ကူးပြောင်းလာပြီးနောက် ဘော့စ်က ငါလေးကို အပင်စိုက်ဖို့ တောင်းပန်နေလေရဲ့

အခန်း (၄၁)

Title: After Transmigrating, the Bosses Begged Me To Plant Land
Author: Come seven months
Translator: Empty

အခန်း (၄၁)

သူတို့သည် ထို Weibo နောက်ရှိ ပိုင်ရှင်ကို စတင်စစ်ဆေးလိုက်ရာ မကြာမီ၌ ဆွပေးသည့်သူ ဝမ်ကို ဖမ်းမိသွားတော့သည်။

ဝမ်က ဝမ်ချန့်ပဲ ဖြစ်၏။ အစက သူမ ပြုလုပ်ခဲ့ကြောင်း ဝန်မခံခဲ့ပေ။ နောက်ပိုင်း၌ ဝေ့ရုံရုံနှင့် ကျန်သည့်သူများက အသံသွင်းထားသည်ကို ထုတ်ပြလိုက်ပြီး သူတို့က CCTV ဗီဒီယိုကိုလည်း ထုတ်ပြလိုက်လေ၏။

သူမနှင့် ရှဲ့တို့ စကားပြောနေသည့် ဗီဒီယိုကို ကြည့်ပြီးမှသာ ဝမ်ချန့်က ၎င်းကို ဝန်ခံတော့သည်။ သူမထိုသို့ပြုလုပ်ရသည့် အကြောင်းရင်းကိုလည်း ဖြေကြားခဲ့၏။

ဝမ်ချန့်၏အဖြေက ယန်ကျန်ချင်းနှင့် ဝေ့ရုံရုံကို အလွန်ဒေါသထွက်စေခဲ့သည်။ သူမက ပြော၏။

“ငါ ရှန်းထင်ရွှမ်းကို မကြိုက်လို့ “

သင်မကြိုက်လျှင်တောင် တစ်ပါးသူကို ထိုကဲ့သို့ စွပ်စွဲပြောဆိုတာမျိုး မပြုသင့်ပေ။ ရှန်းထင်ရွှမ်းသည် သစ်သီးများ ရောင်းချခြင်းပေါ်တွင် မှီခိုနေထိုင်ရကြောင်း သိထားရပေမည်။ အစားအသောက် ဘေးကင်းရေး ပြဿနာသည် ကိစ္စကြီးတစ်ရပ်ဖြစ်၏။ ထိုအရေးကိစ္စ မရှင်းမလင်း ဖြစ်သွားသည်နှင့် ရှန်းထင်ရွှမ်း၏ စီးပွားရေးက အပြည့်အဝဖျက်ဆီးခံလိုက်ရမည်။

ယခင် Weibo ကို တစ်ချက်ကြည့်ပြီး ထိုကြိမ်းမောင်းနေသည့် မှတ်ချက်များ အရုပ်ဆိုးပုံကို မြင်နိုင်ပေ၏။

အင်တာနက် အသုံးပြုသူများသည် ဤအရေးကိစ္စ ပြောင်းပြန်ဖြစ်သွားလိမ့်မည်ဟု မထင်ထားပေ။ လူတိုင်းက ‌ရှောင်ဖုန်းနှင့် ချင်ယွဲ့ကျီကို မယုံကောင်း မယုံနိုင်သော်ငြား ရဲများကိုမူ သူတို့မပြောရဲချေ။

[ဖာ့ခ် ပြောင်းပြန်ဖြစ်သွားတာက မြန်လိုက်တာကွာ။]

[ဒီလိုဖြစ်လာလိမ့်မယ်လို့ မထင်ထားဘူး။]

[ပုံဝါးတာကို တည်းဖြတ်တဲ့သူက ကောင်းတယ်လို့ ပြောချင်တယ်။]

[အစ်မလေးက အပြစ်ရှိသလို ခံစားရတာကြောင့် စင်ပေါ်သစ်သီးတွေ မတင်တာလို့ ငါတွေးမိခဲ့တာ။ ငါ ထပ်မှားပြန်ပြီနဲ့တူတယ်။]