أزهار بلا مأوى

الدار غير آمنة.

ـ عشان أنا اتعرضت للأعتـ ـداء الجنـ ـسي.

وقعت الجملة على مسامعها كدلو الماء البارد في يومٍ شديد البرودة! فتحت مقلتيها على وسعهما ولم تنطق بحرف، لكنها سريعًا لملمت أعصابها وسألته بنبرة جاهدت أن تكون طبيعية:

ـ من مين يا "مالك"؟

انسابت دموعه دون أن يشعر، مسك ذراعه الأيسر وظل يفرك فيهِ وهو يتذكر ما حدث له ثم قال:

ـ منهم... منهم هما.

ـ الدار؟؟

نفى برأسه وهو مازال يذرف الدموع وأردف:

ـ من الناس اللي بروح لها من خلال الدار.

ختم كلماته وانخرط في البكاء، اقتربت منه ومسحت دموعه بأناملها، مسكت وجهه بيدها ورفعته لها وهي تقول له:

ـ خليك عارف يا "مالك" ان ده ماضي، ماضي خلص وعايزين نعالجه، عايزين نعالجه عشان عاملنا مشكلة كبيرة، كل الحاجات دي انتهت، بس أحنا عايزين نعالجها عشان هي تعباك، صح؟

رفع عينيه لها بضعفٍ، كان يتوقع أنه يرى في عينيها نظرة أشمئزاز ورفض، ولكنه رأى نظرة الفخر بوضوح تتراقص في مقلتيها! ابتسم لها من بين دموعه وهو يرفع يداه ويمسح بها دموعه ثم بدأ في قص معاناته منذ نُشبها:

ـ من 3 سنين تقريبًا في عيلة اتبنتني، العيلة دي كانت مكونة من رجل وست ومعندهمش أطفال، بس... بس كان في ولد بيجي عندهم على طول.

كانت "سلمى" تُعطي له كامل تركيزها، مسكت ورقة صغيرة وقلم وبدأت في تدوين النقاط الهامة، عندما لاحظت أنه صمت طرقت القلم من يدها ونظرت له بتركيز وسألته:

ـ مين الولد ده؟ وعنده قد إيه؟

ـ كان ابن اختها، بس كانت هي اللي مربياه.

قال أخر كلمة بسخرية شديدة، نظر لها ثم واصل قائلًا:

ـ كان أكبر مني بكتير، كان في ثانوي تقريبًا وأنا وقتها كنت أصغر من دلوقت، وكان بيجي عندها كتير جدًا.

نظرت له "سلمى" بتركيز ثم سألته بوضوح:

ـ هو اللي عمل كده صح؟

نكث رأسه للأسفل ولم يرد، بينما هي ففهمت وأنتقلت للسؤال التالي لكي تساعده على الاسترسال:

ـ قولي أول مرة عمل إيه يا "مالك"؟ وكانت أزاي وأهل البيت معاك؟ وحسيت إيه وقتها؟

تنهد بعمقٍ وكأنه يتذكر أبشع لحظات حياته، رفع وجهه لها ثم أجابها قائلًا:

ـ كنت لوحدي أنا وهو في البيت، يومها كانوا هما في مشوار وسابوه معايا، أنا كان ليا معاد نوم، يومها جيه معاد نومي ودخلت نمت، بس قبل ما أدخل في النوم لقيته داخل ورايا الأوضة وجيه ينام جمبي! كنت فاكر عادي يعني يمكن فكرني خايف ولا حاجة، بس... بس طلعت كنت ساذج!