نوڤيلا فرح فهيمه بقلم: آيه شاكر

الحلقة الأولى

-خلاص يبقا فهيمه بتنا هتتچوز راچل من حداكم طلما الچواز هو الحل عشان نرچع حبايب.

قالها «ماجد عمران» كبير عائلة «عمران»، حاول ابنه أن يتدخل قائلًا:
-بس يابا....

رفع والده «ماجد» يده مقاطعًا كلامه بحزم:
-الكلام انتهي يا زيد.

دار الحوار في بيت كبير بمنتصف القرية بإحدى القرى الريفية وبالتحديد بمحافظة كفر الشيخ حيث ينعقد إتفاق بين مجموعة من الأفراد بعد نقاش طويل يشوبه الحدة أحيانًا والتراخي أحيانًا أخرى....

عقب رجل أخر «سليمان» «كبير عائلة النجار»:
-يبقا كتب الكتاب في خلال يومين والفرح والدخله نبقوا نحددوهم بعدين...

تجلت الدهشه على وجوه جميع الحضور ولكن لم يستطع أي منهم الإعتراض فقد قُضي الأمر واتفق كبار العائلتين.

وانفض المجلس بعد هذا القرار...
الحلقة الأولى
#رواية_فرح_فهيمه
بقلمي آيه السيد شاكر

«عائلة عمران»
***************
-يابا إنت بتقول هتچوز فهيمه ازاي إنت مش عارف إنها عايشه في مصر وكمان بتدرس في الچامعه!

قالها الإبن فتنفس والده «ماجد» بعمق وقال بانفعال:
-عارف يا زيد بس هي لازم تنفذ أوامري وإلا هكون مقاطع أبوها طول عمري.

وأردف بحسرة:
-أخوك إيهاب الله يرحمه غلط زمان وكلنا لازم نتحمل نتيجة غلطُه.

تنهد «زيد» بحسره وقال:
-لو فهيمه موافقتش على الچواز هنخسر كل شغلنا...
أردفت بقلة حيلة:
-ومفيش حل إلا إننا نتصالح مع عيلة النچار بأي شكل!

قال ماجد:
-ربنا يستر من الي چاي.

___________
على جانب أخر اجتمعت «عائلة النجار»

خاطب الأخ الأصغر أخيه الأكبر معاتبًا:
-هتچوز يوسف بت من الريف ازاي يا سليمان وإنت عارف إنه اتعين داكتور في الچامعه وعايش في مصر وسقف طموحاته عالي!

عقب سليمان بتعجب:
-يعني هيخالف أوامر عمه! حتى لو هو عصي هچبره..

عقد جبهته مفكرًا لبرهة ثم أردف بتحدي:
-أنا عارف هخليه يوافق إزاي....

نظر لأخيه الأصغر وقال:
-كلمه وقوله عمك عايز يشوفك بكره...

عقب الأخ الأصغر بقلة حيله:
-ماشي يا سليمان لما نشوف أخرة دماغك هتودينا فين!

عقب سليمان بثقة:
-متقلقش أنا مرتب لكل حاچه.

أردف بفخر وثقة قائلًا:
-أنا إلي ضيقتها عليهم وعرفت أچيبهم راكعين.

طالعه الأخ الأصغر بملامح يغطيها الاستفهام والتعجب، وقال:
-رچعت برده تفكر في الإنتقام!

رفع رأسه لأعلى قائلًا بخبث:
-أنا منستش الإنتقام أصلًا وطول السنين دي كنت بطاردهم في الخفى...