وصلنا للمكان اللي تقصده رنا وكان فود ترك بسيط لمجموعة شباب وكل اللي عندهم برجرات وفرايز وهالسوالف ف خليتها تطلب لي مثل ما هي متعوده وتمينا ننتظر!
بعدها واحنا ف الانتظار الا تتحرك رنا وتفصخ اللابكوت عشان يبين توب يادوب يغطي صبعي وبنطلون اسود .. حاولت ابعد عيوني بس ماقدرت خصوصا عن جسمها المرسوم بالملي والخصر اللي حسيت من كثر ماهو منحوت يعور عيوني من حدته !!
لحد ما قالت : مش خلاص ؟
سلامه تنخرش : ها ؟
رنا : من الخز يعني لو خلصتي خبريني برد اللابكوت
سلامه تبتسم : شدعوه بس خرشتيني فجأه تحركتي ف لفيت اشوف - ترقعها-
رنا : يا سلامه يا سلامه قلتلك كل شيء عادي عندي الا الكذب
سلامه : ف شو كذبت؟
رنا : فموضوع انك انخرشتي! قولي كنت اشوف عادي ترا
سلامه : انا اقول الثقه الزايده شينه ترا
رنا تضحك : ع الاقل انا واضحه فيها بشينها قبل زينها مب نفس بعض الناس اخز وانكر فعلتي
سلامه : تصعيد مواضيع عندك ما شفت مثله من قبل
رنا تضحك : شدعوه عاد امزح معاك ولا انتي حسوسي
سلامه : حسوسي بعد الله يعين
قطع نقاشنا العامل وهو جايب الاكل واعطتني رنا وجبتي وبدت تاكل وفنص اكلها قالت : ترا انا مب شيخه ما بجلس اقولك كلي ويلا وشوي لقمتين ثلاث ! تبين كلي ماتبين خليه
سلامه : توه تقوليلي لازم تتعشين ومدري شو!
رنا : غيرت رأيي لين تكونين قد كلامك وتقولين اللي تسوينه ماترقعين
سلامه : اوهوه بعدنا على نفس السيره
رنا تضحك : لا تفضلي كلي لو سمحتي خلينا نحرك
سلامه تاكل : كلنا كلنا
في هالوقت رنا كانت تطالعني وكأنها تتأكد اني اكلت مع انها قالت مايهمها لو كليت ولالا بس بديت افهم ان هذا اسلوب علاجي يمكن؟ انها ما تجبرني ؟ او تجبرني بطريقه لينه؟ يمكن
تحركنا بعدها ع طول وكنت اظن انه بنروح البيت لكن شوي والاقينا وقفنا قدام البحر والتفتت علي رنا وهي تقول : بنزل امشي شوي تبين ولا اخلي السياره شغاله
سلامه : لا بنزل معك عادي
ونزلت امشي معها ع الشاطيء اللي كان هادي ومافيه يمكن الا ٥ اشخاص واحنا وكل واحد فزاويه ف طلعت زقارتها وبدت تدخن بدون سابق انذار لكن هالمره ماقدرت اسكت وسألتها : ياخي انتي كيف تعالجين المتعاطين وانتي تدخنين؟
رنا : شو العلاقه؟
سلامه : هذا ترا ادمان بعد الا انه اقل تكه وحده عن اللي انا فيه
رنا : مبدئيا انا مب ملاك منزل على الارض ولا قدوة نفس الصوره النمطيه اللي فبالك ولا فيه اي دكتور قدوه ترا دكتور التغذيه وزنه زايد ودكتور العيون يلبس نظاره ! الفكره كلها تنفهم لما تستوعبين انك انتي تتعالجين لنفسك مو لانه الدكتور قدوه ولا احسن خلق الله ولا عشان حد ثاني
سلامه : يعني!
رنا : يعني الواحد حر نفسه ويوم جيتيني جيتي اساعدك م جيتي لاني انا المنزهه عن الخطأ ف شخصيتي وحياتي مالها دخل بحياتك وعلاجك
سلامه : ترا ما اقصد بس انا مريت بكثير دكاتره م شفت احد مثلك يعني
رنا : لانهم ببساطه يورونك جانب ملائكي ظنهم انه بهالطريقه يسحبونك للطريق الصح لكن الواقع العكس يذكرك بنقصك وعجزك قدام هالمثاليه وانا مب هذي قناعتي
سلامه : شو قناعتك؟
رنا : اللي يبا يتعالج ف لازم يسويها عشانه ويخطي عشان نفسه ما يترك الموضوع للدكتور او الجهه اللي تعالجه ويجلس يركز ع اشياء م تفيده والمتعاطي اساسا محتاج احد يتفهم نقصه ومشكلته ما يتباهى بكماله قدامه
سلامه : والله مدري
رنا : كيفك مع تنفيذ الاوامر؟ لو قلت شيء بتسوينه؟
سلامه : هيه بسويه
رنا : خلاص لاتهتمين بأي شيء ثاني
سلامه : ترا انا ما اقصد اعيب عليك بس صدق استغربت لانك م تشبهين ولا دكتور تعاملت معه
رنا : ما خذتها كذا لان لو شو ما تسوين مابتقدرين تعيبين علي المهم امشي لين اخر الشاطئ وردي السياره
سلامه مستغربه : ها ؟
رنا : يلا يلا امشي انا فالسياره
سلامه : ليش انزين؟
رنا : جايبتك تتمشين ؟ مع راسك المربع هذا؟ امشي يلا هذا من ضمن العلاج
سلامه : انزين - تمشي -
————-
كل ما اقول اني فهمتها اتفاجئ اني مافهمت ولا شيء وانه لغز كل مره اقرب منه يتحور ويتحول اصعب هالانسانه واضح انها بتجنني وبتعب منها وحتى لو بغيت اتخلص منها فالطريقه ما بتكون سهله ابدا
مشيت ومشيت وكنت مابا ارد كنت اتمنى المشي هذا ياخذني لمكان بعيد عن كل حد شيخه واهلي وماضي والمخدرات واولهم رنا هذي اللي مادري شيخه الله يسامحها من وين طلعتها ؟ كنت ابا اكمل ولا التفت ورا وادخل ع عالم جديد ابدأ فيه حياتي نظيفه من دون ولا شيء من الماضي
بس !
ساقتني رجولي للسياره ولقيتني اركب مره ثانيه بعد ما خلصت المشي اللي طلبته مني والتفتت وانا اقولها : خلصت ممكن توديني للبيت الحين
رنا : ممكن اكيد
سلامه تتنفس بصعوبه : ليش تسوين اللي تسوينه!
رنا : شو بالضبط
سلامه : هالوقت كله والمشي والخرابيط والعشا
رنا : قلتلك العلاج رحله كامله ما يقتصر عليك تجين مكتبي ونبربر ساعتين وفحوصات وخلص
سلامه : ويعني ؟
رنا : يعني كل مره بعطيك جدول تتبعينه للاسبوع كامل وبكون جزء من وايد اشياء نفس المشي مثلا
سلامه : شو يعني بتتمين معاي ٢٤ ساعه
رنا : امم لا نقصي منهم ٨ ساعات نومك
سلامه : تستهبلين صح؟ تراك دكتورتي مب مرافق شخصي
رنا : تعبت وانا اشرحلك انه هذا ضمن العلاج ومابا شيء غير اني اخلصك من السم اللي تورطتي فيه
سلامه : اول مره اشوف علاج فيه عشا ومشي مع الدكتوره
رنا : والله عاد هذي طريقتي م تبين قوليلي عشان اكلم شيخه تشوفلك احد ثاني
سلامه : اسألك انتي شو!!! كل ما قلت كلمه قلتيلي هذا الدرب ؟؟ انتي اللي تبين الفكه من هالكلام مب انا وبعدين انا صدق معاي حق وين في دكتوره تسوي لللي تسوينه
رنا : لو ركزتي شوي بتعرفين ان ١٦٠ ما جات من فراغ جات لاني م اسوي اللي يسويه باقي الدكاتره
سلامه : انزين يا قاهرة زمانك خليني اشوف شو بتسوين عاد
رنا : انتي كيف بتتقبلين لاني ما اشوف الا شخص ضعيف قدامي طلبت منه يمشي بس وجاني يصارخ ومعصب لو اطلب شيء ثاني كيف ؟
سلامه تتنرفز : ما لانك مستحيله تطلبيني اشياء بدون ما تشرحيلي ! والاسلوب مضروب فيه الجدار حتى ما تتكلفين ف اختيار الفاظك ! انتي كيف دكتوره صدق ؟؟؟؟؟
رنا : شو تبيني اكون ؟ البس نظارات والصق شعري بالجل وكل كلامي منمق ! وامشي بتوتي باق ؟
سلامه : ع فكره حتى امثلتك مالها رابط بالموضوع لكن تعرفين ! طول عمرك مع متعاطين كيف بيكون اسلوبك يعني
رنا تضحك : الله اكبر المتعاطين اللي انتي مب جزء منهم الحين؟ تبريتي ؟
سلامه : انتي ماتعرفين شاللي حدني على هالوضع والمخدرات ولا انا مب مثل باقي المتعاطين اللي مريت فيه ما يعلم به الا للله
رنا تتنهد : قوليلي شاللي مريتي فيه طيب بعرف !
سلامه : لا يا شيخه بعد اسلوبك الزباله هذا ! ماني قايله شيء وهذي اخر طلعه واخر جيه لك وشيخه بتبلغك تأكيدا على كلامي
رنا : يعني كلامي صحيح حالك من حالهم لان هذا كلام اي متعاطي والهروب مع اول مخرج لعبتهم
سلاامه : حركي ع بيتنا ولا اقولك! ليش اذل نفسي الله يخلي اوبر بس - تنزل -
هنا اكون صادقه معكم توقعت منها تنزل وتحرك ساكن لكن العكس تماما نزلت وهي ولا همها حركت ع طول لا وفوق هذا ودعتني وقالت : بايييييي !
وبصوت ونبره حاده قهرتني فنفسي، وطلبت اوبر وجلست انتظر كثير لحد ما انقبل طلب ولحد ماوصلني السايق اصلا وطول هذيك المده كنت اتحسب وامشي فالمكان في محاوله اني اهدي نفسي
#يتبع
