وأنا الهبايب ماتحرك غترتي وعقالي

الهبايب ~١٢~

~~ المغرب ~~
دخل منصور شقته وهو يفك شماغه بتعب ودخل المجلس ويلاقي زوجته امام عيونه جالسه على الارض وقدامها القهوه والتمر والحلا وحاطه البناجر الذهب بيداها
ابتسمت بخفه : تعال تقهوى
مشى لها منصور وبدا يتقهوى معها وكان الوضع صمت لين مانطقت بشاير : منصور شرايك نشتري دش ل البيت نشوف اخبار العالم والناس
ناظر فيها منصور : ابشري بس اسعارهم ي بشاير ماهي هينه
بشاير نزلت راسها وهي تناظر فيه ببتسامه : يغلا علي؟
ورفعت راسها وكملت : بعدين اخوانك وخواتك تسع وش بيصير لو اخذت منهم فلوس ؟
هز راسه منصور ب الإيجاب: سمي يجيتس الي تبينه
ابتسمت بشاير : عسى الله يخليك لي
ابتسم منصور بخفه وقام من مكانه طالع ل غرفه العيال و اول مادخل مالقى احد موجود من اخوانه مشى ل دولاب العيال وبدا يفتش بين ملابس عبدالعزيز لين مالقى كيس بني ابتسم من فتحه وبقى فيه حول الفين ريال همس بضحكه : مانت بهين تجمع الريال
اخذهم وحطهم بجيبه وقفل الدولاب وطلع ل السوق وهو يدور دش لشقته وفعلا لقى عامل يركب دش مع تلفزيون تقدم له منصور ونطق
: سلام صديق
العامل : وعليكم السلام
منصور وهو يناظر ب التلفزيون وفوقه الدش: بكم هذا تركيب؟
العامل : هذا يجي سوا سوا تركيب الف ريال
مده يده منصور وهو طلع الالفين حقت عبدالعزيز ومدهم ل العامل: يلا هذا الفين حق انت وحق دش شيل بيت انا
اخذ الفلوس عامل وهو يناظر فيهم بذهول ولف على منصور الي بدا يمشي ل البيت اخذ عدته والتلفزيون وركض ورا منصور ل البيت
~~ بيت العم ابراهيم ~~
دخل عبدالعزيز ومعه اخوانه ماعاد طلال بعد ماخلصوا من المحل
ابتسمت العمه نوره وهي تشوفهم سوا داخلين ويسولفون مع بعض ويضحكون نطقت ببتسامه : يهلا بعيال يهلا بنور عيوني
ابتسم عبدالعزيز وجلس جنبها:يهلا بتس ي ام العز
العمه نوره: الا وين طلال ما اشوفه؟
تركي : جلس مع خويه ب المحل وبيرجع عقب العشاء
دخل منصور يناظر فيهم مجتمعين نطق : ي حريم قوموا ل غرفكم فيه عامل بيدخل لشقتي
ناظرت فيه الجوهره : ليه مايدخل مع باب الشقق ؟
منصور وهو يناظر فيها : كيفي انا ابيه يدخل من هنا قوومييي ييلااا
قاموا كل البنات والعمه نوره من نطق كلمته الاخيره بصراخ والعيال ساكتين وهم يناظرون ب العامل الي دخل ومعه تليفزيون الا اياد توسعت عيونه بذهول ونطق من مشى منصور : ي عياللل تلفزيون ودش
تركي بعدم اهتمام: طيب ؟ منصور مسوي كل المحرمات وقفت على التلفزيون والدش؟
ادهم: ي غبي هو مايقصد إذ حرام او لا هو يقصد ان الاسعار توصل لين خمس الالف شلون منصور جابهم
اياد ضرب كتفه : حي عينك ي فاهمني
تركي: انا ذاك اليوم شفت تلفزيون مع تركيب الدش ب الف
عبدالعزيز: يمكن معه قيمه الفلوس
ضحك اياد : وش النكته ذي شكله اكيد زارف فلوس من امي
طلعوا البنات من الغرف وعبدالعزيز نطق من شاف العمه نوره: يمه
العمه نوره: سم ؟
عبدالعزيز: منصور اخذ منتس فلوس ؟
هزت راسها ب النفي : لا بس اني شايفته يوم انه صعد غرفتكم قبل لايروح يشتري الحرام
فز العيال كلهم وهم يركضون لغرفتهم والكل يدعي ان منصور ما اخذ من فلوسه شي ورح كل واحد ل المكان الي مخبي فيه فلوسه
تنهد اياد وهو ماسك قلبه وحاط يديه تحت مخدته : الحمدالله موجودين
ضحك تركي : الله على المكان ي اياد
اياد ناظر فيه : شف نفسك وين مكانك
حك راسه تركي ولف راسه على الكراسي الي بوسط الغرفه ومقسوم نصين وبوسطه فلوس تركي
لف الكل على عبدالعزيز الي طلع من الغرفه وهو ماسك كيس البني ويصرخ ب اسم << منصور >>
فزوا البنات من مكانهم ومعهم العمه نوره وهم يناظرون ب عبدالعزيز الي متوجه لباب الشقق ويصرخ ب اسم منصور
العمه نوره بخوف : ي الله ي الاثنين هذولاء يارب صبرنييي
نزل منصور وقف قبال عبدالعزيز وزجته كانت واقفه على درج الشقق وتسمع كل الحوار
عبدالعزيز بعصبيه : منصور ب اي حق تمد يدك على حلالي ؟
منصور وقف ببرود على حده الباب وهو يدخن ويناظر فيه: حلالنا واحد حنا اخوان
عبدالعزيز قرب له ووجه مقابل وجه منصور وصرخ :تستهبللللل؟؟ تاخذ فلوسي بدون اذن مني وتصرفه على شي مايسوى ؟؟؟
قربوا له ادهم وتركي وهم يمسكونه لاجل مايتضارب مع منصور
منصور ببرود : مو انت قايل خذ من فلوسي بس لاتقرب ل امي وخواتي؟
عبدالعزيز بعصبيه : وانت قايل انك بتعقل لو زوجناك ولكن خلف الله عليك وعلى عقلك الي فسد من المخدرات
شهقت بشاير اول ماسمعت كلام عبدالعزيز ومدت يديها ل فمها بصدمه من الموقف ومن برود منصور الي امام نظر عيونها
دخل منصور وهو يناظر فيها بعد ما مشوا عيال وبنات ابراهيم من باب الشقق
وقفت لثواني وهي تناظر فيه وصعدت الشقه وبقى منصور واقف وهو يحك راسه ومو فاهم اي شي يصير
~~ الرياض ~~
طلع ناصر من شقته وهو يركض مع الدرج يبي يلحق على اخوياه الي ينتظرونه ب المطعم بس ماحس بنفسه الا وهو طايح من الدرج وحولينه كميه كبيره من الحريم يسمون عليه ومن ضمنهم عجوز كبيره كانت ماسكه كتفه وتقول : بسم الله عليك ي يمه صاير بك شين؟
ناصر حس الدنيا دايره به وهو يناظر كميه العبايات الي قدام عيونه ارتخى على اسوار الدراج ونطق : بخير بخير
العجوز : وين امك ؟ وخواتك اهلك كلهم وينهم ؟
ناصر وهو يمسح على رجوله : ماعندي احد جاي بعثه هنا
انصدم من مسكت يده العجوز وهي تقول : تعال اصعد شقتك يمكن فيها جرح قوي ولا عظامك انكسر
قام معها ناصر من الصدمه وهو يصعد شقته والعجوز دخلت وراه وبناتها ورا ونطقت : ي امي حنا الشقه الي قبالك ان بغيت شي طق الباب وابشر بالي تبيه
ابتسمت ناصر بخفه : يملا العافيه ي خاله
ابتسمت له العجوز وطلعت مع بنتها وجلس ناصر وهو مسك رجوله بالم
~~ عنيزه ~~
بيت الخال فرحان
الخال فرحان: جادلللللل
طلعت الجادل من غرفتها : سم يبه؟
الخال فرحان: شعندتس ب الغرفه
الجادل بتملل: وين اروح ماعندي الا الغرفه اجلس بها
الخال فرحان: البسي عبايتك بتنزلين معي السوق
مشت الجادل وهي تلبس عبايتها وطلعت مع ابوها السوق وهي تتفرج يمين ويسار تدور محل العم ابراهيم وماحست الا هم امامه ولكن ماكان موجود سوا طلال و واحد ماتعرفه الي هو رفيق طلال
الخال فرحان: سلام طلال
طلال ببتسامه: وعليكم السلام يهلا بخالي توه ينور المحل
ابتسم الخال فرحان بخفه : منور ب اهله الا صح عزوز وينه ماشوفه دايم معك
طلال لف نظره من دخل عبدالعزيز السوق : الذيب عند طاريه
لف الخال فرحان: شكل الذيب نفسيته ماش
تقدم عبدالعزيز وهو منزل راسها بعصبيه ونطق : سلام
ودخل المحل بدون لا ينتبه ل الخال فرحان والجادل
ضحك الخال فرحان ونطق : عزوز علامك ماتشوفني واقف
رفع نظره عبدالعزيز وبثواني تبدل وضعه ل ابتسامه من شاف زول الجادل خلف ابوها مشى وهو يسلم : يهلا والله بخالي اعذرني والله كانت منفس
الخال فرحان ببتسامه : يهلابك عسى ماشر ؟
حك راسه عبدالعزيز: تعرف منصور ومشاكله
الخال فرحان: ايههه الله يعين ويهديه ي رب المهم انا جاي ابي تمر سكري
عبدالعزيز: ابشر
ومشى يجيب له وهو كله نظره على الجادل وهي الي متوتره من نظرات وتلتفت يمين ويسار لاجل تتخطى الموقف
~~ شقه منصور ~~
بشاير بدموع : ليههه ماقلت لي ؟
منصور كان واقف امامها وماسك راسه : ي بشاير كله ماضي قسم بالله ان مالي ب الحرام الحين ولا قربت له
بشاير نزلت راسها وهي تبكي : وش بيقولون الناس؟ رجعت ل اهلها ثاني يوم
منصور وقف بحيره ل اول مره يحس انه ضايع ويهمه وجود انسان بحياته ولكن نطق : بشاير قسم بالله اني ماتقدمت لك الا وانا تايب وماسح كل الماضي من حياتي ولابقى ل المخدرات اثر بحياتي
سكتت بشاير وهي منزله راسها وتبكي بدون اي رد ومنصور مشى وجلس ل الجهه الثانيه من السرير وهو حاس حاله ضايع مايدري وش يسوي لاجل يكسب رضى بشاير ويكسب قلبها سكت من شاف بشاير تمسح دموعها وتقوم من مكانها ل دوره المياه تنهد بضيق واخذ شماغه ونزل ل السوق وهو باله وفكره مع بشاير وراضها
~~ بيت مرزوق ~~
تقدمت مريم ببتسامه ل مرزوق الي كان جالس على الطاوله وقدامه شاهي و مخططات البيت و اوراق شغله تقدمت له مريم ببتسامه ونطقت : مرزوق
مرزوق ونظره على الاوراق :سمي؟
مريم نزلت راسها بخجل : انا حامل
رفع نظره مرزوق بذهول : وش ؟
مريم وهي تاشر على بطنها وتمد يديها على شكل بطن حامل وبابتسامه : حامل
فز مرزوق بفرحه : الله يتمم فرحتنا ب الخير ي ام محسن
ضحكت مريم بخفه : ام محسن ؟ يمكن ام نوره
ابتسم مرزوق : ام محسن ولا ام نوره كلهم خير وبركه المهم بشرتي امي ؟
هزت راسها مريم ب الايجاب وهي مبتسمه ونطق مرزوق : اجل وش عندك واقفه ؟ البسي عبايتك نروح نبشر اهلك
مشت مريم بفرحه وهي تلبس عبايتها وماتقدر تنكر او تخفي حماسها لرده فعل اهلها لو عرفوا عن حملها ومرزوق بنفس مستوى الحماس طلعوا من البيت لبيت العم ابراهيم والابتسامه شاقه وجيهم والفرحه ماليه قلوبهم
نزلت مريم وهي تشوف الباب مفتوح نصه دخلت ودخل وراها مرزوق والبنات تغطوا بشكل سريع من داهمهم مرزوق بدون لايعطيهم خبر
مريم بفرحه : يمهههه
العمه نوره : شنوحك واقفه وموقفه رجلتس معك اجلسوا حياكم
مرزوق ببتسامه : جينا نبشرك بخبر وطالعين
العمه نوره: عسى خير ي امي؟
مرزوق : مريم حامل
شهقوا البنات من تحت الجلال وفزت الجوهره : صدززززز؟؟؟؟
مريم ببتسامه : اي صدز
قامت العمه نوره وهي فاتحه ذراعها : ي عيني مبروك يتربى بعزكم
ومشت لمريم تحضنها ومريم بادلتها الحضن ولفت العمه نوره ل مرزوق ونطقت : ها عاد يويلك تشغل بنتي وحفيدي بكثر الطلبات والحوسه
ضحك مرزوق بخفه : ماعليك ي خاله انا بطبخ وانظف واشيل البيت كله لايهمك
ضحكت العمه نوره: اجل كذا تطمنت
مرزوق : يلا فمان الله
العمه نوره: وين ؟تعشوا عندنا
مرزوق : لا والله ي خاله بروح مشوار مع ام محسن
ابتسمت العمه نوره: بحفظ الرحمن
طلعت مريم مع مرزوق لسوق الذهب وبدا مرزوق يشتري كل الي بخاطر مريم من بناجر واساور وسلاسل
~~ بعد ساعات ~~
تحديدا الساعه ١٢م
دخل منصور لشقته وهو ماسك كيس من محل ذهب وتقدم ل بشاير الي كانت جالسه ب السرير امام باب الغرفه
منصور مد لها الكيس : ادري انه مو حقك ولكن اسف لاني خبيت عليك واعرفي ان لك معزه خاصه بقلبي واي شي تامرين فيه انا حاضر وسمي
ابتسمت بشاير بخبث من شافت انه مستعد يسوي كل شي لاجل يكسبها ويكسب رضها وتبقى معه نطقت وهي تاخذ الكيس : معذور ولكن عندي طلب
منصور بفرحه انها رضت: امريني ؟
بشاير : ابيك تدخل العقارات وتكسب منه ملاييننن اهون من المحل الي ب الموت يطلع منه قرش
هز راسه منصور ب الايجاب : بفكر ب الموضوع وان شاء الله خير
بشاير وهي تناظر فيه : وش تفكر ؟ منصور اصحى ترا الي ب العقارات يطلعون ملايين ودراهم تغطي الشمس هذا غير الاراضي الي تكون ب اساميهم وجب لنا سياره زي الناس نمشي فيها بوسط خلق الله
حك جبينه منصور : سمي بدخل
ابتسمت بشاير ومشت من عنده ل التسريحه وهي تشوف الذهب وتجربه والابتسامه شاقه وجها
~~ من بكرا الصباح ~~
بدوا البنات يحطون الفطور ويجهزون ل المدارس هم والعيال
نزلت بشاير من شقتها و وراها منصور وهي تناظر ب الوضع دخلت المطبخ وهي تناظر ب البنات الي يرتبون الفطور فيه رفعت يديها وهي تحركها والبناجر الي بيدها تطلع اصوات نطقت : سلام
رفعوا نظرهم البنات ونطقوا : وعليكم السلام
رفعت يديها انتصارالي فيها البناجر وهي تقلد حركات بشاير
ونطقت: يهلا والله
صدوا البنات وهم يحاولون يخفون ضحكتهم ناظرت بهم بشاير وانقهرت من انتصار ونطقت : الحين بسالكم انتم عندكم دش؟ لو ماعندكم ي حرام صراحه الكل صار يركبه ويحط شاشات ببيتهم وحتى انا منصوري حبيبي ماخلى علي قصر امس جاب العامل لين سطح الشقق وركب لي دش وشغل التلفزيون
سكت الكل وهم يناظرون فيها ونطقت بشاير بضحكه مستفزه: ها انتصار جاوبي ؟ او تصدقين اخليك تسوين الفطور انا بجلس انتظر ب الحوش يلا سلام
وطلعت من المطبخ وهي تضحك بشكل مستفز لدرجه ان انتصار عضت اصبعها بقهر : ي الله تقهر ي بناتتتت
الجوهره ببرود : ليه تقهر ؟ الحين اكلم عزوز يجيب دش وتلفزيون احسن من حقها المتخلفه ذي
طلعت انتصار من المطبخ وهي صاعده لغرفه العيال ودخلت وهي تشوف طلال وعبدالعزيز موجودين
انتصار بقهر وهي شاده على يدها : عزوزز
عبدالعزيز رفع نظره وهو يسكر ازرار ثوبه: سمي ؟
انتصار : تكفى قل تم
عبدالعزيز بستغراب : تمين بعد مو بس تم بس شسالفه ؟
انتصار شدت على اسنانها : الكلبه بشاير تقهرنا لان ماعندنا دش وتلفزيون تكفى اكسر خشمها وجب لنا
ضحك طلال : سبحان الله لايقين هي ومنصور على بعض
تقدم عبدالعزيز ل انتصار وهو ياشر على خشمه : سمي اول ماترجعين من المدرسه تلاقينه قدامتس
فزت انتصار بفرحه : حي عينك ي شيخ الله لايحرمني
عبدالعزيز: طيب ممكن تبعدين عن الطريق ؟ علشان امشي لشغلي
انتصار ابعدت ونطقت:رح عسى الله يسهل دربك
نزل عبدالعزيز وهو يضحك على حماس انتصار وبنفس الوقت يفكر كيف يجيب الفلوس لاجل يشتري الدش والتلفزيون بحكم ان فلوسه اخذهم منصور مر عبدالعزيز من قدام عيون امه وهو طالع ل الشارع
العمه نوره: عزوز! تعال افطر
عبدالعزيز: لا والله طالع لي مشوار صغير وثم بطلع القصيم
العمه نوره ببتسامه : اجل اسمع الخبر ذا مريم حامل
فز اياد من مكانه: اسالك بالله
تركي: ماشاءالله الله يتمم لها
ادهم بصدمه : احسني ماني مستوعب
عبدالعزيز بفرحه : الله يتمم لها ويبشرهم ب الي يتمنون
منصور وهو يناظر فيهم : ليه لاستغراب ؟ طبيعي متزوجه
كشرت العمه نوره بضيق ونطق عبدالعزيز:فمان الله
طلع وقابل متعب امامه ابتسم بخفه وهو يسلم عليه :يهلا والله
متعب : هلابك شلونك عساك بخير ؟
عبدالعزيز: الحمدالله بخير غريبه ليه واقف تنتظرني؟
متعب حك راسه: اي والله انتظرك عندي خبر
عبدالعزيز بستغراب : عسى خير ؟
متعب : ماشي الرياض انا ادرس بجامعه الامير سعود
ابتسم عبدالعزيز: ماشاءالله رح لشقه ناصر تراه وحيد وكبيره الشقه حتى هو يشكي من الوحده
متعب: اي انا جاي اودعك واخذ عنوان ناصر
بدًا عبدالعزيز يوصف له الموقع والطريق و ودعه متعب ومشى لسياره ابوه طالع ل الرياض
آما عبدالعزيز ركب سياره ناصر الي تركها بعنيزه ومشى لمحل العم راجي وهو يدعي ان اليوم يوم مشعل لاجل ياخذ منه سلف وفعل قابل مشعل قدام محل ابوه نزل وهو يسلم عليه : سلام مشعللل
مشعل ببتسامه : يهلا والله غريبه جاي السوق الصباح
حك راسه عبدالعزيز بتوتر : والله جاي وانا مستحي منك
قام مشعل من مكانه وقف قبال عبدالعزيز: افاااا تستحي من ولد عمك؟ انطق وش بغيت
عبدالعزيز: ابي سلف الف ريال
مشعل: بس الف ؟ ابشر والله
ومد يده ل جيبه وطلع منه الف ريال وحطهم بجيب عبدالعزيز: سم
ابتسم عبدالعزيز وهو يشكره وركب سيارته
~~ الظهر ~~
دخلوا البنات البيت ومعهم العيال بعد المدارس وقبالتهم العمه نوره
العمه نوره: من الي قايله ل اخوها يجيب دش ؟
فز انتصار بفرحه : وين التلفزيون
وركضت ل الصاله ومعها البنات والعيال وهم يشوفون التلفزيون لونه ابيض متوسط صاله البيت
طلال بضحكه : روحي اقهري بشاير
اياد : بدينا سوالف الحموله اقهري واقهري
ادهم بضحكه : والله مدري شسالفه ولكن واضح ان بشاير رافعه ظغط انتصار
الجوهره وقفت تناظر التلفزيون وفيها الضحكه بعد الموقف الي صار الصباح والحين
سلمى : حماس وش بيصير لو شافته بشاير
هيا بحماس : وناسه الحين نتعشاء ونتغدى وحنا نسمع شي يفتح الصدر مو سوالف طلال
ناظر فيها طلال : حاصل لك تسمعين سوالفي ي ام خدود
تركي : خلاص يورع انت وياها تعالوا نعاون امي ونحط الغداء معها
~~ بيت الخال فرحان ~~
وقفت الجادل قدام النافذه وهي تتامل البنات الي طالعين من المدرسه بحكم انها قريبه من بيتهم وتتمنى لو انها معهم وكملت تدريس وتعليم ولكن مابيدها حيله ولا تقدر تفتح الموضوع مع الخال فرحان لانها عارفه انه عصبي ومستحيل بيرضى
دخلت سميه وهي تناظر فيها:جادل
الجادل لفت عليها : هلا؟
سميه : تعالي سوي غداء ل ابوتس قبل لاينزل السوق
هزت راسها ب الإيجاب وقفلت النافذه ومشت تسوي له الغداء وهي متقبله ان ذا وضعها وذي حياتها الي مستحيل لها مفر منها
~~ الرياض ~~
نزل متعب وابو متعب حمدان قدام عماره شقق
حمدان :كم رقم شقته؟
متعب : رقم عشره الدور الثاني
اخذ شنطته متعب وصعد مع ابوه ل القسم الثاني وهم يطقون باب الشقه ونطق ناصر من ورا الباب: ميننن؟؟!
متعب : انااا متعب رفيق عبدالعزيز
فتح الباب ناصر وابتسم من شافهم: يهلا والله حياكم حياكم
دخلوا الشقه وجلسوا كلهم في الصاله ونطق ناصر وهو يحك جبينه : معليش ماحسبت حسابكم ولاكان سويت لكم قهوه بس ثواني اسوي عصير واجي لكم
حمدان : لا لا تعال تعال عندنا موضوع بسيط نبيك فيه
جلس ناصر ب الجلسه الي قبالهم : عسى خير؟
حمدان : شوف ي ولدي ناصر متعب بيدرس هنا بجامعه الامير سعود شريعه وصراحه خايف اخليه بشقه لحاله يضيق او يهمل نفسه وقلت لو عادي يصير معك بنفس الشقه واذ ماتبي عادي ترا
فز ناصر بفرحه : الا ابي شلون ما ابي انا وحيد حالي حاله وكل اخوياي مع اهلهم هنا وصراحه زين انا وياه بنفس الجامعه نروح ونرجع سوا ولاتشيل همه دامه معي
تنهد حمدان براحه : عسى الله يسعدك ريحتني اجل الحين ارجع عنيزه وانا متطمن على ولدي
ناصر : اجلس اليوم عندنا تعب الطريق عليك
حمدان وقف وهو طالع : والله عندي شغل بس جيت لاجل اتطمن على متعب
ناصر : اجل درب السلامه
حمدان : الله يسلمك
طلع حمدان ولف ناصر على متعب وبدا يوريه الشقه وغرفه متعب ودوره المياه وماينكر ناصر انه مبسوط بوجود متعب معه لاجل يخفف عن شعور الوحده الي هو فيه
~~ العصر ~~
تحديدا ب بيت العم ابراهيم
جلس تركي وهو يسولف مع عقاب ومن موضوع لموضوع نطق عقاب: والله صراحه ي تركي مستحي اقول لك
تركي بستغراب : مستحي من وشو ؟
عقاب حك جبينه بتوتر: صراحه ي تركي ودي اخطب من عندكم
تركي ببتسامه : هذي الساعه المباركه بس انتظر عبدالعزيز يجي وفاتحه ب الموضوع لان والله مالي ب السوالف ذي انا
عقاب بتوتر ؛ بس فيه مشكله
تركي كان يصب القهوه : وشهي المشكله؟
عقاب ناظر فيه بخوف : ابي اختكم الي ضاعت ب البر وساعدتها انا
رفع نظره تركي ويناظر فيه لثواني ومساك الفنجال بيده وعقاب بلع ريقه بتوتر من نظرات تركي

ان اصبت فهو من فضل الله وان اخطأت فهو من الشيطان ✨🤎