المنطق والقدر

الحلقة 5

رواية المنطق والقدر
..
أسفة جدا عالتأخير بس كنت في فترة امتحانات

..
..
..
يهمني رأيك في الحلقة عزيزي القاريء 🖊📖
قراءة ممتعة 🕊

مرحبا ياامذكراتي الجميلة
اكيد عرفتيني أني رئام أحمد نور الدين وانتي عادتي
القديمة الي نكتب فيها أسراري ويومياتي
وزي كل يوم نضت الساعة 5 وبديت روتيني اليومي لبست توتة الجيم وبديت نتمرن لين أذن الفجر دوشت وتعطرت وصليت الفجر وقريت أذكاري وحزب من سورة البقرة وحفظت ثمني اااه نسيت ماقلتكش اني وصلت في سورة المائدة وفرحانة لاني قريب نختم ويافرحة جدوا بيا وبعدها درت كوب قهوة وفتحت فيروز اوكي صح العالم اطور والاغاني اتطورت بس اني مش حانسمع لغير فيروز ومحمد حسن وعبد الحليم
عشقي الأغاني القديمة 💕
شايف البحر شو كبيير كبر البحر
بحبك
شايف السماء شو بعيييد بعد السماء
بحبك
يااااحبيبي بحبك
ههههه صح صوتي مش حلو بس مش خاطي هههه وقعمزت نستشنق في ريحة القهوة الدافية وبعدين نشربها واني ندندن مع فيروز ونقرا في رواية
في قلبي أنثي عبرية 📖
لين جت الساعة 8:00 درت شعري كعكة اااه نسيت انقولك وأخيييرا بدي طويل زي ملوكة وبديت رحلة الضمان🏃🏻‍♀️ من حمامات لي مطبخ لي صالة تنشيف مسح نشر حوايج تطبيق حوايج وتعلييق وتحديد وتعطير هوووه عييت😮‍💨 وليت🏃🏻‍♀️ زيقت البلكونات نشفتهم ونشرت الحوايج واخييييرا درت لمستي الأخيرة عطرت حوشي ووشقته وخشيت غيرت ملابسي وبديت انوتي في الفطور درت فوربي بالفراولة والالواز وحطيت عالطاولة بريوش وعسل وشكلاطة وجبنة وفطيرة وتست وتن وزبادي وعصير برتقال وقهوة اااا شن ناقص شن ناقص🤔 ايه كيف نسيت الدحي الطبوخ ودحي المقلي فوقه جبنة شرايح وامشيت انوض في نونو اااه ههه كيف نسيت محكتليكش علي كرزتي نور بنتي حبيبتي الي سموها خوتي علي الاساس علي اسم جدي غدوة اتسكر خمسة سنيين بدت تكبر وتبان ملامحها كانت حلوة وقنوشة فيها شبه كبيير من خلاتها الأربعة خذت العيون الخضر من ملوكة والشعر الذهبي من رواني وملامحها حواجبها وفمها من رنيم ولسانها وثقتها بنفسها وغرورها من رنا تحب تضحك علي اتفه الأسباب زي روان بالضبط ههه بس تخاف من الظلام وماتحبش ترقد بروحها زي ملوكة
خشيت لي دارها اللي كانت علي هيئة اميراات وفتحت الستار
يلا حياتي مامي صباح الورد والياسمين علي الحلويين
نور : l don't want to get up
مامي Speak Arabic please
نور : مامي
يلا حبيبتي wake up
للأسف نور كانت تدوي انجليزي بالرسمي وبحكم اني قريت لغات علمتها اللغة من اول مابدت تتكلم بس كانت تسكر في راسها ومعش بت تدوي عربي حتي مع الناس والصغار في الروضة
فطرنا وبدلتها ولبست القرامبيول الزهري كان يجنن عليها سلتلها شعراتها الذهبيات ودرتلها تسريحة بالضفرة وطلعت أميرة
بابا ديما يقولي انتي مدلعة بنتك هلبا وادلع هلبا مش باهي بس اني مدايرتها صاحبتي قبل بنتي يلا حياتي مع السلامة
نور : llove you mum ❤️ 😘
واني نحبك ياحياتي
وطلعت للروضة كملت حوستي وحطيت غداي عالنار بندير رز بلاو ومعاه طاجين اكلت نور المفضلة كملت الغدي ونزلت لي عزوزتي كنت انقولها خالتي وعندي حماة وحدة نسرين ضميت اني وياها الحوش وزيقنا الجنان ودرنا شاهي وقعمزنا نهدرزوا علي بعض
.
.
.
طق طق 🚪طق طق
افتحي الباب افتحيييي الباااب خيييير منكسره افتحي رئام : حاااضر وسكرت مذكرتها ودستها في الدولاب دارت روحها تنزل في الفانيليا وفتحت الباب نننن نعم وليد : علااااش مسكرة الباااب شن كنتي اديييري
رئام : شيء كنت انننبدل
خديجة: كذااابة اشبح شن كاانت ادير المسخة ضبحت عليها ماردتش عليا ومادرتش الغذي والحوش خلاته مقلوب وخاشة راقدة
وليد : شح رئام من شعرها وهو يتلتل فيها شكلك ناوية تموتي علي ايديا انتي ولوحها في الصالة وجابتله امه العصية خذاها وبدي في رئام ضرب وكأنها مش مرته رئام: فقدت الأمان والراحة بس الخوف الي موجود في هالحوش في كل خبطة ترقي وتنزل علي جلدي كنت نتحسب فيهم بديت معش انحس وكأن جلدي اتعود على الضرب علاش وهو بدي في حياتي وكأنه مضاد راجلي ولااا هذا الإنسان هو يضرب ويعيط وأمه الي هي عزوزتي تضرب فيا معاااه في كل طريحة يعيطوا ويصيحوا واني في عالم تاااني مانعرفش وين نمشي بس مش معاااهم ابدا ومش مركزة علي الكلام الي يقولو فيه
نسرين: جت وقايمة نوور وااااك شن هذا اسكتي اهي ومايتك وضربت نور كف
انجنيت معش نشبح قدامي جتني طاقة خارقة خلتني نوقف علي رجليا واندف وليد ونجبد بنتي منها ونحضنها كانت صايخة من العياط جتني قوة وجرئة في عمري ماجتني لميت كل طاقتي وغضبي ورديت الكف أضعاف لي نسرين لدرجة طاحت وامها عيطت نسررين
العيلة كلها انصدمت من أول ماخشيت لي هالحوش عمري مارديت بكلمة ولا حرف ديما واني نسمع وانفذ في كلامهم هذي اول مرة تطلع ردت فعل مني
وقفت نسرين وجتني زي الثور الهايج ياااكلبة ياامسخة تضربيني انييي وقدمت طاحت فيا كانوا الثلاثة عليا
وليد وأمه واخته ماكنتش حااسة بشيء ولانسمع في شيء مافيش غير صورت بنتي وهي تعيط وحاضنة روحها في التركينة وتنادي بإسمي في عيوني
دمعتي تنزل انحس فيها حامية تحرق في قلبي حرق. و بعدها سكرت عيوني بسلاااااااااامم 🕊
.........................................................................
في مستشفي الطبي 🏥
كان الممر زحمة صغار وكبار شيابين وعزايز الي يعيط والي يتوجع والي يدعي والي يكشخ ويعيط ويضبح وين الدكاترة ليه عليكم مخلينه هكي مشحطينا من الصبح لاتوة وين الدكاترة وين الممرضين به قولولنا كان مافي حد خلي الواحد يتسكد يروح
لاحول ولاقوة الابالله
خطمت رنا تمشي ومركزه في الملف وجنبها الممرضة قامت راسها وشافت الدوشة والزحمة مدت الملف للممرضة
رنا : علاش الزحمة هذي كلها اليوم خيره
الممرضة: هذوا حالات الدكتور ناصر
رنا : وخيره مش مرتب مواعيده
الممرضة : هو قداش ليه معش جي والريسبشن عاطي مواعيد للناس والناس كل يوم تجي والريسبشن علي قولت غدوة بعد غدوة اهو لين زحمت
رنا : تمام اعطي الملف لدكتورة هناء وضبحي علي دكتورة بلقيس
الممرضة : حاضر
رنا : خشت لي الحجرة هدت هدان عالدكتور ممكن نفهم شن اللي قاعد يصير برة شن ادخل في الحالات البسيطة وامخلي كبار السن اللي حالتهم متأزمه وصبره نفذ وحالته مستعجلة
د.ناصر : ماعدلش عليها ومستمر يفحص في الحالة قعمز كتب الروشيتة وقع تفضل استمر عليهم لمدة شهر واطمن حايزول الألم بإذن الله بالشفاء العاجل يارب
المريض : شكرا وطلع
د.ناصر: دخلي الحالة رقم 2
الممرضة : حاضر
رنا : وقفي
وقفت الممرضة
رنا : قدمت وقفت قدام المكتب وخبطت ايدها علي الطاولة اللي قاعد ادير فيه دكتور ناصر مش محتمل عدم احترامك للناس ولي مواعيدهم ومش مقدر كبار السن واخطائك في العمليات كثرت هذا دليل على انك عديم المسؤولية
د.ناصر: هذا شغلي واني حر من اندخل من مندخلش اموري هذم حالاتي واني المسؤول عليهم
وتلفت لي الممرضة نادي علي الحالة التانية وقبل لا توصل الممرضة للباب انفتح الباب
اووووو دكتووور
د.ناصر : اوووو صيني
ووقف وناضوا يسلموا علي بعض بالاحضان
تي وينك يا راجل عاش من شافك واسمع صوتك وحط ايده علي بطن صاحبه ان شاءالله خير في شيء صاحبه: هههه لالا اني الحمد لله اموري تمام عندي صاحبي جايبهولك عنده بطنه هكي مدايرتله مشكلة ومافيش دكتور عطاه راس خيط أسمعت اتشد اهني قلتله عندي الموضوع نمشوله الما يخششنا طوول د.ناصر: وينه جيبه
صاحبه : اهو واقف في الممر
وطلعو
لحقتهم رنا لنص الممر وشدت د.ناصر من مرفقه
رنا : شن قاااعد اديير بتخشش هذا اللي واقف علي رجليه اصحيح مافيه شي ومسيب الناس هذي كلهااا ومسيب الشيابين اللي جااي من الصبح ويستني في دوره ومتشحور وعندك عادي في اما سنة تعلمته هذا وتلفتت للناس
رنا :وتكلمت بصوت عالي والناس ركزت معاها السلام عليكم معليشي في حد عنده مانع يخشوا كبار السن هما الأولين
الناس : لالا عادي مش مشكلة
رنا : بارك الله فيكم وجزاكم الله خير
د.ناصر : انتي مايحقلكش تدخلي في شغلي وتحاسبيني
رنا : يحقلي ندخل لما انشوف الدكتور يدخل بالواسطة ويدخل في الأقارب ومخلي الناس تستني
بلقيس : جت شدت رنا من مرفقها رنا شن في شن الدوشة اللي دايرتيها خلاص تعالي حالاته وهو المسؤول
رنا : ارخيني بالله عليك ترة الموضوع معش محتمل دايرلي شن يبي وعلي كيفه يجي امتي ويروح امتي مايبي بالله عليك يقرولي برة بالاسم ويشريلي شهادة بالفلوس ويجيني يبيني انقوله دكتور وهو امس غالط في العملية ومكلفش روحه حتي تحمل المسؤولية
راه الدكتور كلمة مش هكي وخلاص الدكتور بأخلاقه واحترامه لمهنته وبلاده بإنسانيته الطيبة ومبادئه
وكانك ادور في الاسم نعطهولك بالبلاش مش جايني تفشك عليا بالشهادة وقاري برة وانت حتي المبادئ ماتعرفهمش
د.ناصر : دكتووورة رنااا احترمي نفسك والزمي حدودك في الكلام معاي
رنا : مانيش ملتزمة حدودي واني نشوف في الغلط قدام عيوني
د.ناصر: يلا يلا بري لوسمحتي واهتمي بالأطفال وشغلك لانه ضيعتيلي وقتي والله الدوة زايدة معاك وماتستهليش حتي نوقف معاك يلا بالله عليك ماتخلينيش نصغر عقلي معاك لأنك مش من مستواي ولا يمكن اني نوصل لهل المستوي
رنا : دكتور ناصر قاعد تغلط ديير باالك لانه والله لو بنتكلم مااك قاعد دقيقة في هل المستشفي
وزاد النقاش مابينهم وزادت الأمور تعقدت وتعالت الأصوات
الممرضة: شن في
الممرضة : عركة كبيرة بين دكتورة رنا والدكتور ناصر والخبر انتشر في المستشفى كله واسمع وتعالي التموا الدكاترة والممرضين وحتي من الحرس
رنا : المشكلة بسببك وبسبب الدكاترة الي زيك هنتوا الطب وهدمتوه وخلتوه بلا قيمة في هالبلاد والناس شن قالك شن في لالا مافيش طب في ليبيا ماعندناش دكاترة حطمتم الطب والناس معش عندها ثقة فينا
بلقيس : رنا خلاص اهدي وتعالي وهمستلها شوفي الممر
رنا : غمضت عيونها وتنهدت
دكتور ناصر من اليوم الحلات اني المسؤولة عليهم ومن توة مستلمتهم
دكتور ناصر: مد صبعه وهددها كل الي قلتيه مايهمنيش وقاااعد انقوولك فييها ماااليكش الحققق تحسااابيني
امشت وحدة من الممرضات بتنادي المدراء نزلت الدرجات تجري وتلاقت رئيس الأطباء
د.أحمد : شن في شن صاير وين الدكاترة وين الممرضين والحرس خيره المستشفى هدوء حتي في الليل ماهداش هكي
الممرضة : تعالي معاي دكتور فيسع بالله عليك
د.أحمد: شن في خيرك
الممرضة : تعالي معاي فيسع تو تعرف
د.احمد : وين
الممرضة : ممر الباطنة
وامشت هي وياه يتجاارو ركبوا الدروج
ناض واحد من الشيابين الكباار تكلم يا ولدي الله يربحك خليها هي ادير الكشف وتستلمنا مدامك مش فاضي راهو عيينا لينا ثلاث ايام انجوا وانروحوا علي الفاضي استهدي بالله وحلو هالخلاف
دكتور ناصر: دف الشباني جابه طايح الهوا في روحكم شن هالناس هذي ماتلقي غير الي غاطس في امورك
ويجييييه كفففف ريااااحيي لدرجة وخر من قوته صار هدوووء غريييب والناس سكتت والممر تحول من دوشة لهدوء الدكاترة شهقوا والدنيا كلها مصدومة
رنا : انت واحد عديم الأخلاق والترباية والإنسانية وماتستاهلش كلمة دكتورلانك خالفت العهد واحد بلا شرف وواطي
وامشت رنا وبلقيس قاموا الشباني وسندوه والتموا الدكاترة والممرضين عليه والناس بدت اتسب وتهزب وبدت تتكلم
رنا : انت كويس ياجدي
الشباني : ابتسم عمري مانحساب بعد هالوقت ننذل
رنا : معاش الي بيذلك وبيقلل من قدرك
د.أحمد: شن اللي قاعد يصير اهني شن الشوشرة والكلام اللي نسمع فيه هذا
وصفق الكل علي شغله يلااا انت ويااااه يلااا توكلووااا دكتورةبلقيس دكتور محمد استلموا الحالات
وانت يا دكتور ناصر دكتورة رنا الحقوني علي المكتب
.........................................................................
ملك : هذي اعرابها مضاف
رنيم: حطت رجليهافوق السرير ونزلت راسها تحت السرير حطت الكراسة علي راسها عييييت افففف
ملك : هذي اخر جملة
روان : كانت متشقلبة زيها غر عالكنبة وشادة التلفون تتفرج على فيديوهاتهم يوم الخميس
فتح مؤيد الباب وقربعه احواتي سن الزو
رنيم : الف مرة انقولولك طق قبل لاتخش
روان : ياااحياتي الحوش هذا كله بالمقلوب
خش مؤيد واخطم ضرب رنيم علي رجلها
رنيم : خيره هذا خيره
مؤيد : سكلي فمك سكلي وفتح قجر روان حي عالجو حي سبر ماركت ولا قجر هذا
روان : ناضت تجري ادف فيه واتسكر في القجر
مؤيد : شح بطاطا ومستيكا والله ماصارت حولي يا دريا حولي هذا كله بتاكليه بروحك
وقعد ياكل في البطاطا وروان اتلحق فيه بتشحها منه
كمل البطاطا ولوح الكاغط عليها
روان : شدت الكاغظ وشافاته اااااه بطاطي كملها ااااه وقعمزت تبكي 😭
ملك : وااااك علاش يا ميدو خييرك
رنيم : راااسي مصدع اسكتي
وجي قعمز فوق مكتب ملك قدامها ويلحس في صوابعه الأمور تمام
ملك : وووه كرااساتي هااه بيتمزقوا حول
مؤيد : سن الزو
تعرفوا ساعتي وخاتمي من دبي خنبوهم هيفاء وهويدا
ملك : تحشششم علي وجهك شن خنبوهم اتحشم بنات خالتك مايديروهاش
مؤيد : والله الا خنبوهم حطيتهم فوق المندار دوشت وطلعت معش لقيتهم
رنيم: بلكي راحوا منك ونسيت وينهم
ملك : بات معاك نضال
مؤيد : يس
ملك : بلكي خذاهم ماكم تلبسوا من بعض ومن غير ماتقولو لي بعض عادي يعني
مؤيد : لا مايديرهاش اني متأكد انهم هيفاء وهويدا محد خبيث في حوش جدي غير فادية وبناتها
روان : حتي انت شرير وخبيث ااااه بطاطي كملها ااااه 😭
رنيم : اسكتي نفختيلي راسي
روان : بطاااطي 😭
ملك : مؤيد مش معنى انك تكرهم وماتحبهمش تتهم بالخنبة ان بعض الظن إثم
مؤيد : متأكد هما
مش عارف علاش مابوش بنزلوا من رقبتي تحسيهم هكي أشرار حقوديات معبيات كره هكي داخلهم ظلام
روان : حتي انت زيييهم ااااه😭
رنيم : حذفت عليها المخدة بكشة
ملك : هذي مشكلتك انت هكي تشوف فيهم لاكن اني بنات خالتنا ونحبهوم
مؤيد : مية مية امووورك
وناض فتح الدولاب وشرتع حوايجهم وطيح حجاتهم الي فوق الشكماااجة وطيح الدباديب ال علي المكتب وخنب جزدان الفلوس متع ملك
رنيم : حواااايجييي
ملك : فلوووسيييي
روان : 😭😭😭😭
سمعتهم نجوي جت تجري خيركم بسم الله تتعايطوا وشبحت مؤيد هذا انت
مؤيد : ههههه نزل يجري لحقاته تجري وصلت للدروج وقفت
نجوي : عمرك ماحتكبر وحاتقعد عيل ياسفتووول انتلف
مؤيد : مية مية منورة حويجة ههههههههه وطلع اتقب في مهند
مهند : ينع..... هبك هبك والله الا طول عمرك عيل
مؤيد : اموري يا لوزة
ولع الموطو وطلع يسطرب
مهند : ياام اامي ملللك وينكم سمع العياط ركب للدور الثاني وخش للدار بسم الله شن في خيركم
نجوي : تلم في بضعتهم معاهم مخويك مخويك لاالسمي ساداته ولا الوطي تحملاته فتح برادته علي خواته
مهند : تلفت لي روان خيرك تبكي
روان : اكلي بطاطي وخنب شكلاطة ومستيكا
مهند: به خلاص توة نطلع نجيبلك اسكتي وتلفت لي رنيم وانتي خيرك
رنيم : حوايجييي كيف كملتهم جي شرتعهم وطلع
وقف يدير فيهم معاها
وتلفت لي ملك ملوكة خيرك
ملك : خنب فلوسنا ملقطينهم قداش لينا
مهند : طلع فلوس واعطهملهم هكي ساد
جو تلبطوه وحضنوه
مهند : غر حولو خنقتوني اااه
ملك روان رنيم احني انحبوك
مهند: به شكرا قام راسه شاف ليث وغيث يشبحوله خيرك انت وياه
ليث : غمز لي غيث وهز راسه
غيث : اا مؤيد خنبلي فلوسي
ليث : حتي اني
مهند : مشعارف كأني ريت العصا طايحة اهني
ليث وغيث طلعوا يجروا انبصروا
مهند : تروح انت ويااه
نجوي : تغذيت ياأمي
مهند : والله علي لحم بطني من الصبح
نجوي : ليه عليك
نوض معاي لما نحطلك غدي السلاطين والملوك
روان : اييييواااا شن بيسلكها عاد اهو الدلع علي مفاصله بطلع توة
نجوي : انتي مش كنتي تبكي
.........................................................................
في مكتب الإدارة كان المدراء ورئيس الأطباء ورؤساء الأقسام مجتمعين ورنا ودكتور ناصر كانو واقفين د.أحمد: كان يلف في المكتب ومش مصدق اللي صار برااافوا برااافوا مخليين الناس تستني ومااهتميتوش للحالات وتتعاركوا وصغار فيها مدان إيد مشاء الله مشاء الله دكاترة واااعييين فاااهمييين هذا الي قريتوه
الأطباء: دكتور ناصر كثرت أخطائك وتعديت حدودك وكثر تمردك وعدم الاحترام وعركاتك سوا مع الناي ومع الدكاترة
د.أحمد: احني تغاضينا عن هذي الأخطاء ومركزناش قلنا تو يلزم حدوده ويعرف أخطائه بروحه احتراما للمرحوم بوك كان من أعز الصحاب واشطر الدكاترة ودار معروف لي هلبا دكاترة وجميله علينا هلبا
لاكن انت تعديت كل حدودك ومالتزمتش بواجباتك دكتور ناصر خوذ ملفك لو سمحت واشوف عيادة او مستشفي تاني
دكتور ناصر: بسس...ااني
الدكاترة : دكتور ناصر الموضوع غير قابل للنقاش تفضل ملفك وانتهي
طلع الدكتور ناصر وعيونه نار الحقد علي رنا
اما رنا كانت تشبحله ومبتسمه ابتسامة نصر
د.أحمد: هئحممم احم
رنا : شبحتله شنو
احمد : فنص فيها
رنا : شنو مافهمت شيء
احمد : 🤦
رنا : شبحت للدكاترة لقتهم مفنصين فيها اااه
ونزلت راسها ااني اسفة سامحوني بلغت في ردة فعلي معش يتكرر الغلط هذا
احمد : اعتذارك مش مقبول ومخصوم من معاشك لمدة شهرين وانسحبت منك مكانتك حاتبدي مساعدة دكتورة هنااء
رنا : هو الغالط اني شن درت
احمد : نحا البالطوا واستذن من الدكاترة وطلع وجبد بنته من مرفقها
رنا : بابا بالشوية ايدي اااي
وقاعد شادهالين نزلها البركيدجوا
وركبها في السيارة وطلع وطوول الطريق وهو يهزب فيهاا حشمتيني حشمتيني قدام الدكاترة حشمتيني قدام الناس خذيلك الكلام في كل مكان بينتشر اسرع من الفايروس ووصل للحوش ونزلها وخششها و دفها
تلاقها جدها في حضنه
نور الدين: خييرك شن التصرف هذا شن في
احمد : شوف شوف يا بوي هذي تربايتك هذي تربايتك من البداية انقولك مادلعهاش يابوي راه البنت تفسد راه مش باهي الدلع يابوي لاكن انت اعطيتها الثقة الزايدة والحرية وبدت برايها علي كيفها تطلع امتي ماتبي وتروح امتي ما تبي مش معبرة حد ولا دايرة قدر لحد
نور الدين: احمممد دير بالك اني عارف شن ربيت وشن علمت هذم بناتي ودير بالك تغلط
احمد : ناض يعيط علي طول رقبته هو هذا هو هذا اللي خلاهم معش يحترموا حد غلط الي قاعد يصير يابوي
مهند : شن الدوشة هذي
نجوي : هذا صوت عمك احمد
فدوي : شبحتلها امتي روح وعلي من يعيط
وطلعوا من الكوجينة وقفوا في الصالة شافوه يعيط علي رنا
ملك : شن في
رنيم : صوت بابا
روان: لالا بابا في مصراتة
رنيم : صوت بابا
ملك : شكله يعيط علي رنا ونزلوا يجروا للصالة
احمد : فعلااا انييي مااربيتش
مهند : مش هكي ياعمي علاش الكلام هذا
شن في
احمد : اسئلها اسئلها الدكتووورة اسألها
نور الدين: بنتي شن الي درتيه
فدوي : تكلمي شن درتي
رنا : رشفت خشمها ومسحت دموعها الي علي طرف عيونها وقفت بثقة ضربت دكتور الباطنة قدام الناس وكل الدكاترة كف
فدوي : هيييي😱
روان : ههههه ههههه بس
شابحولها وفنصوا فيها ملك ضربتها علي راسها روان نزلت راسها وحطت ايدها علي فمها
احمد : واتقول فيها بثقة سايبة هي انتي الأمر الناهي
رنا : يحمد ربي جاته كف والله لو نبي فيه راني شديته من شعره وخبطله راسه علي الحيط
ليث : كف يعني كف
غيث : قصدك هكي قمتي ايدك وهوووب
مهند : قام حاجبه علاش
رنا : دف شباني والمسكين الشباني من قوة الدفة طاح
رنيم : كف شوية فيه مفروض اعطيتيه كانشوا برجلك علي بطنه وطحتي فيه ضرب خسارة ياريتني معاك وربي لما نوريه نجوم الليل في النهار
احمد : يسمع ومصدوم
ملك : بس مع ذالك مش لدرجة تمد ايدها عليه
رنيم : اسكتي بالله عليك ترا تخايلي مكان الشباني جدي وصارت لحظة صمت غريب وناضوا يشبحوا لي بعض
مهند : بعدها ورب العباد لما نسيق الشوارع بدمه
رنا : وقتها نفتحله بطنه فتح بالمشرط ونخربله وجهه
ليث : مجباتش امه الي يرفع ايده علي جدي
غيث : اهدوا اهدوا قلنا تخيلوا بس
رنا : والله العظيم ورب الكون لو صار الموقف هذا ولا غيره وصارت دكتور ولا راجل عادي وشبحته والله لما ندها ايدي ونضرب كف ومرات حتي زوز وماني خايفة من واحد
احمد : مشاء الله مشاء الله جايب جون سينا معلمها تضرب بالكفوف
نور الدين: قدم شد راسها وباسها انتي مش بس رفعتي راسي بتصرفك اليوم خليتيني نتأكد انك بمية راجل وماينخافش عليك
رنا : ابتسمت
احمد : بتهبلوووني انتم بتهبلوووني قاعد اتأيد فيها علي الغلط اليوم في المستشفي وغدوة في الشارع
خش أنور : السلام عليكم خيركم صوتكم طالع لابرة الجيران سمعت شن في خيركم
احمد : تعالا ياخوي تعالي اتصرف راني احترت معاهم
أنور: إن شاء الله خير
احمد : رنا رنا الكبيرة الدكتووورة الي رافعين راسكم بيها اليوم ضاربا دكتور كف وقدااام الناس والدكاترة
أنور : تلفت لي رنا حااق وغمزلها ودارلها 👍🏻👌🏻
احمد : ياسلام وواتقول فيها بفخر وثقة اتقول محررة فلسطين من اليوم انسي المستشفي وانسي الطلوع بروحك والسيارة هااتي المفاتيح هاتي
رنا : بس
بدون نقاش هااتي
نور الدين: حتي لو كانت غالطة انك تحرمها من خدمتها وسيارتها ماليكش الحق ولا دخل هذي قرايتها وتعبها محد ليه دخل ولا الحق انك تحرمها
احمد : زيدوا زيدوا ايدوها واعطوها حريتها في كل شي
امااان اماااان الي يقدركم يجي يحاسبني وطلع وقربع الباب وراااه
أنور: هو معصب ومتوتر ومش عارف شن يقول زي العادة يهدأ ويراضيكم بطلعة
اشبح لي نجوي غداي وركب
نجوي : دقايق هي
نور الدين: رنا بنتي عدي من الواحد لا العشرة قبل ماتمدي ايدك وقبل لا تتكلمي
رنا : نزلت راسها حاضر انحاول
وشرين تلفونها 📞📱📞📱
رنا : ألوو شنووو جهزي غرفة العمليات وماتتصرفوش لين انجي مسافة الطريق بس ...... اتسكر الخط
اني عندي طوارئ حالة مستعجلة وجت طالعة تجري بعدين تذكرت كلام بوها وقفت وشبحت لي جدها
نور الدين: هزلها راسه وابتسم توكلي بسرعة
رنا : جت تجري حضناته انت احلا جد بالعالم
وطلعت تجري
مهند : المفتاح واحذفهولها
رنا : ولت قامت ايدها وتلقاته منور يا غالي وطلعت
.........................................................................
الماسة : فتحت الباب بالشوية وخشت علي رووس صوابعها وسكرت الباب قربت من السرير وكبهت علب نضال لقاته في سبات عميق لفت وامشت بعد السرير جهة الكمادينوا مدت ايدها بتاخذ الخاتم الفضة الأسود
تحرك نضال في نومته ولف لجيتها طبست نزلت تحت السرير وقامت يدها وجبدت الخاتم فيسع
وطلعت بحذر وسكرت الباب بالشوية
الماسة : اتكت علي الباب وغمضت عيونها وتنهدت براحة 😮‍💨😮‍💨 بعدين فتحت ايدها شافت للخاتم واستنشقت ريحته 🫠😍 سكرت ايدها وجت نازلة من الدروج بحماس وفرح تلاقت الزعييم
الزعيم : كان راكب وشاد تلفونه شاف ماسة وقف وين أمي
الماسة : بلعت ريقها ودست ايدها وراها
ااااا مننن امييي
الزعيم : شنو اتقولي
الماسة : اااا قققصددي ماا نندرييش ععليهاا
الزعيم : ركز عليها 🤨 في شيء صاير شيء
الماسة : لالا لا ابدا شن بيييكون فيه وتهربت من نظراته ونزلت تجري
الزعيم : اااووووقفييي
الماسة : يارب يارب تسامحني شكله اخر يوم في حياتي اليوم
وتلفتتله نننعم
الزعيم : نزل درجة انتي مش داسة حاجة عليا ولاا
الماسة : زيي شنووو
الزعيم : اممم اوكي الا مانعرف
ركبيلي غداي وضبحيلي علي يااقوت
الماسة : حاضر
ولفتت الحمد لله 😮‍💨😮‍💨😮‍💨 وفتحت ايدها شافت الخاتم ابتسمت وجتها طاقة الفرح والحماس كن جديد
استبرق : شن سبب الابتسامة الحلوة
الماسة : حبي للحياء والتفكير بإيجابية وخشت للكوجينة
استبرق : وقفت في الدروج وقالت مع روحها مافهمت شيء سيدي وصيحت عليها دوووم عليك يارب وركبت تجري
في الكوجينة
ياقوت : ابتسامة وعيون لين مشحطات غمزتلها من مكبوب السعد
الماسة : توتي في السفرة بفرح محد مش ضروري كاني ضحكت معناته انحب مرات فرحانة علي خاطر فلوس مثلا
ياقوت : جتها وشدتها من خذها في حد قالك انك حليوة وصغنطوطة وعسولة
الماسة : رخت ايدها مش ضروري المقدمات الزعيم أعطاني 500 وقالي ضبحي علي ياقوت نعطيهلها في داري
ياقوت : أحلفي
الماسة : والله قالي ضبحي عليها
ياقوت : ياربي قداش ماخوي حنون وطيب بنشري بيهم جوا جدبد لي تلفوني وشنطة وكندرة وعباية سماوية وبناخذ بيهم كسسوارات يييييي وناضت تنقز وتصفق
الماسة : وشن تستني بري فيسع
ياقوت: ايه صح ياا البي وشدت خدود الماسة حياااتي انتي وامشت تجري
الماسة : ههههه مسكينة
طق طق 🚪 طق طق
الزعيم : خشييي
خشت يااقوت وايدها سابقتها مادتها وضحكتها من الحد لا الحد زي المخفوقة
كمل الزعيم لفان الفاشة علي ايديه الزوز وشبحلها
ياقوت : هي اعطيني 500
الزعيم : خمسمية 🤨
ياقوت : هههه خوي حبيبي متتحشمش ياغالي عارفاتك تبي تفاجئني عارفاتك طيب وحنون علينا ربي يحفظك ويحميك لينا
شافتله لقاته يشبحلها وقايم حاجبه
الزعيم : 🤨
ياقوت : ياخوي هههه كنت عارفة اكيدقلت الالماسة ماتقوليش باش مانتحسسوش من بعض لاكن عارفها ماتنبلش في فمها فولة لاكن عادي مش حانحرج والله كان بتعطيني اقل منها
واهني فهم الزعيم انه الماسة كاذبة علي ياقوت
الزعيم : اها تمام قعمزي امالا
ياقوت : عادي اعطهملي حتي واني واقفة والله
الزعيم : لا ماتجيش زايرتيني في جناحي وبالواقفة
ياقوت : ☺️😄 اوكي وقعمزت
طق 🚪طق
الزعيم : خشي
خشت الماسة وهي داسة ضحكتها شافت ياقوت مقعمزة ومبتسمه زي المجانين حطت السفرة وطلعت
الزعيم : نورتي ياقوت
ياقوت : بيك منورة
الزعيم : 😈
وبدي يضرب في الكيسة الي معلقة في داره ضرب لين دهش ووقف صار خمسمية وبدي يضرب تاني ووقف صار والله كان ماتنجحنيش وانصفيها لما نتصل بخوي الزعيم الأمر الناهي ولما يصفيك
ووقف ضرب وشافلها خيرك تبكي قاعد مادرت شيء
ياقوت : رشفت خشمها وحطت ايديها علي راسها اااه اااه 😭😖 ضحكوا عليا يا خوي اه اه اه ااااا😭
........................................................................
بدت الإشارة حمرا ووقفت السيارات
وقف بالموطوا الاسود وطف الدخان ولوحه ساوي الدجكة الجلد الكحلة وقام رجله ساوي خيوط البوت الأسود ساوي تقعميزته علي الموطوا ووجه مراية الموطو علي وجهه
مؤيد : شن هالجمال والله الا هلبا النم ناقص خاتمي الأسود بس وتلفت شاف السيارة الي بحداه فيها بنت
عدل مراية الموطوا عليها قعد يستني فيها لين شبحت القدام
تلفتلها جت عيونهم في بعض غمزلها ودارلها ابتسمة عالجنب
جت الإشارة خضرا شرين مؤيد بالموطو وطلع
وخلا البنت وراه مفهية فيه وقلبها داير حرب
........................................................................
فتحت عيوني كانت الدنيا مدغدشة مانشوف في شيء غير ضيء ابيض قوي قعدت نسكر ونفتح في عيوني لين تعدلت الرؤيا عندي وبدت غرفة المستشفي توضح والسرير وايدي الي معلقة فيها التغذية
يعني اني حية يعني نكتبلي عمر جديد خطرت عليا بنتي نووور نوووور
جت الممرضة الحمد لله على سلامتك هذا حد السوء يارب عيلتك برة خايفة عليك هلبا ربي يحفظهملك
رئام : بابا برة ماما خواتي هما الي برة
الممرضة: لالا الي برة راجلك وبنتك
رئام : هذا مستشفي الطبي
الممرضة : لالا انتي في عيادة
رئام : لوسمحتي ممكن تعطيني تلف..... وقطعت عليها الممرضة خليني نمشي نخبر راجلك
رئام : انلا اسمعي
طلعت الممرضة وماسنعتهاش
رئام : يارب يارب نبي نوصل في بابا مهند جدي اي حد من عيلتي
خش الدكتور وخش راجلها وليد وأمه
الدكتور : فحصها
الحمد لله على السلامة خفنا تخشي الغيبوبة بس الحمد لله فقتي
وليد : هي دكتور لو سمحت اكتبلها الخروج
الدكتور : مستحيلة المريضة تبي اقل شيء ثلاث ايام في المستشفي راه طيحة من الدور الثاني شن تحساب انت
رئام : شبحت لراجلها ابتسمت بإستهزاء نفس الكذبة يكذب فيها باختلاف رقم الأدوار علي حسب الطريحة
وليد : لالا في الحوش عندنا كل الاهتمامات في عندنا سرير وتو نجيبلها ممرضة واكيد حانجيبها ادير مراجعة
الدكتور : اوكي مدامه متوفرة الاهتمامات وبتجيب ممرضة حانكتبلها خروج
الدكتور : كلم الممرضى اتجيبله الملف
شن اسم المريضة
وليد : رئام أحمد نور الدين
كتب الدكتور الاسم وتلفتلها انتي بنت رئيس الأطباء في مستشفي الطبي واستشاري القلب الدكتور الكبير أحمد نور الدين
رئام : شبحت لوليد
بعدين تلفتت للدكتور ايه بابا
الدكتور : والله بوك من أحسن واشطر الدكاترة خلقا وعلما يرحم من رباه
وتلفتلها وجدك القاضي الكبير نور الدين وعمك دكتور الكيمياء العضوية في جامعة طرابلس أنور
رئام : ابتسمت ايه
الدكتور : من نعم العائلات والله ربي يحفظهم ناس طيبة والله ليا الشرف تعرفت علي ناس طيبة واصيلة زيهم
خديجة : نخصت وليد وتكلمت بعصابية العيلة الزفت الي مافيش حد مايعرفهاش مرض يرفعهم كلم هالشباني المخرف شكله بيفتحلها شجرة عائلتها
وليد : مااتحشميناش يام احني دوب كيف قدرنا انمثلوا انها طايحة كان سمعوا احني ضاربينها لما يحبسونا وماخاطريش نفكر في شن بيصير بعدين
الدكتور : وانتي قريتي طب حتي انتي
رئام : كانت في عالم تاني اتفكر كيف بتطلب من الدكتور يوصل لماليها انها في مشكلة
رئام : لا اني قريت لغات كلية الآداب جامعة ناصر
الدكتور : كويس كويس مشاء الله ربي يفتح عليك
وقع الورقة واعطاها لوليد اعطيها للرسبشن وخلاص تم
الدكتور : الف لاباس عليك طهور إن شاء الله
سلملي على الوالد هلباا بالله
رئام : مسحت دمعتها يوصل
وفي خاطرها اني اللي بنقولك سلملي عليهم
طلع الدكتور وجت عزوزتها شحتها شحان من السرير
خديجة : ياريتك متي وافتكينا منك
جت نور تجري مامي
رئام : طبسلتها حبيبت الماما وقلبها
نور :? Are you fine mammy
هل انتي بخير مامي ؟
رئام : yes I am fine
نعم انا بخير
رئام : ?Why are you scared
لماذا انتي خائفة ؟
نور : تمسح في دموعها
Because I miss you
لأنني افتقدتك
Don't move away from me again
لاتبتعدي عني مرة اخري
رئام : I will not do in my life
لن أفعلها في حياتي
خديجة : هوني بدت تبغبغ هي وبنتها بالانجليزي اشبح شن كانت تدوي علينا بنت امها حرباية زيها مرض
رئام : Let's go mammy
نور : OK
.........................................................................
مؤيد : درس الموطو تحت دار نضال وطفاه
حط صوابعه في فمه وبدي يصفر مرة واتنين وتلاتة
شبح للبلكونة مانفتحش قعد يدور يمين يسار لين لقي رشاد صغير قامه وبدي يحذف
حذف الاولي لارد
حذف الثانية لارد
حذف الثالثة لارد
قام رشادة كبيرة وحذفها لاارد
مؤيد : ولد الكلب مايبيش ينوض
ضبح بصوت عالي نضااااال نضااااال نضووو نضااال
في الكوجينة الداخل شمس تلود الطيب وياقوت متكية عالرخامة
ياقوت : بنتك الكلبة يااام حشتني عنده
الماسة : والله مادخلي هو قالي ضبحي عليها
ياقوت : لوحت عليها راص بصل
الماسة : ماما كلميهاااا
شمس : محد حشاك انتي الي هددتي الدكتورة دايرة فلاحتك تو ماتتحشميش علي خليقتك تهددي دكتورة أكبر منك يااحقيرة ياريته خوك مد يده عليك تبيها الطريحة علي قلة أدبك
يااقوت : علي الاساس الي داره فيا شوية حلفلي علي الجامعة السيم هذا كله مانهواها وفوقها قالي كان ماتصفهمش كلهم بامتياز بيبطلني مش عدل ياام راه كلميه
شمس : تستاهلي والله ماني مكلماته
منو الي يضبح برة
ياقوت : الشلال صاحب ولدك وهما كان تجيبو تسجلوه في كتيبنا وخلاص ولا يسجلوا نضال في كتيبهم
شمس : مؤيد الي براا
ياقوت : ومن غيره المنحوس وخوه
الماسة : سمعت اسمه توترت وطاحت الحفاظة
ياقوت : ارفسي لميهم هييي
الماسة لمت ورق النعناع فيسع وطلعت تجري ركبت للدروج تلقتها زمرد في الدروج
زمرد : ماسة اعطيني .....
الماسة : بعدين بعدين
وركبت تجري
زمرد : خيرها هذي ربي يشفيها
الماسة خشت للدار وسكرتها وامشت تجري للروشن فتحت شوية من السدار فما بانت عينها وشافت لي مؤيد
مؤيد : الشمس يا نضال الشمس سوف تغرب
نضااال نضااال ياولد الطاهر نضااال ياولدي شارعي نضووو الشمممس سوف تغرب انهض والا تجيك الشمس
طلعله نضال بعيونه الحمر وشعره الهايج لوح عليه الشبشب ارووح ياامسخ يااكلب
مؤيد : والله معاد لابسه الشبب وين طايح فيه وهو تقول طانطة مدرسة مكبر رجل فيتك
تي هي البس ياراجل وتعالي عندنا مشية خت فت
نضال : مانيش ماشي واروووح
مؤيد : لوح عليه الشبب تي انزل الشمس بتغرب انزل
الماسة : كانت تتفرج عليه ومبتسمه طالع طرف وسكرت السدار واتكت علي الحيط حطت ايديها علي قلبها افففف خيره قلبي اششش اهدي اهدي قامت ايديها شافتهم كيف يرعشوا خيرني اني
ولت شبحتله لاقاته مكرش يتسلق في حوشهم بيوصل للبلكونة دار نضال
الماسة : مجنووون
مؤيد : وصل هات ايديك قيمني يااواطي
نضال : 😈👹 مثلا مثلا لو رخيت صبعك ودفيتك شن يصير
مؤيد : يصير وقتها تبدأ عيل وغدار
نضال : من الي سمحلك تخش لداري
مؤيد : وقف افففف😮‍💨😠 ياكللب ياحيوان مرمدتلي حوايجي وخش تلوح عالسرير
نضال : مش قلت بنطلعو
مؤيد : عجبتني النومة جيب السوني وخلي نلعبوا
نضال : به خشيت من الباب مشينا للمربوعة وقعمزنا الدنيا كلها شافتك حتي الي ماعرفش عرف
مؤيد : ويبدوا ينقزوا لحوشكم من دارك ويخنبوكم ويقتلوك وياخذوا كليتك يبيعوها
نضال : حذف عليه المخدة عيييل
مؤيد : ردله الحذفة اسمع نووض ضيف صاحبك حتي جغمة مية
نضال : درق وجهك
مؤيد : نبي مية
نضال : هوني على الكمادينوا
مؤيد : ناض لف جي خذي المالقي وصب في الطاسة جي بيشرب شبح ساعته
مؤيد : اااااه
نضال : وقف مخلوع شن فيييه
مؤيد : سااااعتي عندك ياحرايمي ياخانب طعتني في قلبي علاش يانضال قلتلي نبيها راهو اعطيتهالك
نضال : مصح وجهك خلعتني نحسابه الزعيم جي
مؤيد : قعمز علي السرير وناض يندب ووه وووه حي حي حي ياارب يااارب اني عبدك الفاشل غضبت امي وكسرت الماعين ورعشت حناي وخبط البيبان وطلع صاحبي خانبني
نضال : تي خنبت شنو ياراجل واحني من يومنا نلبسوا مع بعض
مؤيد : خناب حرايمي
نضال : انبح انبح
مؤيد : به الخاتم وين
نضال : شد الجهاز وغير القناة
بحدا الساعة
مؤيد : ياحرايمي مهناش
نضال : دوره بحداه
مؤيد : طيح السهارة مهناااش قلنا بتكذبني
ناض نضال شافه حطيته اهني النم وينه
مؤيد. : شفت علاش منحبش نعطيك حاجتي فسايدي من يومك وتريح نبيه خاتمي نبيه من دبي
نضال : بلا كذب انت شريه من الدبسكي بجنيه
مؤيد : جيبه نبيييه مدخلكش من وين جايبه
.........................................................................
وليد : خشي وحذف رئام جت طايحة عالرخامة
خديجة : نوضي ضمي الحوش واغسلي البساطاط
جت نسرين شن قالولها الدراما هذي
خديجة : مافيها شي تضرب الحيط تهده ورفستها برجلها نوضي طيبي العشي
خشت نسرين جابت كدس حوايج ولوحتهم علي رئام اغسليهم وحدديهم وضمي داري صحباتي جاييني
خديجة : ديري الهريسة الفلفل من امس جابه وليد مكدس
نسرين : متنسيش ديري حاجة حلوة واضربي النسكافيه بنحطه لصاحباتي
وخشوا كل واحد لداره
رئام ناضت تدعدع طاحت ياارب يارب مانبي شيء نبي بابا نبي جدي نبي بوي أنور بس
يارب والله عارفة مابعد الضيق فرج لاكن عييت والله صحتي نهدت قامت عيونها شافت بنتها
ضروري ماتحاربي يارئام ضروري بنتك اهم شيء وقفت نحت عبايتها وبدت الضم وكل ماتعيى تشوف ل بنتها
.........................................................................
رنا : ايه بايتة الإسعاف زحمة ومافيش كيف انروح وانخليه منغير دكاترة
مهند : ماتروحيش بروحك غدوة تو انجيك
رنا : به حاضر ....... وسكرت الخط
بلقيس : خشت للحجرة وهي تتكلم في التلفون ماما قولي لي الزعيم تمام تصبحوا على خير........وسكرت الخط
بلقيس: اليوم متعب هلبا معش قادرة نحت سبيدروها وقامت رجليها عالمكتب نبي نزوز أين زوزي
رنا : تحت الكوبري
انفتح الباب بالقوة وخشت الممرضة
الممرضة : حادث سير عائلة كاملة والأم حامل
ناضوا بلقيس ورنا شحوا البالطوا وطلعوا يجروا
.........................................................................
شمس : تي قعمز اتعشى انت وياه
مؤيد : في العيد الكبير يارب
معش وقت
شمس : ريت هالشركات الواقفة علي خاطركم
نضال : فوتيني يام ماتدهبيليش شيرتي كل شوية الو من توة تلفوني امسكر واني الي سكرته
شمس ؛ روح بكري والا مافيش من يفتحلك الباب
نضال : مية مية
وطلعوا
مؤبد : ففففف نسيت الابتوب في الحوش
نضال : نخطموا عليه عالسريع
وركبوا ورا بعض في الموطوا ونضال الي يسوق
وكانت في عيوني تراقب فيه كل صغيرة وكبيرة بحب 💘
.........................................................................
رئام العشي .......رئام تعالي اكنسي .....رئام ديري قهوة رئام انشري الحواايج .......خيييرك مادرتيش البسطات
رئام قلتلك ضمي داااري ......رئام اركبي فوق السطح ضميه......رئام شوفي الغسالة
رئام🏃🏻‍♀️ رئام 🏃🏻‍♀️ ...... رئام.....رئام رئااااااااامم
وهذا حال رئام كل يوم
.........................................................................
مؤيد : ياام اامي
نجوي : تعالي اني في الصالة
وخش مؤيد شبح مهند متكي في علي حجر امه
مؤيد : خزيي علي العييل حبيب امه
اغغغة يا دلب الماما انت
مهند : يااام كلميه
مؤيد : اغغة خسارة مانك عسكري وقايد وهيبة كانيشوفوك الناس خزززيي
مهند : لوح عليه المخدة ارقد يااعيل
نجوي : ضربت مهند علي وجهه بطل انت ويااه
وانت وين كنت وين ماشي
مؤيد : كنت في حوش صاحبتي وتوة ماشي لحوش حبيبتي
نجوي : بلاحشم ولا جاعرة تقول في هالكلام قدامي قليل ادب
مؤيد : ماهو انتي يام تسئلي في أسئلة مافيهاش إجابة وين بنكون يعني في حوش الطاهر في دار نضال
غر اسمعي يام نبي فلوس
نجوب: مااعندييش
مؤيد : تعانديني يااام والربطة الي تحت الردي متاعك في الدولاب الوسطي في التركيننة
نجوي : ووووه عليا ان شاء الله ماسهم نتقت عليهم حتي هما مصاااريني ماطلعتهمش مزااال مصاااريني
مؤيد : سقطت عيني عليهم سهووا
نجوي : سقطت اممك نهارك اسود مافيه ضيء نلقاك ماسهم
مؤيد : مماسيتهمش هما خذيت من اللي في الشنطة
نجوي : ياااربي يااااربي دير معاه حلل راني عجزت علييه مش متاااعاااتي هذم امامة متع جمعية الجارات لمينهم بنعاونوا بيهم خدوجة مرت مفتاح حوشها عربي منغير سقف قلنا ان لمولها من حيش مات راجلها مسكينة معش قاعدلها حد ضايقة بيها الدنيا
مؤيد : المسكينة ودار روحه يمسح في دموعه 🥲ورشف خشمه الله 🤧يعاونها ان شاءالله اه اه تسمع مصيبة غيرك تهون عليك مصيبتك فكرتني بيا حتي اني ضايقة بيا الدنيا زيها 😢😭
نجوي قامت الشبشب وحذفاته عليه 💦 تفووو عليك
مؤيد : امشي يجري 🏃🏻 خلاص خلاص هههههه
ركب للدروج وهو يعيط مللللك ملللك وفتح الدار ملك
ملك : نحت القلم من راسها اففف نععمم
مؤيد : اللابتوب متاعي وين
ملك : عند ليث شوفهمؤيد : تمام
روان : سكر الباااب
مؤيد : خلا الباب مفتوح وسكر الضيء
رنيم : تعاااالاااا
روان : خرا هذا
مؤيد : توأم الشر وخش للدار
غيث : اطلع وسكر الباب
مؤيد : ضم فمك احترم نفسك خير مانجي نهبكك
وتلفت لي ليث اللي كان يتمرن وعارق وعروقه بيطربقوا وعضلاته بينات
متعياش انت خف علي جسمك
ليث : حط الأثقال افففف هوووه شن تبي
مؤيد : اللابتوب متاعي وين
ليث : فوق المكتب
مؤيد : قااايل لدين امكم معاااش تمسوووه
ليث : مافتحه حد زي قلته البرامج كلها مسكرة
مؤيد : مادخلكش في امه معش تمسه
غيث : به خوذه واطلع بنقرااا
مؤيد : عنفكه علي رقبته دارهتولي كبببديي انت واختك تيي قرييب تولي احوول انت وياااها من القرايا
الكتابات بتعيط
غيث : مادخلكش واطلع
مؤيد : حوسله كتاباته وطيحهم وطيح ادواته واللي علي المكتب كله
غيث : لااا ياااعييل لااا
وطلع مؤيد
ليث وغيث قعدوا يشبحوا لي بعض 🙆🏻🤷
ولا ليث يتمرن وغيث يضم في الحجات
نجوي : وين طالع هاد تجري وانت زي الكلب العربي تلود من مكان لمكان تقول ماعندكش حوووش
مؤيد : اهو طالع الكلب وفوتيني مادورينيش
نجوي : باللطف
وانت ماتقوليش خيرك مسكت عليه هذا شن مخليه متمادي راه
مهند : عندي مااهم منه لاكن تو نفضاله
.........................................................................
رئام : سكرت ضواوي الحوش بعد مالكل ارقد وخشت لدارها 😮‍💨😮‍💨
واخيرا الهدوووء محتاجة هدووء وبس مانبيش اكثر من هكي وطبست غطت بنتها وساوتها باستها علي راسها اني اسفة ياماما اسفة لأنك في بيئة زي هذي اسفة لاني مقصرة في وقتي معاك اسفة لأنك ماعشتيش زي الأطفال ولا فرحتي زي الأطفال وفتحت الدولاب طلعت مذكرها وفتحتها وبدت تكتب
الحياة الي كتبتها يامذكرتي هذي الي حلمت بيها هكي كنت مفكرة حنعيش بعد الزواج بس للأسف مش ديما ال نحلموا بيه يتحقق لما جي وليد وخطبني كان عمري 23 سنة بعد تخرجي بشهر جو وطلبوني في البداية جدي عارض لانه من منطقة بعيدة علي اهلي في الجبل لاكن جاب شيخ القبيلة وكلم جدي وطلبوني وقتها كيف بديت نخدم في شركة بوي أنور والطاهر بديت كامترجمة اول معاش ليا كان بعد ماسفرت معاهم لي إيطاليا وربحوا الصفقة واني طول الوقت واقفة نترجملهم كنت فرحانة انه درت انجاز زي هذا وبابا طول الوقت يقولي حضري ماجستير اكملي الدراسات العليا قلتله خليني توة نخدم حتي سنة وبعدها نكمل بعد سنة من الكلام هذا كنت متزوجة وحامل من البداية عزوزتي ماتحبنيش واني قلت يلا مرا كبيرة نسايرها معلشي اجري حاصل عند ربي زي اميمتي ويوم عن يوم زاد كرها وبدت تعبي في راس وليد ومالقيته غير مقلوب عليا حولني من الشركة وبديت نخدم في شركة تانية وكل معاشي واخذينه امه واخته وهو بطل خدمة وبديت اليالي نخدم ونصرف عليهم وبديت خدامة عندهم وواحارمين عليا اي حاجة توصلني بأهلي ولا طمنهم عليا وياامذاكراتي كل أحلامي في انه انكون زوجة صالحة وأم صالحة وكنت صالحة ادمرت وبديت طول الوقت مشغولة بطلابتهم الي ماتمش وانشغلت علي بنتي
بس مش حانقعد هكي طول عمري اكيد خوتي حايسمعوا ويجو يطلعوني من هالحوش اني وبنتي ونولي لي طرابلس
هذي الجملة الي رئام كانت تنهي بيها كلامها في كل صفحة .
.........................................................................
روان ركبت تجري من الدروج وفتح باب الدار بالقوة
روان : تعاااالوا فيييسع معاي هاااااا لقيته مريض حرارة وفيروز قالتلي من الصبح الحرارة ومابتش تنزل
ملك : شن تقوولي انتي
اتصلي برنا فيسع
رنيم : به وطلعو يتجاروا لنهاية الحوازة
.

.
.
. يتبع
للكاتبة نور القمر 📖🖊

ا