سعد
اشوف ابوي له يومين بس يفكر ووجهه متكدر والله يستر ابوي مايكون كذا الا ومصيبه جايه بالطريق وفعلا الي توقعته صار والمصيبه ان اورانوس رجع يعيش معنا حنا
ماصدقنا ان المشاكل هدت وعلاقه ابوي بامي تحسنت بس الي مستغربه هو اورانوس ماكان كذا وجهه مهموم جسمه هزيل وحتى لو غطاه بالهودي الي لابسه بهالحر ،
ورغم التعليقات الي جته ماتكلم باي كلمه وكانه اصلا مو معنا صراحتا حزنن شكله مو هذا اخوي الي اعرفه كانت الشياطين تهج من البيت لان هو يتولى مهمتهم ، واكثر
شي المني عليه لما انضرب قدام البزران الي قعدوا يضحكون عليه وجدي يزيد من غضب ابوي بكلامه وهو ماسوا اي رده فعل وكانه متعود على الضرب وبهدوء قام ورقى
لغرفته لما فكيته من ابوي الي بس قعد يسبه ، فلتفت باتطمن على همس الا القاها تضحك على اورانوس وتناظره وكأن كان ضربه اهم انجازاتها بس سويت نفسي ماشفتها
لانها علطول اخفت الضحكه فمضى اليوم بهدوء ولما جاء من بكرا ماطلع اورانوس من غرفته ابدا حتى لما سألت جنات الخدامه الي ربته قالت انه ماطلع ولا اكل شي
فقررت اتركه على راحته وانا رايح لامي علشان اعلمها اني بطلع ان كان تبي شي من برا الا اسمعهم هي وهمس تمدح همس على تمثيلها وانها تبي تشتري لها الايباد الي
تبيه انا هنا عصبت وعرفت ان امي تبي تدمر اورانوس بهمس فطلعت من قسمهم ورحت لغرفتي والحمدلله ان جواهر مو موجوده فيها علشان اخذ راحتي فاخذت جوالي
وتصلت على عمي فيصل الي رد علي بعد اربع مكالمات وقال بنزعاج : خير احرقت جوالي وش تبي
سعد : السلام عليكم وش اخبارك عمي عساك بخير
فيصل : وعليكم السلام اخلص وش تبي قاطع علي نومي
سعد : ابيك بشي مهم يبي يطر النوم من عيونك اسمعن زين
فيصل بقلق : اللهم اجعله خير قل وشو
سعد : عمي انا ماكنت بفضح بابوي بس الوضع خلاص لازم اقوله ، عمي ترا اورانوس كان عند جده عبد الله من سبع سنوات وقبل ثلاث ايام جاء لمنا وترا الي كان يكلمك
مو اورانوس تراه كان راكان ولد عمي محمد وترا الفلوس الي معطيهن ابوي علشان يتكفل باورانوس كان يعطيهن جد اورانوس مقابل انه يتكفل فيه وتراي ماتكلمن الا بسبت
ان الولد قبل كان يدافع عن نفسه وكنت اقول ينتقم لنفسه بس الحين الوضع تغير فلحق ولدك لان امي ناويتن في النيه
فيصل بعد سكوت : حسبي الله اسبوع وانا عندكم ولا تعلم احد تسمع وانتبه لاورانوس
ثم سكر السماعه بوجهي وانا مصدوم توقعت يبي يقلب الدنيا فوق راسي بس شكله ناوي على ابوي استغفر الله عقوق بس ابوي وامي يستاهلون الى متى وحنا ظالمين الولد
فنزلت الجوال وثم طلعت للمشوار الي ابيه ،
المهم مر الاسبوع علي ببطى شديد واورانوس عزل نفسه عنا وصار يطلع من الصبح ولا يرجع الا على الساعه 12 بليل وكان عادي محد قاله شي الين فصل عليه جدي ان
ليش يطلع كل هالوقت اكيد انه يسوي خراب فتسلطوا عليه الين اعترف انه يشتغل بكافيه وهنا صدق تسلطوا يقولون انه فشلنا حنا الي مغنينا الله ولدنا يشتغل بكافيه فسكتهم
اورانوس بقوله يبون يترك الشغل يعطونه كل شهر ثلاث الاف قيمه راتبه فعيا جدي يقول ماتحتاج كل هالقيمه الف يكفيك فعيا اورانوس الين بعد يومين واقف جدي ان يسمح
لابوي يعطيه الي يبي وفعلا ترك اورانوس الشغل بس ماترك غرفته رجع يعزل نفسه من جديد بس يلا هانت بقى يوم ويجي عمي فيصل تصبر وانا اخوك
سلام كيفكم اليوم البارت برعايه سعد ، وش رايكم بتصرفه وانه استنجد بعمه وعطوني رايكم بالبارت ووش تتوقعون الاحداث القادم وان كان في اخطاء املائيه علموني وبس احبكم
