مرت سبع اسنين بالتمام والكمال وصارت فيهن هلبا احداث ويلي هنا:
فرج: بني حوش فتحية ع حوش فتحي وسكنت فيه هي ونهى وماجد وخيري تزوج في حوشهم الاول وفي اخر السنة السابعة مشي للحج
فتحي: تزوج من جنى وجابتله ولد وسماه فرج وبنت سماها مسرة
ناصر: تزوج بنت كان معتجب بيها في الكلية اسمها سلوى وجاب منها توأم ولدين هشام وهاشم
محمد: حصل بعد سمية ولد سماه علي على اسم بو لبنى وبنت ثانية اسمها هيام
اما معز: خطب نهى رسمي وقاعد يبني في حوشه في جنب حوش اهله
ومراد: خطب ملاك حتى هو ويبني في حوشه ع حوش معز وكانوا امقررين انهم بيديروا العرس في يوم واحد
أحمد: تخرج وقعد مدير في شركة كبيرة والكل انصدم فيه
اما جهاد: اخر العنقود تخرج وسافر لالمانيا بيكمل ماجستير ودوكتورا
-------
حاليا بعد ما روح فرج من الحج فرحوا كلهم وكانوا دايرين لمة بسيطة
معز: شن اسمي اني؟
فرج الصغير: وين نندري بدعوتك
معز: ريت ريت اقسم بالله الولد هذا قليل ادب
مراد: ميت ضحك .. واني فروجة شن اسمي
فرج الصغير: انت عمي مراد
مراد: شبح لمعز وقعد يضحك
معز: النهارات اكيد بيطلع هكي حتى هو ولد فتحي
مراد: عادي عادي مش مهم تنعرف
معز: شبح لمراد من فوق لتحت وبعدها شبح لفرج الصغير .. برا سلم ولدي اقلب وجهك
فرج الصغير: لما انحرش فيك بوي .. وعدى
معز: النهارات السانه اطول منه
مراد: جبد ولد ناصر هشام .. شن اسمي اني؟
هشام: ااه انت عمي .. وقعد يذكر .. اه انت عمري مارد
معز: مات ضحك على مراد يلي كان مصدوم
مراد: اني مارد يا ولد اـ استغفر الله
هشام: بنمشي اطلقني
مراد: انتلف .. وطلقه وشده معز وقعد يشرب في مشروب
معز: وهو يمسح في دموعه من الضحك .. واني حبيبي شن اسمي؟
هشام: تعطيني شكلاطة؟
معز: شبح لمراد .. خيرهم ع شكاليطي هذوم النهارات .. وشبح في هشام .. من عيوني غير قول شن اسمي
هشام: اني نعرفك كويس انت عمي معزة
مراد: مات ضحك لين تفل المشروب يلي كان يشرب فيه
معز: مصح وجهك مافي معزة الا بوك انتلف من قدام وجهي سلم ولدي
هشام: وشكلاطة عمي
معز: شكلاطة في عينك اقلب خليقتك
هشام: عدى وهو يبكي
مراد: اااه عادي عادي اهدى عمي معزة .. وكمل ضحك
معز: احلف
مراد: اااه جي من ياخد حقي منك
معز: كلهم اسطول طالعين ع بوهم
مراد: ايه ع اساس اولادك حيطلعو علماء
معز: مصمص فمك بالزهر قبل لاتجبد سيرة عصافيري .. وناض من جنبه
مراد: هذيما مجوش وانت تقول هكي امالا لما يجو شن اديرلي .. لحقه
--------
جهاد: يتصل ببوه فيديو .. كيف حالك يا سي الحاج فرج
فرج: ههه الحمد لله وانت كيف حالك يادكتور جهاد
جهاد: مزال مزاال ع لقب الدكتور
فرج: امتى حتروح استاحشناك يا ولد
جهاد: ان شاء الله حنروح كا العادة في راس السنة
فرج: ربي يعطيك يلي تتمناه ونشوفك دكتور ودرس الاجيال الجاية
جهاد: امين يارب
فرج: منأخركش وليدي هي مع السلامة
جهاد: مع السلامة .. وصكر الخط
أنت تقرأ
سڤن أب (رواية ليبية)
General Fictionالكاتبة: هذي الرواية برعاية: معز: .... الكاتبة: تكلم قولها معز: منيش الكاتبة: تقولها بالله عليك معز: اااااخ الكاتبة: هذي الرواية برعاية: معز: النهارات
