المنطق والقدر

الحلقة 6

رمضان مبارك 🇱🇾
رب يتقبل منا ومنكم صيامنا وقيامنا و صالح أعمالنا 🤲🏻
.
.
.
يهمني رأيك وتعليقك في الحلقة عزيزي القاريء 🥰
قراءة ممتعة 🕊
.
.
روان ركبت تجري من الدروج وفتح باب الدار بالقوة
روان : تعاااالوا فيييسع معاي هاااااا لقيته مريض حرارة وفيروز قالتلي من الصبح الحرارة ومابتش تنزل
ملك : شن تقوولي انتي
اتصلي برنا فيسع
رنيم : به وطلعو يتجاروا لنهاية الحوازة
ملك : طق طق 🚪
فيروز فيروز افتحي هذم احني افتحي
روان : ردت عليك رنا
رنيم : اسسس اهي ردت
الو رنا ايوااا
رنا : هااا نعم
رنيم : تعالي روحي فيسع ضروري
رنا : عندنا حالات مستعجلة شن فيه
رنيم : روحي الحالة الي عندنا اهم
رنا : مافيهاش كيف شنو فيه
فيروز: خشوا فيسع صقع
ملك ؛ خشت تجري للحوش
وينه شن حاله توة شن صارله
روان : اهدي اهدي
فيروز : اششش كيف رقد اهدوا
وتلفتت لي روان قلتلك ضبحي عليهم مش رعشيهم
روان : من الي ريته احمر وعارق نخلعت
ملك : قعمزت جنبه حيااتي وبدت تبكي
فيروز: ملك خيرك اهدي الأمر طبيعي ومافيش حاجة خطيرة كلها كلها الحرارة 38
ملك : 😭😭 لكن هو بيبي وخطيرة عليه
فيروز : كله تمام توة نزلت الحرارة متخافيش
رنيم : ايه ايه فهمت عليك تمام به حاضر سلام
... سكر الخط
قالتلكم رنا ديروله كمادات باردة ولو زادت عليه الحرارة دوشوله لابين ماوصلت الصبح
فيروز : وهذا الي صار وتلفتت لي روان
ااخ منك قداش ماتحبي تكبري الموضوع
روان : وين نعرف اني توترت
فيروز : المهم شافكم حد وانتم جايين اهني
رنيم : ضربت راسها نسيناهم مرة وحدة
فيروز : بنااات
روان : اصلا امي نجوي في حوشنا تكلم في بابا احمد هي وماما مش عارف علي صيانة ماصيانة
فيروز : ديروا بالكم يابنات مش مستعدين نبرروا ابدا
رنيم : اليوم 8 شهور
روان : لأمتي حاندسوا اولها علي آخرها بيعرفوا اليوم او غدوة
ملك : 😢 من البداية قولتلكم خلونا انقولوا لجدي اكيد حايعرف يتصرف وهكي يبدأ كل شيء بالقانون
رنيم : الي صار صار وعملتنا ودرناها ومن اليوم لا اليوم الي بيعرفوا فيه يبقي نستسلموا للأمر الواقع وانقولوا كل شيء
انفتح الباب وخش موسي
موسي : السلام عليكم
بناتي شن في شن صاير شن جابكم الوقت هذا
فيروز : من الي سمعوا جو يتجاروا
طلع موسي قدام الباب وولا سكر الباب والرواشن
موسي : هبلتوا انتم شن صايرلكم لو يعرف البيك ليلتنا ليلا وقتها
فيروز: ضمتهم ليها خلاص حبيباتي متخافوش اني معاه وكله تمام بروا غدوة عندكم مدرسة واطمنوا حاندير بالي عليه
ملك : مش عارفة كيف بنشكرك ولاكيف بنردوا معروفك وجميلك علينا
فيروز : أسس عيب الكلام هذا
روان : أسس كأن صوت حد ينادي
وسكتوا جمدوا في مكانهم
رنيم : فتحت الروشن وقعدت تسمع
اااه يام نجوي حي علينا حي
روان : اااه ياربي طحنا
ملك : اطلعوا فيسع
وطلعوا يجروا
ملك : فيروز بالله عليك كان صارت حاجة قوليلي
فيروز : اطمني حبيبتي
روان شحت ملك فيسع تعالي
............................................................................
نضال : الحل
مؤيد : مركز في اللابتوب ويدوي
ساهلة شهر بشهر
نضال : وكيف بنعوضوا الخسائر
مؤيد : تلفتله باش نوصلو للي نبوه ضروري مانضحوا بكل شيء مبدئيا شن المهم عندنا احني
نضال : كثرة الزبائن
مؤيد : برافو عليك الشهرة والعالميا
والأهم نبوا الزبون يتعامل معانا احني طول بدون وسيط
نضال : معناها ضروري من عملاء ورواد باش يوصلوا المنتج
مؤيد : هو هذا الي نبو نوصلوله خلينا نجربوا وصدقني
حيبدا يتعاملوا معانا هلبا رواد أعمال وعملاء في كلتا الحالتين احني الرابحين
نضال : وقف علي طوله وولع السبسي
ايوا معناته يامعلم ضروري مانديروا من المنتج نفسه نصدروا منه ثلاثة أحجام وبسعر قريب من بعضه
مؤيد : فكرة معناته المنتج نفسه في منه كبير متوسط والحجم الصغير
الصغير والمتوسط يكون سعرهم مجموع سعر الكبير
نضال : أو المتوسط بسعر قريب جدا من الكبير
مؤيد : وبهكي الزبون يبدأ عنده خيارات هو يستفيد واحني الرابحين بعنا عدد كبير من المنتج والمدخول يزيد
نضال : بالضبط معناته خلينا بعد غدوة نسافروا وانديروا اجتماع مع الممولين ومدراء المصنع
مؤيد : معناته من ليبيا لي إيطاليا ومن إيطاليا لي دبي
وجتهم مكالمة من السكايب
نضال : سكر بطم جاكيته الرسمي وقعمز بجنب مؤيد
مؤيد : شوف شعري مساوي
نضال : ساوله شعره مية مية مدير شركة بسلامتك عيني مضرك
مؤيد : اسكت اسكت واشحط روحك وفتح المكالمة
احم هئحم السلام عليكم
نضال : مرحبا بكم جميعا وان شاءالله منتأخروش عليكم دقايق بإذن الله من وقتكم
مؤيد : نعطوكم اللب من الاجتماع اللي حيصير في روما
.........................................................................
بمهل وبدون صوت وبخفة ركبوا الثلاثي الدروج بحذر وخوف
روان : فيسع فيسع اركبوا قبل مايشوفونا
وركبوا يجروا
فدوى : اووووووقفووو انتييي ويااااهاااا
وقفوا الثلاثي في نص الدروج وزمطوا ريقهم من الخوف وغمزوا لي بعض
ملك : نعم امي
فدوي : نجوي ليها ساعة اضبح عليكم وين كنتم وعلاش خاشين هكي زي الخانب تقول هاربين
رنيم : ابدا مافي شيء كله طبيعي
قدمت فدوي عليهم وشبحتلهم بقيمة حاجب وبدت اتلف عليهم
فدوي : امممم كل شيء طبيعيي
توتروا من نظراتها وشبحوا لي بعض
فدوى : وقفت علي ملك
ملوكة
ملك : انننعمم امييي
فدوي : وين كنتوا
ملك : بجنب جمانة قاللنا عمي موسي انها مريضة لانه البيطري جي اليوم وضربلها اليبرة
فدوى : توة في هالصقع امالا علاش ماردتيوش
روان : والله مسمعناكم في البداية ولما سمعناكم جينا نجروا
فدوى : شبحت لي رنيم امممم
رنيم : شنو
فدوى : لا غر قلت بلكي بتزيدي حاجة باش تطلع كدبة مبدّْعا عاد ووقتها اني انصدق
رنيم : علاش بنكذبوا مثلا وين عندنا بنمشوا تمشينا في الحوازة وبعدين اطمنا علي الفرس جمانة
فدوى : غدوة يذوب الثلج ويبان المرج ونعرف شن داسين ولشن تخططوا مانيش مستعجلة
ملك : شبحتلهم شبحا بمعنى اهدوا راهوا تختبر فينا تبي اتشككنا وغمضتلهم عيونها بهدوء مطول وفتحتهم
روان ورنيم علي طووول فهموا عليها وابتسموا
روان : ياريت ياماما لانه بعدها بيجي الربيع وبيزين حوازتنا ويخف البرد
رنيم : ويطلع الحميض والعسلوس
ملك : بضحكة ايييه وميدوا يطيبلنا بكبوكي ناشطا علي الحطب
روان : بالوطني
رنيم : يمييي حمستوني للربيع والتزريد والجو متاعه
امشت من جنبهم فدوى وخلتهم يهدرزوا بعد متأكدت إنهم مش داسين شيء وهما كملوا تهدريز وبحماس يبوا فدوى تبعد الشبها من عليهم
ملك : هههه هيي هييي رانا في اول الشتاء ٠
مزااال ثلاث شهور هكي كبرهم
روان : اففف قريب مشينا فيها
ملك : هاااه ان شاءالله غر صدقت
رنيم : اكيد صدقت تي هو اني قريب صدقت التهدريز هذا كله
وتلفتوا لي غيث الي نازل ويساوي في نظاراته
غيث : ملوكة تشرحيلي درس القلب والدورة الدموية في الأحياء
ملك : خذت كتابه تعالا حياتي هي
وركبت معاه
.........................................................................
الطاهر : اني الولد ماعندي مانقول فيه ولد عيلة معروفة وخدومة الحق
شمس : هكي بتسلم في بنتك بي هالسهولة وتخليها تستقر بعيد علينا
الطاهر : لا والله ماصارت ولا هاين عليا لاكن الي فهمته انه قادر يدير زيارات مرة مرة وبعدين خايف مانقوللهاش انكون دمرت مستقبلها وخصوصا اني عارفها زمرد خاطرها تسافر وتحضر الماجستير واهي جتها في دبي
شمس : ابدا اني مش موافقة قرايا وكملتها واهي دكتورة أسنان قد الدنيا وبعيادتها ومستقبلها تبيني نسلم فيها ونخليها تسكن في بلاد تانية وتستقر ابدا ان شاءالله يجيها عامل بسيط وحالته رقيقة ولا نعطيها لي واحد بيسافر وبيستقر في دبي
وبعدين خيره الطنطاوي من شن يشكي ماهو راجل وسيد التريس فلوسه حلال ومن عرق جبينه ضايق بنة الشقا والتعب باش مايخليش اهله تستحق حاجة وتلقاه حزار ومحرار وقدع وغيرته نار علي حرمة بيته
الطاهر : ماقلت شيء عليه اني بس شوفي بنتك واسأليها وشاوريها باش مايجيش يوم واتقولك جاني الي بيسافرني ويخليني نكمل قرايتي وفوتوه
شمس : بنتي تربايتي وتو تشوف شن ترد عليا
الطاهر بريلها
.........................................................................
جواهر : بصوت تبكي وسام وسام انت فاهم غلط والله ماقلت حاجة
خيرية : تكذبي فياا بنص عيني وقدامي
جواهر : 😭😭 حشاك ياعمتي لاكن
وسام: خلاااااص
وبدي يقربع ويكسر في اماعين الكوجينة وجواهر تلود وراه وتهدي فيه
تعلي في صووتك علي أمييي يلي قبل ماتكون امي هي عمتك ااااا خلاص معش درتي قيمة لحد
جواهر : وسام اهدي اهدي الصغار
وسام: شدها من ايديها وجبدها معاه
جواهر : 😭😭ايدي ايدي وسام مش قدام الصغار بالله
وركبوا فوق لشقتهم وأمه طالعة وراه تلعلع
خيرية : إن شااااء الله يقتلللك يااكلبة
وسام : فتح باب الحوش وقعمزها عالكنبة
جواهر : والله انت فاهم غلط
وسام : حط صبعه علي فمه وأشرلها اششش وغمزلها
جي قعمز قدامها ومسح دموعها سامحيني يابنت خالي
ووقف وبدي يعيط علي طول رقبته
تعيطي علي امي مش محترمتها دايرة مااتبي والله مااتتحشمي لاكن هيين هيين وربي العباد لما نربيك من اول وجديد ويقرب علي الباب ويزيد يعلي في صوته ويغمز لي مرته
لوطة في دار الدروج كانوا خواته مستفات
رحمة مطبسة وذنها ولاصقة في الباب تتصنت
ميساء شنو يضرب فيها
نزلتلهم رحمة تضحك هههه والله شكله فرمها
خيرية تستاهل سلمه وليدي الغالي بردلي علي قلبي
خلاص انزلوا تو يشبحنا
وسام : المرة هذي ربي يحبك المرة الجاية لما ندفنك
وهو يضحك ويدغدغ فيها
جواهر : حاطة ايدها علي فمها وتضحك خلاص خلاص هههههه بالله عليك خلاص
وسام : مزال حركة وحدة وطيح الطاولة المرش
جواهر : هيييي😱😖 طاولتي الجديدة
وسام : اسف اسف
جواهر : وقفت بتلمها
وسام شدها أوقفي أوقفي اني انلمها
جواهر : اخخخ منك لازم اطيحها
وسام : ضروري ياعمري ضروري الاكشن
ولم المرش وكنسه
جواهر : جت نشفت ان شاءالله ماتطلع وحدة زارقة ويعفسوا عليها الولاد
وسام : وقف وراها وباس خذها خايفة علي ولادك ومش خايفة علي بوهم لفلها ايدها وراء ظهرها وهمس في وذنها مسامحتيني
جواهر : ولاعمري انفكر نزعل منك باش نسامحك
وسام : تاعب والله الا تاعب عييت يا حبي عيت
جواهر : بعيد السوء عليك من التعب والهم
هذي امك وهذوا خواتك وانت خوهم وحيدهم كان ماتحملتهمش وسايرتهم من بيتحملهم اني خايفة يا حبيبي خايفة لو اليوم مش بالصدفة وسمعت كلام امك راه كنت صدقت انه اني حق سبيتها
وسام : اولا حتي لو ماخشيتش بالصدفة وسمعتها ونزل راسه 😞 لما هزباتك وغلطت فيك وفي خالي مستحيل انصدق انه انتي تغلطي فيها
جواهر : قامتله راسه هذي عمتي وفرض عليا نسمع ونسكت ونسامح
وسام : اليوم لينا عشر سنين مع بعض وعمري مسمعت العيبة طلعت من فمك كيف نكافيك وعدتك نعيشك أميرة ومن يوم ماتزوجنا واحني ماشيين رفس بين مشاكلهم وعلي شيء ماليناش علاقة بيه
وربي العباد كان مش حرام لما نهج اني وانتي والصغار وطز فيهم وفي ورثهم وعراكهم
جواهر : انت وحيد امك وماليها حد غيرك كيف تسافر وتخليها منو بيها
وسام : واني شن ذنبي شن ذنبي انوض علي مشاكلهم ونرقد علي العراك والكلام الفارغ شن ذنبي مش قادر نعيش مرتاح اني وصغاري
جواهر : قول ربي يهديهم ويقسموا الورثة ويعيش كل واحد وهو مرتاح ويحلو الخلاف الي بينهم
وسام اني مانبي شيء كله جاي علي صحتي والله الا عادي جاي علي صغاري والله الا عادي لكن يجي يوم وتصدق امك وكلامها عليا شن ندير اني مانتحملش تفهمني غلط ونتفرقوا
وسام : اششششش الكلمة هذي بدات نكرها ربي مايفرقنا وبعدين اهو ندير روحي نصدقها ونركبك اهني هما يحسابوني نضرب فيك واني ...
بدي يبوس فيها
جواهر : لالا ههههه الصغار قريب يروحو من المدرسة
....................... ................................................
شمس : شن قلتي يابنتي
زمرد : تحشمت من امها ونزلت راسها بحشمة ويجيهاا البيروا علي راسها
زمرد : اييي
ياقوت : دايرة روحها متحشمة وهي ياما تحت السواهي نواهي
الماسة : ههههه شن هي هههه غر قوليها صح انتي
شمس : اسكتي انتي وياها خل نفهم من اختك
شن قلتي ياأمي
زمرد : هو صح اني خاطري نحضر برة لكن قلت وحدة من سفرات بابا نمشي معاه وهي الحكاية كلها كلها سنتين باش نقوي بيها شهدتي مش اكثر لكن انه نستقر صعبة يام نمشي ونخلي وراي كل الي بنتيه ونسيبكم ونستقر بعيد عليكم بعدين اني الحق يام توة مش مفكرة في الزواج بكل
ياقوت : راهو القطار قريب يفوتك وتعنسي والمشكلة انه الخطاب مكدسات والله يجيك يوم وتندمي علي الي ردتيهم كلهم
شمس : سكري فمك انتي
اسمعيني يابنتي المراء ماليها الا حوش راجلها وتكمل نص دينها وانتي قريتي وتخرجتي وخدمتي اظني يابنتي هو هذاك
الماسة : انتي مأثرة فيك سجى وحياتها هذا علاش خايفة
شمس : قاعدة تكلمي فيها
زمرد : مهما كان تقعد صاحبت الطفولة
شمس : به صاحبيها مش تتأثري بيها صوابع ايديك مش زي بعض ورجالة مش زي بعض
وبعدين جايك واحد مصلي عالنبي عليه زين ورجولة وأخلاق وترباية راجل وماينخافش عليه أراه نسيب كل حبيب
ياقوت : شن دستة هما امالا يام تي مش كيف قلتي بيسافر وقالتلك ماتبيشي
شمس : لا هذا واحد تاني ولد جيران حوش بوي زمان
امس كلمتني خالتك ليلي وقالتي اتصلوا بيها ينشدوا بنعطوا ولالا والحق امه صاحبة عشرة وياما لعبنا وقعمزنا مع بعض ناس تبارك الرحمن عليهم كيف جيت بنقول لي بوك عليه قالي امالا راهو حتي ولد صاحبي جاي وكلموني عليها
ياقوت : ضربتها علي رجلها اضربي هيي بالزوز يجو
زمرد : تنهدت تمام نستخير ويدير الله طريق
شمس : هذا الكلام الي يفرح يابنتي
ياقوت : يااام قلتي جيران حوش جدي من هما
شمس: قيس ولد رجاء
ياقوت : جت قدام زمرد نهارك اسود بضيعيه من ايدك نهارك احرش تقوولي لااا ياماتك سوووود كل واحد يجيك احسن من التاني وهذا خير منهم كلهم يومك مغبر ترفضيه شن تبي انتي ياأمي شن تبي انتي خلاص عاد هذاا واستوب تي مش زين وبس هذا طلقة فيراري
وتجيها خبطة علي ظهرها قريب سلتلها بلحوحها من امها
يااقوت : ووك عليا مصاريني دابوا
شمي: شدتلها وذنها وانتي منين تعرفيه
يااقوت : وهو منو الي مايعرفاش قيس رديف الشارع
شمس : لا مانعرفاش عرفيهولي
يااقوت : ااي ايي به خلاص خلاص وذني اهو تو انقولك نعرفه مرة عاكسني ولد في الشارع ويأخذ هو يركه طريحة تمسح علي القلب الشارع كله يخاف منه ماعندهمش معاه كلمة ياام وبعدين نعرفه ولد خالتي رجاء
شمس : ياماتي اني نهاراتي اني وكان يسمع خوك خاطرك يذبحك اكيد تبي تموتي علي ايديه
.........................................................................
روان : وأخيراً ووووه بنروح بنرقد والله ماني ماسة فيها حاجة الله
ملك : تلم في ادواتها به به غر اسكتي بلا عار
رنيم : ملك درس الكيمياء اليوم والله مافهمته
ملك : لبسة شنطتها خلي انروحوا وانقولو لي بابا يشرحولنا حتي اني ماقدرتش انركز
طلعوا من الفصل يمشوا بجنب بعض روان تمشي بالعكس مقابلتهم
روان : اني لااا مانيش قاريا اليوم
رنيم: انتي شكله بتسلمي في الترتيب الثالث وشكله البنت الجديدة بتحتله
ملك : ايه تسنيم الله يبارك عليها البنت مشاء الله واضح هذم الناس الي جاية تقرا
روان : قامت اكتافها خل تأخذه كان ربي كاتب عاد شن بندير اني
رنيم : شحتها ديري عيون ديري عيون قريب تحطي ريتي هذا الغباء هذا الغباااء مش بس مشيتك معكوسة حياتك كلها معكوسة
روان : هذا اسمه فن اللا مبلاه
ملك : هههه راك فاهمة الكتاب غلط راه
خلاص اسكتو في الشارع رانا
👤: هذم
👤: ايه ايه بشحمهم ولحمهم ملك وأخواتها برا برا وراهم بالشوية
👤: حي عليا اني حي تي شن هذا شن هذا هذي بكلاوة كيكة شنو بالضبط معقولة ادس علي صاحبك كرزة زي هذي ياراجل وين كان مغطس الطير هذا
👤: حط ايده يلعب بليحته ملك من يوم يومها حلوة وتوة كبرت وزادت حلاوت
اسمع استاقض راهو هذو خوتها خطيرين والله يفجروا البلاد ويفجروك علي خاطر خواتهم بعدين استاقض احني عندنا موضوع وجايين نكملوه
👤: تي غر خيرك ياراجل سكرتها من اولها بلكي نعجبها ونخشوا طول
👤: اسمع فوتها ناس زي هذي فوقنا بهلبا وصعب اللعب معاهم
رنيم : تلفتت وراها ركزت في السيارة لقتها كحلة مسلفرة وميبان منها شيء
👤: شكلها ركزت فينا
👤: خفف السرعة خفف
رنيم : يابنات وكأن حد يلحق فينا
روان : واس امك منو الملزوم بقزمات زينا
ملك : تلفتت لمحت السيارة
اسمعوا خفوا رجليكم الوضع قايلا ومايطمنش
👤: ياااوووك عليا اني وخلاص هما العيون هما الحواجب هي الشبحة دخت ياراجل
👤: ضربه علي راسه اسمع ركز ركز وفكنا ياراجل
👤: اسمع انت قلت هما أربعة ديما يروحو مع بعض لكن هذم ثلاثة وينها اية
👤: خبطه علي راسه معش تنطق اسمها دير بالك
👤: ههه الي يشوفك توة مايقلش هو نفسه الي قبل سنة نسيت شن درت فيها ولا ادير في روحك العاشق الولهان توة
👤: والله نلقاها بس لما نقرأ فاتحتها ونتزوجها خلاص الكبد طابت والقلب مشتاق غر نلقاها بس
سطرب سطرب قدمهم واوقف قدامهم
ملك : هيييي 😱 وشدت هي وأخواتها في بعض
رنيم : خير امه هذا
واتجي تقربع السيارة برجلها
روان : لفت وقعدت الطق علي الروشن
ماتشبحش يابابا مااتشبحش انطمر في الحوش وخلي السواقة للتريس
ملك : شحتها هي ورنيم
ملك : خلاص تعالي رانا في الشارع فكينا الناس
رنيم : والله الا عيل كانك راجل اطلع وبين وجهك
👤: والله الا ذبت تي شن هذا كنا في وحدة طلعوا الثلاثة صاروخ
👤: بنت الكلب غر في بالي موال كنهذا وريتك الراجل
وبيبلهم وامشي
ملك : أجروا ماتعرفوش شن يديرولنا
.........................................................................
خشت بالسيارة تسطرب درستها ونزلت تجري جابت الكرسي وركبت فوقها وشحت السارينتي بقوتها سكرت الورشة ونزلت
رنا : حطت صوابعها في فمها وصفرت برو اطلع
أيهم : طلع من تحت السيارة خذي الطرف وقعد يمسح في وجه الاكحل وايديه من أثار الزيت متع السيارات
أيهم : تي شن جابك النم مش مكان بنات بكل شن خششك
وطلع فتح شوية من السرانتي وشاف الشارع
أيهم : خيرك النم يارنا كان شبحك حد وفهم غلط الزفت ديما هكي تخاطري بدون ماتحسبي شن بتقول الناس
رنا : خبطاته علي صدره هي احبيبي هي زود زود ماتخلينيش نغلط فيك حتي انت والناس طز فيهم ينحرقوا
أيهم : افففف كان يندري خوك مهند بس
رنا : جت ادف فيه من ظهره العيلة كلها تندري انت خوي ورفيق دربي من الطفولة زود عدلي السيارة وزوقلي الخرطة هذي
أيهم : في داخلها الكلمة هذي بدات نكرها كلمة خوي منحبهاش وبنقعد طول عمري كارها بمجرد مااتقولها انحس في نار داخل قلبي مش عارف شن نحس ولا شن يقولوله هذا
رنا : ضرباته علي جبهته الي واخذة عقلك تتهني زود زود مهند يستني فيا في الحوش وحاسبلي الوقت بالثانية قالي قدامك للساعة ثلاثة وثلاثين وثلاثة ثواني فيسع يرحم بييك
أيهم : خذي نفس اهدي اهدي شن الطبول الي في قلبي هذي واااك
به النم وجي وقف قدام السيارة حي علي امك وصفرر وصفق مرسيدس 2019 CLA وبيضا الجوو ربي يبارك
رنا : خبطاته علي ظهره شن رايك يامعلم
أيهم : دماار ربي يبارك امتي صار
رنا : امس خذاهالي جدي من معرض مهند وصاحبه سفار مكرشمة امشيت اني للمعرض واستلمتها قبل بياخذلي أزيرة 2014
أيهم : وانتي ماتمشيش معاك عاد كيف تبي تجري وتحرقي الدنيا وراك
رنا : من الاخير تحسها تبي ناس مدلعة
أيهم : دار ضحكة بالجنب ههه
رنا : وعقبال مناخذ بورش
أيهم : شن خليتيلنا امالا
المهم ديري بالك عليها مش نلقاك خارطيها
رنا : ضربت راسها نسيت زود زود توة ولد حرام خرطهالي الحرايمي مباش يعطيني الطريق ركبت فوق المرشابيدي وفوته
أيهم : شاف الخرطة وكانت خط اكحل من لوطة
حي حي تي خير فيتك يانم حرام عليك فسدتيها
رنا : تمشي تمشي تو البرو القدع يمكجهالنا وديرلها لقطة تمشي زود ياغالي هييي
أيهم : اااخ منك وخلاص اصلا انتي امتي تعرفيني غير وقت المصلحة
رنا : الله غالب انت أكثر واحد يعرفني زود هيااا
.........................................................................
زنقة غير عن كل الزناقي تتوسط طرابلس
حياشها محلاتها الصغيرة كوشتها البسيطة بس خبزتها فيها بنة زايدة قهوتها المميزة الي تلم شيابين وشباب وصغار جروب يتفرجوة علي الكورة وجروب يلعبو بالكارطة وجماعة يلعبوا في نرد الطاولة وجماعة يأرقلوا ويدوا عالسياسة وفي كل الأحوال صوت عراك الشيابين هو الغالب
ملك : مساءوو عمي صلوحة
صلاح صاحب الكوشة
اهلا اهلا يابناتي سلمو علي جدكم
روان : خذت تفاحة من براكة الخضرة ونتشتها وطلعت تجري
سجل في الدفتر عمي مهدي
المهدي : روااان
روان : هههههه
رنيم : اعطيني وحدة عسلا خلوودة
خالد : أعطاها ثلاثة ولفهملها تفضلي
رنيم : اعطاته حقهم تسلم وشفتهم اااووخ سخونة
خالد : هههه خلي علينا يابنتي
رنيم : ولو
ملك : ههههه شن أمور حلوة الصوف يا كريم
كريم : جايك بنسمعلك اغنية العصر نبي رايك في كلماتي
ملك : نستني فيك
وخشو لحوشهم
ملك : اندير طلة عند فيروز وجايا
روان : وزي العادة يافلة عند جمانة
رنيم : ماطعتليش
ملك : لالا
........................................................................
أيهم : مسح جبهته ونفخ بتعب
اففف
رنا : والله الا فنااان ابداااع انت مش طبيييعي وضرباته علي ظهره منور يامعلم
أيهم : ابتسم علي جنب ديري بالك مرة تانية
رنا : ركبت السيارة زي العااادة سجل في دماغك الحساب
وشرينت وطلعت تسطرب وبيبتله
أيهم : غررر افففف ياااقبضااااا هذااا غر دكتووورة
وتنفس بدهشة 😮‍💨 وابتسم وحط ايده علي قلبه شن صاير الزفت عندك خييرك شن تحسسس اهدي علاش هكي صاير فيا كل ماااانشوفك
اففففف
.........................................................................
رئام : اااااه ااااه حسبي الله ونعم الوكيل حسبي الله ونعم الوكيل
وليد : شاد السبتة ويضرب بكل غله تتحسبي فيا ياابنت الكلب ياااحمااارة يا نعن بوك وجدك وكل عيلتك لما نربيك شن درتي بالفلوس وييين درتييهم امتي امشيتي المصرف واسحبتي امتيي
نسرين : جت وجايبة معاها شكارة هه اهما اهني الفلوس شوف الكلبة شن شاريا بيهم ههه دايرة جو الأم الحنونة وشاريا حوايج وألعاب لبنتها
وجابت الولاعة وولعت النار فيهم
رئام : ناضت تجري اطفي في النار ااااه اااه لاا لا لا ااااه يااارب رحمتك يارب راني معش قادرة نتحمل يااارب
وليد : شدها من شعرها وطاح فيها ضرب لين صاخت
.........................................................................
نجوي : خشت المربوعة وفتحت الضيء والروشن
هواااا هذاااا هو هذااا اسهروا الليل وارقدووا النهار نوووض انت ويااه العصر بإذن وانتم لا صلي لا عبادة نووووضووو
أنور : اصلا فيه حاجة غريبة كان ماعيطيش عليه
نجوى : الحمد لله عالسلامة
أنور : غداي
نجوي : اليوم الغذي في حوش بوك بدل وتعالا
علي طاولة الغذي
الكل ملتم وصوت الكواشيك
روان : ااااه معش تاكل من صونيتي
ليث : شد ايديها وخذي اللحمة وطلع لسانه
أحمد : رنا شن صار في الحالة اللي في الغرفة 400
رنا : نستني في التحاليل وان شاءالله خير
فدوى : مانبيش نوصيكم اليوم دخول ولد صابرة وتوة بنمشوا نعولو
نجوى : ملك راك تنسي شاهي جدك
رنيم ديري العشي
رنيم : مش عليا اليوم علي روان
روان : افففف وفنصت فيها وبعدين شبحت لي رنا ماهو كانا الكبيرة مش بايرة ومتعلمه اتطييب والضمان راهو دورها اليوم
رنا : طلعت لسانها بايرة وافتخر
نور الدين: حط كاشيكه وضحك ههههه جديدة هذي
غيث : في علم الحيوان
وكلهم في صوووت وااحد
لاااااا
غيث : قام كتافه قبل بنقولكم معلومة
لااااا
غيث : براحتكم
ملك : جدو راك تنسي مشوارنا
نور الدين: متفكرك
ملك : بحب انت احلا جد في العالم
روان : به علاش ماترفعوناش معاكم للعرس والله الا مستحشين العراس قداش لينا عليهم
فدوى : يوم الدخول مش للصغار
رنيم : صغار شنو رانا 18 السنة راااه
نجوي : اهو جاي عرس ولد سعيدة وتو نرفعوكم
مهند : شاف الساعة
ناض وقف هي نستأذن الحمد لله
نجوي : وين
مهند : عندي مشوار
نجوى : ماتشغلنيش يا ياما
مهند : هي نتلاقو ليث بعد العصر نلقاك واتي
رنا : تلفتت لي ليث امتي سفرتك
ليث : بعد صلاة العشاء
رنا : ارفع راسنا عااد
ليث : غمزلها نحن الملوك
روان : غر راك توثق اكثر من اللازم
ليث : نبو دعاك يا ميمة
نجوي : إن شاء الله ربي يوفقك
.........................................................................
الزعيم : وين نضال
ياقوت : وين بيكون يعني في حوش بوه التاني
الماسة : ضربتها علي رجلها وفنصت فيها
هههه قصدها في حوش عمي أنور
الزعيم : تلفت لي بلقيس شن أمور الجرحة درتي زي ماقتلك
بلقيس : اكيد واطمن هما بخير وجروحهم بسيطة غدوة يطلعوا
الزعيم : وقف تصرفي نقص شيء الو
بلقيس : ولا يهمك
شمس : كمل غذااك
الزعيم : الحمد لله
هي سلاام
ياقوت : ماما عادي نعرف علاش انتي مدلعتيه هلبا هكي
شمس : عمري مادرت الفرق كلكم عندي زي بعض
ياقوت : امممم
الطاهر: هههه باهي اهو اني مدلعك
ياقوت : والله كان مش منك يابابا راني صايرلي جفاف عاطفي
شمس : هزت راسها بالنفي ربي يهدي
الماسة : ماما ماشية العرس
شمس : ايه عزمتني صابرة
الماسة : ارفعيني ماما
شمس : خلي انشوف نجوي كان بترفع البنات تو نرفعك انتي وبلقيس
ياقوت : وخيرني اني مشلولة
شمس : لا يا ماما مانرفعش مخفوقة
ياقوت : اني مخفووقة
الطاهر : اشرلها اسسس وغمزلها متع فوتي
تعرفي كيف اني طالع اني وأنور اليوم للجردينة عندنا تصحيح أوراق الامتحان ونبو هدوء وجو كلاسيكي تو نرفعك معاي انتي وزمرد
شمس : هاااه بري مع بوك ماهو انتي بنت بوووك
ياقوت : اكيد وبدت تقلب في عيونها علي الماسة
الماسة : 🤨😑
وزمرد وبلقيس يضحكوا عليهم
زمرد ؛ هههه كلنا جينا علي سن بعضنا بس ماتعركناش
بلقيس : ههه خذوها الحصة ياقوت والماسة عندهم حساسية علي بعض مس طبيعية
زمرد : لكن اكثر زوز قراب علي بعض
ياقوت : الي يوشوش
الماسة : فمه يلشلش
زمرد : لسانها يبي قص
بلقيس : قسم بالله الا حالة
.........................................................................
من أول ماطلعت من البوابة ووقفت ادور في سيارة خوها كنت مركز معاها طولها عيونها ابتسامتها ابتسمت لما ريتها لا بسة عباية طالعة طرف وزدت ابتسمت لما شوفتها غطت عيونها بالنظارات ماشيتها ثقتها في نفسها فعلا تستاهل كلمة دكتورة
مهند : وربي يشهد عليا ماني مواطي راس بوك الي رافعه بتربايته وعز الترباية مش اني الي نضيع ثقة صاحبي فيا مش اني الي نجر بنت وتكلمني بالحرام وحق الله الي رفع السمي علي الوطي وزرع حبك في قلبي ماني ماكلمك الا بالحلال وحق الي خلق العيون السماح فيك حانصبر حانصبر ونتحمل لين تكملي هالسيمستر وبعدها تكوني حلالي وتتخرجي عندي لما تكوني حلالي
الزعيم : ايوا
إستبرق : آلو اندور فيك وين انت
الزعيم : تعالي قدام البوابة
إستبرق : تمام
مهند : افففف صوتها ادبها حشمتها كله يخلي في حبك يكبر في قلبي
كل يوم وزي هالوقت لو ربي وعطاني وعشت حانجي ونحول ريااف قلبي
.........................................................................
نور الدين: كان يسوق في السيارة ومركز مع الطريق تلفت لي ملك شن تقري
ملك : البسي واسع
نور الدين: من الكاتب
ملك : مركزة في الكتاب دكتورة ابتسام القاضي
نور الدين: اهااا من العنوان الكتاب جميل
وصلنا يلا انزلي
وسكرت الكتاب ونزلت تجري
وجوها الصغاااار كلهم يجروا ملووووكة
فتحت ايديها وبدت تحضن فيهم حبااايبي
وجاها بيبي صغيرون عمره ثلاث سنين
عمر : ماما ماما ماما
ملك : ياحياتي ياماما عموري وقامته في غمرها وبدت تجري والصغار يجروا وراها
هههههه واطيحوها وجو فوقها
ملك : ااه ااه هههههه
وجت مشرفة الميتم
لمياء : شرفتنا استاذ نور الدين كيف حالك
نور الدين: بخير مشكورة
جت لمياء مدت ايدها لي ملك ووقفت
ملك : ههه كيف حالك أستاذة لمياء
لمياء : بخير الحمد لله
تأخرتي والصغار استاحشوك
ملك : كنت مضغوطة شوية
وجو بنات عمرهم 15 16 سنة لي ملك وكانو صانعين اكليل بالورد والفل ولبسوهولها
ملك : محلاه هذا انتم صنعتوه
الصغار : كلنا مع بعضنا
ملك : يهبل عجبني صحيتو وناضت تحضن فيهم
ورفعوها معاهم ل داخل الميتم
لمياء : بسببك استاذ نور الدين وبسبب الانسة ملك هالصغار بدت الابتسامة متفارقهمش ويوم ماتجشوش فيه يبدوا مشغولين ويبونا نتصلوا ونكلموكم وخصوصا الطفل عمر للأسف بدي حتي لما يبي يرقد يبيها معاه ويعيط بإسمها وهي الوحيدة مابين المشرفات والاستاذات الي تقبلها وضبح عليها ماما
نور الدين: كان يتأمل في ملك كيف تلعب فيهم وترسم معاهم وكل شوية مع مجموعة مرة بنات صبايا ومرة أطفال ومرة ولاد ومبتسم
........................................................................
نجوي : زيدي عاودي عليها خيرها انفتحت اللفة
رنيم : ماهو من غير سبراي ياأمي
فدوي : روان سيبي التلفون وتعالي لبسيلي التاكم
روان : به هي
مؤيد : يااام يااام
نجوي : في دار النوم تعالا
مؤيد : بسم الله وييين ماشيين
نجوي : اشي هذيك الخليقة العيون منفخات وحمر هذا السهر والله الاما يهلكك
مؤيد : توة غر فوتيني جعااان نبي ناكل
نجوي : صليت
مؤيد : ايه
نجوي : زي العادة جماعهم كلهم مع بعض
مؤيد : حك عيونه وين ملوكة
رنيم : طلعت مع جدي
مؤيد : به زودي حطيلي ماناكل
رنيم : مش فاضية اني
مؤيد : شعوبا زودي حطيلي انتي
مؤيد : بوعجيلة هيييي
روان : الله يبعتلك وحدة تسم بدنك اااااه اااه
رنيم : هههه مش هكي الاغنية
روان : غمزتلها وعضت شاربها نسيتها ماه
وهوووووب يجيها السبراي علي راسها
روان : ااااااااااه
مؤيد : نتكلم معااااك اني
روان : تعرفوه المستكلب صس
رنيم : لااا
روان : هذا في الولايات المتحدة قالك دارو دراسة تقول في ليلة اكتمال القمر فيه نوع فريد من البشر يتحول من إنسان الي كلب ويطلع في الليل ويبدا يعوي
ومايجي غير مؤيد ويجبدها من شعرها
مؤيد : اهووو المستكلب تو تشوفيه كيف
وجاته فدوي تجري فكتها منه
فدوي : باهي باهي اهو تو نمشي نحطلك غداك وهو مش عارفة غذي ولا عشي
روان : اااااه😭😥 راسي الحيوان صارله ارتجاج
خيره هذا خيره
مؤيد : باش تعرفي تلمحي مليح مرة تانية
فدوى : تعالا معاي وفوتها
نجوي : تلفون مني الي يشرين
رنيم : تلفون روان
روان : فتحت الخط ايوا حبي
وطلعت برة وخشت لدارها
ماسة : ااه قلبي شن الأمور
روان : زي الجيفة
ماسة : مااتقوليليش خيرها امك حرمتك وحرمتنا في جرتها من العرس
روان : شن بديري هي قالت مش للصغار
ماسة : به اسمعي هي تعالو مع عمي أنور للمنتزه اهو بنمشوا حتي احني
روان : والله الا فكرة تمام تو انجو
الماسة : ملك وين نتصل بيها ماتردش
روان : طالعة مع جدي مش عارفة وين اكيد تلفونها صامت
الماسة : به لما تروح قلها ادورني
روان : به اسمعي سكري سكري فيه رقم شادها في جرتي من اول امس ومارديتش عليه قلت اكيد غالط لكن هذا تمادي خلي نهزبه
الماسة : مانوصيكش امالا وبدات كانه ولد
روان : الرقم يقول رقم وحدة مزيتة
الماسة : ههههه والله الا جو انتي هي سلام
روان : ايوااا مادام ماااريديتش معناته مانبيش انرد
تكلم صوت غليظ صوت اصطناعي مركب
👤: معاك لاغدوي لو ماتقوليش وين آية الكلام كله يوصل لعيلتك وخصوصا خوك
روان : ههههههههاااااااااي واستاكت ضحك
👤: شاف لصاحبه 🤨
👤: شن الي يضحك
روان : هههههااااه اااه ياجنبي وواااك قدااش ليا معش ضحكت جو صوت عصابات الأتراك وتهديد هههههه
غر اسمع كيف قدرت اديره الصوت
👤: وين آية
روان : بالله عليك قولي والله خاطري ندير بيه مقلب في مؤيد كيف ركبته باه هو برنامج ولا كيف
طوووط طوط طوط
روان : قامت اكتافها سكر عليا خزي
ههههههه جو والله الا جو ولت تعاون في امها علي اللبس
ليث : بنستاحشك ياروحي
غيث: حضنه مش اكثر مني يابرو
نبوك تقيم علم ليبيا بفخر اااه
ليث : تي كيف ياراجل
غيث : خبطه علي صدره قدها وقدود
وطلع ليث طق الباب
احمد : ادخل
ليث : عمنا
احمد : نحا نظاراته اووو بطل الملاكمة في مكتبي انست ياسي
ليث : حضنه ادعيلنا
أحمد: توصل بالسلامة
اتذكر ديما واقفين معاك قلبا وقالبا واثقين فيك
ليث : منور ياغالي
وسلم على بوه أنور
أنور : أهم شيء العزم والتحدي ديما خليك فخور انك وصلت لهلمستوى وتقدرها بإذن الله
وطلع خش ل رنا
رنا: سكرت الزمالطوا أقرب جاي
ليث : ههه ادعيلنا
رنا : كيف عاد حشومي ياقدر
ليث : هههه هو والله الا الانوثا هاربة غر اهو الزمالطو داير جهده
رنا : عيب عليك هههه
رنا : توصل بالسلامة حبها
وطلع وخش حضن امه وباس ايدها
ليث : ادعيلنا ياغاليا
نجوي : رشفت خشمها ومسحت دموعها توصل بالسلامة حبيبي ان شاءالله تفوز الأول يارب
ليث : هاه هاه كحلك بيسيل يام
نجوي : هههه تحشم هذي دوة بنات
روان : اوولي اووولااا ليث قاالها الأول ولا لا
ليث : هههه ان شاءالله
وطلع سلمولي على ملوكة وجدي
فدوي : بساته علي راسه استودعتك الله
مهند : يلا يا بطل
في المطار .....
الزعيم : شد ليث من راسه دير بالك وركز واصبر استني الفرصة المناسبة وهاجم
بقيمة حاجب تقدرها يابرو
مؤيد : غمض عيونك وتفكرنا لانه احني اهني واشر علي قلبه
مهند: يلا ياغالي ينادوا علي اسم رحلتك
نضال : ربي معاك ربي يقويك علي من يعاديك نحن معك نحن معك
وناض يعيط هو ومؤيد انتصر الحق وزهق الباطل الله اكبر الله اكبر
ليث : يمشي ويضحك عليهم
مهند : اييي هييي انت وياه ماهواش ماشي بيحرر فلسطين
نضال ؛ والله الا صح خيرنا احني
مؤيد : وفي الاخير بيربح وبيروح بي 1000 دولار والله مانا رايين منهم قرش
الزعيم ؛ ولع دخانه ونفخه مهند
مهند : ايوا
الزعيم : ترا قول شن صار فيهم هذوكة الزوز الي جابهم خوهم الكبير وسلمهم للمعسكر
مهند : اييه فكرتني شن صار فيهم حقاا
الزعيم : حلقناهم قرعة
وبدوا يسيقوا في حمامات ( أكرمكم الله )المعسكرات
وبدوا يطيبوا للمحبسة ووقت تطلع الماكلة مش اوي يكلو في شلابيخ ولما يخالفو في الأوامر يحطوا فيهم بدال لوحة التدريب
مهند : بامبلا قصدك
الزعيم : ايواااه
وتلفتو لقو غبرت مؤيد ونضال بس
.........................................................................
رنيم : خشت للدار وسكرتها
منو معاي
👤: معاك مهلة لاغدوة لو ماتقوليليش وين آية عيلتك وزنقتكم وجيرانكم كلهم حايعرفوا وينفضح كل شيء
رنيم : طززز فيييك وفي الي معاااك واعلي مافي خيلك اركبه انت لو متسكرش لما نقول لخوي ونعطيك علم خوي يخدم في المعسكر لو انقوله انه في رقم يهدد فيا وربي العباد لما يشنقك ويعلقك في باب المدينة
طوط طوط طوط
رنيم : وسخ اتفففووو (حشاكم )
ولت بحداهم
رنا : لالا الحمد لله حرارة مافيش وصحة ممتازة وحطت سماعتها وادواتها في علبة الإسعاف شيء طبيعي يصير معاه هكي لانه قاعد يطلع في سنون
حبيبي اغغغغغ
فيروز : الحمد لله والله قولتلهم مافي حاجة تخوف لكن هما كبروا الموضوع
👤: شن هذا الزفت ولوح التلفون علي طووول ايده اني الي خفت مش هما ممشاش معهم لا تهديد ولا مراقبة
حط رجليه فوق المكتب ولع الدخان
👤: هذوا بنات نور الدين رباهم عالثقة بالنفس والذكاء زيه بالضبط حكمة وصبر وركازة لكن ساهلة مزال ورقة رابحة
👤: تي اما ورقة رابحة
👤: نزل رجليه ومدله صورة
مازال دلوعة العيلة ملك انسانة تخاف من نسمة الهواء عندها فوبيا ماتحبش الازدحام والخلطة مع الناس
👤: قصدك هيدوقة ومسكسكا
👤: ايووواااه
👤: خذي التلفون واتصل
.........................................................................
نور الدين: رقدتيه
ملك : ايه ياروحي عليه ماتوقعتاش يتعلق بيا لدرجة يبيني انرقده
نور الدين: لأنك علمتيه كلمة ماما وحنيتي عليه وعوضتيه علي فقدان أمه واعطيتيه من حنان الأم
يابنتي ياملوكة الام مش الي تجيب بس الأم الي تربي وتعلم وتحن هو أمه الحقانية تخلت عليه وحطاته قدام الجامع بدون ماتشفق عليه ولا تفكر فيه نخنق صوته
ملك : شدت إيد نور الدين وباستها ماتعرفش شن كان ظروفها مافيش أم تجيب ولدها واتشوفه وتحضنه وتتحمل آلم الولادة وبعدين تسلم في ولدها ربي يعلم شن واجهها وشن الي خلاها تحطه اهني لوكانت حية ان شاء الله ربي يفرج عليها ويدلها علي ولدها
نور الدين: مسح دمعته الي تخطت حدود جفونه و ماقدرش يسيطر عليها اني نستني فيك في السيارة
ملك ؛ حاضر
وسلمت على البنات وودعت الصغار وطلعت
ترن ..... ترن ....... ترن
ملك : آلو
.
.
.
.
..............يتبع
للكاتبة نور القمر 🖊