نسل القبائل "تتمة"

الفصل 94

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 191:

دخلات على والديها وهما مصدومين فيها مفاهمين والو ..

جمال: بنتي فين كنتي ..

مشات جلسات حداه : جا عندي عبدالواحد مع صباح فطرت انا وياه برا..

مينة تبسمات: وفين هو علاش ما دخلش معاك..

نرجس: مزروب خاصو يتبع السربة حيت سبقاتو.."دورات عنيها"..شمس مزال ما فاقت ..

مينة : ناضت ومشات لكازا قالك عندها شي شغل..

نرجس تكسلات فبلاصتها : تا انا انطلع نعس واحد شوي .

مينة: خليك تا تنعسي فطريق انمشيو لكازا كلشي مجموع عند عفراء انديو لفطور لقمر ..

نرجس تنهدات:  بلاتي نطلع لبس شي قفطات ونحيد عليا هاد زيف لي دايرة لوجهي خنقني..

طلعات وجمال نغز مينة وهضر معاها بشوي ..

- هضري مع لبنت راها عيقات بهاد شرط واش قدامنا وقدام لبراني كتعري وجها وقدام راجلها كتغطيه ..

مينة تنهدات بلا خاطر : واش عمر نرجس سمعات ليا ولا ليك هاديك لي قال ليها راسها ديري كديرو ما مصوقة لتاواحد ..

جمال زير على حجبانو :  خاصها تولي تسمع وتفهم راها ولات مرات راجل وزيد داك ولد ناس ما فيا لي يتعايب معاه وهو عيبو بعيد وبيني انا وياه غير الإحترام  راه بكثرة ما كيحترمني وليت نحشم نقوليه صبر على بنتي ..

مينة هزات كتفاها : وصافي راه تا هو قبل بشرطها وكيتعامل معاها زوين وما مخصرش ليها الخاطر وكون مكانش كيبغيها ما يطلبش يديها من لول  ..

جمال عندو هضرة وحدة مكيزوقهاش..

- لخاطر ليه وقتو الالة مينة وكيجي نهار لي مكيبقى فيه خاطر وداك ولد ناس عارفينه مزيان وداير حدود مع نسا ما هز فيهم العين ولا شرك معاهم هضرة واول وحدة فحياتو هي نرجس وماشي ساهل واحد بحالو بطولتو وعرضو وبديك صحة كاملة تبارك الله يتحكم فراسو وحلالو قدامو وداير معاها لخاطر كثر من لقياس راني كنشوف كلشي بين عيني وساكت حيت عندي بنت وحدة مكنبغيش نخسر ليها الخاطر بارك غير لخلعة لي دارت فيا نهار هربات وخلاتني قربت نحماق ولكن دابا من ولات مرات راجل نبغي دير عقلها وتولي مرات دار وتعطي لراجل حقو اما هاد شروط ماعند لواحد ما يدير بيهم كيجيبو غير لمشاكل وصداع ..

مينة ساطت بحهد : وصافي خلي عليك لبنت دابا وهي عاد ضحكات ليها دنيا خليها تفرح شوي ومافيها باس تفشش على راجلها ..

جمال : تفشش لبغات تفشش تاحد ما منعها ولكن لفشوش ليه قانون  راه عندها 24 سنة وبعقلها ماشي صغيرة لي نبررو ليها أفعالها وعبدالواحد ما خلا ليا ما نقول  ،شرا دار فرباط  باش تبقى تقرا مرتاحة وعاطيها لكارط بنكير ديالو  وزيد داك صداق لكبير لي عطاها  ولحد ساعة عمرو قال لي عطيت لبنتك ولا شي حاجة ديما كيعطيها بسكات وبينو وبينها كون ما بنتك لي قالت ليا هادشي عمري نعرفو  وهانتي شفتي سيد داير كل لي فجهدو وما مقصر من والو فمنجيش انا بلا حشمة بلا حية نقول ليه هاديك لبنت عندي بلا عقل صبر عليها  ،..