ماذا يحدث لي؟

الفصل الثامن عشر

لكن ادهم اتحرك بسرعه وبيضرب المحامي وبيقوله اه ياكلب جاي هنا عيني عينك تهددنا انت وسيدك ايه يامفترى مكفاكوش كل الظلم اللي شفناه علي ايديكم والله ماهتطلع من هنا سليم،

في دخله فارس جرى يخلصه من ايده وهو بيحاول يهدى ادهم وبيقوله في ايه؟متعصب ليه كده؟
ومحدش بيرد عليه بس المحامي قعد علي الكرسي يلقط نفسه من ضرب ادهم ليه وقال عالعموم كده ردكم وصلني وقد اعذر من انذر.

لسه ادهم هيقومله تاني فقعده فارس وقاله لاء بصراحه النبرة معجبتنيش انا كمان ريح ايدك انت كده شويه قالها لادهم.

افهم الحوار بس انا ياجماعه احط ايدى عالمشكله احلها علطول والله، وراح للمحامي وجه يحط ايده علي كتفه لقاه اتخض، وقاله الله جبت ورا يعني واتخضيت يعني صوت عالفاضي طيب تمام في ايه بقي احب افهم.

رد ادهم وقال البيه المحترم الراجل اللي بيمثل القانون،جاي يهدد مريم قدامي وبيقول انه هيقتل لها اعز ما عندها هو وطليقها قال ايه مريم سرقته سرقت ايه منكم ياعصابه علي بابا.
فضحك فارس عالتشبيه وهنا كل الموجودين بيحاولوا يهدوا في مريم اللي مش مبطله عياط.
اتكلم المحامي وقال الهانم سرقت شركه موكلي طليقها قاله اه كده فهمتك تمام ثواني ممكن تتفضل معايا عندى ليك الرد اللي هيريحك عالاخر اتفضل معايا مكتبي نتكلم براحتنا بعد اذنكم ياجماعه، خرج المحامي وفارس وراه.

بس دخل فارس عالباب وقالهم خدوا راحتكم عالاخر ومتخافوش من اي حاجه متقلقوش خالص ومريم عياطها زادت مع شهقاتها وقالت بصوت متقطع بنتي ياماما بنتي فين هيقتلها هيبعت ناس يقتلها دا مجرم انا مش قلتلكم مش عاوزه منه حاجه.

دخل فارس عند مريم وقالها بعد اذنك ممكن تهدى وتثقي فينا شويه معلش الناس دى احنا نقدر نتعامل معاهم كويس متخافيش وخمس دقايق وهطمن قلبك ثواني.

وسابهم وخرج وحوريه عيطت وهي بتقول لمريم بطلي عياط يامريم انا والله تعبت خالص ومش قادرة.

جه ادهم وقال لها حاسه بايه ياحبيبتي قالتله جسمي كله بيوجعني ياادهم حاسه اني هموت من الالم والله،

وهنا شيماء انتبهت ان حوريه مااخدتش العلاج من الصبح والخبطه والعمليه قلبوا علي جسمها كل الوجع بالذات لما مفعول المسكن انسحب من جسمها خالص، ونسيوها خالص في اللي بيحصل حواليهم ده.

هنا خرجت شيماء تنده للدكتور المتابع لحاله حوريه ولممرضه تغير لها المحلول وفعلا جابتهم والدكتور اتطمن عليها وعلي العمليه وقال ان الرضوض والكدمات هتاخد وقت وهيا اللي تعبها انها ماخدتش علاجها وهتكون بخير بعد شويه وسابهم وخرج.

عند فارس دخل مع المحامي مكتبه لقي اتنين بودى جارد في انتظاره قاله اتفضل معاهم هياخدوك للراجل اللي اشترى الشركه تتفاهم معاه وتخلص بقي الموضوع ده.