أزهار بلا مأوى

الدارك ويب الملعون

كُلّة! بيشِم كُلّة!

هتفت بها وهي تشعر أن أطرافها بأكملها شُلّت عن الحركة!
ولكنها نجحت أن تُفيق حالها من تلك الحالة التي امتلكتها، وبعلو صوتها كانت تصيح عليه باسمه، اتنفض الطفل فور سماعه لصوتها، ترك ما كان يفعله ونظر حوله سريعًا عن مصدر الصوت، وقبل أن يخفي أي شيء كانت "سلمى" تظهر أمامه من العدم وهي تحملق في فيه بعدم استيعاب وتصيح عليه قائلة:

ـ أنت بتعمل إيه يا "سمير"؟؟  وإيه اللي في إيدك ده؟؟

تلجلج الولد، لا يعلم ماذا يقول لها، تلعثم أمامها وقال بتوتر:

ـ ده.. ده حاجة لقتها وقولت أشوف أي ده.

كان الكذب واضح مثل ظهور الشمس في يومٍ مُشرق! وبغضب انتشلت ما وضعه على الفراش بجانبه عندما دخلت لكي يرتطم بالأرض، وهي تصيح عليه بعصبية:

ـ أنت كداب، أنت عارف ده إيه كويس.

اقتربت منه وبعنف مسكت ذراعه وهي تهتف حانقة:

ـ بتشِم كُلّة يا "سمير" بتدخل جسمك السم ده؟! أنت..أنت بجد أتجننت! بتعمل كده ليه؟؟ أنطق ليه؟

كلماتها وفعلتها تلك أثارت غضبه، دفع يدها عنه بعنف وصاح هو هذه المرة قائلًا:

ـ وأنتِ تعرفي إيه أنتِ عننا عشان تقولي ليه ومش ليه؟؟ تعرفي أحنا عايشين أزاي ولا هنا ليه؟ ولا بيحصلنا إيه؟ أنتِ مين أنتِ عشان تسألي وتتحمقي أوي عليا؟ أنا بشِم البتاعة دي بقالي شهور ومحدش عارف حاجة ولا حد حس، وحتى لو حد عرف مكنش حد هيهتم.

صمت وهو يلهث بعنف وكأنه كان في سباق ضد نفسه! وقبل أن تتحدث قاطعها وهو يواصل حديثه الحانق من العالم وليس منها قائلًا:

ـ وأنتِ كمان مش هتهتمي، ولما تخرجي من المكان ده هتنسي أنك قابلتيني أصلًا؛ فبلاش الجو ده، عشان محدش هنا يهمه أنا ولا يهمه أنا بعمل إيه أصلًا.

شعرت بالآلم في حديثه؛ لذلك لَنت نبرة صوتها حين تقدمت مِنه وقالت بهدوء حاولت أن تتحلى بهِ:

ـ مين قال كده؟ أحنا يهمنا أنك تكون كويس يا "سمير" يهمنا أنك تكون في أحسن حال.

صمتت ثم استرسلت وهي تجلس بجواره وتمسك كف يده المرتجف:

ـ وأي رأيك بقى أن من النهاردة كل شغلنتي أن أعرف أنت إيه اللي مضايقك ومزعلك، ومش همشي غير لما تقولي مين بيجبلك الزفت ده.

قالتها بأصرار وهي تنظر له بتحدٍ، بينما هو فالدموع غرقت وجهه دون أن يشعر، طأطأ رأسه للأسفل ولم ينطق، بينما هي فجلست جواره على الفراش وضمته لحضنها بحنان، أدمعت عينيها على حال ذلك المسكين، ربتت على ظهره ثم قالت له:

ـ بقى بقالك شهور يا "سمير" بتدخل الزفت ده جسمك؟ ليه بتعمل في نفسك كده؟ أنت متعرفش أن ده سم وبيدخل جسمك؟