معز: شن يخرط الفرخ هذا .. وفتح الباب وكان يغلي .. أحمد
أحمد: بصدمة .. معز شن ادير هنا؟
معز: شن نسمع فيك تقول خيره جهاد؟
أحمد: كان مصدوم ومش عارف شن يدير .. ءءءء اا ش شنو
معز: نسالك فيك خير جهاد تكلم
أحمد: خيره جهاد
معز: انت ورى اختفاء جهاد ولا؟
أحمد: ...
-------
ناصر: الساعة قريب الـ 11 وملقيتاش شن حنقول لبوي اني
مروان: بوك متكلماش قول لواحد من خوتك الكبار وخلاص
ناصر: ياربي عيني يارب .. وطلع تلفونه واتصل ع محمد
محمد: رن تلفونه وهو كان يلعب في بنته يلي كانت تناغي .. الو ناصر
ناصر: محمد بنقولك شي بس تعيطش ولا تقول لبوي
محمد: تعدل في تقعميزته .. ها شن في قول نسمع فيك
ناصر: خوك جهاد
محمد: خير شنو فيه
ناصر: خدي نفس .. رايح
محمد: بعصبية وصدمة .. كيف؟!
ناصر: والله مانعرف كيف بس ليا قريب ساعتين اندور عليه بس بدون فايدة
محمد: عطيت .. خبرت الشرطة؟
ناصر: لا خفت يقولوا لبوي
محمد: ماك حمار وين انت توا
ناصر: في ****
محمد: ماشي هاني جاي
كان حيطلع الا وهو اتصال
محمد: وقته هذا تو .. فتح التلفون .. الو من معاي
سالم: يحاول يغير صوته .. مش لازم تعرف منو معاك اسمعني كويس راه خوك عندي
محمد: كيف؟ شن تخرط انت
سالم: اسمعني قلتلك تبي تاخده ادفع مليون وكان تاخرت مش حتشوفه مرة ثانية .. وصكر الخط
محمد: كان حاير ومش عارف شن يلي صار توا عاود اتصل بناصر
ناصر: ها شنو
محمد: تعال للحوش بسرعة
ناصر: ليش متبيش...
قاطعه محمد وهو معصب
محمد: قلتلك تعال فيسع
------
مراد: اقسم بالله ما تتحشم كيف ادير هكي
معز: ماهذي نهاية الدلع
أحمد: شبحلهم والخوف في عيونه .. بالله متقولوش لبوي ان اني يلي درتها
مراد: شبح لمعز وابتسم .. شن رايك في كلامه؟
معز: انحس فيه كلام غبي
مراد: ضحك وشبح لاحمد .. صار ماتبيش انقولوا لبوي؟
أحمد: وراس خوتي متقولولاش حنطيح من عينه
معز: لويت رمشة امالا .. وطق يد مراد وقعدو يضحكو
أحمد: هه بايخة
معز: شبحله .. اضحك لنخبر بوي
أحمد: تنهد وبعدها قعد يضحك بلا نية
مراد: ايوا هكي خليك جوك فري
معز: ساد من الضحك هيا اتصل بالسطل هضاك وقوله يطلق جهاد
أحمد: مش حيطلقه اني نعرف اشرف طماع وحيقولي وين فلوسي
مراد: والحل؟
أحمد: حنتصل بسالم ونقوله ان الخطة فشلت وانت تمشي لاشرف ومعاك سالم وعلى اساس انت عطيت الفلوس لسالم وخود جهاد وتعالي
معز: شبح لمراد .. والله فكرة
أحمد: بيش تشوف
مراد: انصدمت منك خيرك متشغلش عقلك هكي في القراية
---------
فتحي: درس ع جنب .. شنهو؟
محمد: ايه اقسم بالله
فتحي: حسبنا الله ونعم الوكيل وشن حنديروا توا
محمد: مش عارف بس حاليا اني عندي ربع الملبغ ومش عارف من وين حندبروا الباقي
فتحي: يصير خير .. وصكر وعلى طول توجه للمصرف وسحب منه مية ألف وروح للحوش
ولما وصل لقي محمد يراجي فيه هو وناصر
فتحي: مد ظرف لمحمد
محمد: كم فيه هذا؟
فتحي: مية ألف
محمد: سترك يارب حتى نص المبلغ مجبناشي
ناصر: كل يلي يصير مني اني
محمد: انت مدخلكش في شي كله كتبة ربي
فتحي: اني جبت الفلوس بدون ما نفهم يلا فهموني
أنت تقرأ
سڤن أب (رواية ليبية)
General Fictionالكاتبة: هذي الرواية برعاية: معز: .... الكاتبة: تكلم قولها معز: منيش الكاتبة: تقولها بالله عليك معز: اااااخ الكاتبة: هذي الرواية برعاية: معز: النهارات
