إعدام الحر"

9

أميرة

ايدي ترجف جسمي ثكل احچي بلا تركيز عيوني تتجول بالغرفة بعشوائية..

أميرة.. ندى شنو تحچين؟

.. معقوله متدرين؟

.. اي والله مادري هسه سمعت منچ..

.. ليش ما كلچ ابوي.. كل ضني يأخذ رائيچ..

.. ما فتح الموضوع من الاساس..

.. هاي شنو..

.. اي والله مادري ما كال شي..

.. زين اهدائي انتِ تعالي اكعدي هدي..

.. ندى معقوله عادل.. عادل خطبني..

.. اي معقوله ان شاءالله يصير قسمتچ يا أميرة.. الله يهديك يابا شكاعد تسوي بينا..

جسمي مستمر يرجف و ثكل مو طبيعي صار.. ندى.. ندى

عيوني بالقوة محافظة على ثباتها بلا مدمعي.. ندى لازمة ادية تمسح عليهن.. تباوع لعيوني بتركيز..

.. ندى اردد بأسمها بلا غاية بلا كلام ماعندي شخص الجئ له غيرها حاليا .. وين ياقوت وين عايفتني انا بادق حاجة لها..

.. ندى..

.. اسكتي يعيون ندى.. سودة علية والله مادري.. چان مكتلچ حتى لا تنصدمين والله أميرة مادري..
اتوقعت ابوي كلچ بخصوص الخطبة..

اهز رأسي بلا انتباه عيوني ما تثبت على مكان اباوع بسرعة و ارجع اغير مكان النظر.. ندى..

راحت بسرعة لمكان المندر سحبتني من ايدي حتى اكوم .. تعالي نامي.. تعالي..

نمت طفت الضوء واجت كعدت يم رأسي تدلك بيه..

ندى.. الله يهديكم.. الله يهديك يا محمود.. دخيلك رب العرش العظيم..

أميرة.. ندى عادل خطبني..

.. اي حبيبتي خطبچ اي ان شاءالله متصير لغيره..

غمضت عيني اتمنى النوم.. مادري بيومها شلون غفيت.. كعدت على صوت الأذان والإقامة.. صلاة الفجر..

نايمة على المندر متغطية زين.. وندى عالفرشة بلا غطاء.. رأسها على مخدتي و جسمها عالأرض..

.. كاعد تتعب وياي.. معنويا، صحيا، عاطفيا.. كاعد تتاذة بسببي.. تتحمل فوك طاقتها.. من يكعدون كلهم تبتعد عني مرات ومرات ماتفارق ..