مراد: مع السلامة عمتي بنمشي للجامعة عندي محاظرتين اليوم
فتحية: ربي يسرها عليك ونشوفك احسن واحد ياربي
معز: واني عمتي
فتحية: هه وحتى انت
معز: لا نبي دعوة زي مراد
فتحية: ااخ منك .. رفعت يديها .. يارب يبارك في عملك وتأسس روحك ونشوفك احسن تاجر فيك يا ليبيا .. بعد ما كملت شبحتله .. تريحت؟
معز: ليش انحس فيك دعيتيلي بدون نية
فتحية: خرفي برا مراد ربي معاك
مراد: هي سليمات
نهى: مرااد مراد استنى بنمشي معاك ارفعني لكليتي
مراد: شبح لـ معز واشرله على نهى بعيونه .. تمام
معز: استوعب .. لا مراد حيتأخر على محاظراته تو نرفعك اني
نهى: لا مش حيتأخر
فتحية: لا بنيتي حتأخريه وليدي معز ح يرفعك
نهى: شبحت لمعز بقرف .. حاظر ماما
معز: يشبح ليها بنظرت انتصار .. بنوض انسخن السيارة انديرلك رنة اطلعي
نهى: ماشي
معز: مر من جنب مراد وهمسله .. شدت معاها
مراد: ابتسم .. مبروك
معز: طلع يضحك وسخن السيارة وبعدها رن على نهى وطلعت ركبت معاه
-----
ناصر: نازل من ع الدروج .. فتحي بالله تعال تفاهم معاه
فتحي: شنو خير ان شاء الله
ناصر: قالي يبي سوريتين بسعر سورية يبي يخسرنا
فتحي: تنهد .. امنت بالله صبح ياربي .. ركب مع ناصر .. خير خوي في شن انسعدك
الشاب: حناخد السورية العنابية والسماوية بسعر العنابية لان الصراحة سعرها مرتبي
فتحي: خدي نفس .. ياخوي هذي خدمتنا لو بنبيعك بالكريقة هذي حنبيعك بالخسارة
الشاب: عادي دير استثناء اليوم
فتحي: كان بنديرلك استثناء انت حنديره للكل وحنفلس في النهاية ابيني انفلس؟
الشاب: اعوذ بالله والله لا بس اني الحق اليوم ثلاث عرسي ونبي انوفر لحياتي المستقبلية
فتحي: وتبي توفر ع حسابي؟
الشاب: سامحني خوي حنشري العنابية وخلاص
فتحي: لا خلاص حنعطيك السماوية هدية يا عريس
الشاب: لا والله خلاص حنشريها مرة ثانية
فتحي: خلاص اني قلت هدية يعني هدية ناصر حطهله في كيس
ناصر: شبح لشاب من فوق لتحت .. تمام
الشاب: امنور خوي ان شاء الله انردلك في الافراح
فتحي: امين يارب
الشاب: طلع ورقة من حيبه وبيرو وقعد يكتب .. هذا رقمي اني عندي محل لتغليف الهداية نقدر انساعدك في اي وقت
فتحي: ان شاء الله .. وخدي الرقم
جي ناصر عطاه الكيس وطلع الشاب
ناصر: خدي السورية بلبلاش واني خوك نشري منك شري
فتحي: كون عريس قبل وحنهديك زيه
ناصر: عند كلمتك؟
فتحي؛ شبحله وابتسم على جنب .. مش عارف
ناصر: عارفك متحبنيش
-------
سالم: وقف من الصدمة .. هبلت انت ياولد ولا شنو بتخطف خوك اكيد هبلت
أحمد: شده من يده ونزله .. قعمز فضحتنا، ايه بنخطف خوي احسن حل لانه بوي عنده ملايين وخوتي كلهم معبيين
سالم: بالله طلع الفكرة من عقلك، فكر كان كشفوك شن حيصير فيك وفيا
أحمد: انت غير نفد يلي حنقولك عليك ومش رح يكشفونا
سالم: متردد .. نش عارف اني خايف من القصة
أحمد: بلا خوف ترا حرام الشعر يلي على خليقتك
سالم: بالله فوته الموضوع
أحمد: مش حنفوته وحتنفد الفكرة معاي
سالم: بتردد .. به كيف حنخطفه يعني
أحمد: اسمع اني حنروح اني وخوي اليوم طبيعي وفي العشية حنبعته للمحل او حندور تصريفة ليه انخليه يطلع برا الحوش ولما يطلع انت وولد عمك اشرف راقبوه وبعد ما يبعد ع الحوش شدوه واربطوه وانقلوه لحوش الحاج صبحي " حوش مهجور" وحطوه غادي تمام؟
سالم: مش حيشبح وجهي حننكشوا في الاخير
أحمد: لا ننكشفوا لا سو انت وولد عمك البسو اي شي على وجهكم ومتتكلموش معاه هلبا هكي مش حيعرفكم
سالم: مش عارف خليني انفكر في الموضوع
أحمد: لا تفكر لا سو اليوم حيتم الموضوع وحيطلعلنا نصيب كويس من خوتي وبوي
أنت تقرأ
سڤن أب (رواية ليبية)
General Fictionالكاتبة: هذي الرواية برعاية: معز: .... الكاتبة: تكلم قولها معز: منيش الكاتبة: تقولها بالله عليك معز: اااااخ الكاتبة: هذي الرواية برعاية: معز: النهارات
