وأنا الهبايب ماتحرك غترتي وعقالي

الهبايب ~~١٤~

يوم الجمعه ~ليلة زواج عقاب بن زايد والجوهره بنت ابراهيم
دخلوا رجال الراجي بـالبشوت لـحدى القصور الفخمه بـعنيزه ومذهولين من منظر قصور الافراح وريح البخور الي تعم المكان قابلوا جماعه عقاب امامهم بوسط القاعه ابتسم الشيخ جمال وهو يسلم عـلى العم راجي ويرحب بـجماعه الراجي : يهلا والله ومسهلا
بادله الابتسامه العم راجي بثقل وهيبه وعـ يمينه منصوروالعيال وراه : يـهلا فيك
عقاب توجه لهم ببتسامه وبدا يسلم عليهم مع رجال جماعته جلسوا رجال الراجي بجهه اليمين لـلقاعه وبوسط القاعه جماعه عقاب والوضع كان رسميات لين مالف الكل عـ باب القاعه من دخل ناصر ومعه متعب ببتسامه نطق : مبروك ي عقاب
ابتسم عقاب وتوجهه له يستقبله : ي مرحباااا
سلم عليه ناصر ولف عـ اهله : سلام
وقف الكل له ببتسامه وبدوا يسلمون عليه ويرحبون فيه وفي متعب
عبدالعزيز لـمتعب : صرتوا اعز الاخويه
ضحك منيف بخفه : والله ناصر شخص مايتفوت
جاهم ناصر ببتسامه : كاني سمعت اسمي؟
عبدالعزيز: ماسمعته الابكل خير تعال اجلس
جلس ناصر جنب عبدالعزيز وهمس : ماشاءالله ي نصيب الجوهره
عبدالعزيز بنفس الهمس: الله لايوريك عمي راجي ماخذنا من صباح الله خير لسوق البشوت وشاري لنا اغلى البشوت رغم اني قايل له عندنا بشوت زواج منصور ولكنه رافض يقول حنا الراجي ماحنا اقل من غيرنا
ابتسم ناصر: حي عينه العم
~ قسم الحريم ~
دخلت الجوهره عـغرفه البنات وهي لابسه الفستان الابيض ونطقت ببتسامه : سلامممم
الكل ناظر فيها : وعليكم السلام
مريم مسكت راسها : انتي وش تسوين هنا ؟ روحي غرفتك اجهزي
تنهدت الجوهره وهي تناظر فيها : كيف اكمل تجهيزات وانا مااعرف زوجي مين؟
انتصار بضحكه: ي غبيه زوجتس هو نفسه الي شافك بالبر
ناظرت فيهم الجوهره بصدمه : اسالكم بالله ؟؟؟
هيا : اي والله عزوز قال لنا ذاك اليوم
سلمى : بس ماعليك عزوز سال عنه وشاف وضعه وضع اهله وطلعوا خوش ناس لاتشيلين هم
الجوهره ببتسامه: اي ماعليه دام عزوز سال عنه اجل اموري تمام
ولفت نظرها على الجادل الي لابسه فستان ازرق ضيق ومبين تفاصيل جسمها وخصرها المنحوت مع شعرها الاسود الطويل ونصه على ورا والنص الثاني على قدام وحاطه مكياج خفيف مع جمالها البارز وجالسه قدام التسريحه تحط روج تقدمت لهِ الجوهره ببتسامه :يزينتس يشيخه
لفت لها الجادل وهي ترتب شعرها: صدز حلو شكلي ؟
الجوهره ناظرت فيهِ : حلوه وبس ؟ يشيخه احمدي ربك اني مب رجال ولا كان خطفتك من عزوز
لفوا كل البنات عليهم وناظرت فيهم الجوهره بتوتر وطلعت من الغرفه اما الجادل بلعت ريقهِ بخوف وجلست قدام التسريحه وهي تحوس بـالمكياج دخلت بشاير وهي تناظر بـ حوسه الغرفه وريحه الاستشوار والعود والفساتين الي بالأرض واصوات البنات وكل وحده تحط مكياج لثانيه نطقت بقرف: شفيكم فوضى كذا ؟
ناظرت فيهِ انتصار : وشعندتس جايه؟ مو من اليوم مزعجتنا جبت كوفيره خاصه تسوي مكياجي وشعري طسي عندها
ضحكت بشاير بشكل مستفز: خلصت من زماننننن وبعدين انا ماجيت الا علشان عمتي نوره تقول نادي البنات
مريم :زين الحين ننزل
ناظرت فيهم بشاير بضحكه وطلعت نطقت انتصار بـ كره : وش الي يضحك معتوه
سلمى وقفت وهي تسحب ثوبها: خلصت يلا بنات ننزل ؟
الكل قام من مكانه وبدوا يتبخرون ويرشون العطورات ودهن العود وطلعت مريم اول وحده وثم البنات ورآها ونازلين من درج القاعه وكل وحده تقول الزين عندي وقفت العمه نوره قدام الدرجه ببتسامه ونطقت : بسم الله عليكم ي يمه الله لايضركم
ناظرت فيهم بشاير الي جالسه على الطاوله وصدت عنهم بسرعه
البنات ماهتموا لوجودها وبدوا يستقبلون الحضور ببتسامه ورحابه صدر وصوت الطقاقات ملى القاعه نطقت انتصار بعد ساعات : بنات العيال بدوا العرضه شرايكم نشوفهم من الحوش الخلفي
الكل هز راسه با الايجاب وقاموا متوجهين ل الحوش الخلفي الي فيه الباب حاجز بين قسم الحريم وقسم الرجال فتحوا الباب وهم يشوفون عرضتهم على الفرشه الحمراء الي تتوسط حوش القصر وعلى اليمين جماعه عقاب بسيوفهم وعلى اليسار جماعه الراجي بسيوفهم ومعهم مرزوق والخال فرحان وبوسطهم عبدالعزيز ماسك السيف ويعلب به بفرحه وصوت الطبول حوالينه
نطقت انتصار ببتسامه : الله بنات الاجواء تهبلللل
ضحكت سلمى ؛ تكفون ابي اشوف ادهم واياد كيف عرضتهم
الجادل كانت مغطيه الباب بطولها وطول مريم ولكن ماهي منتبه لقصار الي وراها وهم البنات نطقت هيا: جادللل خلينا نشوف
الجادل ماكانت مركزه معهم كل تركيزها على عبدالعزيز والخال فرحان ولعبهم بـسيوف لين مارجعت مريم على ورا وتقدموا البنات كلهم بمكان مريم وهو يناظرون ببتسامه
~~ بعد ساعه ~~
وقفت الجوهره بوسط الغرفه والانوار الذهبيه عليهِ والمسكه بيدهِ والطرحه البيضاء خلفهِ والبنات يرتبون الفستان ويرتبون شكل الجوهره لاجل تستقبل عقاب
الجوهره بتوتر : خلاص يكفي
مريم بضحكه : وش الي يكفي؟
الجوهره عضت شفايفها: مدري ي بنات يوتررر
رفعت الكاميره اشواق : يلا جوهره ابتسمي
صورت اشواق الجوهره لوحدها وثم وقفوا البنات كلهم حوالينها واشواق ثبتت الكاميره وصوروا صوره جماعيه كلهم سوا لين مادخلت العمه نوره: يلااا اطلعوا العريس بيدخل
طلعوا البنات كلهم ورا بعض و وراهم العمه نوره وبقت الجوهره لوحدهِ والتوتر مسيطر عليه بشكل غير طبيعي لين مافتحت الباب وهي تسمع اصوات اخوانها وضحكتهم وصوت ادهم الي دخل اول واحد : يهلاااا جوهرتييييي
تركي ببتسامه : اوخسسس وش ذا الزين
اياد بضحكه : حي عينيك ابو حمود يبي يتزوج
الجوهره ضربته بمسكتها من عرفت انه يطقطق عليها : اياد بالله سد حلقك
دخل ناصر ببتسامه : مبروككك
الجوهره فزت من شافته : الله متى جيتتت؟؟؟؟
ناصر قرب لهِ: جيت اليوم لاجل جوهرتي
دخل منصور و وقف جنب الباب يناظر فيهم وثم دخلوا طلال وعبدالعزيز سوا ببتسامه ل الجوهره نطق عبدالعزيز: ماشاءالله الله يجمع بينكم بـخير
طلال حك جبينه وهو يناظر بها: والله مدري وشيقولون بس الله يجمع بينكم بالخير
ضحكت الجوهره على طلال : امينن
ابتعد الكل عن الجوهره وصاروا على يمينها من دخل عقاب ببتسامه وهو يناظر بـجوهره وهي منزله راسها وقف لثواني وهي يناظر بشكلها والفستان الابيض وشعرها الي كان قصير لحد الاذن والطرحه البيضاء عليه تقدم لها وهو يقبل جبينها : مبروك ي عروس
صد ادهم وهمس ل اياد :زوجني
قرصه اياد وهمس : اسكت
قرب ناصر ل عقاب : احميها بقلبك وعيونك نفس ما حميتها من ذياب البر
ابتسم عقاب بخفه : ابشر
طلعوا العيال كلهم وبقى عقاب من الجوهره الي متوتره وظلوا ساكتين لثواني لين مادخلت ام عقاب ببتسامه : ي ماشاء الله تبارك الرحمن عيني عليكم بارده
ابتسم عقاب بخفه : يهلا يمه
قربت ام عقاب وهي تمسح على كتف الجوهره وكتف عقاب : بسم الله عليكم تبون تمشون لجناحكم ؟
عقاب : لا يمه الليله بنروح فندق وباكر الصباح ان شاء الله نسير عليكم وعلى بيت عمي ابراهيم
هزت راسها ام عقاب ب الايجاب : الي يريحكم
لبست عبايتها الجوهره ونزلت مع عقاب لسيارته واخوانها كلهم عند الباب يناظرون فيهِ ويودعونها والبنات مع الشباك يناظرون بهم
وماهي الا ثواني والعيال راجعين لقسم الرجال بعد مامشت الجوهره والبنات رجعوا لقسمهم
~~ بيت العم ابراهيم ~~
اجتمعوا البنات كلهم بـ سطح البيت بعد تعب العرس
طلعت اشواق من غرفه البنات وهمست؛ ترا حمد نايم بفراش الجوهره لحد يزعجه
سلمى : ابشري بس الجادل وين ماهي داخل ؟
اشواق وهي تجلس : لا والله مالمحت زولها
مريم بستغراب : غريبه عاد هي قايله بتنام عندنا
انتصار : ماعليه ممكن تحت بالمطبخ تدور اكل
~~ عند الجادل ~~
وقفت قدام باب المطبخ وهي تفك الكعب وترفع شعرها لفوق وتوقف بوسط المطبخ بكامل زينتها و وراها باب المطبخ وتسوي لهِ خبز وتدندن بصوتها الهادي عـ: تلقى حياتي كلها لذة غــرام
لذة غــرام مهمـا سهـر طـرفـي
أو جارت ظـروفـي أو عشـت أنا الحـرمان
تلقى حياتي كلها لذة غــرام
تلقى حياتي كلها لذة غــرام
وجاهل النظرات خلفهِ عبدالعزيز الي كان فاهي بصوت الجادل وتفاصيلهِ وشعرهِ المرفوع مركي يده عـ باب المطبخ ويناظر بهِ لين ماصحى على نفسه ولفت الجادل عليه من سمعوا الاثنين شهقت العمه نوره وهي ماسكه كتف عبدالعزيز: وجعههه
عبدالعزيز بتوتر: جاي اشرب ماء
الجادل وقفت ورا الباب بتوتر وهي تسمع العمه نوره: ي تسذوب مجلس الرجال بوه ثلاجه كامله كلها ماء مير وش جابك هنا وانا قايله لك ول اخوانك ان الحريم بوه وش جايبك ؟؟؟
حك جبينه عبدالعزيز بدون رد ونطقت العمه نوره وهي تدفعه على باب الرجال : هينننن باكر الصباح اتفاهم معك
مشى عبدالعزيز لقسم الرجال وهو كاتم ضحكته اما العمه نوره مشت ل الجادل تعتذر منهِ
~~ الصباح ~~
دخل ناصر المطبخ ونور الشمس مالي المكان وريحه الشاهي والبيض ولف نظره وهو يشوف عبدالعزيز واقف عند امه الي كانت تسوي الفطور وتهاوش عبدالعزيز ركى يده ناصر على طاوله المطبخ وهو ياكل طماطم ويناظر عبدالعزيز الي يبرر ل امه لفت العمه نوره على ناصر بعصبيه : اترك الطماطم قطعته ل البيض ماهو لبطنك
وسحبت الصحن بقوه ونطق ناصر بستغراب : علامك يمه معصبه ؟
العمه نوره بعصبيه : شف اخوك جالس لي اخر الليل يناظر بنات خلق الله بـ المطابخ
عبدالعزيز لف على ناصر:اقول لها اني جاي اشرب ماء تقول لي تسذوب
العمه نوره بعصبيه: سبحان الله وبعدين مالقيت الا بنت فرحانننن ؟؟؟؟ قسم بالله غير خالك يعلقك ب جدران البيت ان دراى
ضحك ناصر الي يشوفهم : طيب علشان خالي مايدري زوجيه وزوجيني معه بنفس اليوم
ناظرت فيه العمه نوره : عرس مافيه طيرت عقلي انت وياه برا يلا
فز ناصر ومسك عبدالعزيز من ظهره لاجل يتكلم معه ونطق ناصر:والله يمه بعيد عن المزح ابي اتزوج انا وعزوز بنفس اليوم وانا شايف بنت وأعجبتني بس والله اني شفتها ب الغلط
مسكت راسها العمه نوره: وش جاكم انتم الاثنين ؟ مربيه عيال ولا خرفان انا ؟
ناصر : قسم بالله اني انا باغلط هي فتحت الباب وشفتها
نزلت راسها العمه نوره بدون رد لثواني وثم رفعت نظرهِ وهي تناظر بعبدالعزيز الي يناظر ناصر ويهز راسه بـ النفي وملامحه باين عليه الخوف نطقت العمه نوره: ومنهي بنته الي بتاخذها ي نويصر
ناصر ببتسامه : بنت السلطان بس والله يمه مادري اي وحده شفتها بغلط يوم جيت بعطيهم الصحن
ولفت على عبدالعزيز الي واضح انه متوهق: وانت شوضعك؟
فز عبدالعزيز من حس بيد ناصر تقرص ظهره :موافق
رفعت يديهِ العمه نوره بوجيهم : اسمعوني زين انتم الاثنين تراه زواج مب لعب عيال لو مره وحده خوذوا موضوع بشكل جدي
ناصر بجديه : لا ماعليك يمه حنا رجال ونعرف نفرق بين المزح والجد وعارفين ناخذ قرارتنا توكلي على الله واخطبي لنا
ناظرت فيهم العمه نوره : متاكدين؟
عبدالعزيز: اي متاكدين
العمه نوره تنهدت براحه وابتسمت : طيب نويصر شلون نخطب لك والبنت بـالرياض ؟
ناصر : لا اخذت اجازه والحين هم بالقصيم
ناظرت فيه العمه نوره: ماشاءالله عارف كل تفاصيل حياتهم بالغلط بعد؟
ضحك ناصر : لا لا اخوهم صديق متعب
ناظرت فيهم العمه نوره والدموع بمحجره عيونها : مسرع كبرتوا ي يمه الله يوفقكم ويتمم لكم
ابتسموا ناصر وعبدالعزيز بدون رد واخذت البيض العمه نوره وطلعت لحوش عبدالعزيز مسك ناصر ونطق : صاحي انت؟ شلون جبت طاري الزواج
ناصر مد يدينه لكتوف عبدالعزيز وهو يناظر فيه : شنوحك متوتر؟ عزوز انت امورك ماشيه بـعقارات وبيوم واحد تدخل الآلف ولاتشيل هم البيت الشقق موجوده وغير كذا فكر بـ الجادل وحياتها مع خالي
تنهد عبدالعزيز وهو يناظر فيه وكانه بدا يقتنع بعد كلام ناصر
ناصر طبطب على كتفه ونطق : كانك ماتبي تتزوج ابعد عن الجادل
رفع راسه عبدالعزيز وهو يناظر بذهول من نطق << ابعد عن الجادل>> ولكن سكت بدون رد من طبطب على كتفه ناصر وطلع من المطبخ وتارك عبدالعزيز يفكر بكلامه
~~ بيت اهل عقاب ~~
قام عقاب و وراه الجوهره بعد ما انتهوا من زياره ام عقاب
ابتسم عقاب: تامرين بشي يمه ؟
ام عقاب ببتسامه : سلامك وانا امك وصح تراني قلت لخدم يرتبون جناحكم
عقاب ببتسامه : يعطيك العافيه
وطلع عقاب وطلعت وراه الجوهره لسياره عقاب وكان الوضع صمت لثواني لين مانطقت الجوهره : شغل المسجل
ناظر فيها عقاب بحده ورفع اصبعه : اسمعيني جوهره انا فاهم زين ان اهلك معطيك حريتك كامله ومدلعه ولكن انتي الان زوجتي شعرك القصير ذا شوفي له خلطات تطويل من امي وملابسك الضيقه والقصيره ماعاد ابي اشوفهم عليك كلهم بازباله
ناظرت الجوهره على فستانها الابيض والقصير طالع من تحت العبايه وغطته بخوف وكمل عقاب: والمسجلات ماتشغل الا على حلقات دينيه
لف نظره وكان ناوي يكمل كلامه ولكن سكت من شاف العيون الي تناظره ومليانه دموع نزل راسه ولف على الطريق وهو ساكت لين مانطقت الجوهره بنبره هاديه و مخنوقه : بنام عند امي اليوم
تنهد عقاب بضيق من نبره الجوهره من حس بقساوته عليها وسكت بدون اي رد على كلام الجوهره
بعد ثواني وصلوا بيت العم ابراهيم ونزل عقاب وبعده الجوهره وهو داخلين البيت والبنات من السطح يناظرون بالجوهرة بضحكه واخوان الجوهره والعمه نوره والخال فرحان جالسين ب الحوش
وبدوا سوالف ومن سالفه لسالفه تحت مسمع البنات
نطق الخال فرحان: وانا جبت هديه لبنتي الجوهره
وقفت الجادل وهي تناظر بـخال فرحان الي طلع جوال من جيبه ويمده لجوهره : تستاهلين كل خير
ابتسمت الجوهره بفرحه وهي تقبل راسه : الله يديمك لي يخال ولايحرمني منك
ابتسم الخال فرحان: امينن ي بنتي
سكت عقاب وهو يشوف الكل فرحان ل الجوهره ودلع الخال لها سكت بدون اي رد من شاف فرحه الجوهره وابتسامتها
قامت الجوهره وصعدت ل البنات الي مصدومين و اول مره يشوفون جوال بعيونهم بحكم انهم جدد في السوق اما الجوهره وقفت تناظر بـجادل الي واضح عليها ملامح الضيق والحزن ولكن نطقت ببتسامه مزيفه : مبروك جوهره تستاهلين كل خير
ومشت من عنذها لسميه الي تلبس عبايتها لاجل تمشي البيت
الجادل : بروح معك البيت
هزت راسها سميه بالايجاب وطلعوا سوا لبيت الخال فرحان
~~ بيت الخال فرحان ~~
دخلت الجادل لغرفتهِ وقفلت الباب بشكل سريع وطاحت على الارض تبكي وهي تفك النقاب ونزلت الطرحه على عنقها وبدت تشهق بشكل مجنون وهي تقارن افعال ابوها مع الجوهره ومعها نزلت راسها على الارض ونطقت :منهي بنته؟ منهي الي من لحمه ودمه منهي الي جايه من ظهره ؟ انا ولا الجوهره ؟
رفعت يدها تسد اذنها من بدت تجي لها اصوات ضحكات الخال فرحان وهو مع الجوهره وذاكرتها بدت ترسم صورة الجوهره وهي بحضن الخال فرحان عكس الصوت الاخر صوت الصراخ والصياح والدموع وانرسمت صوره الخال فرحان وضربه ل الجادل كانت الصورتين والاصوات كافيه انها توضح معزه الجادل بقلب الخال فرحان ومعزه الجوهره
رجعت نفسها الجادل على جدار الغرفه وهي رافعه راسها لسقف الغرفه والدموع ماليه عيونها كانت تحس بالم بوسط قلبها وشعور قهر
لفت نظرها على النافذه الي يصفقها قوي الهبايب وكانها تهب عـ قلبها وصدرها المهموم جلست بنفس مكانها تتامل الشباك وبدا يهدى ضجيج دموعها عكس ضجيج مشاعرها الي من يوم مافارقت امها ماهدى وكل ليله يزيد
~~ بعد ساعه ~~
بيت العم ابراهيم
جلست الجوهره مع اهلها وطلع عقاب وبنات العم راجي لبيوتهم
جلس الكل يشوف جوال الجوهره بذهول بحكم ان الجوهره الوحيده ببيت العم ابراهيم عندها جوال ونطق ادهم : ماشاءالله ي حظك ي جوهره ليت خالي يحبني نفس مايحبك
ناصر ناظر بـجوهره الي تناظر فيهم وساكته ونطق : غريبه جوهره كانك مو مبسوطه ؟
الجوهره رفعت راسهِ تناظر بهم : مبسوطه بس الجادل شافت الجوال وضاق خلقهِ
نط اياد من مكانه : لاتقولين لي ان خالي شاري لك وساحب عليها!!
هزت راسهِ الجوهره بالإيجاب وتوسعت عيون عبدالعزيز بذهول ونطق بينه وبين نفسه : تهون ي جادل تهون
ادهم ناطر بـجوهره : يمكن بيشتري لها بعدين
الجوهره : والله ماتوقع انت تعرف خالي فرحان زين مايحتاج اتكلم
قام عبدالعزيز ونطق : بنزل انا وناصر القصيم تبون شين؟
العمه نوره: سلامتك
طلع عبدالعزيز وطلع وراه ناصر متوجهين لقصيم وطول الطريق كان صمت لين مانطق ناصر: تفكر بها؟
عبدالعزيز الي كان فاتح شباك السياره والهواء يضرب على وجهه ورابط العمامه نطق بهدوء وعيونه عـ شارع: افكر بخالي فرحان هو ليه لذي الدرجة كاره الجادل؟ واصلا ليه ماخذها من حضن امها دامه بيعاملها كذا ؟
ناصر ركى نفسه على النافذه ووجه لعبدالعزيز ونطق : والله مدري ي عزوز خالي ذا غريب اطوار بس شوف خلينا نتفق على شي واحد اساسي هو ان خالي يكره كل البنات حتى خواتي بس سبحان الله حب الجوهره قبول جاء له من ربي واذ على موضوع ام الجادل فاكيد ان خالي فرحان يشوف ان ام الجادل ماهي قادر تتحمل مسؤولية الجادل واخذها
ضحك عبدالعزيز بسخريه : على اساس هو وجه مسؤليه
ناصر ناظر فيه وعرف ان عبدالعزيز بدا يفقد اعصابه من حركات الخال فرحان وموضوعه ونطق : اهد عزوز مابيدنا شي نسويه بنته وهو اولى بها
عبدالعزيز مسك راسه بعصبيه : باكر العصر بروح اخطب الجادل
فز ناصر بفرحه : ليت خال شاري الجوال من زمان
ناظر فيه عبدالعزيز بحده وعصبيه وتعدل ناصر بتوتر من نظراته
~~ من بكرا العصر ~~
بيت الخال فرحان
نطق الخال فرحان بحده : بنتي ماهي لزواج
شد عبدالعزيز على قبضه يده بعصبيه وهو يسمع كلام الخال فرحان ونطق العم راجي: وش تقصد بكلامك ي فرحان وضح لنا!
الخال فرحان بوضوح : يعني بنتي ماهي متزوجه لاعزوز ولا غير عزوز بتجلس بابيت ابوها لين ربي ياخذ امانتها
دمعت الجادل الي كانت تسمع الكلام من باب غرفتها ولكن سرعان ماتغير حالها من سمعت نبره عبدالعزيز الجاده : خالي البنات عار ومالهم الا بيت رجالهم
لف عليه ناصر بذهول من الكلام وكمل عبدالعزيز: وجادل بنت وعار عليك باخذها واستر عليها ببيتي
الخال فرحان سكت لثواني من كلام عبدالعزيز لان الي يعرف ان الراجي ماهم متشددين مع بناتهم ومعطينهم راحتهم وخصوصنا عبدالعزيز اول دافع ل البنات ولكن نطق بهدوء: انا موافق وبنتي مالها كلمه بعد كلمتي
هز راسه با الايجاب عبدالعزيز وطلع مع العم راجي والعيال لبرا البيت مسكه ناصر بحده مع ذراعه : صاحي انت؟ وش الي البنت عار جاك مرض خالي ولاشوضعك؟
عبدالعزيز فك يده بقسوه من قبضه ناصر وركب السياره وركب جنبه ناصر ابتعدوا عن البيت بمسافه قصيره وثم صرخ عبدالعزيز فز ناصر بخوف : شجاككككك؟؟؟؟؟
عبدالعزيز لف عليه ببتسامه : اخيرنا بتصير حلالي
ناظر فيه ناصر بستغراب من شخصيته قبل ثواني كان جاد والحين كانه ورع معطينه حلاو مد يده ناصر على عقل عبدالعزيز ونطق:بك شي انت؟
ضحك عبدالعزيز:اصلح ممثل صح؟
سكت ناصر بدون رد وهو يناظر فيه وكمل عبدالعزيز: ماتكلمت قدام خالي بكلامي ذاك الا علشان يحسب اني نفس فكره ونفس عقليته ويوافق
ناصر بدا يصفق له: ماشاءالله ذكي
ابتسم عبدالعزيز ولف عليه ناصر ونطق بحده : طيب مافكرت ان الجادل ممكن تسمع الكلام وتخاف تكون نفس ابوها؟
فز عبدالعزيز وهو يلف عليه : تتوقع كانت تسمع؟
ناصر مسك راسه: غبي انت؟ ي حمار البيت كله على بعضه مترين ونص وصوتك ماشاء الله يسمعه سابع جار وباقي تسال اذ تسمع او لا؟
عبدالعزيز ناظر فيه بتوتر : لا لا ان شاء الله الجادل فاهمتني
صد ناصر عنه وهمس : الله يستر
عبدالعزيز: طيب ماعليك مني الحين متى نبي نخطب لك؟
ناصر : باكر ان شاء الله
عبدالعزيز لف نظره على السوق : وقف هنا بنزل
نزل عبدالعزيز من السياره وهو متوجه لسوق الذهب المطلي واخذ له خاتمين ومشى لشباك الجادل وهو متوتر من رده فعلها عـ كلامه طق الشباك وفتحت الشباك الجادل بشكل سريع وهي منزله راسهِ على الارض : كنت انتظرك
تجمدت عروق عبدالعزيز من كلمتهِ ونسى الكلام ونسى كل شي كان بيسويه وكلمت الجادل : عز
رفع عيونه بذهول واعجاب :سمي ؟
الجادل : ليه قلت باخذها لاجل استر عليها مفضوحه انا؟
عبدالعزيز فز : لا والله ي جادل اني قلت ذاك الكلام لاجل خالي يعجب فيني ويوافق ولا انتي شفتي القمر شلون عالي عند الناس؟ تراه نفس قدرك عندي
ومد يده لجيبه وهو يطلع الخواتم الي شراهم : حتى اني عارف خالي ماعنده سوالف الخواتم وذي الاشياء ولكن شريت وادري انه مب حقك
سكت وهو يناظر يد الجادل ورفعت يدها بتوتر له وهي ترجف لاجل الختام مسك كفها عبدالعزيز الي يرجف وحط الدبله بـ اصباعها ونفس الشي سوته الجادل بيد عبدالعزيز
ابتسمت بخفه وهي تشوف الخواتم البيض بوسط اصابعهم ابتسمت وهي تشوف الخواتم الي تربط بعروق اياديهم وكانهم رابطين قلوبهم مع الخواتم وهي حاسه بحب عبدالعزيز وحنانه الي ماقد حسته ولا عاشت مع احد ابتسم عبدالعزيز من ابتسامه الجادل ونطق بـهدوء: عسى الله يعجل اليوم الي بتكونين فيه ببيتي من غير شر
ابتسمت له الجادل بخفه وبدون رد
~~ من بكرا العصر~~
جلست الجادل جنب ابوها وهي مستغربه انه مافتح معها موضوع الخطبه وكانت سواليفهم طول العصريه عاديه لين مانطق الخال فرحان: سميه خوذي الجادل وانزلي انتي وياها السوق تجهزوا اكتب كتاب الجادل يوم الجمعه
رفعت عيونها بذهول الجادل ونطقت بـغباء: على مين ؟
لف نظره الخال فرحان: ولد خالتك اجهزي
وقام من مكانه وتارك الجادل الي حاسه ان الارض ماعاد تشيلها من قوه فرحتها قام بسرعه وهي تلبس عبايتها وتنزل السوق مع سميه وهي حاسه ان السوق قدامها فراشات من الاحساس الي بداخلها ولكن حست بشي غريب وهي تتسوق مع سميه حست بنقص بفرحتها وان امها مو جنبها امها وقفت لثواني وهي تناظر بسميه الي تشتري الاغراض وبدت تمسح الدموع الي نزلت عـخدها
~ بيت السلطان ~
جلست العمه نوره ومعهِ مريم وسلمى قدام العمه خيريه وبناتها ونطقت العمه نوره : والله اني مستحيه ي خيريه بس ولدي شاف وحده من بناتك ويقول انه بـغلط ودخلت مزاجه من ذاك اليوم ويبيها زوجه له
رفعت نفسها نجلاء ببتسامه وبدت تتنحنح وضحكت العمه خيريه : اجل عندي وعندتس خير ي نوره حتى البنت تبيه
نزلت راسها نجلاء بخجل وضحكت العمه نوره: اجل الله يكتب الي فيه الخير
~|قسم الرجال |~
العم راجي: جاين نطلب يد كريمتكم على سنه الله ورسوله
ابتسم جزاع : والله لنا الشرف ي عم وانتم الراجي سمعتكم معروفه بكل الحي وعارفينكم زين ولكن الراي الاول والاخير ل اختي
ابتسم العم راجي : ماشاءالله عليك رجال ي جزاع شبيه ابوك عسى ربي يغفر له
ابتسم جزاع : اللهم امين
ونطق جزاع بهدوء : الا اي وحده من خواتي تبون ؟
لف العم راجي على ناصر الي بلع ريقه ونزل راسه بدون رد وهمس العم راجي : الله يصلحك جاي تخطب وماتعرف منهي البنت ؟
ولف على جزاع : نبي الكبيره
لف عبدالعزيز على ناصر المتوهق وملامحه باين عليها التوتر صد يحاول يخفي ضحكته وهو يسمع سوالف العم راجي مع جزاع وثم لف عليهم : يلا ي عيال ؟
وقف العم راجي وبعده العيال وطلعوا وقابلوا الحريم بدربهم ركض ناصر بثوبه ل امه ونطق : تكفين طالبتس قولي انها الكبيره
العمه نوره بجديه : لا الوسطانية
جمدت ملامح ناصر وهمس : لا كدينا خير
ضحكت العمه نوره وهي تشوف ملامح التوتر بوجه ناصر ونطقت:لا لا ي امي انت الكبيره ماعليك
تنهد ناصر وهو يمسك يد امه : الحمدالله
ومشت العمه نوره بضحكه وهي تتذكر ملامح ناصر و وراها البنات الي استلموه طقطقه نطقت مريم : والله البنت حلوه مالومك ي نويصر
سلمى : حتى خواتها يقولون الزود عندي
ناصر : مايصير اخذها هي واخواتها ؟
ضحكت مريم وهي تضرب كتفه
ان اصبت فهو من فضل الله وان اخطأت فهو من الشيطان ✨🤎