إعدام الحر"

1

أميرة

ليش كل هذا يصير ويانا .. ليش يسوي هيچ.. شمسوين احنه.. بس اريد اعرف هاي السنين كلها مرت علينا ألف شوغة و ياويل بسبب او بدون سبب
بس ضرب، ضرب، ضرب

ميعرف بس الضرب ليش اخذنا منها و جابنا هنا
ميتحمل وجودنا چان ما اخذنا من بدايتها چان عافنا يمها..

چنت احچي و الدموع ترسن عيوني رافضين الاستسلام محبسات في غلافهن.. احچي ودمي يغلي..

ياقوت : هسه يا اميرة شبيچ متكوليلي؟

: ياقوت تعبت هذا مو وضع يعني نكعد من الصبح لليل يلا نكعد شوية..
شغل البيت تنضيف وطبخ نفتر وممخلصين ويا ريت لو راضين علينا فوك كل هذا تضرب بينا هاي..

تباوع بعيوني وتحچي تحاول تهديني.. عيونها تريد تبچي.. بس حتى تزيدني قوة و صبر محافظة على ثباتها.. ياقوت من المستحيل تضعف بسهولة و بنفس الوقت تستسلم وتنفذ الي تطلبة بلقيس تجنبا للمشاكل..

ياقوت : ميخالف تحملي..

:هو شنو الي اتحمله.. اتحمل بلقيس و اولادها لو اتحمل محمود..

: يبقى ابونا..

غصة بالقلب كل ما نحچي بي يرجع علينا القهر.. احنه مكسورين من ابونا.. نزلت رأسي وحچيت بخفوت..

: همه كل الاباء هيچ؟

: لا حظنا الي هيچ!

حچتها ياقوت ودارت ضهرها تنهي الحديث مادري اذا استسلمت للنوم او للدموع..

رجعت ضهري للفراش حركت راسي عالمخدة محاولة الحصول على راحة.. راسي الي من المستحيلات يرتاح من سالفة لسالفة..

"الأفكار المزعجة اللئيمة المؤلمة"

هاي انا "أميرة الي اسمها مو عليها"
كلها اسم على مسمى الا انا.. كل عمري خلصته ببيت بلقيس الي هيه زوجة والدي محمود .. بحياتنا ما حسينا بمحبة، بحب، بإحترام
بحياتنا ما حسينا عدنا اب.. محمود و والدتي انفصلوا بيوم ولادتي..

ماعرف شنو المعتقدات الي چانو يفكرون بيها ولا الشي الي وصلهم لهاي المرحلة.. حياتهم انبنت و تأسست على خلافات و مشاكل دامت 5 سنوات
بيوم ولادتي تحررت امي من ضلمه الها...
تحررت منه..

ربتني من يوم لسبعة سنوات ما نقصت علينا بشي كل الي نريده تلبي.. چانت تكول عندي ياقوت و أميرة بالعالم كله..

رجع سوالها مشاكل من بعد الطلاق و انتهت باخذة لياقوت اخذ ياقوت عنده للبيت حتى تخدم زوجتة لان متلحك لاولادها..