إعدام الحر"

10

أميرة

من يوم الخطوبة لليوم ما شفت طعم الراحة.. محمود و بلقيس كل ساعة يتعاركون و مشاكلهم كثرت..

يطلعون طاقتهم السلبية كلها بيه.. انتهيت بهاي الفترة طاقتني نفذت ..

احاول اتجنبهم ما اتقرب الهم بلا فائدة..

جو متكهرب كلها قلقه.. متوتره.. خايفين من شي ما معرف..

بلقيس بصوت عالي.. أميرة.. تعالي أميرة..

.. هاا اجيت..

واكفه بالمطبخ ايدها على خصرها.. هاي ليش هيچ المطبخ وسخ متعرفين تنضفين مكسرة ايدچ..

.. لا هسه اجي انضفه بس خلي اكمل غسل الملابس مو كلتي غسليهن..

.. وصار لچ ساعة بالملابس.. شوكت تخلصين بالشتاء الجاي..

.. لا هسه اخلصهن و انضف المطبخ..

.. شوفي ولچ شوية واجي اذا لكيتهن بعدهن تعرفين شسويلچ..

عافتني و طلعت.. هسه شبيها هاي هو شبي المطبخ بس صحون الريوك ما مغسولات لان من كمت بعدهم ياكلون..

غسلتهن على السريع ما يراد الهن شي و رجعت للملابس.. تتقصد تذب الملابس حتى النضيف تخليني اغسله..

كملتهن شريتهن و كعدت.. ضهري متكسر..

ثواني كعدت ثواني معدودات..

بلقيس.. أميرة وين وليتي تعالي..

رحت الها اسحل بروحي.. بلا كلام بس باوعت الها حتى طاقة للكلام ما عندي..

.. تعالي سوي النضدة عدليهن و اغسلي الفرشات..

باوعت على النضدة و عليها.. هزيت رأسي حتى تروح.. هاي شلون اسويهن هسه.. هواي كلش..

هيه الله يسلمها ما مخليتهم ملمومات ناثرتهن..

طلعت الفرشات على صفحة.. كعدت اصفط و اخلي بمكانهن.. منادر و اغطية.. كلش ثكال.. ما ينرفعن..

احس روحي ترتفع لسماء السابعة و هذني ما ينرفعن..

خلصت روحي يلا خلصتهن.. هسه وكتهن ذني..

سحبت الفرشات برة فرشتهن و سحبت الماي.. مو مال غسل نهائيا الدنيا باردة.. والماي بارد..

كعدت اغسل بيهن هواي اريد يخلصن ماكو ايدي راحت بالغسل جسمي يرجف من البرد و التعب.. خليتهن على صفحة ينشفن من الماي.. بين ما انشف الأرض..