الحرب بيننا سـِجال
والحب كذلك أيضًا
ما بين الحب والجفى
الألفة والبـعـــد
تكون رنا وانـا
صباح ريحة القهوة اللي ماليه المكان والتوست المفضل عندي من ايدين اختي شيخه واللي كان بسيط تيركي ومايو مع رشة ملح وفلفل اسود ومحمص على اعلى شيء لدرجة انه تسمع الكرنشي من اخر البيت ! بالغت ؟ اعرف
لكنه لذيذ ويستاهل ..
نزلت اتهادى من الدرج مسرعه على المطبخ عشان احصل اللي كنت انتظره واشم ريحته .. فطوري المفضل وكالعاده قربت له والتهمت كل اللي ع الصحن وخذت من صحن شيخه بعد ! مستحيل اخلي صباحها يعدي بدون محارشي طبعا
شيخه : سسسسسسلامه خلاصصص عاد ترا حتى انا جوعانه
سلامه تضحك : هاردلك كلي بسرعه مره ثانيه
شيخه : ماعلينا خلي الساندويتش الحين ممكن توعديني !
سلامه تتنهد : اخخخ يا شيخه والله حتى اكل ماقدر على راحتي
شيخه تخز : بعد ماخلصتي الاكل تقولين ماقدر ع راحتي ؟
سلامه تضحك : قولي ماشاءالله ها بعدين هالعضلات تحتاج من يغذيها ترا - تفرد عضلاتها قدام شيخه -
شيخه : اقول لا تنفجرين علينا بس اوعديني وخلصي
سلامه تصب كوب قهوه ثاني : انتي تعرفيني زين مثل ما تعرفين تسوين هالقهوه بالملي مستحيل انيييي اوعد بشيء ما اقدر التزم فيه
شيخه : سلامه ما استهبل والله !
سلامه : شو شو ؟؟؟
شيخه : تردين للمركز والإجتماعات وابا اشوف العضويه بنهاية اليوم ولا صدقيني انا ببلغ عليك ف دوامك ما بنتظر ولا بحن لانك اختي
سلامه تعصب : منو قالك اني مابسير ؟ تراني احاول
شيخه : هذا اللي تقدرين عليه تعصبين وتلفينها علي صح؟ ابا مصلحتك انا قبل تتعفنين بجرعه زايده ولا ينتهي بك الموضوع فالسجن
سلامه : خلاص شيخه كافي تذكريني باللي صار ليتك تركتيني اموت والله ولا هالمذله كل مره
طلعت وقتها وانا شياطين الدنيا فوق راسي بس اللي عصبني ماكان اسلوب شيخه لا ! اعرف انها اخت كبيره وتحاتي وهذا كل ما فالموضوع لكن عصبني ان كلامها صحيح ولو ماتحركت بتعفن بسبب جرعه زايده او برتكب جريمه وانا تحت تأثير المخدرات
المخدرات ؟ اوه نسيت اخذكم فجولة تعريفيه على حياتي ..
انا سلامه عمري ٢٨ سنه ، مهندسة طيران واداوم في القاعدة العسكريه بمنطقتي .. طولي ١٧٥ مهووسة بالنادي والاثقال بالذات الباورلفتينق .. بشرتي حنطيه وشعري بوي .. كنت من اوائل دفعتي لحد ما طحت لكن خلونا نسوي سكيب لهذا البارت الحين
اما عن شيخه اللي كانت تهاوشني قبل شوي فهي اختي الكبيره وعمرها ٣٥ موظفة في قسم ادارة المشاريع .. طولها والله ما ظنتي يتعدى ١٥٧ ! بس لسانها اهخ يا لسانها ضعف طولي ٧ مرات .. لكن ما الومها صارت ام لي بعمر صغير بعد وفاة امي وبعد ابوي اللي له سنين مطلق امي قبل وفاتها حتى
