بسم الله الرحمن الرحيم
-----------------------------------------------------------
في صباح يوم جديد
في قصر المنصوري
كانت تقف موج في شرفتها "البلكونة " كعادتها وهي تنظر لشروق الشمس ولكن هذه المره مختلفه جدا لأنها قررت الاستقرار في الوطن للابد من أجل نور و للحقيقه من أجلها أيضا كانت و ستظل نور بالنسبه لها النور والحياه وللمفاجأة تشعر بسعادة اختفت من حياتها من زمن.
لهذه الدرجة الاستقرار بجوارها يشعرها بهذا الكم من الراحه و السعاده لدرجه لا تشعر بالخوف من القادم مادمت هي بجوارها
تنهدت براحه و بعدها جلست علي مقعد بجانب السرير كعادتها أثناء العمل وأمامها اللاب الخاص بها تقوم بإنهاء عملها سريعا قبل موعد الإفطار
بعد الانتهاء من العمل قامت بروتينها اليومي و استعدت للنزول للاسفل.
🌸🌸🌸🌸🌸🌸🌸🌸🌸🌸🌸🌸🌸🌸
نزلت موج للاسفل فوجدت الجميع علي مائده الافطار وكانت من بينهم نورسين التي صممت أن تنزل و أن تذهب أيضا الي شركتها بعدما أقنعت اختها بصعوبة أنها أصبحت بخير .
موج وهي تجلس بجانبها بعدما ألقت تحيه الصباح علي الجميع
موج بهزار : ايه ده هو الحجر اتفك ولا ايه
نور بعبوس : يا رخمه ايوه اتفك
ضحك الجميع عليهم
غنوه بضيق : مع اني مش مقنعه بس اعمل ايه في دماغها الناشف
نور : أنا الحمد لله كويسه خلصي يا موج فطار بسرعه علشان نخرج قبل ما هي تغير كلامها
موج بضحك : حاضر
بعد فتره انتهي الافطار و توجه كل شخص الي وجهته .
🌸🌸🌸🌸🌸🌸🌸🌸🌸🌸🌸🌸🌸🌸
في قصر الصاوي :-
وبالأخص في غرفه ادهم
كان يرتدي ملابسه بسرعه للنزول للإفطار وهو متحمس لاخبار أهله بما قرر له من فتره و أخذته الشجاعه و التسرع و اللهفه لتنفيذه الان
نزل سريعا وهو سعيد يتمني أن يوافق أهله
وجد الجميع يجلس علي مائده الافطار القي تحيه الصباح وجلس بجوار أخيه
ادهم بلهفه : بابا كنت عايز اقول حاجه و مش قادر استني لبعد الفطار بصراحه ينفع اتكلم الوقتي
نظر له الجميع بانتباه
محمود باهتمام : اتكلم
ادهم بلهفه : بصراحه انا عايز اتجوز
نظر له الجميع بصدمه
تولين بذهول : انت قلت ايه
ادهم : اتجوز ايه الصعوبة في كلامي
صفيه بدموع : انت متاكد اصل انت كنت رافض كل ما اتكلم معاك فيه
ادهم بضحك : ماهي جيت بقي اللي وقعتني
محمود : مبارك يا حبيبي حد نعرفه
ادهم : ايوه جميله صاحبه تولين
تولين بفرحه : جميله وقعت واقف بصراحة
صفيه : بصراحه جميله اسم علي مسمي و محترمه جدا
الياس وهو يحتضنه : مبارك يا حبيبي
ادهم : الله يبارك فيك عقبال يا باشا
محمد : مبارك يا ادهم
ادهم : الله يبارك فيك يا عمي
تولين وهي تحتضنه : مبارك يا دومي وقعت واقف يا شقي
ادهم بضحك : الله يبارك فيك يا صغنن
وسيم : مبارك يا كبير
ادهم : الله يبارك فيك يا باشا
محمود : أنا هاخد معاد من عثمان علشان نتقدم لها
ادهم بلهفه : بس يكون في نفس الاسبوع ده
محمود بضحك : هحاول
وأكمل الجميع الافطار في جو من المرح و الضحك ماعدا الياس الذي كان مشغول البال يفكر في ماحدث معه بالأمس وأنه قضي اليوم كله مصدوماً بسبب ذلك
فلاش باك
كان الياس في طريقه الي صديق له في المرور يطلب منه معرفه صاحب رقم هذه السياره
بعد فتره وصل و طرق علي الباب و دخل بعدما سمع صوت الأخر يخبره بالدخول
الشخص وهو يقف : صباح الخير يا الياس باشا عامل ايه عاش من شافك
الياس وهو يحتضنه بمحبه : الحمد لله انت اللي عامل ايه يا معاذ
معاذ بمحبه : انا كويس انت اللي اختفت
الياس : معلش ظروف كنت عايز منك خدمه
معاذ : طبعا من غير ما تقول
الياس : ده عشمي فيك برده ده رقم عربيه عايز اعرف صاحبها
معاذ : سهله لما تكون شربت الشاي بتاعك و نفتكر الذكريات بتاعتنا يكون اسم صاحبها ادامك
بعد مرور نصف جاء شخص و في يده ورقه
الشخص : اتفضل يا معاذ باشا
معاذ : تسلم روح انت
خرج الشخص
معاذ وهو يعطي الورقه لالياس : اتفضل يا باشا
الياس وهو يمسك الورقه بلهفه و يفتحها و نظر إلي الاسم بصدمه : ايه ده
تدارك الوضع سريعا ووضع الورقة في جيبه و سلم علي معاذ و خرج و ذهب في اتجاه سيارته و ركب و اخرج الورقه مجددا وهو ينظر فيها مصدوما كان يتوقع أنه يعلم الجاني و كانت الورقه للتأكيد فقط لكن صدم لأن توقعه كان خطأ وان الاسم الموجود مختلف جدا مع الاسم الذي كان يتوقعه وهو اسم المجرم اللي قبض عليه في اخر عمليه قبل زواجه فتوقع أن يكون هو للثأر منه لأنه يدرك قوه و نفوذ هذا المجرم وما يستطيع أن يفعله حتي وهو داخل السجن لكن كل توقعاته وقعت في الأرض وهو ينظر للاسم الغريب جدا عنه ونظر للمعلومات عنه وعنوانه
الياس : عوض غريب صاحب ورشه كبيره لتصليح العربيات
نهايه الفلاش باك
انتبه الياس لصوت أخيه وهو يحدثه
الياس بانتباه : كنت بتقول ايه
ادهم بغمزه : سرحان في ايه ها مين اللي شاغل بالك
الياس بضحك : مفيش بفكر في قضية كنت بتقول ايه بقي
ادهم : بقول هننزل امتي نجيب بدل جديده
الياس : في أي وقت تحبه وانا معاك
ادهم : حبيبي خلاص هحدد و هكلمك
الياس : ماشي أنا شبعت الحمد لله همشي أنا بقي علشان ورايا شغل مهم
صفيه بدعاء : في امان الله يا حبيبي
خرج الياس وهو عازم علي الذهاب الي عوض غريب هذا لمعرفة ماهي قصته
🌸🌸🌸🌸🌸🌸🌸🌸🌸🌸🌸🌸🌸🌸
في سيارة نورسين
كانت موج تقود هي السياره بدلا من نورسين لأنها لم تُشفي بعد ولن تقدر علي القياده الان
نورسين : بصي بما انك هتفضلي في شغلك اللي برا بس في الفرع اللي هنا لما تخلصي هتيجي علي الشركه الفتره دي بما انك لسه بتشتغلي اون لاين هتشتغلي معايا و هعرفك كل حاجه متخافيش انا والبنات معاكي
موج بحب : ماشي يا حبيبتي هي وعد صحيح مش بتيجي ليه و بتحط حجج وخلاص
نورسين بتوجس: بصراحه حسيت كده و مش عارفه السبب بس حاسه انها متخانقه مع البنات لما نروح الشركه هتكلم معاهم في الحوار ده
موج : تمام
بعد فتره من الوقت كانت موج توقف السياره أمام مبني الشركه
🌸🌸🌸🌸🌸🌸🌸🌸🌸🌸🌸🌸🌸🌸
في قصر الصاوي:-
وبالأخص في غرفه شهد
كانت تجلس علي السرير وهي تتحدث في الهاتف
شهد بغضب : كل ده بسببك يا خلود أنا واحد حقير زي ده يهددني
خلود بامتعاض : و انتي كنتي عايزاني اعملك ايه يعني اجبلك واحد امام جامع اهدي كده و ادفعيله أخر مبلغ وهو هيحل عنك
شهد بضيق : طب و الفيديو اللي مصورني فيه واحنا بنتفق
خلود : بصي هو بيخوفك بيه بس اكيد يعني مش هيفضح نفسه لأن دي جريمه و عقوبتها صعبه
شهد : ماشي هشوف كده هعمل ايه وهكلمك
خلود : ماشي باي
أغلقت معها شهد وهي تشعر بالضيق منها ومن حياتها
نزلت من غرفتها واتجهت الي غرفتها والديها و طرقت الغرفه و دخلت عندما سمعت الاذن بالدخول
شهد : ماما بابا فين
وفاء : في الحمام يا حبيبتي عايزه حاجه
شهد :ها لا كنت عايزه اتكلم معاه في حوار كده
وفاء : طب انا نازله تحت لمرات عمك علشان تعرفوا تتكلموا براحتكم
شهد : ماشي يا ماما
خرجت والدتها من الغرفه مع خروج والدها من الحمام
محمد بدهشه : شهد بتعملي هنا ايه الوقتي فيه حاجه
شهد : عايزه اتكلم معاك يا بابا شويه
محمد وهو يجلس علي اريكه بجوار السرير : طب تعالي اعدي هنا
شهد وهي تجلس بجانبه
محمد بحنيه : ها حبيبه بابها عايزه ايه
شهد : بابا بصراحه محتاجه ١٠٠ الف ضروري
محمد : انتي لسه واخده من فتره صغيره ٤٠٠ راحوا فين بالسرعه دي
شهد : ها خلصوا يا بابا عملت شوبنج و اشتريت شويه حاجات ودفعت لمقدم عربيه و حاجات تانيه و كمان واحده صاحبتي في زنقه و محتاجه فلوس ضروري
محمد : بصي مش هعلق علي حاجه لاني واثق فيكي
حاضر هحولك الفلوس الوقتي
شهد وهي تحتضنه : حبيبي يابابا تسلمي
محمد : متقوليش كده انتي حته مني ياريت كانت حور زيك
شهد : ربنا يهديها
محمد : يارب
شهد : هروح أنا اوضتي بقي عايز حاجه يا حبيبي
محمد : سلامتك يا حبيبتي
خرجت شهد وهي سعيده لأنها ستتخلص من هذه المصيبة التي تؤرق نومها
🌸🌸🌸🌸🌸🌸🌸🌸🌸🌸🌸🌸🌸🌸
في شركة نورسين
كانت الفتيات يرحبوا بموج في الشركه
بتول : اكتمل الفريق اخيرا برجوع موج
جميله بفرحه : لا وايه كمان موج معانا للابد
موج : مبسوطه بلمتنا اوي يا بنات
نورسين : يارب يديمها علينا بس ناقص وعد
عبست بتول بغضب ولاحظت نور و موج رده فعلها
موج :هو انتم حصل بينكم حاجه
بتول بغضب : دي واحده مخادعة و كدابه و غشاشة كمان
نور : ليه كل ده عملت ايه
جميله : هقولك
فلاش باك من الفصل 25
أما في الخارج
عدي وهو يخرج بغضب و يشتم في وسيم استمع لنداء أحد باسمه
وعد :عدي يا عدي
عدي بغضب وبرود :نعم عايزه ايه
وعد :انت كويس حصلك حاجه اتعورت وهي تضع يدها علي خده واكملت بحب بيوجعك
عدي وهو ينزل يدها : لا أنا كويس
وعد بكره وعدم وعي : كل ده بسبب الاستاذه نورسين و مشاكلها لازم تعمل مشكله في كل مكان تروح فيه و تدخلك فيها المفروض مكنتش دورت عليها و لا روحت انقذتها كنت سيبه يتجوزها ولا يولع فيها حتي و ارجع وهي حره تحل مشاكلها لوحدها انت مش شغال عندها علشان تنقذها من كل بلاويها
نظر لها عدي بغضب و اقترب منها بهدوء
عدي بغضب : انتي ازاي تتكلمي علي نور كده انتي واعيه لكلامك مش دي صاحبتك
وعد بتوتر و ادراك لما قالته و حاولت إصلاح ما أفسدته :أنا مكنتش قصدي أنا بس
عدي بغضب :اخرسي مش عايز اسمع صوتك انتي مين انتي علشان تتكلمي عنها كده و لا تدخلي في حاجه متخصكيش أنا مش عايز اتصرف معاكي بطريقه مش كويسه احتراما لنور اللي فاكره انك صاحبه كويسه و بتحبها و ابتعد عنه و ذهب ناحيه سيارته حاولت وعد إيقافه و لكن وجدتك من يمسك يديها فنظرت نحو الفاعل بغضب ولكن تلاشي وتحول لصدمه
هو بقي سابك علشان هو عامل علي احساس نور و انك كنتي في يوم صاحبتنا بس انا لا أنا هاخد حق نور منك و من لسانك ده و شدت ايديها و عضتها
وعد بوجع : اه بتول سيبي ايدي أنا مكنش قصدي
بتول وهي تعض بقوه و جميله تحاول أبعادها عنها
بتول :و انتي فاكره اني هصدق واحده زيك
وعد بوجع :جميله ابعديها عني انتي واحده متوحشه
انس بهزار : انت متاكد انك هتتجوز الشبح ده دي اكلت ايد البت
ادم بخوف مصطنع : مش عارف انا شكلي ادبست
انس بهزار : هقولها
ادم : ده انا اخوك
انس :خلاص عفوت عنك علشان تعرف أنا طيب ازاي
ادم :طيب اوي ليك يوم
اخيرا استطاعت جميله ابعاد بتول عن وعد
بتول :عملتلك ساعه حلوه علشان تعرفي تتكلمي علي نور حلو
وعد وهي تبكي :و اللهي لقول لنور و خرجت تجري و ركبت سيارتها و غادرت
بتول بزهول : شوف البجحه بتقول ايه اه لو أمسكها تاني
انس :اهدي يا وحش مش كده اعصابك
بتول : نرفزتني
جميله بحزن :ليه كده يا توتي وعد صعبت عليا انتي عضتيها صعب
بتول : اسكتي يا حبيبتي انتي طيبه و علي نياتك و مش فاهمه حاجه لا انتي ولا الاستاذه نور
ادم :خلاص اهدي تعالوا يلا نروح الشركه علشان نخلص بدري و نرجع لنور
الجميع :يلا
ركبت بتول و جميله مع بعض و ادم و انس مع بعض
نهايه الفلاش باك
بتول بغضب : بعد كل ده عايزاني ارجع اتعامل معاها
موج : بصراحه مكنتش متوقعه انها مش سالكه
جميله : ولا انا بس بصراحه صعبت عليا
بتول : ساكته ليه يا نور
نورسين : هقول ايه بصراحه أنا زعلت شويه بس بعدين رجعت افكر و اقول من حقها
بتول بغضب : حقها ازاي معلش
نورسين : قصدي أنها غارت علي عدي مني احنا كلنا عارفين انها بتحبه و اكيد اضيقت فبصراحه مش زعلانه من الكلام اللي هي قالته
بتول بغضب : و برده كلنا عارفين أن عدي مش بيحبها بجد مش عارفه انتي ازاي سامحتيها
نورسين بتنهيده : أنا مش مثاليه وانتم عارفين كده بس مش هقدر ازعل منها علي حاجه مش بإرادتها الحب مش بايدينا و كلكم عارفين كده حتي لو عدي مش بيحبها معلش هخرج بره وراجعه و خرجت بسرعه
بعد خروجها
بتول بغضب : مش عارفه اقول ايه بجد نور دي غبيه مش حاسه بحب عدي ليها
موج : نور اللي مرت بيه مش قليل و صعب تركز في حاجه زي دي حتي موضوع وعد احنا اللي نبهناها ليه
بتول : برده هفضل اقول ان وعد مش بتحب نور و بكره اثبت لكم
🌸🌸🌸🌸🌸🌸🌸🌸🌸🌸🌸🌸🌸🌸
في لندن
في قصر الوزير شاكر
كان يجلس علي سريره بعدما خرج اليوم من المستشفى وأمامه المحامي الخاص به
شاكر : عايزك تخرجي ساهر من المستشفى
المحامي : حاضر يا شاكر بيه
شاكر : طب اتفضل انت
خرج المحامي من غرفه الوزير و توجه لكي يخرج له ابنه
دخلت فريال وهي سعيده لأن شاكر افرج عن ابنها اخيرا كانت تدرك أنه يقدر أن يخرجه في يومها لكن هو يريد أن يعذبه و يعذبها معه
فريال بفرحه : بجد خلاص ساهر هيخرج و يرجع لحضني
شاكر بغموض : متفرحيش كده كل حاجه هتتغير من اللحظه دي
فريال: ازاي مش فاهمه
شاكر : مش مهم تعرفي الوقتي
نظرت له بخوف وهي تشعر أن الايام القادمه صعبه جدا كانت تظن أنه عفي عنه رحمتك بنا يا الله في أيامنا معه و حاولت الهاء نفسها عن كلامه الان و تتذكر فقط أن ابنها قادم فنزلت سريعا تخبر الخدم بطهي اكلات ساهر المفضله و تنظيف غرفته
🌸🌸🌸🌸🌸🌸🌸🌸🌸🌸🌸🌸🌸🌸
في مقر العمليات الخاصه
وبالأخص في مكتب عدي
كان عدي يجلس علي مكتبه و يعمل بجد و يحلل القضيه ولكن أوقفه صوت الهاتف فحمله ونظر وجد المتصل الياس
عدي : نعم
الياس : معلش يا عدي هتأخر شويه مش هنعرف نراجع القضيه مع بعض قبل الاجتماع
عدي : لا متخافيش اللوا غير معاد الاجتماع
الياس : بجد ازاي و محدش عرفني
عدي : كنت هكلمك بعد شويه
الياس : عادي ولا يهمك اتأجل لأمتي
عدي : بعد ٣ايام لانه قال أن فيه شخص هينضم معانا
الياس : ينضم غريبه طب تمام ماشي هبقي اكلمك بعدين نحدد وقت نناقش القضيه مع بعض
عدي : تمام واغلق الخط
عدي بضيق : باين هتبقي قضيه زفت علشان انت معايا
🌸🌸🌸🌸🌸🌸🌸🌸🌸🌸🌸🌸🌸🌸
في قصر الصاوي
في غرفه شهد
كانت انتهت من ارتداء ملابسها بعدما تأكدت من وصول المبلغ لحسابها و قامت بمحادثته و اتفقت معه علي المقابله بعد ساعه من الان و طلبت إحضار الفيديو معه لتتأكد من صدق كلامه
نزلت علي السلم بسرعه و منه إلي الخارج و ركبت سياره و انطلقت الي اقرب بنك لسحب المبلغ و بعد فتره من الوقت كانت انتهت من سحب المبلغ و الخروج من البنك و اتجهت الي المكان المنشود
دخلت المقهي "cafe" وطلبت قهوه وظلت تنتظره
مر الكثير من الوقت وهي تنتظره مما جعلها تتوقع أنه لن يأتي فوقفت و قررت الرحيل لكن شاهدته وهو يدخل
الشخص : معلش يا هانم اتاخرت بسبب المواصلات
جلست مره اخري
شهد : تمام تمام ندخل في الموضوع علشان نخلص بقي
الشخص : طبعا هنتكلم هو فيه احلي من الكلام مع واحده زيك ها جبتي الفلوس
شهد : ايوه
الشخص بطمع و فرحه : طب هاتي يلا بسرعه
شهد : مش قبل ما اشوف الفيديو
الشخص : عيني
وأخرج من جيبه هاتف حديث و ظل يعبث فيه قليلا حتي وجده
الشخص : اهو
شهد وهي تمسك فونه وتنظر فيه وجدت فيديو واضح جدا لها وله و هما يتفقان علي كل شئ
شهد وهو تبلع ريقها بصعوبه : أنت مش هتاخد مني ايه حاجه الا لما اخد الفيديو ده و اتاكد أن مفيش اي فيديوهات تانيه
الشخص بضيق وهو يخطف منها الفون : لا احنا متفقناش علي كده يا حلوه اطلعي بالفلوس و الا هتشوفي وشي التاني
شهد : الفيديو ادام الفلوس إذا كان عجبك ولو قلت هبعت الفيديو لالياس ولا يهمني ابعته بس انت هتظهر معايا يا حلو و شوف بقي الياس هيعمل فيك ايه
قلق الشخص بشده و ظل يفكر لفتره ولكنه رضح للأمر الواقع
الشخص بضيق : موافق
شهد بفرح : كويس اوي
الشخص أخرج الكارت الميموري وهو يضعه أمامها
الشخص بضيق : الفيديو موجود هنا بس
شهد : اتاكد
وأخذت منه الهاتف و ظلت تعبث فيه ولكن لم تجد أي شيء فارتاحت و وضعت الهاتف أمامه
شهد بفرحه لأنها تخلصت من هذا الهم : بس ايه جايب فون حديث
الشخص بسماجه : ده من خيرك يا هانم
نظرت له بضيق ولكن رفعت الشنطه التي تحمل الفلوس أمامه ووقفت وهي تتحدث
شهد : الفلوس اهي اياك اشوف وشك تاني و امسح رقمي من عندك والا والله اخلي حياتك سوده
الشخص : عيوني يا هانم
خرجت شهد من المقهي وهي تتنفس براحه وعمق كأنها اول مره تتنفس في حياتها
🌸🌸🌸🌸🌸🌸🌸🌸🌸🌸🌸🌸🌸🌸
وصل الياس أمام حاره و سأل أحد الأشخاص حتي وصل إلي الورشه
وقف قليلا يتطلع حوله و نظر في الورشه وجدها كبيره و أمامها يجلس شخص كبير في السن علي كرسي خشبي و في يده كوب من الشاي و هناك يافطه في الاعلي مكتوب عليها "الاسطي عوض غريب "
تقدم من الرجل
الياس : السلام عليكم
الشخص وهو ينظر له بتدقيق : وعليكم السلام ورحمه الله وبركاته
الياس : حضرتك عوض غريب
الشخص : ايوه انا خير
الياس وهو ينظر له بقوه و يقرأ ردود أفعاله : كنت عايز اتكلم معاك شويه في حوار
عوض : طبعا و صاح بصوت عالي واد يا احمد هات كرسي بسرعه للاستاذ
جاء شاب صغير في العمر وهو يحمل كرسي خشبي ووضعه أمام الياس
عوض : تشرب ايه
الياس وهو يجلس علي الكرسي : ملوش لزوم
عوض : لا ابدا ميصحش واد يا احمد هاتله شاي
الياس وهو يركز فيه : أنا اسمي الياس الصاوي و ظابط شرطه
عوض بنبره عاديه : اهلا نورت الحاره
الياس : ده نورك تسلم
عوض : خير يا باشا
الياس : من حوالي سنه او اقل في عربيه باسمك كانت عند فندق ---- و بعد فتره شاب اخدها بسرعه وهرب بعد ما ارتكب جريمه
عوض بتفكير :ابدا محصلش العربيه كانت بايظه في الفتره دي ولسه متصلحه من حوالي ٥ شهور لاني اصلا مش بقدر اسوق من فتره لاني كنت عامل عمليه و ابني الوحيد مسافر بره مصر من سنتين
الياس: بس المرور جاب العربيه و انا متاكد من الكلام اللي أنا قولته
عوض باستغراب : بصراحه مش عارف انا قولت اللي اعرفه و مستغرب جدا
الياس وهو يقوم : عموما انا همشي الوقتي بس هرجع تاني بتمني لما ارجع تكون افتكرت أو عرفت حاجه مفيده
عوض : تنور في أي وقت
تحرك الياس وهو يشعر أن هذا الرجل صادق وفي نفس الوقت هو متاكد ان السياره كانت موجوده هناك اليوم إذا اين الحقيقه
كان يفتح الباب لكن منعه صوت لهاث شخص يجري وراه وجده هو الولد الصغير احمد الذي احضر له الكرسي
احمد: باشا أنا عارف مين اللي هيوصلك للمطلوب و هيعرفك الحقيقه كامله
الياس بلهفه : مين
🌸🌸🌸🌸🌸🌸🌸🌸🌸🌸🌸🌸🌸🌸
انتهي الفصل
بتمني يكون عجبكم و بعتذر علي اب أخطاء إملائية لاني ملحقتش اراجعه
فتره الاسئله
١-هل هيوافق أهل جميله علي ادهم
٢- مين اللي هينضم لالياس و عدي
٣- رايكم في رد فعل نورسين
٤- يا تري الياس هيكتشف الحقيقه
٥- الولد كان عايز ايه من الياس
٦-هل حقيقه وعد و شهد هتبان
٧-ايه حكايه موج
أراكم في حلقات قاعده
في امان الله 💚
