اللقيطة (مُكتملة)

١

مرحبا حبايبي شخباركم ان شاء الله تكونوا بخير ومرتاحين 🌹

.
.
.
.
فتحت عيوني بصعوبة وشفت امي گاعدة يم راسي وخرتْ ايدهة مني، اني جنت احلم.. لا لا حقيقة فزيت على اخر كلمة سمعتهة، الميتم...

فتحت عيوني والدمع سرق الرؤيا مني..
،، فهميني اني بنت منووو؟،،
التفتت . امي ولااا مو. امي مادري كلشي تخربط عندي وخايفة من اللي اريد اسمعة.
،، فرح حبييتي،،
لاتگولين حبيبتي،، صرخت بيها وأشرت الهة حتة تكمل وتجاوب عن سؤالي..
وهي تماشت وياي لان تشوف حالتي ووجهي اللي طگگ من العصبية..
.
.
.
.

اني كنت صغيرة وماافهم شي بالحياة واحب اسوي خير واساعد الناس، كللش احب اساعد الناس ويوم گالوا أبوج تصوب بحرب ايران نقهرنة على شبابة وظليت اتابع اخبارة ويومية يسولفون بيه شون حالته انتكست وصار عصبي لان عرف انه مستقبلة تدمر ومحد تقبل بيه فيوم من الايام صارت سوالف بعد مامر على صوابة سنة گاعدة عند بيت اخوه ابو سهام ظلن يحجن البنات وگالن منو تقبل بيه أني رديت بسرعة،، ليش هيج تحجون هواية نسوان تكيف، اشو عندة بيت وسيارة وبعدة شاب،،
ضحكن الموجودات على كلامي وجاوبت ام سهام،، انتي والله مسكينة منو تقبل بواحد مُقعد، انتي لو نخطبج الة توافقين؟،،
،، والله ياام سهام رغم انه اني بعدني شابة زغيرة بس الحمد لله الله انطاني عقل جبير ليش الانسان مايسوي لآخرته،، انتبهت بوكتهة كلهن صفنن مستغربات على هدوئي وجوابي، جان سألت امه الله يرحمهة گالت بيبي يعني تقبلين؟؟ گلت بكل ثقة،، اي اقبل مابيها شي،،
كل تفكيري بوكتهة هو خطية يحتاج احد يواسيه ومااخفي عليج شكلة حلو يساعد انه البنية تنعجب بيه وتصرفاته وياية كلش حلوة جانت، مرت سنة واحنة على حالنة هو خطية ظل يحبني ومايگدر يفرغ شوگة مثل اي متزوجين، وهذا اللي خلة باخر السنين يسبب مشاكل بيناتنه،، ظلت عمامه يحجون شوكت يخلف، وتعرفين الناس تحب تتدخل باتفه الاشياء، وصار برود بعلاقتي وياه وابد ماگدر يتقرب علية لان اصلا مايگدر....
بقيت بين لوم اهلي وخواتي وزن اخواني لان بوقت الوافقت امي نحرجت ومن رجعنه بالبيت گلبت الدنيا واخواني گالوا مانوافق تخبلتي شون هيج تحجين، اشو كلما يعاندون اني كنت ازيد اعاندهم، والله جان ببالي انه اني صح موقفي ماجنت منتبهة لمشاعري او اعرف شنو راح يتغير بيه، حبيت اوگف وياه واواسيه هذا كل تفكيري بوقتهة..

بعد ماشافوني مُصرة على قراري صار العرس وكلهة فرحانه عكس امي اللي ماتت بحسرتهة علية، وظلييت بعد سنة من زواجنة اشتغل الضغط عليه من نسوان اخوتة واقاربهم، هاي تگلي خلفي بسرعة خاف يموت حتة لايروح البيت والسيارة والراتب منج، وذيج تگلي شبيج عاگر وعلى هالرنة بقيت اشهر واني متحملة ولاگلت لاي شخص انه اني بعدني بنت بيت...

امة تدري بيه وتعرف وضعنه فاقترحت علينه انه نتبنى من الميتم...

وافق حازم بسرعة لان راد يربطني بيه اكثر جان مايشعر بالأمان وياي.