" Tripartite Love " Season 1 + 2

Chapter -2

ဒီဇာတ်လမ်းလေးက သုံးပွင့်ဆိုင် အချစ်ဇာတ်လမ်းလေးပါနော် ။

*********

ဂျူတီချိန်ပြီးပြီဖြစ်သော်လည်း ဒေါက်တာ
အိမ်ပြန်ချင်စိတ်မရှိပေ ။ အိမ်ရောက်လို့
ဟိုကောင်လေး မျက်နှာ မြင်သည်နှင့်
ပြောသင့် မပြောသင့်မစဥ်းစားပဲ စကားလုံးကြမ်းကြမ်းတွေပြောမိနေမှာမို့ အတတ်နိုင်ဆုံး သူ့မျက်နှာ မမြင်ရအောင် နေမည်ဟု ဆုံးဖြတ်ထားလေသည်။

ဆေးရုံ၏ အပေါ်ဆုံးထပ်မှ ကော်ရစ်တာတွင် ရပ်နေပြီး စီးကရက်တစ်လိပ်ကို
ခပ်ပြင်းပြင်း ရှိုက်ဖွာနေမိ၏ ။

အောက်ဆုံးသို့ ငုံ့ကြည့်နေပေမယ့် 
ထိုကောင်လေးနှင့် စတွေ့ခဲ့သော  ပုံရိပ်ကလေးများကသာ ဒေါက်တာ မျက်လုံးထဲတွင် ဖျက်ခနဲ ..ဖျက်ခနဲ ပြေးလွှားနေတော့သည်။ 

ထိုကောင်လေးနဲ့ စပြီး တွေ့သည့်နေကပေါ့

စတစ်ကော်လံရှပ်လက်ရှည် ၊  နီညိုရောင် ပုဆိုးကွက်စိပ်လေးနှင့် ပိန်ပါးပါး ကောင်လေးတစ်ယောက် လက်သီးကို ကျစ်ကျစ်ဆုပ်ပြီး လမ်းကူးဖို့ ပြင်နေသည့်ဟန်ဆိုပေ
မယ့် လမ်းကြောရှင်းနေသည်ကို လမ်းဖြတ်
မကူးပဲ ခေါင်းကို ငုံ့ကာ တစ်ခုခုကို တွေးတောနေပုံ ။

ခေါင်းငုံ့ထားရာကနေ ထိုကောင်လေးက
ခပ်လှမ်းလှမ်းမှ အရှိန်နှင့် မောင်းလာသောကားလေးကို မြင်တော့ တုန့်ဆိုင်းနေသော ကောင်လေးခြေထောက်များက လှုပ်ရှားလာသည်။

ဒေါက်တာ ဤအခြေအနေကို သဘောပေါက်လိုက်သည်။ ဘာမှ စဥ်းစားမနေတော့ပဲ ပြေးကာ ထိုကောင်လေးကို ခါးမှ ပွေ့ဖက်လိုက်သည်။ အခြေနေက ရုတ်တရက်မို့ အရှိန်မထိန်းနိုင်စွာ လမ်းဘေးက မြက်ခင်းပေါ်ကို နှစ်ယောက်သား ထပ်လျက်သား လဲကျသွားရသည်။
ဒေါက်တာ​မှာ အရှိန်နှင့် ကျသွားသည်မို့
အင့် ကနဲပင် အသံထွက်မိသည်။

သူ့ရင်ခွင်ထဲက ကောင်လေးကတော့
မင်သက်စွာ သူ့အားကြည့်လာသည်။
ထိုအကြည့်က သူ့အဖြစ်ကို သူမယုံနိုင်သည့်
အကြည့်  ။

နက်မှောင်နေသော ဆံပင်အလယ်ကွဲလေးက နားရွက်ထိပ်ကလေးနဲ့ပင် ထိလုမတက် ၊ အရည်ရွန်းနေသည့် မျက်လုံး ဝိုင်းလေးများ ၊ ချွန်းနေသည့် နှာတံနှင့် ရဲနေသည့် ကကြီးပုံ နှုတ်ခမ်းလေး လှသည် ၊ ထင်တာထက်
ဖြူစွတ်နေသည့် အသားရေ နဲ့ မျက်နှာ သွယ်သွယ် ထိုကောင်လေးက မိန်းကလေးလိုပင်လှ၏ ။