يوم الاثنين
مر اسبوع على تواجد امه والي مافرق معه لانه ينام للظهر وبعدين يروح للمستشفى وبعدين يرجع ويجلس بغرفته ، فما صدق انه خلص كورس علاجه ، خلاص مل من
غرفته وهو متعود مايجيها الا وقت النوم والحمدلله اليوم اول يوم له دوام بعد غياب اسبوع عن الجامعه والكافيه، ولان المحاضره تبدا ثمان مارجع ينام بعد الفجر راح يستعد
للجامعه فنزل لما خلص وكان وقت دوام المدارس فلما نزل لقى امه تمشط شعر منى الي عمرها 6 سنين وبنفس الوقت تذاكر لمنصور ابو 12سنه ، ولما لف لقى تماضر ام
16 سنه تفطر وادم ابو السنتين ماله اثر والاغلب انه نايم ، فصد عنهم وراح يدور جده الي لقاه بالمجلس يفطر فسلم عليه وطلع ، وهو بسيكله الي اشتاق له بحكم الي كان
يوديه للمستشفى ابو سفيان الله يجزاه خير ، سمع صوت بوري قريب منه فلف بفجعه ولقاه سيف ولد ابو سفيان الي معاه بالجامعه اخر سنه فراح له وسلم فقال سيف :
اورانوس بودي الهنوف للمدرسه وبعدين بروح للجامعه تجي ؟
اورانوس بحرج : لا الله يساعدكم اخاف تتأخرون
سيف وهو يأشر بيده : اقول اركب بس انا بعد الي اشاورك اركب بس
فابتسم اورانوس ورجع سيكله وشاف ان الهنوف نزلت وركبت ورا فركب وهو يحمد الله انه ارسله سيف ، كان الصمت محتل المكان الي نزلت الهنوف وراحت بعد
ماسكرت السياره بقوه هزت السياره
سيف بصراخ : وجع يوجعك مايلقوله علاج ياكلبه
اورانوس : استغفر ربك تراها دعوه كايده
سيف : ماشفت تصرفها
اورانوس : الا شفت بس هي توها صغيره يعني انا ما اتدخل بينكم بس يعني هاوشها عاتبها بس لاتدعي عليها يمكن وحده من دعاويك لو يستجيبها ربي تندم طول عمرك
سيف بعد ماهدا : استغر الله العظيم انا ماقصدت بس هي لها مده وهي كذا عجزنا نفهمها يعني تخيل معصبه علينا كلنا ليش علشان ماوافقنا انها تغير غرفتها الي مامضى
عليها ثلاث شهور والله جديده وغاليه يعني هذا مو اسراف حنا الحمدلله نقدر نجيب لها بس هذا مو منطق
اورانوس : الله يعينكم بس هي تراها فتره وتبي تعدي ماتتذكر احمد وش سواه بجدي من عصيان وكان مايمر اسبوع الا مستدعينه المدرسه لانه متهاوش مع احد حتى تراها
وصلت للشرطه بس ربي ستر والحين شفه عقل وصار ظل لجدي ومايقوم عزايم جدي الا هو فهي فتره وتبي تعقل لاتخاف
سيف يستغراب : ماشاء الله عليك يا اورانوس هالكلام يطلع منك وانت بهالعمر
اورانوس بنظره جانبيه : لو سمحت تراي كبير مابيني وبينك الا سنتين مسوي انك اكبر من بخمس سنين
