طول ما احنا فالسياره وشيخه تدعي ووتتوسل لله بإني ماروح من ايدينها وانها ماتفقدني لكن كسرتني وهي تقول : يارب خذت مني امي وابوي لا تاخذ مني اختي وحبيبتي يارب فرصه لها يارب
حسيت اني اسوء شخص ! كيف اخليها تعاني ؟ مب كافي عليها عانت كثير ففقد امي وابوي ورعايتي ؟ واعرف زين انها ضحت بأحلامها عشان تعيشني احسن عيشه فكيف اسوي شيء مثل هذا فيها
كنت فحاله ماتنوصف فالسياره ارجف؟ اعرق؟ دقات قلبي تتسارع؟ اصارخ؟ كل اللي تتوقعونه لحد ما وصلنا للمركز وهناك لقيت دكتوره رنا والطاقم ينتظرونا عند الباب وجاهزين لكل شيء
ع طول وقفت شيخه وتحرك الطاقم مع دكتوره رنا ونقلوني على الحماله وثبتوني بالسيور بسبب صراخي وحركتي المفرطه اللي كان سببها ادماني للمخدرات .. ع طول نقلوني للغرفه وهناك شفت دكتوره رنا تحضر الابره اللي تنقذني اللي فيها المخرج من هالعذاب كله .. وحقنتها بالوريد
ماعرف كيف اشرحلكم الشعور ! كان اشبه بعطشان يرتوي بعد مده ؟ امم شعور النوم بعد اسبوع سهر؟ شعور اول كوب لبن بعد الصيام ؟ كل هالمشاعر ضاعفوها سبعين مره بتوصلون لشعوري
كل اللي اذكره اني وقتها دخلت ف سبات عميق نمت نومه ماحسيت بنفسي فيها ولا اعرف كم نمت حتى ولا كيف ؟ بعد الحقنه ع طول غبت عن الوعي وادراك كل ما حولي
لحد ما قمت
——————
( غرفة العلاج / بوجود شيخه ورنا )
سلامه تصحصح : ....
رنا : الحمدالله ع السلامه
شيخه : ....
سلامه : الله يسلمك انا وين؟
رنا : عندنا فالمركز وانتي بخير لاتحاتين
شيخه تقربلها : ارتحتي ؟ يوم حقنوك بالسم هذا؟ ولا قبل صراخ وانهيارات مالها اول ولا تالي صح!!! ارتحتي الحين؟؟؟ بتموتين بسبب هالسم ونهايتك على ايده سلامه وقولي انا ماقلت
رنا : شيخه شيخه ! مب وقته هالكلام - تسحبها برا الغرفه -
————
- برا الغرفه -
رنا : شو هالكلام شيخه؟ توها طالعه من نوبة تتعاملين بهالطريقه؟
شيخه : نوبه تجي وراها نوبه ثانيه شو الفايده تصبر تصبر واخر شيء نعطيها شو الفايده فهميني
رنا : مب قلتيلي يا رنا اعاني مع اختي والدكاتره خلصوا ولا احد نفع معها ؟ خلاص انتي قررتي تثقين فيني لو سمحتي لا تخربين الشيء
شيخه : كيف تبيني اسكت رنا! اختي تموت من هالسم الله يلعنه ويعدمه وانا اتم ساكته ؟ ولا ارضى واشوفها وابتسم وهي تتعاطى قدامي
رنا : فيه فرق كبير يا شيخه بين انها تتعاطى وبين انها ف مرحلة التشافي وهي الحين شوي شوي تقلل الكميه اللي تدخل لجسمها بس الفكره انه ما نبا عقلها يحس بهالشيء لان وقتها مافي فايده بترد تتعاطى
شيخه : رنا انا ما افهم فكل هذا اخترتك لانك صاحبتي واختي واثق فيك ف لو سمحتي انا خليني بعيد
رنا : ماينفع شيخه انتي جزء كبير من هالعلاج وصدقيني من كلامها لي سمعته ف انتي السبب اصلا ف انها دخلت علي المكتب ولا ماكان جات لو سحبتي ايدك من ايدها حالتها بتسوء
شيخه تتنهد : تعبت رنا تعبت اطلعها من جرعات زايده تعبت اسعفها تعبت من الخوف والقلق انا طول وقتي بس خايفه هي لا يستوي عليها شيء ما انام الليل كل ساعه ولا ساعه ونص انا اشيك
رنا تحضنها : ياقلبي انتي وانا عارفه لاتنسي اني عايشت اللي عايشتيه ومازلت مع مية مريض غير سلامه بس لو استسلمنا بيروحون فيها والله
شيخه : ان شاءالله رنا ان شاءالله
رنا : الحين اباك تردين البيت ماباها تشوفك لان اكيد بتفهم اني كلمتك وهديتك كملي ع اساس انك معصبه وزعلانه منها حتى لما ترد البيت وانا بهتم بالباقي وانا بوصلها بنفسي لاتحاتين
شيخه : انا مابا اتعبك رنا كفايه انك منتقله للمركز عشان سلامه بس مب مشكله بنتظرها
رنا : لا هذا جزء من العلاج واسمعي مني بتسلمين وتسلم اختك
شيخه : اللي تشوفينه لو احتجتي شيء كلميني
رنا : ولا يهمك
