**اول رواية نكتبها باللهجة الليبية نتمنى تعجبكم ونتمنى دعمكم
حبيت تكون الرواية فيها الضحك اكثر من المواقف الجدية لهذا حتكون الرواية كوميدية لاني انحب نكتب مواقف عن الضحك والبصارة
نتمنى دعمكم لروايتي هذي ولو عجبتكم حنكتب روايات زي هكي اكثر
يلا منطولش عليكم**
-- رواية ليبية (سڤن أب) --
_________________________
فتحي: معصب والضغط شايط .. ياسطل وين السورية مش قلتلك معاش تاخد شي مش ليك
مراد: مرمي على الصالون ويتفرج على التلفزيون .. وين نندري بدعوتها اني سوريتي ومعلقة ملياش دخل بيك، انت تلوح وتجي تنكد ع خليقتي برا اسأل خوك جهاد اكيد هو يلي خداها لاتي سمعته امس يسأل عليها
فتحي: حسبي الله اقسم بالله حتقتلني انت وباقي خوتك .. طلع وهو يسب في مراد
مراد: ياشينك بخث خو كبير بدون عقل الله غالب خليني انوض اندوش خير ما يفوت الوقت
ونهض وخدي بعضه وخش للحمام يدوش
---------------
أحمد: شاد سروال السورية وواقف جنب جهاد يلي يحددله في سوريته .. انشط وقت على الصلاة
جهاد: تباهي قريب انكملها
أحمد: تهيا خيرك منطول يافرخ
جهاد: اقسم بالله لو متسكتش انسيبها وحددها بروحك
أحمد: يبتسم بدون نية .. خيرك جهودة مقلت شي اني، اصلا مزال بكري
جهاد: شافله من فوق لتحت .. امشي لمعلي كندرتي لنبطل وحددها بروحك
أحمد: برا ارقد ضحكنالك بديت تدلع حدد وصكر فمك
جهاد: عارفك عقاب تنبال، بعد عليا خليني رايق
مكملش كلمته الا وهو فتحي خاش
فتحي: كان يتكلم وهو معصب .. جهاد وين سوريتي
جهاد: بهدوء .. اهوني حددتها ليك وتلقى الزيبون في دولابي غسلته امس في الليل وكنت بنحطه في دولابك امس بس نسيت
فتحي: سلمك خوي اقسم بالله انت الوحيد يلي تتقدر في ها الحوش
جهاد: ابتسمله .. تستاهل والله مش زي بعض ناس .. وشبح لـ أحمد
أحمد: ايه اني منستاهلش يلا بسرعة وقت يا جهاد
جهاد: اقسم بالله سطل .. وكمل تحديد
--------
معز: واقف قدام باب الحمام .. نااااصر اطلع وقت النهارات
ناصر: يادعوة امشي للحمام الثاني اني مزال امطول
معز: النهارات الحمام الثاني مشغول خوك مراد مات فيه، ناصر بالله عليك قلتلك اكثر من مرة دير حمام كل اسبوع اقل شي لكن انت لاا في الشهر مرة
ناصر: بعصبية .. شن حسك قلت؟
معز: لا سلامتك .. مشي قعمز على الصالون .. النهارات وكأن في فالحمام تلفزيون
مراد: طالع من الحمام ويجفف في شعره .. معز ان شاء الله قعد مدوشتش؟! حي عليك وحي من بوي
معز: مراد خوي الغالي الحمد لله طلعت كنت نحسابك ميت .. وعلى طول خش بعده للحمام وسكر الباب
مراد: ضحك على جنب .. معز
معز: خير؟
مراد: المية الساخنة كملت
معز: شنوو النهارات مفيش شي كامل في ها الحوش
مراد: ميت ضحك على معز .. وسع بالك انبصر عليك
معز: مصح وجهك بالله بعد خليني ناخد راحتي في الحمام النهارات حتى في الحمام مضايقيني
مراد: انشط بدون كلام اقسم بالله لو متجهزتش قبل الساعة ستة ونص حتشوف وجه بوك الثاني
معز: به فهمنا، انت اقلب وجهك وتو نجهز قبل الوقت
أنت تقرأ
سڤن أب (رواية ليبية)
General Fictionالكاتبة: هذي الرواية برعاية: معز: .... الكاتبة: تكلم قولها معز: منيش الكاتبة: تقولها بالله عليك معز: اااااخ الكاتبة: هذي الرواية برعاية: معز: النهارات
