نسل القبائل "تتمة"

الفصل 101

[ #رواية_نَـسْـلُ_الـقَـبَـائِـل ]

الكاتبة : FATIMA Z-F

الجزء التاني: خطايا شمس نرجس.

الفصل 204:

جعفر بقا الهدوء على ملامحو كيحل ليها ضفرة ديال شعرها وقال بشكل عادي ..

- من دخلنا جلس ضياء وسطنا ما هضرش مع خوتو تا عينو مكيهزهاش فيهم دايرهم زايدين ناقصين ..

عفراء عقدات حجبانها كثر :  كاين شي مشكل بيناتهم ..

جعفر : بيناتهم حنا ما عدنا سوق فمشاكلهم ..

عفراء صغرات عنيها فيه : عارف شي حاجة ومخبيها عليا ..

جعفر تبسم : ماشي مخبي عليك ولكن المشكل قديم كان فوقت باهم الله يرحمو ونتي عارفاني مشاكل لكليان ديالي مكنقولهم لحد ..

عفراء فهمات شي حاجة من كلامو  : لمشكل كان بين ضياء وباه ..

جعفر : راكي عارفة انني مكنتش عارف ضياء ، و فداك لوقت جا عندي تامي وقالي على مشكل وبغاني نشد لقضية وانا رفضتها  ،تال ليوم عاد عرفت ضياء هو سباب المشكل وكنحمدالله من ماشديتش ديك القضية ..

عفراء تزيرات : جعفر جيني من لخر واش هادشي أيأثر على بنتي ..

جعفر حرك راسو بالنفي : مشكل قديم ودابا نساوه وماعندو ما يأثر فبنتنا حيت ضياء هاز راسو بيدو وبخدمتو  ..

عفراء تنهدات براحة ورجعات تكات عليه وغمضات عنيها خلاتو كيلعب فشرها وكيدير ليها مساج وبعد مدة من الصمت سمعاتو قال ..

جعفر : ماقلتي والو لعائلتك على ناس لي ايجيو غدا ..

عفراء بقات مغمضة عنيها : لا ما قلتها لتا واحد تا نسمع بودني شمس كتقول موافقة عاد انحضرهم اما دابا انكون غير انا وياك وخوها وبابا وماما ولالة ماما  تا لو بنتك دارت شي كارثة نكونو غير حنا ..

جعفر تنهد بجهد : ماتزيريش عليها اعفراء  هي بفمها قالت يجيو ويكون خير ..

عفراء : ها نتا قلتيها تا يجيو ويكون خير ماشي قالت لك أه وانا مكنبغيش نهضر وغير كنشوف ولحد الأن ما دخلتش حيت كان عبدالواحد ومابغيتش نوض نهضر وينوض صداع راك عارفو كيف داير ...

جعفر هز حجبانو : كفاش صداع ؟؟ شفتي منها شي حاجة !!!

عفراء نكرات : ما شفت والو انا غير كنهضر حيت بانت لي مزال ما دارت عقلها ...

جعفر  تنهد : مهم غدا اتكون اخر مرة انقبل مبارك يجي يخطب مني لبنت ، لو وافقات هادشي لي بغينا لو ما وافقاتش فأنهضر معاه ما يتسناش بنتي ويقلب على شي بنت ناس ويتزوجها بلا ما نبقى نطمعو  .."تنهد بجهد"..ماكرهتوش هو لي يديها ولكن تا حاجة ما كتكون بزز ...

عفراء بقات ساكتة مغمضة عنيها ، نزل راسو لعندها شافها نعسات ،هزها وداها نيشن لبيتهم  ..