جعلتموني شخصًا إرتيابي، أنا الذي كنت أصدق الكلمة من المرة الأولى.
كاعده بغرفتي
مقرفصه نفسي لامه رجلي لصدري
احس كلبي عليه صخره حتى الهواء ميوصل الريتي
سحبت جهازي من جوه المخده
دخلت على الستوديو اباوع على صورنه اني وياها
ودموعي نار على خدي
شصار بحالج من مات وليدج
شصار بحالج وانتي بقيتي وحدج
ليش هيج سويتي بنفسج
منو يكول انتي سافرتي وما صار عليج شي
واني اباوع للصور دك اصهب
مابطل اتصال من الصبح
شمرت الجهاز من أيدي وستمريت بلبجي
ماعندي غير هاذا الشي
انسانه ضعيفه وجبانه
حقوقي ماكدرت استردهن نوب اطلع حق احد
واذا جاوبت شنو احجيله
هم اجذب عليه لو اسوي نفسي ماعرفت شي
بعد صراع ويه نوبات البكاء والتفكير
شلت التليفون جاوبت حتى أنهي كلشي
وتر : شتريد
اصهب : اريد اشوفج
وتر : اصهب روح كلشي بينه انتهى قبل لا يبدي
اصهب : انزلي اني بره
وكفت على حيلي لازم ينتهي ماريد كلبي يحترك اكثر اول وتالي بس يعرف الحقيقه راح يعوفني
سحبت البرده وفتحت الشباك شويه
اجتني نسمه هواء بارد اخذت نفس عميق اترس ريتي بي حتى اجمع كلماتي
باوعت عليه ونزلت راسي حتى هوا بعيد مالي عين
وتر : مستحيل ماكدر انزل حسين بلبيت
اصهب : ماموجود حسين طلع من زمان
لازم نحجي وجه بوجه.
باوعت على الساعه بالخمسه الصبح
طلعت على اطراف اصابيعي
فتح باب غرفه حسين
ماموجود طالع شوكت
ماسمعته من طلع
شلون اصهب يعرف
رجعت الغرفتي ركض
بدون تفكير لبست البشت وخليت شال على راسي شلون مجان
ونزلت اتسحب احس كلبي يرعد من الخوف بس يشوفني احد اروح بيها
فتحت باب الشارع لكيته واكف بنفس المكانه
لابس كله اسود
ولحيته عاليه كلش متغير
تخطيته وصعدت بسياره
صعد و بقت نظراته عليه
واني منزله راسي افرك بأيدي من الخوف والتوتر
اصهب : شلونج
رفعت راسي صارت عيني بعينه
وتر : زينه
اصهب احجي العندك لازم ارجع قبل لا يحسون عليه
اصهب : وتر اكو شي صار قبل يومين
ركزت وياه بكل حواسي منتظرته يحجي اكيد يعرف شي
دك تليفونه
قبل لا يفتح خط لزمت أيده
وتر : عفيه كمل مو وقتها
