عادل
بالغرفة الي بيها أميرة كاعد ساند ضهري عالحايط اباوع عليها شلون فرحانه رغم الم الحرق هواي تفرح من تشوف امها قريبة منها..
عادل.. هو هذا اخر يوم الها بالمستشفى..
بثينة.. ان شاءالله يوم..
أميرة.. يوم ما احب المستشفيات.. كلشي بيهن اكرهه.. أسبوع مر عليه سنة..
عادل.. بعد بحيل الله ما اخليچ تشوفيها..
انتبهنا على قفل الباب انفتح.. أول ما دخل سمعتها حچت بلهفة..
أميرة.. هاا خالو شكلولك..
باسم.. حبيبتي لليل ان شاءالله تطلعين.. بعد هاهيه نرجع للبيت..
هيه تبتسم وانا روحي تبتسم وياهه..
خلصنا الوقت وياه بالغرفة الى ان طلع خالي سوالها خروج..
نمشي بالممرات الضيقة واحد بعد واحد متجهين الى باب الخروج.. لازمه ايد امها و تمشي.. خليتها امامي عيني عليها.. كل ساعة تدور وجهه عليه و ترجع تكمل طريقها..
وصلنا للباب بالشارع واكفة سيارة يمها خالي قريبة من عندة ياقوت يضحكون بينهم أول ما وصلنا يمهم ضحكت..
ياقوت.. وشحلاهه هاي البنية هيل وچاي عصرية
ويا ريح الهاب يا صفصاف أميرة معدلة و حلوة ..
بثينة.. ياا ولچ يمه مو بالشارع..
أميرة تضحك بخجل..
عادل.. شبيچ خالتي والله حلوة.. ياقوت ولا مرة غنيتيلي..
باسم.. اصعدوا هسه و بالبيت تفاهم وياهن..
ياقوت وهيه تصعد للسيارة.. ياا عادل صدك تحچي؟ دصعد خلي بالبيت اسويلك عرس.. ماخذة راحتها محمد مو هنا..
ضحكت عليها ساكت اباوع عليهم متناسين هموم الدنيا.. دعيت الله يديمهم..
بالسيارة كل ساعة تطفر ياقوت تغني لاختها و تخزرها خالتي ترجع تسكت.. أميرة بس تضحك عليهم.. وصلنا للبيت أول ما دخلنا اجت امي تركض تحضن بيهن ثلاثتهم..
.. يمه خالاتي حبيبتي أميرة.. شلونچ خالة طمني گلبي..
عادل.. يوم على كيفچ بطنها زينة هسه بس لا تاذيها گلبي انت..
.. يوم بالي مشغول عليها..
أميرة.. حبيبتي خالة الحمدالله زينة..
