راجل مرتين

~29~

#راجل_مرتين29 (قبل الأخير)
بقلم : #nano_Ibrahim

الصباح طلعنا ورجعنا البيت نور دي كانت بتبكي وعيونها مورمة حضنتها وقلت ليها انا كويسة بعد خذت واطمنت طلعت فوق عشان ارتاح جو الاتنين خلوني اخد ادوتي واكل ونمت بعد طلعو
اما كمال كان قاعد مع نور
كمال. لي م وريتني انو هي حامل بتوام؟
نور. هي طلبت مني كدا وخلتني اوعدها انو م اكلمك
كمال. طب م حكت لي حاجة؟
نور. ماف حاجة تحكيها لأنها اصلا م عارفة سبب تصرفاتك ولو في متأكدة انها كانت ح توريني ..... م نفسك تفهمني الحاصل عشان اقدر اصالحكم ؟
باسها في رأسها وقال ليها ح احكي لي كل شي بس عايز افهم انا الاول القصة كلها.. بس اطمني نحن شبه اتصالحنا
نور. الحمد لله.. بس يا كمال طريقتك غلط... انت على الاقل وريها الحاجة المزعلك يمكن انت فاهم ها غلط... وبعدين انك تعاملها كدا في فترة زي دي ح تضرها شديد
كمال.  ندمان الصراحة وأسي ح أصلح كل شي
نور. ح تسامحك؟
باسها وحضنها وقال ليها لازم تسامحني
صحيت من النوم لقيت كمال قاعد جمبي في السرير وماسك يدي ومشبك اصابعنا حاولت اقعد
هو. خليك مكانك م تتحركي
انا. فحاجة؟
هو. عايزة اتكلم معاك
انا. انا العايزة اتكلم معاك
هو. احكي
انا. عايزة امش لي ماما
هو. لي؟
انا. بس كدا أشتقت ليها
هو. توته انتي لسه زعلانة صح؟
انا. م عايزة اتكلم في الموضوع.. وم عندي نفس اصلا ح توديني؟
هو. تمام.. بكرة بوديك
انا. لا ماشة اسي
هو. توته..
انا. كمال ح توديني ولا امش برأي؟
هو. اللهم طولك يا روح... البسي خلاص منتظرك تحت
طلع من الغرفة وانا اتجهزت ونزلت تحت
نور. على وين بي شنطتك كمان.؟
انا. ماشة لي ماما كم يوم اغير جو
هي. لسه زعلانة؟
انا. م قدرت أتجاوز كلامو يا نور حتى بعد قررت اسامحو جا في بالي نظراتو لي لمن نام معاي وكلامو بتردد في راسي يا نور.. امبارح م قدرت انوم... عموما وين كمال؟
هي. طلع برا قبل شوية
انا. تمام
ودعتها وطلعت لقيت كمال راكب في العربية فتحت الباب الورا وركبت
هو. شايلة شنطة لي؟
انا. عشان ح اقعد كم يوم هناك
هو. توته...
انا. كمال م عندي نفس احكي اي شي معاك
هو. م هو لازم نحكي.. لي غيرتي رايك فجأة كدا؟
انا. لانو م قدرت أتجاوز كلامك لانو اتذكرت نظراتك ويداب عرفت لي كنت بتعاين لي كدا... لي كنت قرفان يوم نمت معاي.. عرفت لي؟ ح توصلني ولا امش برأي؟
هو. تمام ح اوصلك
فضلنا طول الطريق ساكتين لغاية م وصلنا سلمت على ماما وبابا وهو قعد معانا شوية وطلع.. المسا جا اسلام سلم على
هو. بايتة هنا.؟
انا. ايوة
هو. ساي ولا في حاجة ؟
انا. ااا ساي
هو. توته احكي فشنو؟
انا. مختلفة مع كمال بس
هو. اضربو ليك؟
انا. 😂لالا ماف داعي
هو. احكي الحاصل؟
انا. مرة تانية اسي احكي انت بتعمل فشنو وبتمش وين وكدا
اتونسنا لي وقت متأخر وبجد فرق لي شديد عديت اسبوعين معاهم كمال كان بتصل لي وم برد على مكالماتو وجا كم مرة بس كل مرة كنت بتجنب الاقيهو وحتى فكرت أطلق بس فكرت في الأطفال ألفي بطني
في يوم وهو قاعد قال لي بابا انو عايز يسوقني جات ماما وكلمتني وقلت ليها م ماشة
امي. اجي يا بت كيف م ماشة 😳
انا. يا ماما عايزة اقعد معاكم انا لسه مشتاقة ليكم م عايزة امشي.. عليك الله م تخليهو يسوقني😭
ضحكت وقالت لي سمح بتكلم معاهو
بعد مسافة جا داخل وقفل الباب وراهو كنت بعاين ليهو وساكتة جا قعد جمبي في السرير وفضلنا ساكتين
هو. ممكن نتكلم؟
انا. فشنو ؟اعتقد ماف شي يتكلمو عنو😊
هو. م تتكلمي بس اسمعيني
انا. خمسة دقائق بس
هو. طيب. توته انتي عارفة انا راجل صح؟ والراجل م برضى في عرضو.. صح؟
انا. ايوة صح
هو. وعارفة لو زول لمسك ممكن اقتلو.. لانو بغير شديد
قلت ليهو عارفة وشفت بعيني
هو. توته بصراحة كدا وبدون زعل في حد في حياتك غيري
انا. ابدا والله
هو. ولا كان في قبلني؟
انا. خالص م كان في انت اول واخر زول يدخل حياتي
هو. طب في حاجة مجنناني وراسي ح يطق بسببها
انا. اللي هي؟
هو. الود الاسمو اسلام دا علاقتك بيهو شنو؟؟ ... قدر م حاولت القى تفسر منطقي بس ماف حاجة قدرت تبرر لي... توته انا شفتو وهو بحضن فيك وقريب منك.. شفتو وهو ببوسك في جبينك... حتى انو انو كان خاتي يدو في بطنك بطريقة خلتني أشك.. توته انا النوم غلبني.. من يومها م نمت زي الناس... انا بموت كل يوم م قادر أسألك ولا انتي عايزة تتكلمي...
انا. دا السبب ؟طيب لو جيت سألتني م كان اختصرت على روحك وعلي؟ اصلا انا كنت ناوية احكي ليك وقتها بس انت م جيت بعدها ولا اتكلمت معاي وم كنت فاكرة انو دا ح يزعلك كدا ؟ م كل البنشوقو بكون صح ي كمال
هو. طب ريحيني وقولي لي دا منو لانو انا بموت يتوته بمووت فاهمة؟..دا منو؟احكي؟
انا. دا اخوي دا لحمي ودمي عرفت دا منو؟
عاين لي بعدم استيعاب كدا
هو. انتي م عندك اخوان لكن
اخدت نفس وقلت ليهو اخوي من ابوي
سكت وعاين لي
هو. بس ماف شبه بينكم؟
انا. أي لانو امو م سودانية.. عشان كدا م يشبهني
هو. انا.. انا... م عارف اقول ليك شنو... بس انتي م حصل جبتي لي سيرة ولا كنت عارف  انو عندك اخو
أنا. م انت لو خليت عنادك واتنازلت وجيت سألتني م كنا وصلنا لي هنا
هو. اسف يا توته والله م كنت عارف انو اخوك بس اقسم بالله م قدرت أتجاوز منظركم انا للان بشوفو كانو قدامي اسفة ممكن تسامحيني
انا. لو كنت بتثق فيني م كنت فكرت كدا
هو. توته انا والله لو م شفت بي عيوني كنت كذبت الكلام دا وم كنت صدقت وانا بثق فيك اكتر من نفسي
انا. عايزة انوم انا ممكن تطلع
هو. توته انا اسف سامحيني
انا. كمال ممكن تطلع؟
هو. تمام
طلع برا وقفل الباب اما انا كنت مخنوقة شديد ولقيت روحي ببكي بدون احس شوية الباب فتح ومسحت دموعي عاينت لقيتو بابا
هو. السمحة كيفك
انا. كويسة الحمد لله
هو. كمال قال لي انو زعلانه منو وانا حصل بينكم خلاف
انا. حاجة بسيطة م محتاجة
هو. اسبوعين وبسيطة؟ توته انا ابوك وعارف انو زعلك م بدوم للفترة دي وعارف انك بترضي بسهولة.. بس لمن الموضوع يصل انك ترجعي البيت وتقعدي اسبوعين وم ترضى تلاقيهو اكيد موضوع كبير صح
انا. م كدا يا بابا بس..
هو. بس شنو؟
انا. م عايزة ارجع معاهو
هو. طيب يا بتي فكري في كلامك دا وبكرة تديني قرار.. يا تقعدي معاي وبطلقك منو اول م تولدي لو كان مضايقك وكان الموضوع كبير يا تجهزي حاجاتك وتمشي معاهو لو كنتي م عايزة تطلقي
انا. يبابا..
هو. خلاص انا قلت كلامي يلا انتي فكري وانا م ح اجبرك على شي وبالنسبة لي كمال هو عارف وانا وريتو بالكلام دا لو هو باقي عليك بكرة ح يجي ولو لا م ح يجي
طلع وخلاني سارحة في أفكاري اي نعم انا زعلانة منو وعايزة أطلق بس في نفس الوقت بحبو شديد طول الأسبوعين ديل م كان بتمر لحظة بدون افكر واشتاق ليهو حتى جيتو لي هنا كانت بتخفف على شوقي ولو شوية  قمت اتوضيت واستخرت ورقدت نمت جاتني صحية بليل على احساس البيبهات ضحكت وفكرت ديل ذنبهم شنو عشان يتحرمو من الحنان والجو الأسرى واستخرت تاني ونمت
اليوم البعد كلو كنت بفكر وماف زول جاب لي سيرة حتى بابا المسا كمال جا وقعد معاهم جاني بابا في الغرفة
هو. كمال جا برا... قررتي شنو؟
انا. ح ارجع مع كمال
هو. الله يحفظك يا بتي كنت عارف انك واعية وم ح تخربي بيتك وم ح تضيعي أولادك
ابتسمت ليهو وحضنتو
هو. يلا اجهزي
انا. حاضر
هو طلع وانا قمت جهزت حاجاتي وطلعت لمن كمال شافني ابتسم سلم على وباسني في راسي
طلعنا وكنا طول الطريق ساكتين وهو كل شوية بعاين لي
لمن وصلنا سلمت على نور ووجن وحرفيا كنت مشتاقة ليهم شديد بعدها طلعت غرفتي غيرت ملابسي ورقدت جا كمال داخل قفل الباب وجا قعد جمبي مسك يدي وباسها
هو. بحبك كنت متأكد انك. م ح تتخلى عني
انا. لي واثق كدا
هو. لانو عارفك اكتر من نفسك وعارف انك بتحبني.. ممكن تحكي لي قصة إسلام دا.. والحصل شنو بالضبط عشان تعملو الموقف دا
انا. اوك ح احكي ليك... زمان قبل بابا يتزوج ماما كان شغال برا... ووو اتزوج هناك وجاب ولد سماهو اسلام..امو كندية... ف حصل بينهم خلاف وأطلقو... بعدها نزل السودان وكان معاهو اسلام... لانوو امو اتخلت عنو وتزوجت... بعد نزل اهل بابا قالو ليهو الا يتزوج... ف المهم اتقدم لي ماما وقبل يتم الزواج وراها بي قصتو و وافقت... المهم ماما بعد كم سنه من الزواج حتى جابتني لانو وقتها اسلام كان صغير وكان مشاغب في أجلت فكرة الولادة... بعد اتولدت اسلام كان بحبني شديد من قمت وهو معاي م فارقني ولا لحظة... يمكن دا السبب الخلاني م ادخل اولاد في حياتي لانو كان مكفيني بجد... في يوم... اللي هو كان يوم تخريجي... كنت متفقة معاهو انو يجي يسوقني من الكوفير وكنا مخططين لاي شي وو حرفيا يمكن دي كان أهم لحظة في حياتي وقتها.. انتظرت كتير بس م جا... بابا قال يجي يسوقني بس انا رفضت.. كنت متأملة انو يجي... بس م جا... كنت عايزة اقطع الشارع لانو حرفيا كنت فقدت الأمل وكنت زعلانه شديد وم انتبهت لي روحي وانا بقطع في الشارع.. وحصل حادث... بعد الحادث دي انا دخلت في غيبوبة واحتجت علاجي نفسي وقصة طويلة يمكن اخدت حكاية سنه وانا بتعالج من اثارو... الحاجة المزعلني انو طول الفترة دي اسلام كان ماف.. م اتصل ولا سأل ولا حتى جا عشان يشوفني... حسيت اني اتخذلت شديد ومن يومها ماما وبابا م كانو بحيبو لي سيرتو..واسي جا.. يوم شفتو دا كان أول مرة اشوفو بعد السنين دي كلها... وكل الذكريات رجعت تاني... ف هو كان بحاول يهديني عشان يفهمني وانت شكلك فهمت غلط...
هو. صراحة راسي ضرب وقتها... يوم جبت ليك الاكل كنت عايز اسالك منو بس وانا شايل تلفونك رسل ليك رساله في عنوان وزمن..
انا. وقتها كان عايز يحكي لي بس انت رفضت ويوم مشيت ناس ماما آخر مرة هو حكي لي كل شي.. يومها كان واقف وراي حتى انو صورني وكان عايز يرسلها لي عشان يلعب بي ف قبل يرسلها جاتو مكالمة ردا عليهو ووو ياهو عرف انو امو في الإنعاش حالياً... هو اي نعم قاعد معانا بس صراحة ماف زول فينا كان حارمو من امو والأم في النهاية ام ف هو من مكانو مشي البيت لمى ملابسو وعلى المطار بدون م يكلم زول لانو كان مصدوم... بعد وصل هناك اكتشف انو تلفونو ماف ف م قدر يوصل لينا... هناك اسلام عاني شديد م كان عندو بيت ولا شغل ولا حتى قروش ولي حظو كان شهادتو وأوراقو في الشنطة ف قدر انو يلقى شغل بعد تعب وغير شغلو كان بشتغل حاجات جانبية.. كان متحمل كل المصاريف حقات امو لغاية ما اتحسنت واخدت وقت طويل عشان تتحسن... بعد اتحسنت وطلعو من المستشفى هو كان مقرر يرجع ف هي رفضت يرجع وهو قعد معاها عشان صحتها... بعد فترة امو اتوفت... وكانت صدمة بالنسبة ليهو بس هو قدر يتحاوزها لانو م كانت معاهو من زمان... وبعد شهر من وفاتها هو رجع هنا. ووو دا كل شي
م ردا على بس حضني وقال لي اسفة بجد اسف شديد سامحيني..
انا. لا دا م غلطك... كان مفترض اجيب ليك سيرة أو كدا.. بس حرفيا وقتها م كان نفسي اتذكرو..
مسح دموعي وقال لي واسي كل شي اتصلح اخوك رجع وانا معاك ونور ووجن
ختا يدووفي بطني وقال لي والبيبهات ضحكت وختيت يدي في يدو وقلت ليهو بس لسه زعلانة منك على فكرة
هو. ليك حق تزعلي... غمضي عيوني
انا. لي؟
هو. اعملي القلتو بس
فعلا غمضت عيوني وانتظر مسافة
هو. فتحي عيونك
فتحت ولقيتو شايل هدية في يدو
انا. دي لي انا ؟
هو. اجل
كنت عايزة اشيلها بس شالها
هو. أول زعلانة مني
انا. حسب الهدية
هو. لالا اول تسامحني
انا. كمااال
هو. م سامعك
ضحكت وقلت ليهو سامحتك هات
ضحك واداني ليها كان جايب لي شوكولاتات أشكال وأنواع ومعاها اسورة في نص الشوكولاته كانت حلوة شديد
هو. اها عجبتك؟ 😎
انا. شديد😍😂

مسا الخير يا شباب 💃
اتفاعلو ووروني رايكم 💃