنوب مطفي

لؤي:- الو

علي:- السلام عليكم

لؤي:- وعليكم السلام تفضل

علي:- انا اخو يوسف نسيبك عرفتني؟