المنطق والقدر

الجزء الأول من (الحلقة الاولي)

قراءة ممتعة 🕊

أول ليلة من ليالي ديسمبر الباردة 🌬
بعد نصف الليل
كانت المطر تقطر تقطير وكان هدوء الليل هو الي مسيطر علي المكان والشوارع مظلمة
بس في غرفة في هالشارع ضاوية ومضوية المكان
كان الحاج نور الدين واقف وبكل صحته وهيبته بين يدين أرحم الراحمين السميع البصير رب العالمين يصلي في قيام الليل ومافيش صوت غير تردد صوته العذب وتجويده الي كان اي حد يسمع تلاوته يتأثر ويبكي
كان يقيم في ليله بطوال السور ويعطل في سجوده ويبكي وطالب من ربي العفو والغفران
....................................................................................وبين هالهدوء والطمأنينة والسكينة وصدي صوت القرءان
وقفت المطر وقعد أثرها مما زاد الشوارع هدوء
حتي تجي سيارة وتجري بأعلي سرعتها وصوت الأغاني العالي و تسطرب وتنطر في بركات المية
فيها شابين وواضح عليهم إنهم واخذين شيء من ضحكهم بأعلي صوت
مؤيد: ههههههههه ااااه ااااه ياربي ووووه عليا نحس في جنابي من الضحك خلاص ياراجل هاااههههههه
نضال : يضحك بصوت مرخي وفي يده الدخان ويده الثانية كان شاد الدومان ويلف فيه ويسطرب
ههههه اااه ياواعر انت
لاكن تبي الرسمي تي خلعتني ياراجل لما رهنت السيارة والايفون
مؤيد : تبي الصح كنت بنراهنك انت لاكن سخفتني مانقدرش انت بيست فرند تبعي لااستطيع خسارتك
نضال : ها ها ها سامطة
لاكن وجعني القطوس طحت فيه قصف وبصارة ومعنا برانية ياراجل
مؤيد : خليه هكي لين يستادب ويدير سخصية
نضال : اسمها شخصية
مؤيد : كل زي بعضو
نضال : هي هي سمعنا حاجة علي كيف كيوفك
مؤيد : شن لقتني مشترك في دافويس كدس امالا
نضال : غير هي غير هي
مؤيد : به علي خاطرك حبي هي
احم احم ااااحم
نضال : تي باهي وانت قريب ينطلسلك عرق
مؤيد : شد دموعك راك تبكي
ااا ليلي ليلي ليلي أنا ودعته 😔
وقلبي في ليلي وعقلي مش ناسيه 😩
ااه ليلي ليلي ليش خدعته كاسرتيلي قلبي كان يموت عليك 💔
نضال : ااه ليلي ليلي أنا ودعته
مؤيد : وقلبي في ليلي وعقلي مش ناسيه 😔
....................................................................................ومكان تاني بردوا حد نايض بس مكانش جوه حلو
ملك : تلود في وسط دارها ببدلة الصلاة ومتوتره ومرة مرة تفتح في ستار الروشن الي كان يفتح علي الزنقة
ملك : هذا وينه وينه ياربي
عطل المرة هذي ان شاءالله يروح قبل مهند ان شاءالله
يارب يارب تعدي هالليلة علي خير
قربت من الستار وفتحاته وشافت سيارة درست سكرت الستار فتحت باب الدار وتمشي بالشوية لين طلعت من حوشهم لي جنانهم الكبير نزلت الدرجات تجري وفتحت باب الرئيسي الي يطل عالشارع لقت نضال مساند مؤيد علي كتفه ومؤيد مستمر يغني لاكن اطلع عالسيطرة وبدي يكشخ ويتحلف ويعلي في صوته والله لما نقتله خوها والله الا مانشرب من دمه
ملك : خذت مؤيد وسندته عليها
مؤيد ميدو اهدي اس احني في الحوش
نضال : شبح لي ملك ثقل في الشرب هالمرة
ملك : وهي ماشية بدون ماتتلفت وشادة ايد مؤيد علي كتفها هه هالمرة ماه كل ليلة انتم علي نفس الحال ربي يهديكم ربي يهديكم
نضال : انخششه بلكي رزين
ملك : لاخلاص اهو واقف شكرا وتصبح علي خير
ركب نضال في سيارته وطلع
ملك : سكرت الباب وتلفتت لي مؤيد
هي ميدو شد حيلك يا وخيي
مؤيد : جي بيمشي طاح
ملك : مدت ايدها وقاماته
اه اه ميدو راك رزين ساعدني شوية
وخشو لي حوشهم وهما راكبين للدروج
مؤيد : اااه ليلي ليلي أنا ودعته
وقلبي في ليلي وعقلي مش ناسيه ملوكة
ملك : نعم
مؤيد : علاش هكي صار والله كنا نحبو بعض كانت تحبني هههههه اااه وخلاص تعرفي كنا متفاهمين اول بنوتة اتجينا انسموها ملك زيك
ملك : 😔 قدر ونصيب ياميدو هكي ربي كاتب وانت ارضي بحكمة ربي
مؤيد : ضحك ههههه اااه زوجوها خذوها مني خذوا قلبي معاها يا ملك قتلوني
ملك : اس اس ليل بابا وماما راقدين اني حمدت ربي روحت قبل مهند
ودخلاته لي داره وحطاته عالسرير نحتله سبيدروه وجاكيت الجلد
وغطاته
ملك : اااه اااه دهشت 😮‍💨ضرباته علي كتفه اما انت امولي رزين
وشبحت لي حالته مرة يرقد مرة ينوض مرة يدوي ومرة يغني
طلعت وسكرت الضيء والباب
ملك : خشت لي دارها وقعمزت وفتحت مصحفها
وبدت تقرا
....................................................................................
طق... طق طق ..🚪
انفتح الباب وخش وضرب التحية وهو يرعش
الجندي : اااا أفندي تمت العملية والضابط مهند رجع ومعاه المطلوبين
طوله كتافه العراض عضلاته ايده الموشمة من ظهر صبعه ملابسه السوداء فالينت الرقبة الصوف بوته العالي الأسود بحت صوته الغليظ كله كان ليه كاريزما هيبة تعكريشة حواجبه نضرة عيونه الحادة في الظلام الدامس
كان عاطي الباب بظهره وقف عالحيط الزجاج ويتفرج عالشارع ويدخن
ابتسم مش ابتسامة هوليود لالا ابتسامة خبث لانه متأكد من نجاح العملية
طق الباب 🚪وانفتح
مهند : ضرب التحية احترامي ياافندي الزعيم !
وقال حلو نسمع فيك اختصر
أشر بيإده بدون ما يتلفت وطلع الجندي
مهند : قعمز علي الكنبة وحط القناصة متاعه ونحا التام والطاقية العسكرية
ااه 😮‍💨 توة وراس أمك باعتني علي خاطر كمشة فيران
نفخ دخانه وقال تجربة ليك
مهند : واللهي حق حق ليا 10 سنين نقص ونصيب الهدف من بعد 200 كيلو متر
مهند : بالرسمي شن في فبالك
الزعيم : اتلفت وقعمز علي كرسيه وراه المكتب وطفا الدخان
الضابط باسم خاين
مهند : كان فارد كتافه ومتكي .... ناض قاعمز لالا
كيف صار ومن قالك بلكي كذب واشبح لعيون الزعيم الأهم من أمتي
الزعيم : حط رجل علي رجل من أول ماجي
مهند : معقولة ليه خمسة شهور
غر استني استني الي قتلي صوب عليه هو باسم
الزعيم : شكرا هذا وين استوعبت هذا علاش بعتك مش علي خاطر الفيران
مهند : خسارة كان جندي كويس والله الله يرحمه
حمار لاكن تو مابين المافيات كلها ملقاش الا هذوا يخدم معاهم
استغفر الله ندوي عالراجل وهو ميت ربي يرحمه
الزعيم : حتي انت حمار تو طول الوقت وهو معاك ما ورقتلاش
مهند : تي عيل الله يرحمه دوته هلبا الله يرحمه
الزعيم : باهي سكر فمك
توة مشكلتي مؤيد ونضال صدقني جايهم يوم وربي الكون لما نحبسهم
مهند : جيبهم الزوز ياخذوا كفين يمين يسار تو يولو تريس
الفجر أذن 🕌
مهند : هي اني سلام بنصلي في الجامع
طلع وقبل مايسكر اااه غدوة في اجتماع مع المعارض التانية
الزعيم : يصير خير انظم اموري وانكلمك
مهند : تم طيري هي تصبح
طلع مهند وركب في سيارته البي إم الأخيرة وسطرب
الزعيم : فتح الابتوب وغطس في أوراقه
....................................................................................
فاق قعمز عالسرير امسح وجهه بيديه
الطاهر : سبحان الله والحمد لله واستغفر الله ولا اله إلا الله وحده لاشريك له له الملك وله الحمد وهو على كل شيء قدير لاحول ولاقوة الا بالله العلي العظيم ربي اغفرلي
وتلفت شمس شمس شمس
شمس : نعم
الطاهر : فيقي الفجر أذن وفيقي البنات
شمس : هاييي
ناض الطاهر فتح ضيء الدار ودخل للحمام (حاشة القاريء )
دار عليه المي وطلع صل الفجر
الطاهر : السلام عليكم ورحمة الله السلام عليكم ورحمة الله
شمس شمس فيقي
ناضت شمس : هي ييي نحت البطانية استغفر الله استغفر الله
شافت من الروشن مشاء الله شكله امس صبت مطر سكرت الستار ودخلت للحمام (حاشة القاريء)
الطاهر : ايه الله يبارك
وناض وطبق الصلاية ولبس الكاشبية وطلع من الدار
وبدي يطق علي الديار
بابا بلقيس بابا بلقيس
ناضت وفتحت السهارة
بلقيس : نعم بابا
الطاهر : الفجر أذن يابنتي فيقي صلي حاضر
وقدم وطق باب دار تانية زمرد بابا زمرد استبرق استبرق طق طق زمرد استبرق
ناضت استبرق نعم بابا
الطاهر : نوضي صلي حاضر يابنتي وفيقي زمرد
استبرق : حاضر بابا
وتلفت لي مقابل الدار وطق الباب 🚪
الطاهر : ياقوت ياقوت بابا ياقوت
ياقوت : ايوة بابا
الفجر أذن فيقي ونوضي الماسة
الماسة : اني نضت بابا صباح الخير
الطاهر : صباح النور
وانفتح ضيء الحوش كله وناضو الأخوات
وكل مرة حوش في الشارع ينفتح ضيه
....................................................................................
طلع الحاج نور الدين : وكان لابس جرده وشاد زاكيته وسكر باب حوشه وجاه ولده أنور صباح الخير يا بوي وباس علي إده وراسه
الحاج نور الدين: صباح النور هي هي معش وقت قريب تقيم الصلاة
وانفتح باب تاني وطلع أحمد وجاهم
صباح الخير بوي صباح الخير أنور
الحاج نور الدين أنور : صباح النور
وطلعو مع بعض الاب وولاده الزوز واحد يمينه واحد يساره وخشو للجامع الي كان في نهاية زنقة شارعهم
....................................................................................طلع الصبح واشرقت الشمس ☀️
وفاقت العصافير وبدت تزقزق 🐦🐦🕊
وبدت الدوشة وصوت السيارات وزحمة الناس علي الكوشة
وزنقة بين زناقي طرابلس العريقة ريحة الخبزة السخونة والقهوة العربية والبريوش الزمني السخون والسفنز والفطيرة والموالح الشعبية كانت بداية الزنقة قهوة كبيرة قعدة من الطراز القديم كانت فيها زحمة مش طبيعية بسبب قهوتها العربية وسفنزها السخون الي بدحي وفطيرتها الزمنية وشاهيها الأحمر بالكشكوشة كان ضحك و دوشة الشيابين غالب علي المكان الي يلعب بالكارطة والي يلعب في الطاولة
كانت زنقة عريقة قديمة بيبانها تفتح علي بعض حياشها صغيرة وكبيرة وفيلات وحياش عربية مش مصقفة رغم اختلاف الطبقات فيها الا ناسها قاعدين طايبين قلوبهم علي بعض ويودوا في بعض ويحسبوا في بعض نهاية هالزنقة حوش كبييير كبير الحوش أكبر قاضي في ليبيا وكان حتي كبير هالمنطقة الكل دايرله قدر ويشاورو فيه ويخذوا برأيه في كل شيء
وقف الحاج نور الدين بجرده الي كان تحته زبونه الراقي المصنوع يدوي الأسود والمعرقة البيضاء وقف قدام حوشه وحط ايديه علي الزكية متاعه وبدي يتفرج على رزقه ال دفع فترة شبابه ثمن هالارض الكبيرة كانت حوازة حوالي عشرة هكتار كان حوشه في الوسط وعلي يمينه فيلات ولاده الزوز أنور وأحمد وفي الوسط كانت مزلزة بالسيراميك وفي وسطهم نفورة وعلي اليمين واليسار معشبة وكان في جهة اليسار داير لاحفاده كل واحد حوش العمر وباقي الجنان كان حوض سباحة كانت الحياش هي الواجهة ومن خلفهم حوازة كبيرة فيها إسطبل للخيول وميدان خيل وكانت في سقالة فيها بقر ودجاج وسعي وجنبهم كانت بركة ابل وكان فيه خضرة شن يسمي فمك وشجر فاكهة شن يخطر عليك وكان في عمال يهتموا بي هذا كله تكلم في داخله هذا كله درته بإيدي بنيت هذا كله بعرق جبيني دفعت قرايتي وشبابي وكل حياتي علي شان أولادي مايتعبوش التعب الي تعبته مايشوفوش ذل هالدنيا هما وولادهم واخر شيء انديره انه انجوز هالاحفاد وانحط نقطة النهاية
قاطع تفكيره مهند صباح الخير ياجدي وقدم بأس راسه
الحاج نور الدين: ابتسم صباح النور امتي روحت
مهند : صليت الفجر حاضر وامشيت رقدت ساعتين في الاستراحة
الحاج نور الدين: كيف حال الزعيم
مهند : مية مية
الحاج نور الدين: كأنكم مسكتين علي المعرض
مهند :لالا والله ماشية أموره الي يفضي يمشي اهو طالع عندنا اجتماع
الحاج نور الدين: الازيرة 2014 قداش تسوي
مهند : خمسين ونص
الحاج نور الدين: جيبلي وحدة
مهند : ضحك كيف صار بتتخل علي الكيا
الحاج نور الدين : لا بنغير لي رنا سيارتها
مهند : ااا ياحويج خاطرك ادلعها من يومك تعز البنات ومدلعهم
الحاج نور الدين: ضحك وحط ايده علي فمه كح وكمل ضحكته علاش لا هضو وردات جناني
مهند : ااه صار وردات جنانك خلي نمشي خير مانطلع زليز جنانك
الحاج نور الدين: من يومك مسطردي
ركب مهند سيارته بيب للعامل يفتحله الباب وطلع
الحاج نور الدين: ضبح بأعلي صوت موسي موسي
السواق موسي : أنعم ياحاج
الحاج نور الدين: هي خلي نتوكلو في قضية اليوم
موسي : هي ياحاج
....................................................................................في حوش أنور
نجوي : وهي توتي في الفطور وتحط عالطاولة
واضبح ليث ليث غيث غيث ياليث نوضو معش وقت علي المدرسة
طق الباب وانفتح بالمفتاح وخشت صبية طويلة بيضة لابسة عباية خليجية زهرية وشاح وسبيدروا ابيض وشنطة بيضة كانت أنيقة وجميلة
رنا : صباحو امي
وجت باستها
نجوي : صباحك ورد حبيبتي امشت امك للدكتور
رنا : ايه كيف طلعت هي وبابا
نجوي : إن شاء الله خير اركبي اركبي نوضي توأم البلي هما والسافل مؤيد
رنا : خذت مالقي المية ولا يهمك دقايق بس وركبت للدور الثاني
تلاقت ملك لابسة بدلة الثانوي وشادة الكتاب وتقرا وشنطتها دايرتها كتف واحد
ملك : صباحو
رنا : صباح الخير فلتي منها وين البايرات
ملك : رنيم الدوش وروان تبدل نزلت صباح الورد يا أحلي ام وباستها في خدها
نجوي : صباح الخير حبيبتي
وقعمزت ملك تفطر بابا طلع
نجوي : من أمتك حتي فطور مافطرش قال داير اجتماع في الكلية
ملك : شافت لأمها ماما السحلب بالحليب
نجوي : لالا
خذت ملك الطاسة وشربت وحطت الطاسة
ملك : اااع ماااااما علاش بالحليب
نجوي : اشربي بلا تزعبين نتايات
وسمعو صوت عياط
لاااااا ياكلبة ياحمارة
نزلت رنا حطت مالقي المية علي الطاولة واقعمزت
رنا : شوية وتلاقيهم واتيين
نزلت روان وبعدها رنيم : صباح الخير
نجوي ملك : صباح النور
وقعمزوا عالطاولة يفطروا
رنا : خفوا راهي الساعة 7:30
ملك روان رنيم : توكلي تو نمشوا علي رجلينا اهي المدرسة
نزلو التوأم : ليث وغيث لابسين لبست الثانوية سروال اسود وسوريا بيضة ومتكمين وقارنين حواجبهم
نجوي : رفعت حاجبها الناس تقول صباح الخير السلام عليكم ادعيلنا يام يبوسوا ايد امهم وياخذو رضاها
بأه تعالو افطروا
ليث وغيث : افطروا انتم وطلعو وقربعو الباب
رنا : شربت قهوتها بالواقفة هي سلامات معش وقت عليا وطلعت ولعت سيارتها كيا سيراتو وطلعت مشت للطبي وتستلم دوامها كادكتورة نساء ولادة
ملك : هي مناويت معش وقت
وناضو طلعو
نجوي وهي تسقد فيهم في الباب ديروا بالكم ماما من الطريق وخفو رجلكم
البنات : حاضر
نجوي : جت بتسكر الباب جي مؤيد وهو لابس ومتكم ومجهز روحه جينز اسود وفالينيا صوف بيج وجاكيت وشال قهوي وبوت جلد قهوي وهو ناقر حواجبه صباح الخير
نجوي : بالشوية خليني نستوعب مؤيد نايض بكري ولابس ومتكم وطالع بكرييي وقال تقلد في صوته الغليظ صباح الخير
مؤيد : بنتك الكلبة اني مشيلها في الطبي ولما انديرللها العار تو اتشوف
نجوي : دارت عيونها نص عين اممم باخ من اغلي وارقي عطر عندك
قول انك ماشي تعاكس الممرضات ولا بنات الجامعة لاش اللف والدوران وداير فيها معصب ومزاجك مقلوب فعلا ممثل شاطر
خش افطر شوي تاني ارفعني لحوش جدك خالك عصومي مريض
مؤيد : تي لاعصومي لاوليد فوتيني طالع ماشي بنجدد قيد الجامعة عاطيني إنذار
نجوي : شدت وذنه بترفعني يعني حاترفعني
مؤيد : اي اي اخ اخ يام توة مش وقتها غريان بكل بعيدة ومن مهند ولا هذاك ولدك الغالي المدلل واني ماتعرفينيش الا في ارفع وجيب واشري واخطم ولااا
نجوي : وهي شداته من وذنه تعالي معاي توة وريني أختك ال بديرلها العار ترا ياسافل ياواطي وشبحتله شن تاني
مؤيد : كلمتك الشهيرة المميزة مزال
نجوي : ياسفتول خش قدامي بلا جو المرا الحرجانة
مؤيد : اااه اااه اخ باهي باهي خلاص تو نرفعك حتي البنغازي غر اطلقي وذني 😬

🖊للكاتبة نور القمر
يتبع ......